Chiʼ kekʼuleʼ kebʼ winaq keʼux jun familia. Pa neʼ ri achi o ri ixoq nim keril wi ri unan utat xuqujeʼ keʼuloqʼoqʼej, are kʼu ri winaq che sibʼalaj nim ubʼanik chuwach are chi ri ukʼulaj. Weneʼ jujun chke ri kifamilia kʼax kkiriq che uchʼobʼik. Are kʼu ri pixabʼ rech ri Utzij ri Dios kkunik keʼutoʼ rech kʼo utzilal chkixoʼl kukʼ ri kifamilia xuqujeʼ rech utz kel ri kikʼulanem.

RI KUBʼIJ RI BIBLIA: «Nim chawilaʼ wi ri atat xuqujeʼ ri anan» (Efesios 6:2). Pa neʼ nim chi ri ajunabʼ o majaʼ na, rajawaxik che amaqʼel nim keʼawil wi ri e anan atat. Masach chawe che ri akʼulaj xuqujeʼ rajawaxik kutas uqʼij rech keril ri unan utat. Ri «loqʼoqʼebʼal [...] man kape ta royowal che jun chik», rumal laʼ kachomaj taj che ri akʼulaj más kuloqʼoqʼej ri ufamilia chawach at (1 Corintios 13:4; Gálatas 5:26).

RI KATKUNIK KABʼANO:

• Mayaʼ uwiʼ ri kabʼij rukʼ tzij junam rukʼ wariʼ: «Ri afamilia amaqʼel kinkiyoqʼoʼ» o «Ronojel ri kinbʼano utz ta kril ri anan»

• Chakojoʼ achuqʼabʼ che uchʼobʼik ri kunaʼ ri akʼulaj

RI KUBʼIJ RI BIBLIA: «Rumal kʼu riʼ ri achi kebʼuyaʼ kan ri utat unan rech katuniʼ rukʼ ri rixoqil, ri e kiʼebʼ kebʼux na xa jun winaq» (Génesis 2:24). Chiʼ at kʼulan chik, weneʼ ri anan atat kkinaʼo che rajawaxik keʼok na il chawe xuqujeʼ weneʼ kkaj kixkitoʼ che rilik ri jastaq pa ri iwachoch.

Ix kebʼ kixchomanik jas jastaq kiya chke ri ifamilia che kkibʼano xuqujeʼ chibʼij chke rukʼ loqʼoqʼenik. Kuya kbʼix ri qastzij rukʼ ta itzel taq tzij (Proverbios 15:1). We man kibʼan ta nim che iwibʼ, we ix utz xuqujeʼ we kʼo ipaciencia kixutoʼo rech kʼo utz iwachilanik kukʼ ri ifamilia xuqujeʼ «chikochʼolaʼ [o chiqʼiyaʼ] kʼu taq iwibʼ rukʼ loqʼoqʼebʼal kʼuxaj» (Efesios 4:2).

RI KATKUNIK KABʼANO:

• We sibʼalaj katbʼisonik rumal che ri afamilia qas kkalwachij ri kibʼano, chatchʼaw rukʼ ri akʼulaj chiʼ kʼot chʼoj chixoʼl

• Chichomaj ix kebʼ jas kibʼan che rilik ri jastaq riʼ