1, 2. a) ¿Jas kbʼanowik che jun sipanik nim ubʼanik chawach? b) ¿Jasche are ri tojbʼal mak ri sipanik más nim uyaʼom ri Dios?

¿JAS sipanik sibʼalaj utz yaʼom chawe? ¿Jas kbʼanowik che jun sipanik sibʼalaj nim ubʼanik chawach? Rajawaxik taj che sibʼalaj nim rajil. Sibʼalaj kamaltyoxij riʼ we ri sipanik kuya kikotemal chawe o qas kajwataj chawe.

² Chke konojel ri e sipanik che uyaʼom ri Dios chqe, kʼo jun che más kajwatajik. Are ri sipanik más nim uyaʼom ri Dios. Xuya chqe are chiʼ xutaq lo ri uKʼojol che utojik ri qamak. Rumal wajun tojbʼal mak riʼ kojkunik kkʼojiʼ qakʼaslemal che kʼo ta ukʼisik (chasikʼij uwach Mateo 20:28). Are chiʼ xutaq lo ri Jesús pa ri uwach Ulew, Jehová xukʼutu che qastzij kojuloqʼoqʼej. Pa wajun kʼutunem riʼ kqetaʼmaj na kʼi jastaq chrij wajun sipanik riʼ.

3. ¿Jasche kojkamik?

³ Ri tojbʼal mak are ri xukoj ri Dios che kesaxik ri e winaq pa ri makaj xuqujeʼ pa ri kamikal (Efesios 1:7). Rech kqachʼobʼ ri rumal che kajwataj ri tojbʼal mak, rajawaxik kqetaʼmaj ri xkʼulmataj ojer pa ri kotzʼiʼjalaj Edén rukʼ ri Adán xuqujeʼ Eva, ri e nabʼe qatat qanan. E areʼ xemakunik, rumal laʼ xekamik. Ri oj xqechbʼej kan ri makaj che xkibʼan ri Adán xuqujeʼ Eva. Rumal laʼ, qonojel kojkamik. (Chawilaʼ ri nota 9, «Makaj»).

4. ¿Jachin riʼ ri Adán, xuqujeʼ jas xuya ri Dios che are chiʼ xubʼano?

⁴ Adán are ri nabʼe achi ri xbʼan rumal ri Dios. Are chiʼ  xbʼanik, Dios xuya jun jastaq che nim ubʼanik che: jun tzʼaqatalaj kʼaslemal. Xyaʼ jun tzʼaqatalaj chomanik xuqujeʼ kʼaslemal che ri Adán. Wariʼ kraj kubʼij che kyawaj taj, krijobʼ taj xuqujeʼ kkam taj. Jetaneʼ che ri Jehová are utat, rumal che are ri Jehová xbʼanowik (Lucas 3:38). Dios amaqʼel xchʼaw rukʼ xuqujeʼ xuqʼalajisaj chuwach ri rajawaxik kubʼano. Xuqujeʼ, xuya jun utzalaj uchak (Génesis 1:28-30; 2:16, 17).

5. ¿Jas kraj kubʼij che Adán xbʼan junam rukʼ «ri ukaʼyebʼal ri Dios»?

⁵ Adán xbʼan junam rukʼ «ri ukaʼyebʼal ri Dios» (Génesis 1:27). Wariʼ kraj kubʼij che Jehová xubʼan ri Adán junam rukʼ ri e ubʼantajik areʼ, junam rukʼ ri loqʼoqʼenik, ri nojibʼal, ri sukʼilal xuqujeʼ ri chuqʼabʼ. Xuqujeʼ, Adán are ta jun robot. Ri Dios xubʼano che kkun che uchaʼik ri kraj kubʼano. Kkunik kuchaʼ we kubʼan ri utz o ri utz taj. Wet xniman che ri Jehová, xkun ta riʼ xkʼojiʼ ukʼaslemal che kʼo ta ukʼisik pa ri jeʼlikalaj kʼolbʼal che xyaʼ che.

6. a) ¿Jas xukʼulmaj ri Adán are chiʼ xniman ta che ri Dios? b) ¿Jas kqariqo rumal che xniman ta ri Adán?

⁶ Adán nim xutoj wi rumal che xniman ta che ri Dios. Xkamik xuqujeʼ xutzaq ri utzalaj rachilanik rukʼ ri Jehová. Xutzaq ri tzʼaqatalaj ukʼaslemal xuqujeʼ xesax lo pa ri jeʼlikalaj kʼolbʼal che xyaʼ che (Génesis 3:17-19). Rumal che xniman taj qonojel kqariq kʼax. Rumal ri xubʼano, «xok ri makaj cho ri uwach ulew xukʼam kʼu uloq ri kamikal, xqʼax kʼu ri kamikal chke konojel, konojel kʼut e makuninaq» (Romanos 5:12). Rumal che xmakunik, oj xojux ajmakibʼ xuqujeʼ kojkamik. Ri Biblia kubʼij che xojukʼayij pa ri makaj (Romanos 7:14). Adán xuqujeʼ Eva kʼo ta chi keyebʼal, rumal che xkichaʼ ta unimaxik ri Dios. Are kʼu ¿la kʼo qeyebʼal oj? Kʼolik. Jehová xuya ri tojbʼal mak.

7, 8. ¿Jas riʼ jun tojbʼal mak?

 ⁷ ¿Jas riʼ jun tojbʼal mak? Are ri pwaq kyaʼik rech ktzoqopix jun winaq o rech ktzalix jun jastaq. Are chiʼ ri Biblia kchʼaw chrij jun tojbʼal tajin kchʼaw chrij ri pwaq che kyaʼ che usukʼumaxik jun kʼax. Xuqujeʼ rajawaxik che ri kyaʼ che ukʼaxel junam rajil rukʼ ri kʼax che xbʼanik.

⁸ Kʼo ta jun winaq ajmak kkunik kutoj ri kʼax che xubʼan Adán rumal che chiʼ xmakunik xojukʼayij pa ri kamikal. Are kʼu ri Jehová xuya ri tojbʼal mak rech kojresaj pa ri makaj xuqujeʼ pa ri kamikal. Chqilaʼ ri ubʼanik wajun tojbʼal mak riʼ xuqujeʼ ri utzilal kuya chqe.

9. ¿Jas tojbʼal mak kajwatajik?

⁹ Ri tojbʼal mak che kyaʼik rajawaxik che xaq junam rukʼ ri kʼaslemal xutzaq ri Adán. Rumal laʼ, «xujach ribʼ ri Jesucristo pa uqʼabʼ ri kamikal che utojik ri rajil ri kolobʼal ibʼ chke konojel» (1 Timoteo 2:6). Are kʼu, junam che xqabʼij nabʼe kʼo ta jun chqe kkunik kutoj ri mak. ¿Jasche? Rumal che qonojel oj ajmakibʼ (Salmo 49:7, 8).

10. ¿Jas xubʼan ri Jehová che uyaʼik ri tojbʼal mak?

¹⁰ ¿Jas xubʼan Jehová che uyaʼik ri tojbʼal mak? Xutaq lo ri Jesús cho ri uwach Ulew, ri loqʼalaj uKʼojol (1 Juan 4:9, 10). Jesús qas xraj xuya kan ri uTat xuqujeʼ ri ukʼaslemal pa ri kaj (Filipenses 2:7). Jehová xuqʼaxej lo ri ukʼaslemal ri Jesús chupam ri María. Rumal laʼ, are chiʼ xalax ri Jesús cho ri uwach Ulew tzʼaqat ukʼaslemal xuqujeʼ kʼo ta umak (Lucas 1:35).

11. ¿Jasche xa jun winaq kkunik keresaj konojel ri e winaq pa ri makaj?

¹¹ Junam rukʼ ri qilom chik, ri nabʼe winaq xniman ta che ri Jehová rumal laʼ qonojel tzʼaqat ta ri qakʼaslemal. ¿La kkun xa jun winaq keresaj konojel ri e winaq  pa ri makaj? Kkunik. (Chasikʼij uwach Romanos 5:19). ¿Jas kubʼan che ubʼanik? Jesús kʼo ta jumul xmakunik, rumal laʼ xkunik xuya ri tzʼaqatalaj ukʼaslemal che qesaxik pa ri kamikal qonojel ri oj ralkʼwal ri Adán (1 Corintios 15:21, 22, 45).

12. ¿Jasche sibʼalaj xuriq kʼax ri Jesús?

¹² Ri Biblia kuya ubʼixik ronojel ri kʼax che xuriq ri Jesús chiʼ majaʼ kkamik. Xchʼayik, xtzeybʼax cho jun cheʼ xuqujeʼ xuriq jun kʼaxalaj kamikal (Juan 19:1, 16-18, 30). ¿Jasche sibʼalaj xuriq kʼax ri Jesús? Rumal che ri Satanás ubʼim che kʼo ta jun winaq sukʼ chuwach ri Dios we kuqʼaxej kʼi kʼax. Are kʼu ri Jesús che tzʼaqat ukʼaslemal xkunik xux sukʼ chuwach ri Dios kʼa pa ri kamikal. ¡Sibʼalaj xkikot riʼ ri Jehová rukʼ ri uKʼojol! (Proverbios 27:11). (Chawilaʼ ri nota 15, «Ri cruz»).

13. ¿Jas xbʼan che utojik ri makaj?

¹³ ¿Jas xbʼan che utojik ri makaj? Pa ri qʼij 14 re ri ikʼ judío rech nisán pa ri junabʼ 33, Jehová xuya bʼe chke ri ukʼulel ri Jesús che xkikamisaj (Hebreos 10:10). Qʼaxinaq chi oxibʼ qʼij, Jehová xutzalij chi jumul ri ukʼaslemal ri Jesús. Xukʼasuj junam rukʼ jun uxlabʼal, junam ta rukʼ jun winaq. Ri jun chi jastaq xbʼanik rech ktojtaj ri makaj, are che ri Jesús xtzalij bʼi pa ri kaj che ujachik che ri uTat ri tzʼaqatalaj ukʼaslemal che xuya che tojbʼal mak (Hebreos 9:24). Rumal che xyaʼ ri tojbʼal, kojkunik kojel pa ri makaj xuqujeʼ pa ri kamikal (chasikʼij uwach Romanos 3:23, 24).

14, 15. ¿Jas rajawaxik kqabʼano rech ri Jehová kukuy ri qamak?

¹⁴ Ri tojbʼal mak kuya kʼi utzilal chqe. Chqilaʼ ri kubʼan  wajun jeʼlalaj usipanik ri Dios che uyaʼik utzilal chqe kimik xuqujeʼ ri kubʼan na pa ri petinaq.

¹⁵ Kkuy ri qamak. Amaqʼel kʼax ubʼanik ri sukʼilal. Qonojel kojmakunik, xuqujeʼ jujun taq mul kqabʼano o kqabʼij jastaq che utz taj. ¿Jas kqabʼano rech kkuy ri qamak? Rajawaxik che rukʼ ronojel qanimaʼ kqaya kan ri mak xuqujeʼ rukʼ machʼachʼem kqata che ri Jehová che kukuy ri qamak. We jeʼ kqabʼano, qastzij riʼ che areʼ kukuy ri qamak (Colosenses 1:13, 14; 1 Juan 1:8, 9).

16. ¿Jas rajawaxik kqabʼano rech kkʼojiʼ jun utzalaj retaʼmabʼal qakʼuʼx?

¹⁶ Kuya kkʼojiʼ jun utzalaj retaʼmabʼal qakʼuʼx. We ri retaʼmabʼal qakʼuʼx kubʼij chqe che qabʼanom jun jastaq che utz taj, kqanaʼ kʼax pa ri qanimaʼ. Weneʼ xuqujeʼ kqanaʼo che kʼo ta qapatan xuqujeʼ che kʼo ta chi qeyebʼal. Maqayaʼ kan ukojik qachuqʼabʼ. Rajawaxik kqataʼ sachbʼal qamak che ri Jehová. We kqabʼano, qastzij riʼ che kojutatabʼej xuqujeʼ kusach ri qamak (Hebreos 9:13, 14). Jehová kraj kqabʼij che ronojel ri kʼax kqariqo xuqujeʼ ri jastaq che kʼax kqabʼan che ubʼanik (Hebreos 4:14-16). Rukʼ wariʼ kuya kkʼojiʼ jun utz retaʼmabʼal qakʼuʼx chuwach ri Dios.

17. ¿Jas e tewchibʼal kojkunik kqariq rumal ri ukamikal ri Jesús?

¹⁷ Kojkunik kqariq jun qakʼaslemal che kʼo ta ukʼisik. «Ri tojbʼal ri kuya ri makaj, are ri kamikal; are kʼu ri kochinik ri kuya ri Dios, junalik kʼaslemal pa ri uriqik qibʼ rukʼ ri Cristo Jesús, ri qAjaw» (Romanos 6:23). Rumal ri ukamikal ri Jesús, kojkunik kqariq jun kʼaslemal che kʼo ta ukʼisik xuqujeʼ kqariq nim utzilal (Apocalipsis 21:3, 4). ¿Jas rajawaxik kqabʼano rech kqariq ri e tewchibʼal riʼ?

18. ¿Jasche qas qetaʼm che ri Jehová sibʼalaj kojuloqʼoqʼej?

¹⁸ Chatchoman chrij ri kikotemal kuya are chiʼ jun winaq kuya jun utz sipanik chqe. Ri tojbʼal mak are ri sipanik che más nim ubʼanik, xuqujeʼ rajawaxik che kqamaltyoxij che ri Jehová. Juan 3:16 kubʼij che «ri Dios sibʼalaj keʼuloqʼoqʼej ri winaq cho ri uwach Ulew, xuya kʼut ri ukʼojol, ri xa jun kʼolik». Qastzij, Jehová sibʼalaj kojuloqʼoqʼej rumal laʼ xuya ri loqʼalaj ukʼojol, Jesús. Xuqujeʼ qetaʼm che ri Jesús sibʼalaj kojuloqʼoqʼej, rumal che qas xraj xkam rumal qech (Juan 15:13). Ri sipanik re ri tojbʼal mak kukʼut chqawach che ri Jehová xuqujeʼ ri Jesús qastzij kojkiloqʼoqʼej pa qajujunal (Gálatas 2:20).

19. ¿Jas katkunik kabʼano rech katux rachiʼl ri Jehová?

¹⁹ Rumal che awetaʼm chik che sibʼalaj kojuloqʼoqʼej ri Jehová, ¿jas katkunik kabʼano rech katux rachiʼl? Chawetaʼmaj uwach ri Jehová. Kojkun taj kqaloqʼoqʼej jun winaq che qetaʼm ta uwach. Rumal laʼ Juan 17:3 kubʼij chqe che kqetaʼmaj uwach ri Jehová. We jeʼ kabʼan at, knimar más ri aloqʼoqʼenik chrij, kawaj riʼ kabʼan ri kubʼij xuqujeʼ katux rachiʼl. Rumal laʼ kaya ta kan retaʼmaxik chrij ri Jehová pa ri Biblia (1 Juan 5:3).

20. ¿Jas kqabʼan che ukʼutik che kojkojon chrij ri tojbʼal mak?

²⁰ Chakʼutuʼ che katkojon chrij ri tojbʼal mak. Ri Biblia kubʼij che «ri kkojon che ri Kʼojolaxel, kʼo junalik ukʼaslemal» (Juan 3:36). ¿Jas kqabʼan che ukʼutik che kʼo qakojonik? Are chiʼ kqabʼan pa qakʼaslemal ri xukʼut kan ri Jesús (Juan 13:15). Xaq xiw ta rajawaxik kqabʼij che kojkojon chrij ri Jesús. Rajawaxik che ri kqabʼan pa qakʼaslemal kukʼutu che kojkojon chrij ri tojbʼal mak. Santiago 2:26 kubʼij che «kaminaq ri kojonik ri man e rachilam ta chak».

21, 22. a) ¿Jasche rajawaxik kojopan pa ri Unaʼtabʼalil ri ukamikal ri Jesús che kbʼan ronojel junabʼ? b) ¿Jas kqil na pa ri kʼutunem 6 xuqujeʼ 7?

 ²¹ Chatopan pa ri Unaʼtabʼalil ri ukamikal ri Cristo. Pa ri chaqʼabʼ chiʼ xa jubʼiqʼ chi kraj kkamik, Jesús xubʼij che rajawaxik kqanaʼtasaj ri ukamikal. Kqabʼano are chiʼ kojopan pa ri Unaʼtabʼalil ri ukamikal ri Jesús che kbʼan ronojel taq junabʼ (1 Corintios 11:20; Mateo 26:26-28). Jesús kraj che kqanaʼtasaj che xuya ri tzʼaqatalaj ukʼaslemal che utojik ri qamak. Areʼ xubʼij: «Chitijaʼ waʼ che naʼtabʼal wech» (chasikʼij uwach Lucas 22:19). Are chiʼ kojopan pa ri riqbʼal ibʼ re ri Unaʼtabʼalil ri ukamikal ri Jesús, kqakʼutu che nim kqil wi ri tojbʼal mak xuqujeʼ kqanaʼtasaj che Jehová xuqujeʼ ri Jesús sibʼalaj kojkiloqʼoqʼej. (Chawilaʼ ri nota 16, «Unaʼtabʼalil ri ukamikal ri Jesús»).

²² Kʼo ta jun sipanik más nim chuwach ri tojbʼal mak (2 Corintios 9:14, 15). Pa ri kʼutunem 6 xuqujeʼ 7 kqil na ri kubʼan ri tojbʼal mak che uyaʼik utzilal chke ri millones winaq che e kaminaq.