Pa ri edición 1 re junio 1912 Ri Watch Tower (La Torre del Vigía) xubʼij wariʼ: «Weneʼ e kʼi chke ri kesikʼin uwach ri qawuj ketaʼm kiwach e kʼi winaq e moyabʼ». Xuqujeʼ xubʼij che kʼo kʼi wuj bʼanom rech ksipax chke ri moyabʼ. Y xutzʼaqatisaj ubʼixik: «Waʼ taq wuj chke ri moyabʼ kbʼan imprimir rukʼ taq letras pa ri chʼabʼal braille rech kekunik kkisikʼij uwach. Sibʼalaj e kʼi moyabʼ kemaltyoxinik rumal che kʼo jun qʼij knoj na ri uwach Ulew che jeʼlikalaj taq jastaq».

 Are chiʼ xtzʼibʼax waʼ taq tzij, ri testigos rech Jehová tajin kqabʼan chi wuj che kʼo información re ri Biblia chupam pa braille, paneʼ kʼa majaʼ kbʼan jun jupuq tzij (sistema) pa braille pa ri chʼabʼal inglés. Kimik qatanabʼam ta kan ubʼanik wuj chke ri moyabʼ. ¡Y tajin kqesaj lo ri wuj pa más che 50 chʼabʼal! ¿Jas kbʼan che ubʼanik?

 Ri nabʼe kbʼanik, are che keqʼaxex ri e tzij re jun chʼabʼal pa braille. Ri qachalal Michael Millen, che kchakun pa ri Servicios de Procesamiento de Texto, pa Patterson (Nueva York), kubʼij: «Nabʼe kanoq xqakoj programas informáticos re nikʼaj chi empresas rech keqaqʼaxej ri e tzij pa braille, are kʼu kekun taj kekiqʼaxej ri e tzij pa ronojel taq ri chʼabʼal. Kimik tajin kqakoj chi ri programa Watchtower Translation System, che kojutoʼo rech keqaqʼaxej taq ri e tzij re braille pa kʼi chʼabʼal re ronojel ri uwach Ulew. Kʼo ta jun chi programa junam rukʼ wariʼ».

 Pa taq ri e wuj pa braille xaq xiw ta tzʼibʼam ri tzij re taq ri párrafos xaneʼ xuqujeʼ tzʼibʼam ri kukʼut ri e wachbʼal. Jun kʼutbʼal, ri wachbʼal re ri uwach ri wuj ¡Jun kʼaslemal che kʼo ta ukʼisik! kubʼij wariʼ pa ri chʼabʼal braille: «Jun achi bʼenaq pa jun bʼe che kqʼax chuxoʼl taq kotzʼiʼj y jeʼlikalaj taq kʼachelaj». Ri qachalal Jamshed, jun siervo ministerial y precursor che moy, kubʼij: «Ri e tzij tzʼibʼam che ubʼixik ri kukʼut ri e wachbʼal, sibʼalaj nim ubʼanik chnuwach».

 Are chiʼ qʼaxem chi ri e wuj pa braille, ketaq bʼi pa taq ri sucursales rech kebʼan imprimir. Rech utz kelik, kkoj jun wuj che aninaq ta kubʼan kʼax y kxilin taj are chiʼ kbʼan taq ri puntos re ri tzij chuwach o are chiʼ kʼi mul kojom chik. Tekʼuriʼ, kkoj rij ri e wuj: nabʼe utz kbʼan che uchololexik ri e uxaq ri wuj, kʼateʼ riʼ kxim chuxukut rech kuchap ribʼ ronojel. We bʼantajinaq chi wariʼ, ktaq bʼi rukʼ ri nikʼaj chi wuj che ktaq bʼi pa ri congregaciones, o ktaq bʼi pa ri servicio de correo postal, we kkoj wariʼ pa ri tinamit. Y, we ri qachalal e moyabʼ o ubʼanom kʼax ri kibʼaqʼwach aninaq kajwataj ri e wuj chke pa taq ri e riqbʼal ibʼ, ri sucursales aninaq kkitaq bʼi chke.

 Rajawaxik nim tiempo y pwaq che ubʼanik ronojel waʼ ri chak. Kqabʼij wariʼ rumal che, pa ri kʼolbʼal ri kbʼan wi imprimir wuj re Wallkill (Nueva York), xa 2 Biblias pa braille kukʼam bʼi junam tiempo che ubʼanik imprimir 50,000 Biblias pa nikʼaj chi chʼabʼal. Jun chi jastaq, xa jun Biblia pa braille grado 2 pa inglés kʼo 25 volúmenes chupam. a Ri jastaq che kkoj che jun Biblia pa braille paqal 123 mul ri rajil chuwach xaq jun Biblia pa apachike chʼabʼal. Xaq xiw ri rij jun Biblia pa braille che kʼo 25 volúmenes chupam, 150 dólares rajil.

 ¿Jas kkinaʼ ri e qachalal che ketobʼan che ubʼanik waʼ taq wuj riʼ? Ri qachalal Nadia, re ri sucursal re Sudáfrica, kubʼij: «Kʼax kkiriq ri e qachalal e moyabʼ o ri qas ta kekunik kkilo. Rumal laʼ, chwe in are jun nimalaj eqelen kitoʼik. Qas wetaʼm che ri Jehová sibʼalaj keraj».

 ¿E kʼu we jun winaq moy kkun taj kusikʼij uwach wuj pa braille? ¿Jas kkunik kubʼano? Kebʼ oxibʼ junabʼ kanoq kʼateʼ xbʼan jun folleto ubʼiʼ Chawetaʼmaj usikʼixik uwach wuj pa braille, bʼanom wajun wuj rech kekun e kebʼ winaq kkisikʼij uwach, jun moy y jun winaq che moy taj. Wajun folleto are jun chke ri chakubʼal che kʼo chupam jun alaj caja xuqujeʼ kʼo jun regleta en positivo y jun punzón braille. Ri winaq che tajin kretaʼmaj ktzʼibʼanik y kusikʼij uwach wuj pa braille, kkunik kukoj waʼ taq chakubʼal rech aninaq kretaʼmaj. Waʼ taq ejercicios kutoʼo rech kukʼol pa ujolom ri e tzij pa braille y kkunik kusikʼij rukʼ ri uwiʼ uqʼabʼ.

 ¿Jas tobʼanik kuya ri e wuj pa braille chke ri e qachalal e moy o uriqom kʼax ri kibʼaqʼwach? Chqilampeʼ ri xukʼulmaj ri qachalal Ernst, aj Haití. Ri areʼ amaqʼel kbʼe pa taq ri e riqbʼal ibʼ, are kʼu kʼo ta wuj pa braille che kukojo. Rumal laʼ xaq xiw kukʼol pa ujolom ri comentario che kraj kubʼij pa ri riqbʼal ibʼ. Are kʼu ri areʼ kimik, kubʼij: «Junam ta chi rukʼ nabʼe, kimik are chiʼ kwaj kinbʼan comentar, kinkun chik kinyak ri nuqʼabʼ. Kinnaʼo che in jun chkixoʼl ri e qachalal re ri congregación. Qonojel junam ri jastaq kyaʼ chqe pa ri qakojonik».

 Ri qachalal Jan kʼamal bʼe re jun congregación pa Austria, are kʼu uriqom kʼax ri ubʼaqʼwach. Paneʼ jeriʼ ri areʼ kkunik kuya ri etaʼmanik pa ri riqbʼal ibʼ rukʼ ri wuj Ri Chajinel y ri Etaʼmabʼal chrij ri Biblia rech ri congregación. Ri areʼ kubʼij: «Ri e qawuj pa braille are ri e wuj che kʼax ta kichʼobʼik nukojom. Jun kʼutbʼal, kojom números che ri uxaq ri wuj, kʼax ta kiriqik ri notas y ri e tzij rech ri kukʼut ri e wachbʼal kojkitoʼoʼ rech kqachʼobʼ más chrij ri e kʼutunem».

 Pa Corea del Sur, kʼo jun precursora Seon-ok ubʼiʼ che moy y kuta taj. Nabʼe kanoq pa taq ri e riqbʼal ibʼ rajawaxik kʼo ktoʼwik rech kuchʼobʼ ri tajin kbʼixik. Are kʼu kimik kkun chik kusikʼij ri e wuj rech ri Biblia pa braille. Ri areʼ kubʼij: «Sibʼalaj kʼax usikʼixik uwach nikʼaj chi wuj pa braille rumal che tzʼaqat ta ri puntos bʼanom che, e jechʼ taq ri líneas y sibʼalaj xax ri e uxaq ri wuj. Are kʼu kʼax ta kisikʼixik ri e wuj kech ri testigos rech Jehová, rumal che más utz ri wuj che kojom che y ri puntos kʼax ta uriqik. Nabʼe kanoq kʼax kinriqo we kʼo ta jun kintoʼwik rech kinnikʼoj uwach ri Biblia. Are kʼu kimik nutukel kinbʼan chik. Sibʼalaj utz kwilo kintijoj wibʼ rech kinkʼojiʼ pa taq ri e riqbʼal ibʼ y kinkoj ronojel nuchuqʼabʼ rech kinbʼan nucomentarios. Kinsikʼij kiwach konojel ri wuj pa braille che kyaʼ chwe. Qastzij che, «¡jas ta nubʼanom riʼ wet mat kʼo waʼ taq wuj riʼ!».

 Ri e wuj pa braille junam rukʼ nikʼaj chi wuj kʼo waʼ ri jupaj tzij chupam: «Wajun wuj riʼ ktobʼan che jun loqʼalaj tijonik re ri Biblia che tajin kyaʼ cho ronojel uwach Ulew, kbʼan rukʼ ri e kuchuj che kkiya ri e winaq rukʼ rutzil kanimaʼ. Utz taj kkʼayixik». Rumal ri ikuchuj che kiya pa donate.pr418.com, ri e wuj che kajwataj pa ri kikojonik konojel ri e qachalal xuqujeʼ ri e wuj chke ri winaq che e moy o uriqom kʼax ri kibʼaqʼwach, kʼax ta kiriqik. ¡Sibʼalaj kqamaltyoxij che sibʼalaj kixsipanik!