¿La kʼax unimaxik ri anan xuqujeʼ ri atat?... Kʼo jujun mul che kʼax kinimaxik, ¿la qastzij? ¿La awetaʼm jas kakutoʼ che kinimaxik? Chawilampeʼ ri xubʼan ri Jesús. ¿La awetaʼm che areʼ qas xunimaj ri Jehová xuqujeʼ ri unan utat?... Chqetaʼmaj jubʼiqʼ chrij ri Jesús.

Chiʼ majaʼ kpe pa ri uwach Ulew, ri Jesús kʼo pa ri kaj rukʼ ri Utat, Jehová. Are taq xpe pa ri uwach Ulew, ri Jesús xuqujeʼ xkʼojiʼ unan xuqujeʼ utat. Ri utat José ubʼiʼ ri unan María ubʼiʼ. ¿La kawaj kawetaʼmaj jas xkʼulmatajik rech xeʼux unan utat?...

Rech xkʼojiʼ ri Jesús pa ri uwach Ulew, ri Jehová xubʼan jun milagro. Xuqʼaxej ri ukʼaslemal ri Jesús, che kʼo pa ri kaj, pa upam ri María. Bʼelejebʼ ikʼ xkʼiy pa ri upam ri unan, junam rukʼ ri kkibʼan ri nikʼaj chik neʼabʼ, tekʼuriʼ xkʼojiʼik. Je waʼ xkʼulmatajik rech ri María xkʼojiʼ ral. Ri María rukʼ ri rachajil, José, xkikʼiysaj ri Jesús.

Are chiʼ kʼateʼ 12 ujunabʼ, ri Jesús xubʼan jun jastaq che kukʼutu che qastzij kuloqʼoqʼej ri Utat che kʼo pa ri kaj, Jehová. Wajun bʼantajik riʼ xkʼulmatajik chiʼ ri Jesús rukʼ ri ufamilia xebʼe pa Jerusalén. Xekiya uqʼij ri Jehová. Are taq chiʼ xetzalij loq, ri José xuqujeʼ María xkilo che petinaq ta ri Jesús kukʼ. ¡Kkiriq taj! ¿Jas kabʼij at che xubʼan ri José xuqujeʼ María?...

Aninaq xetzalij pa Jerusalén che utzukuxik ri Jesús. Oxibʼ qʼij xkitzukuj. ¡Sibʼalaj xebʼisonik! Kʼa matam xkiriqo. ¿La kachʼobʼo jachiʼ kʼo wi ri Jesús?... Pa rachoch ri Dios. ¿Jasche kʼo chilaʼ? Rumal che chilaʼ kretaʼmaj kʼi jastaq chrij ri Jehová. Ri Jesús qas kuloqʼoqʼej ri Utat xuqujeʼ kraj kubʼan ri jastaq che kukikotemaj. Are taq chiʼ xkʼiy ri Jesús, xuya ta kan unimaxik ri Jehová. Areʼ amaqʼel xnimanik, pa neʼ kʼax xuriq che ubʼanik rumal che kʼi winaq xkibʼan kʼax che. ¿Jas kabʼij at, la xniman ri Jesús che ri José xuqujeʼ che ri María?... Ri Utzij ri Dios kubʼij che xnimanik.

¿La xawilo che ri Jesús qas xnimanik?... Rukʼ waʼ xukʼut jun bʼantajik nim ubʼanik chqawach: pa neʼ kʼax ubʼanik, qas utz che kqanimaj ri qatat xuqujeʼ ri qanan. ¿La kanimaj at ri atat xuqujeʼ ri anan?...