¿La kawaj wet ktzalij ri tiempo chrij? Chachomajampeʼ che ktzalijik, kojopan pa ri tinamit Jericó, pa Canaán. Chilaʼ ri winaq kkiqʼijilaj ta ri Jehová. Are kʼu kʼo jun ixoq che junam ta kukʼ. Rahab ubʼiʼ.

Chiʼ nitzʼ na, Rahab xuta kʼi jastaq che xubʼan ri Jehová. Xuta chiʼ Jehová xutoʼ ri tinamit Israel pa kiqʼabʼ ri kikʼulel. Jun kʼutbʼal, Jehová xukoj ri Moisés che kesaxik ri israelitas pa Egipto. Xuqujeʼ, ¡xeʼuqʼaxej ri tinamit pa ri nimalaj jaʼ ubʼiʼ mar Rojo pa chaqiʼj ulew! Rahab xuqujeʼ xuta chrij jun jastaq: ¡ri israelitas e kʼo chi chrij ri tinamit Jericó, jachiʼ kʼo wi areʼ!

Pa jun chaqʼabʼ, xeʼopan kebʼ israelitas che rilik chelaqʼal ri tinamit Jericó. Xeʼopan pa rachoch ri Rahab, areʼ xeʼukʼulaj pa rachoch. Pa ri chaqʼabʼ riʼ, ri ajawinel rech Jericó xuta che xeʼopan kebʼ achijabʼ che rilik ri tinamit xuqujeʼ e kʼo pa rachoch Rahab. Rumal laʼ xeʼutaq bʼi achijabʼ che kitzukuxik. ¿Jas xubʼan Rahab? Xeʼukʼuʼ ri israelitas pa rachoch xuqujeʼ xubʼij waʼ chke ri achijabʼ che e taqom rumal ri ajawinel: «Ri achijabʼ che xepe che rilik ri tinamit xetzalijik. We keʼiterneʼj bʼik, weneʼ keʼiriqaʼ pa ri bʼe». ¡Rukʼ waʼ ri Rahab xeʼutoʼ ri israelitas! ¿La kawaj kawetaʼmaj jasche xeʼutoʼ?... Rumal che kkojon chrij ri Jehová. Retaʼm che ri Jehová keʼutoʼ ri israelitas che uchʼakik ri tinamit Jericó xuqujeʼ ri ulew rech Canaán.

Chiʼ majaʼ keʼel bʼi pa rachoch Rahab, ri israelitas che xeʼopan che rilik ri tinamit xkibʼij che: are taq ri Dios kusach uwach Jericó, Rahab xuqujeʼ ri ufamilia kekam taj. Are kʼu kʼo rajawaxik kubʼan ri Rahab rech kkam taj. ¿Jas rajawaxik kubʼano?... Ri israelitas xkibʼij wariʼ che: «Rajawaxik kakoj jun kaq kolobʼ che ri aventana xuqujeʼ keʼamulij ri afamilia pa awachoch». Rahab xubʼan ri xkibʼij ri achijabʼ che. ¿La kawaj kinbʼij chawe jas chi xkʼulmatajik?...

Chiʼ qʼaxinaq chi kebʼ oxibʼ qʼij, ri israelitas xkisutij rij ri Jericó. Pa waqibʼ qʼij xesutin chrij ri tinamit, jumul pa jun qʼij, man xkiraq ta kichiʼ. Are kʼu pa ri wuqubʼ qʼij chiʼ sutitaj wuqubʼ mul kumal, konojel rukʼ chuqʼabʼ xkiraq kichiʼ. Are kʼu xaq kʼateʼ, xkʼulmataj jun jastaq che ilom taj: ¡Jehová xubʼano che xetzaq ri nimaʼq taq tapya che e kʼo chrij ri Jericó! ¿Jas kʼu xkʼulmataj rukʼ ri rachoch Rahab? Rumal  che ukojom jun kaq kolobʼ che ri uventana, xtzaq ta ri rachoch. ¿La kawil ri kolobʼ pa ri wachbʼal?... ¡Rukʼ wariʼ xkam ta Rahab xuqujeʼ ri ufamilia!

¿La xawilo che xkʼasiʼ kan Rahab rumal che xunimaj ri Jehová?... Rahab retaʼm che ri Dios kutoʼ, rumal laʼ xukubʼsaj ukʼuʼx chrij. Chiʼ xbʼix che ronojel ri ubʼanom ri Dios, areʼ xukubʼsaj ukʼuʼx chrij. At tajin kawetaʼmaj kʼi jastaq chrij ri Jehová. ¿La kanimaj ri Jehová junam rukʼ Rahab?... ¡Qastzij riʼ che kanimaj!