Loqʼalaj taq qachalal:

Rumal ri loqʼoqʼebʼal che kqanaʼ che ri Dios y chke ri winaq kqanimaj wajun taqanik riʼ: «Rumal kʼu riʼ, jix, chibʼanaʼ tijoxelabʼ chke ri winaq pa konojel ri tinimit cho ri uwach Ulew. Chibʼanaʼ kibʼautismo» (Mat. 28:19, 20; Mar. 12:28-31). Ri qastzij loqʼoqʼebʼal kuya nim tobʼanik chqe. Kkunik kopan qas pa kanimaʼ ri e winaq che kʼo jun utz kibʼantajik rech kkiriq ri kʼaslemal che kʼo ta ukʼisik (Hech. 13:48).

Ojer kanoq are kqakoj qachuqʼabʼ che ukʼolik pa qajolom ri textos che kqabʼij chke ri e winaq o rech kojkunik kqaya kan jun wuj. Are kʼu kimik kqaj che más kojtzijon kukʼ ri winaq. Kqakʼut ri qaloqʼoqʼebʼal chke ri winaq are chiʼ kojtzijon kukʼ chrij jastaq che kkaj kketaʼmaj. Ri e winaq e junam taj, rumal laʼ rajawaxik che junam ta ri kqabʼij chke y are chqilaʼ jas ri kkaj kketaʼmaj o jas ri kkibʼisoj. ¡Wajun wuj riʼ kojutoʼ rech kojkunik kqabʼan wariʼ!

Chupam ri wuj kʼo 12 kʼutunem che kchʼaw chrij 12 bʼantajik che rajawaxik chqe rech kqakʼut loqʼoqʼebʼal y rech keqatijoj ri winaq. Chkijujunal ri e kʼutunem are ktzijon chrij jun bʼantajik che xukʼut kan ri Jesús are chiʼ xutzijoj ri utzij ri Dios o jun chi cristiano che xkʼasiʼ pa ri nabʼe 100 junabʼ. Ri kqaj are ta chi kqakʼol jun presentación pa qajolom, xaneʼ kqaj che ri winaq krilo che kel qakʼuʼx che. Qastzij wi che ronojel ri e bʼantajik che kʼo pa ri wuj riʼ rajawaxik chqe are chiʼ kqatzijoj ri utzij ri Dios. Are kʼu kqil na che e jujun bʼantajik más kojutoʼ are chiʼ kqamaj tzijonem kukʼ ri winaq, kqachʼabʼej chi jumul ri winaq o are chiʼ tajin kqaya jun etaʼmanik.

Are chiʼ tajin kanikʼoj ri kʼutunem, chatchoman chrij ri kabʼan che ukojik are chiʼ katzijoj ri utzij ri Dios chke ri e winaq che e kʼo chanaqaj. Ri más nim ubʼanik are ri loqʼoqʼebʼal che kqanaʼ che ri Jehová y chke ri e winaq are ta ri nikʼaj chi jastaq. Rumal laʼ chanimarisaj ri aloqʼoqʼebʼal. Wariʼ katutoʼ rech katkun che ubʼanik ri kawaj: ubʼanik tijoxelabʼ.

Sibʼalaj nim kqil wi che pa junamam tajin kqapatanij ri Dios iwukʼ (Sof. 3:9). ¡Are ta bʼaʼ ri Jehová kixtewchin rumal ri chak che tajin kibʼano che kitzijoj ri utzij y che kibʼan tijoxelabʼ!