Pa ri junabʼ 2020, xekʼulmataj kʼi kʼax pa ri uwach Ulew y xumaj ri COVID-19. ¿Jas xkibʼan ri testigos rech Jehová che kitoʼik ri kiriqom kʼax?

 Pa ri chak xkibʼan ri Testigos pa ri junabʼ 2020, a ri Comité de coordinadores re ri Jupuq Ajkʼamal bʼe cho ronojel uwach Ulew xubʼij che kkoj 28 millones dólares b pa ri chak re tobʼanik. Rukʼ ri pwaq ri’ xyaʼ tobʼanik chke ri kiriqom kʼax pa más che 200 kʼax kʼulmatajinaq, jun kʼutbʼal re are ri nimalaj yabʼil re ri COVID-19, ri kaqiqʼ taq jabʼ, ri nimaʼq taq ul pa África, ri wiʼjal pa Venezuela y ri kaqalaj saqʼij pa Zimbabue. Ri pwaq re taq ri kuchuj xkoj che uloqʼik jastaq ktijowik, joron, utzukuxik ja ri kekʼojiʼ wi ri qachalal che xsach uwach ri kachoch, atzʼyaq y kunabʼal. Xuqujeʼ xkoj che uloqʼik jastaq re chʼajchʼojil, jastaq che kkoj che kisukʼumaxik taq ri ja xuriq kʼax. Chqilaʼ jujun kʼutbʼal re ri tobʼanik yaʼom.

 COVID-19. Pa ronojel uwach Ulew, wajun nimalaj yabʼil ubʼanom kʼax chke ri qachalal e yawajinaq, kebʼisonik y kʼo ta chi kirajil che uloqʼik ri rajawaxik chke. Rumal wariʼ xebʼan más che 800 Comités de Socorro rech kyaʼ tobʼanik jawiʼ kajwataj wi. Waʼ taq comités kkil ri kajwataj chke ri qachalal y kuya ubʼixik che ri Comité de Coordinadores rech kutaq bʼi ri tobʼanik che rajawaxik.

 Pa we junabʼ riʼ, ri Comités de Socorro xetobʼanik rech e kʼi winaq kʼo kkitijo, kʼo kijoron, kʼo ri jastaq re chʼajchʼojil kukʼ y kʼo ri kunabʼal che rajawaxik chke. Y pa jujun taq tinamit xetobʼan kukʼ ri kʼamal taq b’e rech kkikʼam ri tobʼanik che kkiya ri qʼatbʼal taq tzij rech kekitoʼ ri e kʼo pa kʼax.

 Ri tobʼanik qayaʼom xaq xiw ta chke ri qachalal xaneʼ xuqujeʼ chke ri winaq che e Testigos taj y e areʼ qas kilom wariʼ. Jun kʼutbʼal, pa Nakonde (Zambia), jun achi Field Simwinga ubʼiʼ, jefe kech ri policías, xubʼij chke ri qachalal: «Kqanaʼo che oj kʼo pa kʼasaj iwukʼ, rumal che xiya ri tobʼanik pa ri qʼij are chiʼ qas xajwataj chke ri e kʼo pa kʼax».

 Wiʼjal pa Angola. Rumal ri nimalaj yabʼil re ri COVID-19, kʼo ta chi más ktijow pa ri tinamit Angola, rumal wariʼ sibʼalaj xpaqiʼ rajil ronojel ri jastaq. Rumal wariʼ ri qachalal kʼax xkiriq chi che uloqʼik ri kkitijo.

 Rumal laʼ xtaʼ tobʼanik che ri sucursal re Brasil rech kutaq bʼi jastaq chke ri e qachalal re Angola. Rech utz kbʼan che ukojik ri pwaq re taq ri kuchuj, ri e qachalal xkilo jas ri más utz kkibʼano rech qas ta nim pwaq kkisacho are chiʼ kkiloqʼo y kkitaq bʼi ri ktijowik, y xkiloqʼ ri jastaq pa ukʼiyal. Rumal ri xkibʼano, xekunik xkikoj xa 22 dólares che uloqʼik y utaqik bʼi jun alaj kit, che weneʼ kʼo 44 libras jastaq chupam, junam rukʼ arroz, kinaqʼ y aceite. Kimik taqom chi bʼi 33,544 kits, kraj kubʼij 654 toneladas (721 toneladas americanas). Ronojel wariʼ rukʼ nikʼaj chi jastaq, xetzuq más che 50,000 winaq.

 ¿Jas kkinaʼ ri e qachalal? Alexandre, che kʼo pa jun alaj tinamit re Angola, kubʼij: «Qas kwilo che Jehová kinuloqʼoqʼej, che nutukel ta in kʼolik y che in loqʼ pa ri utinamit». Mariza, jun nan malkaʼn, kubʼij: «Ri Jehová xutatabʼej ri nuchʼawem. Sibʼalaj kinmaltyoxin che areʼ y che ri utinamit».

 Jun kaqalaj saqʼij pa Zimbabue. Pa ri chak xkibʼan ri Testigos pa ri junabʼ 2020, xubʼan jun kaqalaj saqʼij pa Zimbabue, rumal laʼ e millones winaq xa jubʼiqʼ xraj che xekamik rumal che kʼo ta chi kkitijo. E miles chke ri qachalal qas ta kʼo chi kkitijo.

 Xebʼan jobʼ Comités de Socorro rech kkʼam bʼi jastaq ktijowik chke ri qachalal. E kʼi qachalal xetobʼan che upisik bʼi taq ri jastaq ktijowik, xkaqʼanisaj bʼi pa taq ri chʼichʼ o xkiya pa qajik ri kichʼichʼ. c Pa ri chak re ri junabʼ 2020, xkoj 691,561 dólares rech xetzuq más che 22,700 winaq.

 Pa jujun taq tinamit, ri qachalal kʼo ta chi kkitijo are chiʼ xopan ri tobʼanik kukʼ. Rumal wariʼ ri qachalal xkiya maltyoxinik che ri Jehová xuqujeʼ xkimaj kibʼixoxik ri e qabʼix.

 Pa jun tinamit, e kebʼ qachalal ixoqibʼ e malkaʼn xebʼe pa jun riqbʼal ibʼ, jawiʼ kyaʼ wi ubʼixik chrij ri tobʼanik kyaʼ rumal jun organización no gubernamental (ONG), kraj kubʼij, re ta ri qʼatbʼal tzij re ri tinamit. Are chiʼ xmajtaj ubʼixik jas rajawaxik kubʼan jun winaq rech kyaʼ rech ri jastaq, xkimaj chʼawem ri winaq chrij política, rumal waʼ ri qachalal xeʼel bʼi chkixoʼl y xkaj taj xkikʼam ri tobʼanik. Are chiʼ xeʼel lo chkixoʼl konojel xetzeʼn chkij y xkibʼij chke: «Kʼateʼ bʼaʼ mixpe chi qukʼ che utaʼik iwa, ¿la xito?». Are kʼu, are chiʼ kʼateʼ kebʼ semanas qʼaxinaq, ri e qachalal xeʼopan pa ri lugar, kikʼamom bʼi jastaq kech ri e kebʼ qachalal ixoqibʼ... aninaq xopan ri tobʼanik re ri utinamit ri Jehová chuwach ri tobʼanik re ri ONG.

 Ri kitoʼik ri qachalal pa Zimbabue xuqujeʼ xtobʼanik rech ri winaq xkilo jas ubʼanik ri utinamit ri Jehová. Chqilaʼ ri xukʼulmaj ri qachalal Prisca, che kʼo pa jun alaj tinamit re Zimbabue. Paneʼ umajim ri kaqalaj saqʼij, ri areʼ ronojel taq miércoles y viernes kbʼe che utzijoxik ri utzij ri Dios, xuqujeʼ paneʼ are taq ri qʼij che kchakux ri ulew. Ri e winaq ketzeʼn chrij xuqujeʼ kkibʼij wariʼ che: «Kakamisaj ri afamilia che numik, rumal che xaq xiw are kawilij utzijoxik utzij ri Dios». Are kʼu ri qachalal Prisca xubʼij chke: «Ri Jehová keʼuwonobʼaʼ ta kan ri e upatanelabʼ». Are chiʼ kʼateʼ jubʼiqʼ tiempo qʼaxinaq, xopan jastaq re che taqom bʼi rumal ri utinamit ri Jehová. Jujun chke ri uvecinos sibʼalaj xkimayo y xkibʼij wariʼ che: «Ri Dios at uyaʼom ta kanoq. Kqaj kqetaʼmaj más chrij ri aDios». Kimik, e siete chke ri uvecinos tajin kkitatabʼej chi ri e riqbʼal ibʼ re ri congregación pa radio.

 Rumal che xa más tajin kojnaqajin che ri kʼisbʼal, kʼo más kʼax kqariq na (Mateo 24:3, 7). Sibʼalaj kqamaltyoxij chiwe che sibʼalaj kixsipanik rumal ri ikuchuj che jalajoj ibʼanom che uyaʼik pa donate.pr418.com. Nim ktobʼan wi rech keqatoʼ ri e qachalal che tajin kkiriq jalajoj taq uwach kʼax.