Ri e bʼix are jun jeʼlikalaj usipanik ri Jehová. Kojutoʼo rech kkʼojiʼ utz taq chomanik pa qajolom, kojkikotik y kqaj kqabʼan jun jastaq. Qastzij che, are wariʼ kqakʼulmaj are chiʼ kqata ri e qabʼix, junam rukʼ ri e bʼix re JW Broadcasting^®. Xuqujeʼ, waʼ taq bʼix kojuqebʼsaj rukʼ ri Jehová.

 Umajim lo pa ri junabʼ 2014, bʼanom chi más che 70 e bʼix, y jun chke elesam lo pa más che 500 chʼabʼal. Weneʼ at kachomaj: «¿Jas kbʼan che kibʼanik waʼ taq e bʼix? ¿Y jachin kebʼanowik?».

 Rukʼ ri utobʼanik ri Comité de Enseñanza re ri Jupuq Ajkʼamal bʼe cho ronojel uwach Ulew, ri Equipo de Música de Servicios de Audio y Video kkibʼan ri e bʼix, junam rukʼ ri e bʼix re JW Broadcasting y e nikʼaj chik. E 13 qachalal achijabʼ ixoqibʼ e kʼo pa ri Equipo de Música che kkibʼan organizar ri chak, kkitaq bʼi kukʼ taq ri compositores, kukʼ ri e qachalal che kechakun chrij ri ingeniería re sonido y nikʼaj chi chak che kajwatajik. Xuqujeʼ, ri Comité de Enseñanza uyaʼom bʼe chke ri e qachalal re ronojel uwach Ulew che ketobʼan lo pa ri kachoch che ubʼanik waʼ taq chak riʼ. Chkixoʼl waʼ taq qachalal e kʼo ri compositores, ri kkiqʼojomaj instrumentos y ri kebʼixonik. Waʼ taq qachalal kʼo kʼi jastaq kenaʼw che ubʼanik, are kʼu kkimachʼ kibʼ y kkaj taj che kyaʼ kiqʼij kumal ri e nikʼaj chik.

 ¿Jas kbʼan che kibʼanik ri e bʼix? Nabʼe, ri Comité de Enseñanza kkilo jas kʼutbʼal re ri Biblia kesax wi ri kbʼe pa ri bʼix y jas kunaʼ ri winaq ri kqʼalajin pa ri bʼix. Tekʼuriʼ, ri Equipo de Música kbʼinik jachin kelesan ri melodía y jachin ktzʼibʼan ri letra kbʼe chupam. Kbʼan jun nabʼe grabación, y chrij wariʼ ri Comité de Enseñanza kuya jujun taq pixabʼ ri rajawaxik ksukʼumaxik. Are chiʼ bʼanom chi wariʼ, ri Equipo de música kubʼan ubʼanik ri xbʼixik y kbʼan ri kʼisbʼal grabación. Ri e bʼix kebʼan grabar pa jalajoj taq lugar, jun kʼutbʼal, pa taq ri sucursales o pa taq ri kachoch ri e qachalal.

 Rech kebʼan ri e bʼix, ri e qachalal kkikoj jalajoj taq jastaq, jujun chke are taq ri estaciones re chak pa audio digital, programas rech ktzʼibʼax ri bʼix y bibliotecas re audio. Xuqujeʼ rajawaxik kekoj instrumentos, ri kayujaʼx wi taq ri grabaciones, amplificadores, bocinas y micrófonos. Chkijujunal ri micrófonos weneʼ 100 o más che 1,000 dólares rajil. Pa ri junabʼ 2020 xsach o xchup 116,000 dólares pa equipo re grabación.

 ¿Jas kbʼanik rech nim ta pwaq ksachik? Rech e kʼi ta qachalal kechakun pa Betel rukʼ ri Equipo de Música, ktaʼ tobʼanik chke e kʼi qachalal che kechakun lo pa ri kachoch. Xuqujeʼ, rech kemulix ta e kʼi qachalal che kiqʼojomaxik taq ri instrumentos xaq xiw kkoj programas pa computadoras rech kbʼan ri melodías.

 ¡Ri e qachalal sibʼalaj utz kkita ri e bʼix! Jun kʼutbʼal re, ri qachalal Tara, aj Alemania, kubʼij: «Are chiʼ ksach nukʼuʼx che uchomaxik ri kkʼulmataj na, kinta ri e bʼixonem y kkikubʼsaj nukʼuʼx. Are chiʼ kinta pa ri nuchʼabʼal, kinnaʼo che jetaneʼ kinumatzej ri Jehová». Ri qachalal Dimitri, che kel pa Kazajistán, kubʼij chqe: «Kinxiʼj ta wibʼ are chiʼ kinmaj utaʼik ri e bʼix, rumal che wetaʼm che ri letras kʼo chupam pa ri Biblia esam wi. Y xaq xiw ta wariʼ, ri taq bʼix kinkitoʼ rech are kinchoman chrij ri jastaq re ri Dios».

 Ri qachalal Delia, aj Sudáfrica, kubʼij chqe jas ri kunaʼo are chiʼ kuta ri e bʼix: «Ri e bʼix kkikol qakʼaslemal. Are chiʼ kinbʼisonik o kʼo kʼax tajin kinriqo, kʼo wi jun bʼix kinriqo che kinutoʼ pa ri tajin kinkʼulmaj. Jujun taq mul, paneʼ xaq xiw kinta ri melodía re ri bʼix, sibʼalaj kinutoʼ».

 E kʼi qachalal kkibʼij che waʼ taq e bʼix sibʼalaj utz kkilo. Ri qachalal Lerato, aj Sudáfrica xuqujeʼ, kubʼij chqe: «Ri e bʼix Xa jubʼiqʼ chi kraj y Ri qas kʼaslemal kinkitoʼ rech kinchoman chrij are chiʼ kkʼastaj lo ri nunan. Are chiʼ kenta waʼ taq bʼix, kinchomaj chrij che jetaneʼ petinaq kutij anim kraj kinumatzej».

 Kʼo jun bʼix che xuya nim tobʼanik che jun ali aj Sri Lanka. Ri areʼ kubʼij chqe: «Ri nuprofesora re Ciencias kʼo kʼi itzel taq tzij xubʼij chwe chkiwach ri e wachiʼl rumal che in testigo rech Jehová. Xinriq taj jas xinbʼij che rumal che sibʼalaj xinxiʼj wibʼ. Are chiʼ xinopan cho ja, ri nunan xubʼij chwe che kinta ri bʼix Fuerte tú serás. Wajun bʼix xinutoʼ rech xinchʼobʼo che rajawaxik kintzukuj información y kinchʼaw rukʼ ri nuprofesora. Chukabʼ qʼij, xintzijon rukʼ. Ri areʼ xinutatabʼej y xubʼij chwe che rukʼ ri xinbʼij che kuchʼobʼ chik jasche kinbʼan ta jujun taq jastaq. Sibʼalaj kinmaltyoxin che ri utinamit ri Jehová rumal che ubʼanom e bʼix che kkiya qachuqʼabʼ».

 ¿Jawiʼ kkʼam wi ri pwaq kkoj che kibʼanik waʼ taq bʼix? Are ri kuchuj iyaʼom ix pa ri obra mundial che jalajoj kbʼan che uyaʼik pa donate.pr418.com. Sibʼalaj maltyox chiwe rumal che sibʼalaj kixsipanik.