KʼUTUNEM 40
¿Jas kqabʼano rech oj chʼajchʼoj chuwach ri Dios?
Chatchoman chrij jun nan che sibʼalaj kloqʼoqʼenik che kusukʼumaj ri alaj ral rech kbʼe pa ri escuela. Ri areʼ kukoj uchuqʼabʼ rech kubʼan ratin ri alaj ral y kukoj utz taq ratzʼyaq. Wariʼ kubʼano che utz kkaʼy ri alaj ral y utz kechʼaw ri winaq chkij. Ri Jehová, are ri loqʼalaj qaTat che sibʼalaj kojraj, ri Areʼ kraj che oj chʼajchʼoj pa ronojel ri qakʼaslemal. Rumal che retaʼm che we oj chʼajchʼoj utz kubʼan chqe y kyoqʼ ta ri qumal.
1. ¿Jas kqabʼano rech chʼajchʼoj ri qacuerpo?
Jehová kubʼij: «Chixux tastalikalaj taq winaq» (1 Pedro 1:16). Rech oj tastalikalaj taq winaq rajawaxik oj chʼajchʼoj pa ri qacuerpo y pa ri qakʼaslemal. Kqakʼutu che oj chʼajchʼoj are chiʼ amaqʼel kojatinik, e chʼajchʼoj ri qatzʼyaq, ri qachoch, ri qacarro y ronojel kqaya pa ri ulugar. Y chiʼ kojtobʼan che ujosqʼixik ri Ja rech Ajawbʼal. Ri chʼajchʼojil kubʼano che nikʼaj chi winaq kkiya uqʼij ri Jehová (2 Corintios 6:3, 4).
2. ¿Jas taq riʼ ri rajawaxik kqaxutuj rech oj chʼajchʼoj?
Ri Biblia kubʼij chqe: «Chqesaj bʼaʼ pa ri qakʼaslemal konojel ri jastaq ri e tzʼil ri e kʼo pa ri qacuerpo xuqujeʼ pa ri qanimaʼ» (2 Corintios 7:1). Rumal laʼ, kqakoj qachuqʼabʼ che uxutuxik apachike jastaq che kubʼan kʼax che ri qacuerpo y ri qachomanik. Y kqaxutuj ri itzel taq chomanik rumal che kqaj che ri Jehová kkikot qukʼ (Salmo 104:34). Xuqujeʼ kqakoj qachuqʼabʼ rech kqabʼij ta itzel taq tzij (chasikʼij Colosenses 3:8).
¿Jas más kutzʼilobʼisaj ri qacuerpo o ri qakʼaslemal? Jujun taq jastaq kubʼan kʼax che ri qacuerpo. Rumal laʼ, kqatij ta tabaco, uxaq coca, kunabʼal che uyaʼom ta ubʼixik ri kunanel y drogas. Are chiʼ kqaxutuj wariʼ kqachajij ri qacuerpo y kqakʼutu che nim kqil wi ri qakʼaslemal. Xuqujeʼ, rech oj chʼajchʼoj pa ronojel, kqakoj qachuqʼabʼ rech kqaxutuj ri itzel taq jastaq junam rukʼ ri masturbación (uchapik ibʼ) o rilik pornografía (Salmo 119:37; Efesios 5:5). Weneʼ kʼax uyaʼik kan jun chke wariʼ, are kʼu ri Jehová kojutoʼo (chasikʼij Isaías 41:13).
CHANIMARISAJ RI AWETAʼMANIK
Chqilaʼ jas kqabʼan che uyaʼik uqʼij ri Jehová rukʼ ri chʼajchʼojil rech ri qacuerpo y ri kqabʼan che uxutuxik ri itzel taq jastaq.
3. Ri cuerpo che chʼajchʼoj kuya uqʼij ri Jehová
Are chiʼ kqasikʼij ri taqanik che xuya ri Jehová che ri ojer tinamit Israel, kqetaʼmaj che nim kril ri chʼajchʼojil. Chisikʼij Éxodo 19:10 y 30:17-19, y chixtzijon chrij wariʼ:
-
¿Jas kukʼut ri versículos riʼ chrij ri kuchomaj ri Jehová chrij ri chʼajchʼojil rech ri cuerpo?
-
¿Jas taq naqʼatisabʼal kojutoʼo rech amaqʼel oj chʼajchʼoj?
Rajawaxik kqaya ri qatiempo y ri qachuqʼabʼ rech oj chʼajchʼoj. Kojkunik kqabʼano apastaneʼ ri lugar che oj kʼo wi, we oj qʼinomabʼ o oj mebʼayibʼ. Chiwilaʼ ri VIDEO y chixtzijon chrij wariʼ:
-
We ri winaq che kqatzijoj ri utzij ri Dios chke kkilo che oj chʼajchʼoj, ¿la ktobʼan wariʼ chke rech más nim kkil ri Jehová? ¿Jasche?
4. Chakojoʼ achuqʼabʼ chuwach ri itzel taq jastaq
Ri Jehová kojutoʼ che uyaʼik kan jun itzel jastaq.
We at katij sikʼ, drogas o kunabʼal che ubʼim ta jun kunanel chawe, awetaʼm riʼ che kʼax uyaʼik kanoq. Ri kattoʼwik rech katkunik kaya kanoq are uchomaxik ri kʼax che kubʼan pa ri akʼaslemal. Chisikʼij Mateo 22:37-39, y chixtzijon chrij ri kʼax che kuya ri sikʼ, ri drogas y kunabʼal che ubʼim ta jun kunanel che...
-
... ri iwachilanik rukʼ ri Jehová.
-
... ri iwachilanik kukʼ ri ifamiliares y nikʼaj chi winaq.
Chatchoman chrij ri kabʼano rech katkunik kaya kan jun vicio. a Chiwilaʼ ri VIDEO.
Chisikʼij Filipenses 4:13 TNM y chixtzijon chrij wariʼ:
-
¿La ktobʼan ri chʼawem, usikʼixik ri Biblia y ri bʼenam pa taq ri riqbʼal ibʼ che jun winaq rech kkunik kuya kan jun itzel jastaq? ¿Jasche kachomaj wariʼ?
5. Chakojoʼ achuqʼabʼ rech kaya kan ubʼanik y uchomaxik ri itzel taq jastaq
Chisikʼij Colosenses 3:5 y chixtzijon chrij wariʼ:
-
¿Jasche qetaʼm che ri pornografía, ri sexteo y ri masturbación e tzʼil taq jastaq chuwach ri Jehová?
-
¿Jas kachomaj, la utz che ri Jehová kutaʼ chqe che oj chʼajchʼoj? ¿Jasche?
Chawilaʼ jas kqabʼano rech kqaxutuj ri itzel taq chomanik. Chiwilaʼ ri VIDEO.
Ri Jesús xukoj jun kʼutbʼal chqawach rech kqetaʼmaj ri kqabʼano we kojux chʼajchʼoj pa ri qakʼaslemal. Chisikʼij Mateo 5:29, 30 y chixtzijon chrij wariʼ:
-
Ri Jesús xubʼij taj che kqabʼan kʼax chbʼil qibʼ, xaneʼ xubʼij chqe ri rajawaxik kqabʼano rech kqaxutuj ri itzel taq chomanik. ¿Jas rajawaxik kqabʼano rech kqaxutuj ri itzel taq chomanik? b
We ya tajin kakoj chi achuqʼabʼ che uxutuxik ri itzel taq chomanik, chawetaʼmaj che ri Jehová nim kril wi ri chuqʼabʼ che tajin kakojo. Chisikʼij Salmo 103:13, 14 y chixtzijon chrij wariʼ:
-
We tajin kakoj achuqʼabʼ chuwach jun vicio, ¿la katutoʼ ri versículos riʼ rech kaya kan ubʼanik? ¿Jasche?
¡Makʼistaj akʼuʼx, katkunik kaya kanoq!
Ri kʼax ta uchomaxik are: «Xinbʼan chi jumul, kinkun ta waʼ kinya kanoq». Are kʼu, chatchoman chrij wariʼ. Jun winaq che kutij anim we xtzaqik kraj ta kubʼij che ya kkun taj kuchʼak ri tijoj anim o kumajij chi jumul. Junam rukʼ, we at xabʼan chi jun itzel jastaq kraj ta kubʼij che katkun taj kaya kanoq. We kabʼij che xabʼan chi jumul wariʼ kraj kubʼij che tajin kakoj achuqʼabʼ chuwach. Rumal laʼ, makʼistaj akʼuʼx rukʼ ri utobʼanik ri Jehová katkunik kaya kan apachike vicio.
RI KKICHOMAJ JUJUN WINAQ: «Are jun vicio, kinkun taj kinya kanoq».
-
¿Jas texto katkunik kakojo rech kakʼut chuwach ri winaq che rukʼ ri utobʼanik ri Jehová kkunik kuya kan ri vicio?
RI XQETAʼMAJ
Kqaya kikotemal che ri Jehová are chiʼ chʼajchʼoj ri qacuerpo, ri qachomanik y ri kqabʼano.
¿La knaʼtaj chawe?
-
¿Jasche rajawaxik oj chʼajchʼoj?
-
¿Jas rajawaxik kqabʼano rech chʼajchʼoj ri qacuerpo?
-
¿Jas rajawaxik kqabʼano rech chʼajchʼoj ronojel ri kqabʼan pa ri qakʼaslemal y ri qachomanik?
CHAWILAʼ CHI NIKʼAJ
Paneʼ kʼo ta kʼi jastaq qe, ¿jas rajawaxik kqabʼano rech oj chʼajchʼoj?
Chawilaʼ jujun tobʼanik che katutoʼo rech kaya kan utijik sikʼ.
«¿Jas kinbʼano rech kinya kan utijik sikʼ?» (¡Despertad!, mayo 2010)
Chawetaʼmaj ri kʼax che kuya rilik pornografía.
«¿La kuya kʼax ri pornografía?» (La Atalaya, 1 re agosto 2013)
Chawilaʼ ri xubʼan jun achi che uyaʼik kan rilik ri pornografía.
a Ri kʼutunem: «¿Jas kinbʼano rech kinya kan utijik sikʼ?», che kʼo pa ri sección «Chawilaʼ chi nikʼaj» re wajun kʼutunem riʼ, kuya jujun tobʼanik rech jun winaq kkunik kuya kan jun vicio.
b Rech katkunik kaya kan ubʼanik ri masturbación, chawilaʼ ri capítulo 25 re ri wuj Lo que los jóvenes preguntan. Respuestas prácticas (volumen 1), ubʼiʼ «¿La kinkunik kinya kan ubʼanik ri masturbación?».
Wene' xuquje' utz kawilo
PREGUNTAS CHE AMAQʼEL KBʼANIK
¿Jas ubʼanik ri etaʼmanik re ri Biblia che kkiya ri testigos rech Jehová?
Katkunik kakoj apachike Biblia pa ri etaʼmanik che kkiya ri testigos rech Jehová che tojom taj. Y katkunik kabʼij chke konojel ri afamilia y ri e awachiʼl o nikʼaj chik.
