CHIʼ qʼaxinaq chi weneʼ 350 junabʼ che xubʼan ri Nimalaj Jabʼ, xalax ri Abrahán pa ri Ur, jun qʼinomalaj tinamit che kʼo pa ri kʼolbʼal che kimik kʼo wi ri Irak. Are jun achi che kʼo ukojonik, tekʼuriʼ ri ukojonik chirij ri Jehová kqʼax pa kʼax. Chqilaʼ jasche.

Jehová xubʼij che, che kuya kan ri tinamit ri xalax wi rech kbʼe pa jun chik tinamit: Canaán. Ri Abrahán xuchomaj ta na, areʼ xnimanik. Xubʼan bʼi ri nimalaj bʼe rachil ri rixoqil, Sara, ri Lot xuqujeʼ konojel ri e kʼo pa rachoch. Chiʼ kʼo chi Canaán, xa ta pa jun kʼolbʼal xkʼojiʼ wi, ri rachoch xa che atzʼyaq bʼanom wi. Ri Jehová xubʼan jun pacto rukʼ ri Abrahán: xubʼij che, che kuya tewchibʼal chike konojel ri e winaq rumal ri areʼ, xubʼij che ri e ralkʼwal kebʼux na jun nimalaj tinamit xuqujeʼ kkechbʼej na ri ulew rech Canaán.

Ri Abrahán xuqujeʼ ri Lot xkʼojiʼ kʼi kichij xuqujeʼ kiwakax. Abrahán sibʼalaj utz rumal laʼ xuyaʼo che ri Lot xuchaʼ ri ulew más jeʼlik chike ri e uchikop. Ri Lot xuchaʼ ri ulew che kʼo chuxukut ri nimalaj jaʼ ubʼiʼ Jordán, che kkʼiy más jastaq chuwach, rumal laʼ xkʼojiʼ rachoch chuxukut Sodoma. Ri winaq rech Sodoma sibʼalaj e itzel kkiyoqʼ ri Jehová rukʼ ri e tzʼil mak kkibʼano.

Chiʼ kijachom chi kibʼ ri Abrahán rukʼ ri Lot, ri Jehová xubʼij che, che ri e ralkʼwal kebʼux na junam rukʼ ri chʼumil che e kʼo pa ri kaj. Abrahán xukoj ri xubʼij ri Jehová, are kʼu ri rixoqil ubʼiʼ Sara kkʼojiʼ ta ral. Chiʼ ri Abrahán kʼo chi 99 ujunabʼ ri Sara xa jubʼiqʼ chi kraj che ktzʼaqat 90, ri Dios xubʼij che, che kkʼojiʼ jun kalkʼwal. Je waʼ xbʼantajik: ri Sara xkʼojiʼ jun alaj uneʼ xukoj Isaac che ubʼiʼ. Pa neʼ ri Abrahán xekʼojiʼ chi nikʼaj ralkʼwal, ri Kolonel che xtzujux pa ri Edén xpe pa ri ufamilia ri Isaac.

Are kʼu, ri Lot xuqujeʼ ri ufamilia xekʼojiʼ pa Sodoma. Ri areʼ xubʼan ta re ri itzelal che kkibʼan ri winaq chilaʼ, rumal che areʼ sibʼalaj utz. Rumal laʼ, chiʼ xopan ri qʼij che ri Jehová xuchomaj che kusachisaj uwach ri Sodoma, nabʼe xutaq bʼi ángeles rech xkibʼij che ri Lot. Che kanimaj bʼi pa ri tinamit rukʼ ri ufamilia xuqujeʼ nijun kkay kan chirij. Tekʼuriʼ, ri Dios xubʼano che xqaj lo qʼaqʼ pa ri kaj xuqujeʼ azufre, che xusachisaj kiwach ri itzel winaq rech Sodoma xuqujeʼ rech ri tinamit che kʼo naqaj che ubʼiʼ Gomorra. Ri Lot xuqujeʼ ri e umiʼal xekam taj. Tekʼuriʼ ri rixoqil xkay kan chirij, weneʼ rumal che kubʼisoj ri jastaq che xuya kanoq. Rumal che xniman taj xkamik.

(Esam chupam Génesis 11:10–19:38.)