RI WUJ re ri Utzij ri Dios che más nim are jun jupuq tyoxalaj taq bʼixonem che xmol weneʼ pa 1.000 junabʼ. Ri xebʼanowik xkikʼut ri kikojonik rukʼ jeʼlalaj taq tzij che kʼot kajunamataj wi. Xuqujeʼ chiʼ xkibʼano xkikʼut ri kkinaʼo jujun chike are, kikotemal xuqujeʼ qʼoxomal, maltyoxinik xuqujeʼ uyaʼik kan jun mak, qʼijilanik xuqujeʼ bʼis. Ri xebʼanowik are achijabʼ che kkiloqʼoqʼej ri Dios xuqujeʼ kʼo jun utz kachilanik rukʼ. Chqilaʼ jujun chike ri kʼutunem che kʼo pa ri Salmos.

Ri Jehová, ri nim Ubʼanik puwiʼ ri kajulew, taqal che kqaqʼijilaj. Ri Loqʼalaj Pixabʼ kubʼij wariʼ chirij: «Ri abʼiʼ are Jehová xiw at qas at nim puwiʼ ri uwach Ulew» (Salmo 83:18, TNM). Kʼi chike ri bʼixonem kkiya uqʼij ri Jehová rumal che xubʼan ri kaj, ri chʼumil, ri kʼaslemal puwiʼ ri uwach Ulew xuqujeʼ ri utzalaj qabʼaqil (Salmos 8, 19, 139 y 148). Kʼi chike kkiya uqʼij rumal che xeʼutoʼo xuqujeʼ xeʼukol ri e sukʼ rajpatanel (Salmos 18, 97 y 138). Nikʼaj chik xebʼixon che ri Dios rumal che sukʼ, keʼutoʼ ri kʼot kimak xuqujeʼ kukʼajisaj kiwach ri e itzel (Salmos 11, 68 y 146).

Ri Jehová keʼutoʼ xuqujeʼ kukubʼsaj kikʼuʼx ri kkiloqʼoqʼej. Kbʼixik che ri salmo che más kchʼobʼ uwach are ri 23, pa wajun salmo riʼ ri David xujunamaj ri Qatat kʼo pa kaj rukʼ jun utzalaj ajyuqʼ che kukʼut kibʼe xuqujeʼ keʼuchajij ri uchij. Pa ri Salmo 65:2 knaʼtisax chaqe che ri Jehová kutatabʼej «ri chʼawem». Xuqujeʼ ri kibʼanom nimaʼq taq mak pa ri kikʼaslemal ri Salmo 39 xuqujeʼ 51 kukubʼsaj kikʼuʼx. Chupam ri salmos riʼ, ri David xukʼutu che qas kʼax xunaʼ rumal ri nimaʼq umak xuqujeʼ xukʼutu che retaʼm che ri Dios kusach umak. Xuqujeʼ ri Salmo 55:22 kojutoʼ rech kqakubʼsaj qakʼuʼx chirij ri Jehová xuqujeʼ kqaya che kojutoʼ chuwach ri kʼax.

Ri Jehová kukoj na ri Rajawbʼal ri Jesús che ubʼanik kʼakʼ che ri uwach Ulew. Pa ri Salmos kyaʼ kʼi ubʼixik chirij ri Mesías, ri Ajawinel che tzujum kanoq. Jun kʼutbʼal re, ri Salmo 2 kukʼutu che wajun Ajawinel riʼ kusachisaj kiwach konojel ri e tinamit che kewalij chirij. Ri Salmo 72 kukʼutu che kresaj na ri wiʼjal, ri itzelal xuqujeʼ ronojel ri kubʼan kʼax. Ri Salmo 46:9, kubʼij che ri Dios rumal ri Rajawbʼal ri Jesús kusachisaj na uwach ri chʼoj xuqujeʼ konojel ri e kamisabʼal. Xuqujeʼ, pa ri Salmo 37 kqilo che pa ri kʼakʼ uwach Ulew e kʼo ta chi itzel winaq xuqujeʼ ri e sukʼ kkiriq na kʼaslemal che kʼot ukʼisik rukʼ jororibʼal xuqujeʼ rukʼ utzilal.

(Esam chupam ri wuj Salmos.)