Sibʼalaj e kʼi winaq e kʼo pa Latinoamérica, y chkixoʼl ri winaq riʼ e kʼo millones indígenas che kʼo wi ri kichʼabʼal y ri kinaqʼatisabʼal. E kʼi chke ri e qachalal keʼel pa taq ri tinamit indígena. Rech ketoʼ ri winaq indígenas che retaʼmaxik chrij ri Biblia, ri testigos rech Jehová kkiqʼaxej wuj pa más che 130 chʼabʼal rech Latinoamérica. a E kʼi qachalal paneʼ nim kkil ri kicultura, are kʼu kbʼan kʼax chke rumal che kkipatanij ri Jehová y rumal che kkibʼan ta ri jastaq che kubʼij ri Biblia che utz taj kbʼanik. ¿Jas qabʼanom che kitoʼik rukʼ ri kuchuj?

 Ri qachalal che keʼel Huichol pa taq ri juyubʼ re Jalisco (México), xkixutuj ubʼanik jujun jastaq rumal che ri Biblia kubʼij che utz taj kbʼanik. b Wariʼ xubʼano che e jujun winaq re ri tinamit sibʼalaj xpe koyowal, pa ri 4 re diciembre re 2017, jun jupuq winaq sibʼalaj e qʼaqʼarinaq che oyowal xkaj xkibʼan kʼax chke ri testigos y e nikʼaj chi winaq che e kʼo kukʼ. Ri e winaq xekesaj bʼi ri qachalal pa ri tinamit, xkiwulij ri kachoch y xkibʼan kʼax che ri jastaq kech xuqujeʼ xkibʼij chke che we kʼo jun ktzalij bʼi pa ri tinamit kkikamisaj.

 Ri e nikʼaj chi Testigos che keʼel naqaj che ri tinamit xkiya ri kajwataj chke ri e qachalal. Are kʼu, ¿jas kbʼan che kitoʼik rech ketzalij bʼi cho kachoch? Jun qachalal Agustín ubʼiʼ, kubʼij: «Kʼo ta qarajil che utojik jun abogado xuqujeʼ qetaʼm taj jachiʼ kqata wi tobʼanik».

 Rumal che kbʼan kʼax chke ri qachalal rumal ri kikojonik, ri sucursal re Centroamérica aninaq xrilo ri kbʼan che kitoʼik. Nabʼe, xubʼij chke ri kʼamal taq bʼe re ri tinamit che kkikʼutu jas itzelal o makaj kibʼanom ri e qachalal. Tekʼuriʼ, ri Comité re Coordinadores re ri Jupuq Ajkʼamal bʼe cho ronojel ri uwach Ulew kech ri Testigos re Jehová xuya bʼe che ri sucursal rukʼ ri Departamento de Asuntos Legales re ri central mundial kkitoʼ kiwiʼ ri e qachalal huicholes. Are chiʼ xqʼax ri tiempo, xebʼe chuwach ri Suprema Corte de Justicia de la Nación, ri nimalaj qʼatbʼal tzij che kʼo más utaqanik pa México.

 Jun jupuq abogados re ronojel uwach Ulew xkiya jun chʼabʼal jawiʼ kubʼij wi che rajawaxik nim kil wi ri kicultura ri winaq indígenas. Rumal laʼ, ri winaq re ri tinamit che xekesaj bʼi ri qachalal pa ri kachoch rajawaxik nim kkil ri kkichaʼ ubʼanik ri winaq re ri kitinamit, rumal che konojel winaq kʼo kiderecho.

 Pa ri 8 re julio 2020, ri Suprema Corte de Justicia xubʼij che ri testigos rech Jehová ketzalij bʼi pa ri kitinamit jachiʼ xeʼesax wi loq. Ri qachalal Agustín che xojchʼaw chrij nabʼe, kubʼij wariʼ: «Sibʼalaj kojkikotik y kqamaltyoxij chke ri qachalal che xojkitoʼ. Rumal che jas ta qabʼanom riʼ wet mat xojkitoʼ».

 Xuqujeʼ xkiriq kʼax ri qachalal re San Juan Ilumán re Ecuador, jun tinamit jawiʼ keʼel wi winaq indígenas. Pa ri 2014 are chiʼ ri qachalal tajin kkimaj uyakik jun Ja rech Ajawbʼal rumal che yaʼom chi bʼe chke, are kʼu jun kʼamal bʼe católico rukʼ e 100 winaq xubʼij chke ri qachalal che kkiya kan uyakik ri Ja rech ajawbʼal. Xuqujeʼ xkibʼij chke ri qachalal che kkiya kan ubʼanik ri kiriqbʼal ibʼ.

 Ri departamentos re Asuntos Legales re ri sucursal re Ecuador y re ri central mundial xkitoʼ uwiʼ ri congregación riʼ. Xojbʼe chuwach ri qʼatal tzij, rukʼ waʼ ri winaq kʼo ta chi xkibʼij chke ri e qachalal. Are kʼu rech ktoʼ uwiʼ ri kiderechos ri qachalal pa ri petinaq, ri qabogados xkibʼij kan che ri qʼatal tzij che rajawaxik kkil wajun jastaq riʼ nim ubʼanik: ¿La qas rajawaxik che ri indígenas nim kkil ri kiderechos ri winaq pa ronojel ri uwach Ulew?

 Pa ri 16 de julio 2020, ri Corte Constitucional re Ecuador, ri qʼatbʼal tzij che más nim ubʼanik pa ri tinamit are xojtoʼwik. Ri e qachalal re ri congregación che xechʼaw chuwach ri qʼatbʼal tzij e abogados. Xuqujeʼ xekʼojiʼ e kajibʼ qachalal abogados che kʼo ketaʼmabʼal che rilik ri kʼax riʼ. Are kʼu rumal ri COVID-19 ri riqbʼal ibʼ xbʼan pa videoconferencia. Wariʼ are ri nabʼe mul che ri qʼatal tzij xuya bʼe chke ri testigos che kkibʼan wajun riqbʼal ibʼ pa videoconferencia. c Ri qachalal abogados xkibʼij chuwach ri qʼatal tzij che xa ta rumal che jun tinamit indígena mat kʼo kiderechos.

 Kimik ri qachalal re ri valle de Otavalo keyeʼm ri kuchaʼ ubʼanik ri Corte Constitucional y sibʼalaj kkimaltyoxij ri tobʼanik che yaʼom chke. Jun qachalal kʼamal bʼe César ubʼiʼ, re ri congregación Ilumán Quichua, kubʼij: «Xaq xiw ri Jehová rukʼ ri utobʼanik ri utinamit kʼi kubʼan che kitoʼik ri man e kʼi taj».

 Konojel ri abogados che xkiya ri kitobʼanik e testigos rech Jehová y kʼo ta pwaq xkita chke ri e qachalal. Ri qabogados y e nikʼaj chi qachalal xkikoj más che 380 horas che utijoxik kibʼ rech xechʼaw chuwach ri qʼatal tzij re México y nikʼaj chi 240 horas rech xkiqʼaxej ri wuj pa ri chʼabʼal. Jun chi jastaq, weneʼ 40 abogados pa ronojel ri uwach Ulew xkiya kʼi horas che kitoʼik ri e qachalal chuwach ri qʼatal tzij re Ecuador. ¿Jachiʼ xekʼam wi ri pwaq che xekoj che kitoʼik ri e qachalal? Rumal ri ikuchuj che iyaʼom pa donate.pr418.com. Maltyox che sibʼalaj kixsipanik.