KRAJ na kʼi junabʼ che ri israelitas keʼok pa Canaán, Jehová xubʼij che ri Abrahán che kuya ri ulew riʼ chike ri ralkʼwal. Tekʼuriʼ, rukʼ ri utaqanik ri Josué, ri israelitas kkechbʼej ri ulew che tzujum chike.

Ri Dios xrilo che ri winaq rech Canaán rajawaxik ksachisax kiwach, rumal che sibʼalaj e ajbʼanol chʼoj xuqujeʼ e itzel. Rumal laʼ, xubʼij chike ri israelitas che kkisachisaj uwach konojel ri e tinamit rech Canaán.

Chiʼ majaʼ kkimaj ri chʼoj, ri Josué xutaq bʼi kebʼ achijabʼ rech kkilaʼ ri tinamit. Ri achijabʼ riʼ xeʼok pa ri tinamit rech Jericó xuqujeʼ xeʼopan pa rachoch jun ixoq ubʼiʼ Rahab. Pa neʼ ri ixoq retaʼm che e aj Israel, xraj che xkikʼu kibʼ pa rachoch. ¿Jasche? Rumal che utom ri kʼi taq milagros ubʼanom ri Jehová chiʼ xeresaj lo ri utinamit xuqujeʼ kkojon chi chirij. Ri Rahab xubʼij chike ri kebʼ achijabʼ che xkilaʼ ri tinamit che kkitoʼ rech kkam taj xuqujeʼ ri ufamilia chiʼ ksachisax uwach ri Jericó.

Xqʼax ri qʼij, ri israelitas xeʼok pa Canaán xuqujeʼ xkisach uwach ri Jericó. Ri Jehová xubʼano che xetzaq lo ri tapya, rukʼ waʼ ri israelitas xkichʼak ri tinamit, are kʼu ri Rahab xuqujeʼ ri ufamilia xekam taj. Are waʼ xmajin ri chʼoj che xkibʼan pa waqibʼ junabʼ, ri Josué xuqujeʼ ri ajchʼojabʼ xekunik xkikʼam nimaʼq taq ulew rech ri ulew che xtzujux chike. Kʼisbʼal re, xkijach ri ulew che xkichʼako chkiwach ri tribus rech Israel.

Xopan jun qʼij, chiʼ naqaj chik kʼo wi ri ukamikal, Josué xeʼumulij ri winaq re ri tinamit, xunaʼtisaj chike ri ubʼanom ri Dios chike ri kitat kinan xuqujeʼ xubʼij che rajawaxik kkibʼan sukʼ chuwach ri Jehová. Tekʼuriʼ, chiʼ kaminaq chi ri Josué xuqujeʼ ri e rachiʼl, ri israelitas xkiya kan ri Jehová are xkimaj kiqʼijilaxik dioses che e qastzij taj. Pa 300 junabʼ, kʼi mul xkinimaj ta ri utaqonik ri Jehová. Rumal ri kkibʼano, ri Jehová xeʼuya pa kiqʼabʼ ri filisteos xuqujeʼ pa kiqʼabʼ nikʼaj chik kikʼulel. Tekʼuriʼ chiʼ kkitaʼ che ri Jehová che keʼutoʼ areʼ kuya jun toʼl ke. Konojel, ri tobʼanelabʼ riʼ e kabʼlajuj, xbʼix qʼatal taq tzij chike.

Ri wuj rech ri Utzij ri Dios che kutzijoj waʼ taq bʼantajik riʼ kumajij ubʼixik chirij ri ajqʼatal tzij Otniel xuqujeʼ kukʼis ubʼixik rukʼ ri achi che más nim uchuqʼabʼ che kʼolinaq: ri ajqʼatal tzij Sansón. Ri bʼantajik che kubʼij ri wuj rech Jueces kuya jun kʼutbʼal che nim ubʼanik: we kqanimaj ri Jehová, kqariq utzilal pa qakʼaslemal; we kqanimaj taj, kqariq kʼaxkʼolil.

(Esam chupam Josué, Jueces xuqujeʼ Levítico 18:24, 25.)