¿Jasche are chiʼ xkam ri Jesús xubʼij ri e tzij re ri David che kriqitaj pa Salmo 22:1?

Mateo 27:46 kubʼij che are chiʼ xkam ri Jesús xubʼij kan waʼ taq tzij riʼ: «NuDios, nuDios, ¿jasche xinya la kanoq?». Rukʼ wariʼ xbʼantaj rukʼ ri Jesús ri xubʼij kan ri David pa Salmo 22:1 (Mar. 15:34). Xubʼij ta ri e tzij riʼ rumal che xa kbʼisonik o rumal che kʼo ta chi ukojonik. Ri areʼ qas xuchʼobʼo jasche rajawaxik kkamik y jasche xraj xbʼantaj wariʼ rukʼ (Mat. 16:21; 20:28). Xuqujeʼ retaʼm che kchajix ta rumal ri Jehová chuwach ri kamikal (Job 1:10). Jeriʼ xqʼalajinik che ri Jesús kuya ta kan upatanixik ri Jehová apastaneʼ ri xuriqo (Mar. 14:35, 36).

Rumal laʼ, ¿jasche xubʼij ri Jesús ri e tzij riʼ? Kojkun taj kqaya uwiʼ ri kqabʼij, are kʼu chqilampeʼ jujun chomanik. *

Rukʼ ri e tzij riʼ weneʼ ri Jesús tajin kuqʼalajisaj che katoʼ ta rumal ri Jehová chuwach ri kamikal. Rajawaxik che kuriq ri kamikal rech kutoj ri kimak konojel ri e winaq. Xuchʼobʼo che rajawaxik xaq utukel kutoj ri qamak rukʼ ri ukamikal. Are jun winaq che kʼo ubʼaqil y utiʼjol y rajawaxik «xuriq kamikal rumal kech konojel» (Heb. 2:9).

Weneʼ ri Jesús xchʼaw chrij jujun taj tzij  re ri Salmo 22 rech ri e winaq knaʼtaj ronojel ri Salmo chke. Pa ri uqʼij ri Jesús ri judíos kinaqʼatisam kibʼ che ukʼolik ri salmos pa kijolom. Rumal laʼ, we knaʼtajisax jun versículo chke kʼax ta kkibʼan riʼ che unaʼtajisaxik ronojel ri salmo. We are ri rumal che ri Jesús xubʼij ri e tzij riʼ, tajin keʼutoʼ riʼ ri judíos ri xeteriʼ chrij rech knaʼtaj chke ronojel ri tzʼibʼam kan chrij ri ukamikal pa wajun salmo (Sal. 22:7, 8, 15, 16, 18, 24). Jun chi jastaq, chukʼisbʼal ri salmo kbʼixik che ri utaqanik ri Jehová kchʼakanik y kuqʼat tzij pa uwiʼ ronojel ri uwach ulew (Sal. 22:27-31).

Are chiʼ ri Jesús xukoj ri utzij ri David weneʼ xa tajin kuqʼalajisaj che kʼo ta umak. Are chiʼ ri Jesús majaʼ kkamisaxik, xuchʼij ri kʼax rumal che xqʼat tzij pa uwiʼ (Mat. 26:65, 66). Y xbʼixik che ubʼanom ukʼulel che ri Dios (Mat. 26:59; Mar. 14:56-59). Are chiʼ ri Jesús xubʼij ri e tzij riʼ weneʼ tajin kubʼij che kʼo ta umak rech kkamisaxik.

Weneʼ xuqujeʼ ri Jesús xa tajin kunaʼtajisaj jun jastaq chke ri e nikʼaj chik. ¿Jas riʼ? Paneʼ tajin kuriq kʼax kraj taj kubʼij che xa kqaj ta chi chuwach ri Jehová. Chojchoman chrij wariʼ, ri David tajin kuriq kʼax are chiʼ xutzʼibʼaj wajun salmo riʼ, are kʼu kraj ta kubʼij che ma ta xqaj chi chuwach ri Jehová. Xa ta xqaj uchuqʼabʼ ri ukojonik ri David, rumal che are chiʼ ubʼim chi ri e tzij riʼ, xubʼij che qas kukubʼsaj ukʼuʼx che ri Dios kkunik keʼukol ri upatanelabʼ y xya ta kan utewchixik rumal ri Jehová (Sal. 22:23, 24, 27). Rukʼ wariʼ, paneʼ xuriq kʼax ri Jesús are chiʼ xbʼajix chuwach ri cheʼ, kraj ta kubʼij che mat xqaj chi chuwach ri Jehová (Mat. 21:9).

Xuqujeʼ weneʼ ri Jesús xa tajin kukʼutu che kbʼisonik rumal che xya kan utukel rumal ri Jehová, rech kqʼalajinik che kukʼut ri usukʼilal kʼa pa ri kamikal. Ri Dios xubʼij che rajawaxik kuriq kʼax y kkam ri Jesús are chiʼ ri Adán y Eva xemakunik, are kʼu are ta riʼ ri qas xraj xubʼan ri Jehová are chiʼ xubʼan ronojel ri jastaq. Ri Jesús xkamik rech kqʼalajinik che ri Satanás are jun molol tzij y xutoj ri kimak ri e winaq rech kkʼojiʼ kikʼaslemal kʼo ta ukʼisik (Mar. 8:31; 1 Ped. 2:21-24). Xaq xiw kbʼantaj wariʼ we ri Dios kresaj ri utobʼanik pa uwiʼ ri uKʼojol.

Jun chi rumal weneʼ ri Jesús xa xraj xeʼutoʼ ri utijoxelabʼ rech qas kkichʼobʼo jasche rajawaxik kkamik. * Jesús retaʼm che e kʼi winaq kkichomaj che xkamisaxik rumal che are jun bʼanal itzelal (1 Cor. 1:23). We ri utijoxelabʼ kkichʼobʼo jasche xkamik, nim kkil wi riʼ ri ukamikal (Gál. 3:13, 14). Jeriʼ kkichomaj taj che are jun bʼanal itzelal, xaneʼ are ri kiKolonel.

Apastaneʼ ri rumal che ri Jesús xubʼij ri e tzij re Salmo 22:1, qas xretaʼmaj che ri ukamikal chuwach ri cheʼ tajin kuqʼalajisaj che xubʼan ri kraj ri Jehová. Are chiʼ kʼate xbʼitaj wariʼ rumal, xuqujeʼ xubʼij: «Xtzʼaqatik» (Juan 19:30; Luc. 22:37). Ri Jehová xresaj ri utobʼanik pa uwiʼ ri Jesús, rech ktzʼaqat ronojel ri xpe che ubʼanik pa ri uwach Ulew. Rukʼ wariʼ xqʼalajinik che xtzʼaqat «ronojel ri tzʼibʼatal» chrij pa «ri uPixabʼ ri Moisés, pa taq ri kiwuj ri Qʼaxal taq tzij xuqujeʼ pa taq ri Salmos» (Luc. 24:44).