CHIʼ kaminaq chi ri Sansón, xkʼojiʼ jun ajqʼatal tzij xuqujeʼ ajqʼaxal tzij pa Israel ubʼiʼ Samuel. Ri israelitas, kkaj kkibʼan junam kukʼ ri nikʼaj chi tinamit, rumal laʼ xkibʼij che kkaj jun ajawinel. Ri xkibʼano xuyoqʼ ri Jehová, ri areʼ xuya ri kkaj xuqujeʼ xutaq ri Samuel che xubʼan ajawinel che ri Saúl. Are jun achi che kubʼan ta nim che ribʼ, tekʼuriʼ chiʼ xeqʼax ri qʼij Saúl xubʼan nim che ribʼ xuqujeʼ xunimaj ta chi ri Dios. Rumal laʼ ri Jehová xuxutuj xuqujeʼ xubʼij che ri Samuel che kukoj jun ala ubʼiʼ David che ukʼaxel. Xqʼax kʼu na kʼi junabʼ rech xubʼan ajawinel.

Kʼo jun qʼij, ri David xbʼe che kilik ri e rachalal, che e kʼo chkixoʼl ri e rajchʼojabʼ ri Saúl che e kʼo pa chʼoj. Chiʼ xopanik xrilo che ri achijabʼ riʼ tajin kebʼirbʼat rumal che kkixibʼij kibʼ. ¿Jas xbʼantajik? Jun nimalaj achi filisteo che ajchʼoj ubʼiʼ Goliat tajin keʼuyoqʼ ri aj Israel xuqujeʼ ri Dios. Ri David xpe royowal rumal laʼ xubʼij che kchʼojin rukʼ pa neʼ koʼl na, xuya ribʼ pa kamikal. Xaq xiw kʼo jun ikaqʼ (u honda) rukʼ xuqujeʼ kebʼ oxibʼ abʼaj, ri David xbʼe pa chʼoj rukʼ ri nimalaj achi che xa jubʼiqʼ chi kraj kopan pa oxibʼ metros ri raqan. Ri Goliat xa xtzeʼn chirij, ri David xubʼij che are kchʼakanik, rumal che kchʼojin pa ri ubʼiʼ ri Jehová. Xaq xiw jun abʼaj xukoj che ukamisaxik. Xuqujeʼ xutoqij ri uchʼichʼ xresaj kʼu ri ujolom. Chiʼ ri nikʼaj chik ajchʼojabʼ filisteos xkilo che xkam ri Goliat, xkixibʼij kibʼ xeʼanimaj bʼik.

Ri Saúl nim xril wi ri David rumal che xuxibʼij ta ribʼ rumal laʼ xukoj che ajkʼamal bʼe pa kiwiʼ ri ajchʼojabʼ. Rumal che ri ala kʼi chʼoj xuchʼako ri ajawinel xtitat xunaʼ che are kraj kukamisaj. Rech xkam taj, ri David xanimaj bʼik. Pa neʼ kʼi junabʼ xukʼu ribʼ, qas sukʼ chuwach ri Saúl. ¿Jasche? Rumal che retaʼm che are ri Jehová xbʼanow ajawinel che. Chiʼ xqʼax ri qʼij, ri Saúl xkam pa jun chʼoj. Rukʼ waʼ, ri David are chi ri ajawinel, xbʼantaj ri xubʼij ri Jehová.

Ri David kraj kuyak jun ja che ri Jehová. Ri Dios xubʼij che, che are ta areʼ kbʼanowik, are jun chike ri ralkʼwal. Are ri ukʼojol ubʼiʼ Salomón. Tekʼuriʼ, ri Jehová xuya jun jastaq che nim ubʼanik che: xubʼan jun pacto rukʼ, che are ri David ri nabʼe ajawinel pa ri ufamilia. Xuqujeʼ, pa wajun familia riʼ kpe wi ri Kolonel che tzujum kanoq, ri Ijaʼlil che xyaʼ ubʼixik pa Edén. Wariʼ are ri Mesías, kraj kubʼij, ri Chaʼom, ri xuchaʼ ri Jehová rech kubʼan Ajawinel re ri Rajawbʼal, jun qʼatal tzij che ksach ta uwach.

Ri David xumaltyoxij, rumal laʼ xumulij kʼi jastaq rech uyakik ri ja xuqujeʼ jeʼlalaj jastaq rech kkoj che ubʼanik wajun ja riʼ. Xuqujeʼ, rumal ri uxlabʼixel xubʼan kʼi salmos, o bʼixonem che ri Jehová. Chiʼ xopan ri kʼisbʼal taq qʼij re ri ukʼaslemal, ri David xubʼan nim che ri Dios rumal ri xubʼano rumal laʼ xubʼij: «Ri Ruxlabʼal ri Dios kachʼaw wumal in; ri utzij kʼo puwiʼ ri waqʼ» (2 Samuel 23:2).

(Esam chupam 1 Samuel, 2 Samuel, 1 Crónicas, Isaías 9:7, Mateo 21:9, Lucas 1:32 xuqujeʼ Juan 7:42.)