Ri oj testigos rech Jehová qas kojok il chke ri e qachalal (1 Pedro 2:17). Kʼi chqe junam kqachomaj rukʼ ri qachalal Tannis, re Kenia. Ri areʼ kubʼij: «Sibʼalaj utz kwilo che kwetaʼmaj ri kkikʼulmaj ri wachalal che e kʼo pa ronojel uwach Ulew». ¿Jas kqabʼan ri oj Testigos rech kqetaʼmaj ri kkikʼulmaj ri e nikʼaj chik? Rumal ri sección ubʼiʼ «Prensa» che kʼo pa jw.org y che xbʼan pa ri junabʼ 2013.

 Ri noticias che kʼo chupam wajun sección riʼ qas tzʼaqat, kchʼaw chrij ri kbʼan che uyakik ja jawiʼ kyaʼ wi uqʼij ri Jehová, ri kbʼan che kitoʼik ri e qachalal are chiʼ kkiriq jun kʼax o are chiʼ kbʼan jun jastaq che nim ubʼanik, junam rukʼ are chiʼ kel lo jun kʼakʼ Biblia. Xuqujeʼ kchʼaw chrij ri kiriqom ri e qachalal che e kʼo pa cárcel rumal ri kikojonik. Y kʼo utzalaj taq experiencias che kiriqom ri e qachalal pa ri campañas re utzijoxik utzij ri Dios y ri kkʼulmataj pa ri Unaʼtabʼalil ri ukamikal ri Jesús. Are kʼu, ¿jachin kebʼanow ri noticias riʼ y jas kbʼan che ubʼanik?

 Ri Oficina de Información Pública are kbʼanow ri sección «Prensa». Are ri Comité re Coordinadores re ri Jupuq Ajkʼamal bʼe cho ronojel uwach Ulew keʼilow ri kbʼan pa wajun Departamento riʼ. Más che e 100 qachalal ixoqibʼ achijabʼ ketobʼan pa wajun Departamento riʼ, y e kʼi chke cho kachoch kechakun wi uloq. Ri e qachalal riʼ kkitzʼibʼaj ri noticias, kkinikʼoj rij, kkiqʼaxej pa jun chi chʼabʼal o kkil ri wachbʼal che kekojik. Xuqujeʼ kechʼaw kukʼ ri winaq che kechakun pa ri qʼatbʼal taq tzij, ri kechakun chrij ri uyaʼik taq noticias o kukʼ ajtijabʼ re ri universidades. Xuqujeʼ ri más che 80 secciones de Información Pública che e kʼo pa ri sucursales pa ronojel uwach Ulew ketobʼan rukʼ wajun Departamento.

 Ri Oficina de Información Pública, junam kechakun kukʼ ri e kʼo pa ri secciones de Informacion Pública rech kkibʼan jun noticia. Are chiʼ ri qachalal kkito che xkʼulmataj jun jastaq, kkitzukuj información chrij che qastzij xbʼantajik. Rech kekunik kkibʼan wariʼ, weneʼ kkibʼan entrevistar winaq, o kechʼaw rukʼ jun winaq che kʼo nim retaʼmabʼal. Y are chiʼ ketaʼm chi ronojel ri qas xkʼulmatajik, kkitzʼibʼaj y kkisukʼumaj ri kʼutunem. Tekʼuriʼ kkikoj wachbʼal chupam y kkitaq bʼi che ri Comité re Coordinadores rech kkilo we utz xelik.

 ¿Jas kkichomaj ri e qachalal chrij ri sección «Prensa»? Jun qachalal ixoq che kel pa ri tinamit re Filipinas Cheryl ubʼiʼ, kubʼij: «Sibʼalaj utz kwilo kinsikʼij ri noticias aqʼabʼil che kchʼaw chrij ri utinamit ri Jehová y chkij ri e wachalal».

 E kʼi sibʼalaj utz kkilo che junam ta ri noticias che kʼo pa jw.org rukʼ ri kyaʼ pa taq ri televisión. Jun qachalal Tatiana ubʼiʼ, re Kazajistán, kubʼij: «Sibʼalaj nim kwil ri noticias che kʼo pa jw.org, rumal che qas tzʼaqat. Xaq xiw kkibʼij ri qas xkʼulmatajik». Jun qachalal che kel pa México, Alma ubʼiʼ, kubʼij: «Ri noticias che kʼo pa ri televisión xaq xiw kkitzijoj jastaq che kuyaʼ bʼis, are kʼu ri noticias che kʼo pa jw.org kuya qachuqʼabʼ».

 Jun chi jastaq che kubʼan ri sección «Prensa» chqe, are che kukowirisaj ri qakojonik. Jun qachalal Bernard ubʼiʼ, che kel pa Kenia, kubʼij: «Rumal ri noticias riʼ apastaneʼ ri tinamit che keʼel wi ri e qachalal keʼinwilo che jetaneʼ e nufamilia. Are chiʼ kinbʼan nuchʼawem che ri Jehová kinkoj ri kibʼiʼ rech kinchʼaw pa kiwiʼ y kinbʼij ri qas tajin kkikʼulmaj». Jun qachalal ixoq Bybron ubʼiʼ, che xuqujeʼ kel pa ri tinamit Kenia, kubʼij: «¡Sibʼalaj kinkikotik are chiʼ kwil jun kʼutunem che kchʼaw chrij jun kʼakʼ traducción rech ri Biblia! Kunaʼtasaj chwe che ri Jehová kojuloqʼoqʼej qonojel».

 Xuqujeʼ ri noticias che kchʼaw chkij ri e qachalal che e k’o pa cárcel rumal ri kikojonik kuya’ qachuqʼabʼ. Chixchoman chrij ri xubʼij jun qachalal Jackline ubʼiʼ, che xuqujeʼ pa Kenia kel wi, kubʼij: «Are chiʼ kinchoman chrij ri ukowil kikʼuʼx ri e qachalal kukowirisaj ri nukojonik, amaqʼel kinchoman chrij jasche kʼo ukowil kikʼuʼx. Y wetaʼmam che ri jastaq che kʼax ta ubʼanik, junam rukʼ ri ubʼanik chʼawem, usikʼixik uwach ri Biblia, o ubʼanik bʼixonem, are waʼ ri uyaʼom kichuqʼabʼ ri e qachalal».

 Jun qachalal ixoq che kel pa Costa Rica, Beatriz ubʼiʼ, kmaltyoxin rumal ri noticias che kchʼaw chkij desastres naturales, kubʼij: «Sibʼalaj mayibʼal che ri utinamit ri Jehová aninaq kuya ri kajwataj chke ri e qachalal are chiʼ kkiriq jun kʼax, sibʼalaj utz kkibʼan che ubʼanik y rukʼ loqʼoqʼebʼal kkibʼano. Wariʼ kinutoʼ rech kinkojo che qas pa ri utinamit ri Jehová in kʼo wi».

 ¡Sibʼalaj kqamaltyoxij che kʼo ri sección «Prensa» pa jw.org! Rumal waʼ taq noticias riʼ qas qetaʼm ri kkikʼulmaj ri e qachalal che e kʼo pa ronojel uwach Ulew. Are kʼu kqetaʼmaj ta wariʼ wet mat kiya ri ikuchuj pa donate.pr418.com. Sibʼalaj maltyox chiwe rumal che kixsipanik.