Pa ri chak xkibʼan ri Testigos pa ri junabʼ 2021, a ri yabʼil COVID-19 sibʼalaj xubʼan kʼax chke ri winaq. Junam rukʼ ri xyaʼ ubʼixik pa jun kʼutunem ubʼiʼ «Ri bʼanom che kitoʼik ri qachalal re ronojel uwach ulew pa ri pandemia», xqabʼij che sibʼalaj kʼi millones de dólares b xsach pa wajun junabʼ riʼ y xebʼan 950 Comités de Socorro.

 Xaq xiw ta ri yabʼil COVID-19 tajin kubʼan kʼax cho ri uwach Ulew, xaneʼ xuqujeʼ kʼo chi nikʼaj kʼax kqariqo che kubʼan kʼax chke ri qachalal. Rumal laʼ ri Comité de Coordinadores re ri Jupuq Ajkʼamal bʼe cho ronojel uwach Ulew xubʼij che kkoj más che 8 millones de dólares che kitoʼik ri qachalal chuwach más che 200 nimaʼq taq kʼax. Chqilampeʼ jas xbʼan che ukojik ri kuchuj pa kebʼ nimaʼq taq kʼax.

 Pa ri 22 re mayo 2021, ri volcán Nyiragongo, pa República Democrática del Congo xubʼan kʼax chke kʼi taq ja, escuelas xuqujeʼ jun nimalaj kʼolbʼal joron. Are kʼu xaq xiw ta wariʼ xubʼano, pa kʼi taq qʼij ri volcán xresaj lo chaj che sibʼalaj kubʼan kʼax pa uwiʼ ri tinamit Goma xuqujeʼ xubʼan kabʼraqan. Más che pa nikʼaj che ri tinamit xeʼesax bʼi pa ri kachoch. Sibʼalaj e kʼi winaq xeʼanimaj bʼik y e kʼo jujun xeʼopan kʼa pa Ruanda.

 Chkixoʼl ri e winaq che xeʼanimaj bʼik e kʼo más che 5,000 testigos rech Jehová. E jujun chke kʼo ta chi kachoch rumal che ri qʼaqʼ xubʼan kʼax che y e nikʼaj chik xelaqʼax ri jastaq ke are chiʼ e kʼo ta chi chilaʼ. Ri comités de socorro rech Ruanda y República Democrática del Congo xetobʼanik. Ri sucursal re República Democrática del Congo xubʼij ri xubʼan jun chke waʼ taq comités riʼ: «Ri comité nabʼe xutaq bʼi jastaq che ktijowik, joron, qʼuʼaj y atzʼyaq are chiʼ majaʼ kkiya ubʼixik che keʼel lo ri e qachalal pa ri kilugar, xkibʼan wariʼ paneʼ sibʼalaj tajin kriqitaj kʼax pa ri tinamit». Pa jun chi tinamit xeʼel lo más che 2,000 qachalal pa ri kachoch. Rumal laʼ jun chke ri comités de socorro, xeʼuya tiendas de campaña, mascarillas xuqujeʼ xkibʼij chke ri e qachalal jas rajawaxik kkibʼano rech kkiriq ta ri COVID-19 y ri cólera.

 Pa oxibʼ ikʼ ri e qachalal xkijach más che 6 toneladas arroz, 6 toneladas kʼaj re ixim, más che 8,000 litros aceite che kkoj che ubʼanik rikil y más che 8,000 litros joron. Rech ksach ta más pwaq, ri sucursal xuloqʼ ri e jastaq pa nimaʼq taq kʼayij che e kʼo pa ri tinamit.

 Jun qachalal ixoq xubʼij: «Sibʼalaj xqariq kʼax». Ri volcán xubʼan kʼax che ri kʼakʼ kachoch, are kʼu ri areʼ y ri ufamilia xetoʼ kumal ri e qachalal y xyaʼ uchuqʼabʼ ri kikojonik. Tekʼuriʼ ri areʼ xubʼij chik: «Kinmaltyoxij che ri Jehová che kʼo ri kajwataj chqe kimik. Qas xqil ri utobʼanik ri Jehová, che ri areʼ kojutoʼ che uchʼijik ri e kʼax».

 Pa kʼi taq junabʼ pa Venezuela sibʼalaj kʼax kbʼan che uchʼakik pwaq. Kʼo ta jastaq che ktijowik, ri elaqʼ y ri kamisanik xa más tajin knimatajik. Rumal laʼ, ri e qachalal kʼax kkibʼan che uriqik ri jastaq kech. Are kʼu ri utinamit ri Jehová uyaʼom ta kan kitoʼik.

 Pa ri kʼisbʼal kan junabʼ re servicio, xsach más che jun millón y medio de dólares che e jastaq che ktijowik, chʼipaq y rech keyoʼq kan chke ri e familias che kʼo kajwataj chke. Ri sucursal re Venezuela kubʼij: «Man xaq ta je riʼ kkʼam bʼi ronojel taq ikʼ 130 toneladas jastaq che ktijowik pa naj taq tinamit che e kʼo wi e qachalal che kʼo ta kiwa». Rech ri e jastaq che ktijowik kubʼan ta kʼax, ri e qachalal kkitaq bʼi jastaq che más naj tiempo kuchʼijo. Y ri sucursal xubʼij chik: «Are kqaloqʼ jastaq che más kekʼayix pa ri qʼij y xa ta pa nitzʼal kqaloqʼo xa neʼ pa ukʼiyal, y kqaloqʼo are chiʼ qas ta paqal kajil. Tekʼuriʼ kqatzukuj ri kqabʼano rech kqataq bʼi chke ri e qachalal rech paqal ta kel ri viaje».

 Leonel, jun qachalal che kʼo pa ri Comité de Socorro pa Venezuela, sibʼalaj utz kril ri chak che kubʼano. Kubʼij: «Sibʼalaj nim ubʼanik chnuwach che keʼintoʼ ri e qachalal. Wariʼ kinutoʼo rech qas ta kinbʼisoj más ri wixoqil che xkam che COVID-19. Sibʼalaj latzʼ chi nuwach y kinnaʼo che kʼo tajin kinbʼano rumal che tajin keʼintoʼ ri e qachalal. Qas wilom che ri Jehová kuya ta kan ri utinamit».

 Chiwilampeʼ ri xubʼij jun qachalal che ojer kanoq xtobʼan pa ri comité de socorro. Kubʼij: «Chanim riʼ in chik tajin kintoʼik. Ri e qachalal xaq xiw ta xkiya ri kajwataj chqe xaneʼ xinkitoʼ in y ri wixoqil rech ksach ta qakʼuʼx, xkiya qachuqʼabʼ, xojkichajij y xkikubʼsaj qakʼuʼx».

 Qetaʼm taj jampaʼ kkʼulmataj jun nimalaj kʼax. Are kʼu ri utinamit ri Jehová aninaq kuriq y kujach ri e jastaq che kajwataj chke ri e qachalal. Kojkunik kqabʼan wariʼ rumal ri ikuchuj che kiya pa ri obra mundial. Rech kiwetaʼmaj jas kibʼan che uyaʼik kuchuj, chiwilaʼ pa donate.pr418.com. ¡Sibʼalaj kqamaltyoxij ri itobʼanik!