Pa ri domingo 20 re noviembre 2022 are chiʼ ri Naciones Unidas xetzijon chrij ri tajin kukʼulmaj ri uwach Ulew rumal ri clima o ri Cambio Climático. Ri winaq che kʼo kitaqanik xkimulij pwaq rech ketoʼ ri tinamit che más kkiriq kʼax rumal ri desastres climáticos. Paneʼ xkibʼan wariʼ, are kʼu e kʼi ketaʼm che kekun ta che usukʼumaxik ronojel ri kʼax che tajin kkʼulmataj cho ri uwach Ulew.

•   «Utz che kmulix pwaq rech ketoʼ ri tinamit che kkiriq kʼax rumal ri clima […]. Wariʼ nim ta ktobʼan wi […]. Ri uwach Ulew sibʼalaj tajin kuriq kʼax» (António Guterres, secretario general re ri Naciones Unidas; 19 re noviembre 2022).

•   «Ri uwach Ulew sibʼalaj tajin kuriq kʼax rumal ri clima» (Mary Robinson, che xux qʼatal tzij pa Irlanda xuqujeʼ xux nim ubʼanik pa ri Derechos Humanos pa ri ONU; 20 re noviembre 2022).

 Ri alabʼom y alitomabʼ kebʼison chrij ri tajin kukʼulmaj ri uwach Ulew. ¿La kekun ri qʼatal taq tzij che usukʼumaxik ri kʼax che kuya ri clima y la qas kkibʼan ri kkitzujuj? ¿Jas kubʼij ri Biblia?

 Paneʼ e kʼo jujun winaq che kʼo jun utz kanimaʼ y kkikoj kichuqʼabʼ che usukʼumaxik ri kʼax, are kʼu ri Biblia kubʼij che kʼo ta más kekunik kkibʼano. Chqilampeʼ kebʼ rumal che kqabʼij wariʼ:

•   «Mawi kuyaʼ ksukʼubʼax ri jechʼobʼinaq» (Eclesiastés 1:15).

   Ri kraj kubʼij. Ri e qʼatal taq tzij kekun taj kkisukʼumaj ri kʼax rumal che yaʼom ta chke kkibʼano (Jeremías 10:23). Paneʼ kkikoj kichuqʼabʼ y kkitoʼlaʼ taq kibʼ, are kʼu kekun taj kkisukʼumaj ri kʼax che kʼo cho ri uwach Ulew.

•   «Kekʼojiʼ na winaq ri kkiloqʼoqʼej kibʼ chkibʼil kibʼ, ri kkiloqʼoqʼej ri pwaq […], man e kuyenelabʼ taj» (2 Timoteo 3:2, 3).

   Ri kraj kubʼij. Ri Biblia kubʼij che ri winaq xaq xiw kechoman chbʼil kibʼ y kkaj taj ketobʼanik rech kkiriq utzil ri nikʼaj chik. ¿La mat are waʼ ri tajin kqil kimik pa ri uwach Ulew?

 Ri kuriq na ri wach Ulew pa ri petinaq are ta ri kkitzujuj ri qʼatal taq tzij. Ri Dios uchaʼom chi jun qʼatal tzij che kkunik ktaqan puwiʼ ri uwach Ulew: Jesucristo. Are waʼ ri kubʼij ri Biblia chrij:

•   «Yoʼm ronojel kuʼinem pa uqʼabʼ che uqʼatik tzij, are kʼu taq ubʼiʼ waʼ kbʼix na: Mayibʼal pa taq ri kubʼano, Dios ri man chʼakatajel taj, junalik tataxel, ukʼojol ajawinel yaʼl jamaril» (Isaías 9:6).

 Ri Jesús are ri qʼatal tzij pa ri uQʼatbʼal tzij ri Dios che kʼo pa ri kaj (Mateo 6:10). Ri areʼ kʼo uchuqʼabʼ, unojibʼal y kraj kusukʼumaj xuqujeʼ kuchajij ri uwach Ulew y ri winaq che kekʼojiʼ chuwach (Salmo 72:12, 16). Ri qʼatbʼal tzij riʼ che kʼo pa uqʼabʼ ri Jesucristo kusachisaj na «kiwach ri kesachow uwach ri uwach ulew» y kusukʼumaj na ri kʼax che uriqom (Apocalipsis 11:18; Isaías 35:1, 7).

 We kawaj kawetaʼmaj ri kbʼan na che usukʼumaxik ri kʼax che tajin kubʼan ri clima che ri uwach Ulew, chawilaʼ ri kʼutunem «¿Jas kubʼij ri Biblia chrij ri clima cho ri uwach Ulew y ri kʼaslemal pa ri petinaq?».