Ronojel taq ikʼ kqaj kqil ri programas y videos che kya pa JW Broadcasting. Are kʼu e kʼi chke ri e qachalal re África kekun taj kkil wariʼ pa internet. ¿Jasche?

 Pa kʼi taq tinamit re África ri e qachalal kkiriq kʼax che uriqik ri internet. Y we kʼo internet pa jujun tinamit qas ta kʼo uchuqʼabʼ y sibʼalaj paqal rajil. Jun kʼutbʼal, jumul jun solinel re circuito re Madagascar xuqasaj jun programa JW Broadcasting pa jun kʼayibʼal refacciones che kʼo internet chupam y rajawaxik xutoj 16 dólares. a Sibʼalaj nim pwaq wariʼ rumal che e kʼi winaq kkichʼak ta wariʼ pa jun semana.

 Paneʼ jewaʼ ri kkʼulmatajik, kimik sibʼalaj e kʼi chke ri winaq pa África kekun chik kkil JW Broadcasting y rajawaxik taj kkikoj internet. ¿Jas ketowik?

 Xumaj lo pa ri 2017, ri e kʼo pa taq ri tinamit chunaqaj ri desierto re ri Sahara kekunik kkil ri programa re JW Broadcasting pa jun canal re televisión rukʼ señal rech satélite. Wajun canal riʼ tojom taj y kbʼanik kkoj pa ronojel taq horas ronojel taq qʼij, pa 16 chʼabʼal.

 Rech kbʼantaj wariʼ, ri testigos rech Jehová kkitoj jun canal rech kil ri kʼo pa JW Broadcasting rukʼ señal re satélite. Y ri señal kopan pa más che 35 tinamit re África y 12,000 dólares ktoj ronojel taq ikʼ. Y are chiʼ kbʼan riqbʼal ibʼ nim ubʼanik ktoj chi jun canal. Rumal wariʼ sibʼalaj e kʼi winaq kekunik kkil ri nimaʼq taq riqbʼal ibʼ, xuqujeʼ are chiʼ kopan jun qachalal re ri central mundial pa ri sucursal.

 Sibʼalaj e k’i qachalal xuqujeʼ ri e winaq che e Testigos taj, kekunik kkil ri canal pa taq ri kitelevisores. Are k’u, e k’i chke ri e qachalal k’o ta kirajil rech kkiloqʼ wa taq jastaq ri’. Rumal la’, xekoj antenas pa 3,670 Ja rech Ajawbʼal rech kujek’ ri señal re ri satélite. Wariʼ keʼutoʼ ri qachalal rech kkil ri programa re JW Broadcasting. Paneʼ kʼo chi jun televisor o jun proyector pa ri Ja rech Ajawbʼal rajawaxik ktoj chi na 70 dólares rech kloqʼ ri nikʼaj chi jastaq che kajwataj na. We k’o ta televisores y proyectores pa ri Ja rech Ajawb’al, kpaqiʼ ri rajil pa 530 dólares.

 Rumal wajun canal riʼ ri e qachalal sibʼalaj kemaltyoxinik. Jun kʼamal bʼe re Camerún kubʼij: «Rukʼ ri nufamilia kqachomaj che wariʼ kjunamataj rukʼ ri maná chunikʼajal ri desierto». Jun qachalal re Nigeria, Odebode ubʼiʼ, kubʼij: «Oxibʼ mul pa jun semana kqil ri canal JW rukʼ ri nufamilia. Ri e walkʼwal sibʼalaj kkaj kqil ri programas. Kʼo jujun mul xaq kʼateʼ kkibʼij chqe che kqilo». Ri al Rose xuqujeʼ aj Nigeria, kubʼij: «¡Sibʼalaj kinkikotik! Nabʼe xaq xik kwil ri canal re noticias, are kʼu kimik are más kwaj kwil chi ri canal JW. Are chiʼ kwil ri noticias, sibʼalaj kpe woyowal y wariʼ kubʼan kʼax chwe. Are kʼu ri canal JW sibʼalaj utz taq jastaq kwil chupam y kuya utzilal chwe... Are ri canal che más utz kwilo. Wariʼ are jun tewchibʼal re ri Jehová».

 Jun solinel re circuito re Mozambique kubʼij che pa ri ucircuito pa taq ri Ja rech Ajawbʼal e kʼo chi televisores, proyectores xuqujeʼ antena che kujekʼ ri señal re satélite rech ri e qachalal kkil ri canal JW. Are chiʼ kraj na jun hora che kmajix ri riqbʼal ibʼ konojel ri e qachalal keʼopan pa ri Ja rech Ajawbʼal rech kkil ri JW Broadcasting.

 Pa ri nim riqbʼal ibʼ che xbʼan cho ronojel uwach Ulew pa ri 2019 pa Johannesburgo (Sudáfrica), xkoj wajun canal pa nueve nikʼaj chi tinamit, rech xil ri chʼabʼal che xkiya ri e qachalal re ri Jupuq Ajkʼamal bʼe cho ronojel uwach Ulew. Ri qachalal Sphumelele, rech ri Departamento Local re Broadcasting pa ri sucursal re Sudáfrica, kubʼij: «Nabʼe kanoq, keqaqʼaxej ri chʼabʼal pa internet y rajawaxik kloqʼ internet che kʼo uchuqʼabʼ. Are kʼu pa ri canal rukʼ señal re satélite qas ta nim ktojik y sibʼalaj utz kel ronojel».

 Rumal che rukʼ ronojel iwanimaʼ kiya ri ikuchuj, kimik ri e qachalal re África kekun chik kkil ri JW Broadcasting. Sibʼalaj maltyox che ri ikuchuj che kiya pa ri obra mundial pa donate.pr418.com.