KʼUTUNEM 19
¿Jas rajawaxik kqabʼano rech qas kqakojo che ksukʼumax na ri uwach Ulew?
«Are taq ri areʼ kubʼij jun jasach, kutzʼaqatisaj ubʼanik» (NÚM. 23:19).
BʼIXONEM 142 Chqakowirisaj ri qeyebʼal
RI KQETAʼMAJ NA a
1, 2. Rech kqeyej ri kʼakʼ uwach Ulew che kukʼam lo ri Jehová, ¿jas rajawaxik kqabʼano?
SIBʼALAJ kqamaltyoxij che ri Jehová rumal che kusukʼumaj na ri uwach Ulew (2 Ped. 3:13). Paneʼ qetaʼm taj jampaʼ kubʼano are kʼu rumal ronojel ri itzelal tajin kkʼulmatajik kqachʼobʼo che naqaj chi kʼo wi (Mat. 24:32-34, 36; Hech. 1:7).
2 Qonojel rajawaxik kqakowirisaj ri qakojonik chrij ri utzujum ri Jehová apastaneʼ ri tiempo qapatanim chik. ¿Jasche? Rumal che kqaj uchuqʼabʼ ri kojonik. Rumal laʼ ri apóstol Pablo xubʼij che «ri mak [...] kʼo chqij che qachapik» (Heb. 12:1). Rech kqakʼulmaj ta wariʼ rajawaxik amaqʼel kqanikʼoj ri kkʼutuwik che xa jubʼiqʼ chi kraj che ri Jehová kubʼan kʼakʼ che ri uwach Ulew (Heb. 11:1).
3. ¿Jas kqil na pa wajun kʼutunem?
3 Pa wajun kʼutunem kqil na oxibʼ jastaq che kojutoʼo rech kqakubʼsaj qakʼuʼx che ksukʼumax na ri uwach Ulew: 1) chojchoman chrij ri xkibʼan ri Jehová y ri Jesús pa qawiʼ, 2) chojchoman chrij ri uchuqʼabʼ ri Jehová y 3) chojok il che upatanixik ri Jehová. Tekʼuriʼ kqil na che ri xubʼij ri Jehová che ri Habacuc xuqujeʼ kukowirisaj ri qakojonik oj. Are kʼu nabʼe chojtzijon chrij jasche rajawaxik kojkojon chrij ri kutzujuj ri Jehová chqe.
¿JASCHE RAJAWAXIK KʼO JUN KO QAKOJONIK?
4. ¿Jasche rajawaxik kʼo jun ko qakojonik are chiʼ kqachaʼ ubʼanik jun jastaq?
4 Rajawaxik jun ko qakojonik rumal che ronojel taq qʼij kqachaʼ ubʼanik jastaq pa ri qakʼaslemal. Jun kʼutbʼal, rajawaxik kqachaʼ jachin keqachilaj, jas etzʼanem kqabʼano, jas carrera kqakʼam bʼik, la kojkʼuliʼk o kojkʼuliʼ taj, we kekʼojiʼ qalkʼwal o kekʼojiʼ taj y jas chak kqabʼano. Y chojchoman chrij wariʼ: «¿Jas kukʼut ri kinchaʼ ubʼanik? ¿La kinkojo che xa jubʼiqʼ chi kraj ksach uwach ri itzelal cho ri uwach Ulew? ¿O kinchoman junam kukʼ ri winaq che kkibʼij: we kojkamik chilaʼ kkʼis wi ronojel?» (Mat. 6:19, 20; Luc. 12:16-21). We kqachʼobʼo che naqaj chi kʼo wi ri uQʼatbʼal tzij ri Dios qas utz riʼ ri kqachaʼ ubʼanik.
5, 6. a) ¿Jasche rajawaxik ko ri qakojonik are chiʼ kojqʼax chuwach jun kʼax? Chayaʼ jun kʼutbʼal.
5 Kʼo chi nikʼaj jastaq che rajawaxik kqakʼut kojonik chuwach, are chiʼ kbʼan kʼax chqe rumal ri qakojonik o kqariq jun yabʼil o jun chi uwach kʼax. Weneʼ jujun chke ri kʼax naj ta kuchʼijo, are kʼu e nikʼaj chik kukʼam más tiempo. Rumal laʼ, rajawaxik ko ri qakojonik rech kqapatanij ri Jehová rukʼ kikotemal (Rom. 12:12; 1 Ped. 1:6, 7).
6 Are chiʼ tajin kojqʼax pa jun kʼax weneʼ kqachomaj: ¿jasche ri Jehová kukʼam ta wi lo ri kʼakʼ uwach Ulew? ¿La xa ko ta ri qakojonik are chiʼ kqachomaj wariʼ? Je taj. Chojchoman chrij wariʼ. Are chiʼ oj kʼo pa qʼalaj weneʼ kqachomaj che kraj na nim tiempo rech kpe ri saqʼij. Are kʼu qetaʼm che kpe wi ri saqʼij paneʼ kbʼeytajik. Are je kqakʼulmaj are chiʼ kojbʼisonik, weneʼ kqachomaj che kpe ta wi ri kʼakʼ uwach Ulew. Are kʼu, we ko ri qakojonik, kqakojo che ri kutzujuj ri Jehová qas kubʼan wi (Sal. 94:3, 14, 15; Heb. 6:17-19). Wariʼ kojutoʼo rech are kojok il che upatanixik ri Jehová.
7. ¿Jas chuwach rajawaxik kqachajij wi qibʼ?
7 Rajawaxik jun ko qakojonik rech kqatzijoj ri utzij ri Dios. Are chiʼ kojchʼaw chrij ri kotzʼiʼjalaj uwach Ulew che utzujum ri Dios, e kʼi winaq kkibʼij che qas ta kbʼantaj riʼ (Mat. 24:14; Ezeq. 33:32). Maqayaʼ bʼe che kkʼojiʼ wajun chomanik qukʼ. Rumal laʼ rajawaxik kqakowirisaj más ri qakojonik. Chqilaʼ oxibʼ jastaq che kojkunik kqabʼano.
CHOJCHOMAN CHRIJ RI XKIBʼAN RI JEHOVÁ Y RI JESÚS PA QAWIʼ
8, 9. ¿Jasche kukowirisaj ri qakojonik are chiʼ kojchoman chrij ri xkibʼan ri Jehová y ri Jesús pa qawiʼ?
8 Jun jastaq kqabʼano rech kqakowirisaj ri qakojonik are che kojchoman chrij ri xubʼan ri Jesús pa qawiʼ. Rumal ri xubʼan pa qawiʼ qas kbʼantaj wi ri utzujum ri Jehová. Rajawaxik kojchoman chrij ri xkibʼan ri Jehová y ri Jesús pa qawiʼ. Rech jeriʼ más kqakubʼsaj qakʼuʼx chrij ri Jehová che qas kukʼam wi lo ri kʼakʼ ulew che utzujum. ¿Jasche kqabʼij?
9 Chojchoman chrij ri xkibʼan ri Jehová y ri Jesús pa qawiʼ. Ri Jehová xuya bʼe che xpe ri loqʼalaj uKʼojol cho ri uwach Ulew. Are chiʼ xpe ri Jesús waral xuriq kʼi taq kʼax y más na chiʼ xkamisaxik. Sibʼalaj kʼax xunaʼ riʼ ri Jehová are chiʼ xril wariʼ rumal che are jun tat kloqʼoqʼenik. Are kʼu rumal che kraj kqariq jun utz kʼaslemal, xuya bʼe che xkam ri uKʼojol (Juan 3:16; 1 Ped. 1:18, 19). Ri Jehová nim xutojbʼej ri qamak rumal laʼ qas kuya wi na ri kʼaslemal che kʼo ta ukʼisik chqe.
CHOJCHOMAN CHRIJ RI UCHUQʼABʼ RI JEHOVÁ
10. Junam rukʼ ri kubʼij Efesios 3:20, ¿jas kkunik kubʼan ri Jehová?
10 Jun chi jastaq che kojtoʼwik rech kkowir ri qakojonik are uchomaxik ri uchuqʼabʼ ri Jehová. Ri areʼ kkun che ubʼanik ronojel ri utzujum, paneʼ ri winaq kkichomaj che kbʼantaj ta wi laʼ o kpe ta wi laʼ ri kʼakʼ uwach Ulew. Rumal che ri Jehová sibʼalaj nim ri uchuqʼabʼ kojkun taj kqachʼobʼ ri jastaq che kutzujuj (Job 42:2; Mar. 10:27). Rumal laʼ kqamay ta ri kutzujuj chqe (chasikʼij uwach Efesios 3:20).
11. Chayaʼ ubʼixik jun tzujunik che ubʼanom ri Jehová kukʼ ri upatanelabʼ (chawilaʼ ri recuadro « E jujun utzujunik ri Jehová xebʼantajik»).
11 Chqilampeʼ jujun tzujunik xubʼan ri Jehová chke ri upatanelabʼ ojer che weneʼ xkikoj taj. Jun kʼutbʼal, xubʼij chke ri Abrahán y ri Sara che kkʼojiʼ jun kalkʼwal paneʼ e rijabʼ chik (Gén. 17:15-17). Xuqujeʼ xubʼij che ri Abrahán che kuya na ri ulew re Canaán chke ri e ralkʼwal. Are kʼu are chiʼ ri israelitas, ri e rachalaxik ri Abrahán, kʼi tiempo xekʼojiʼ pa Egipto weneʼ xkichomaj che ri xutzujuj ri Jehová chke kbʼantaj taj. Are kʼu, qas xbʼantaj ri xutzujuj ri Jehová. Are chiʼ qʼaxinaq chi kʼi junabʼ ri Jehová xubʼij che ri Elisabet che kkʼojiʼ jun ral paneʼ nim chi ujunabʼ. Xuqujeʼ xubʼij che ri María che kkʼojiʼ jun ral paneʼ kʼulan taj. Rukʼ wariʼ ktzʼaqat ri tzujunik che xubʼan kan ri Jehová pa ri kotzʼiʼjalaj Edén (Gén. 3:15).
12. ¿Jas kukʼut chqawach ri kubʼij Josué 23:14 y Isaías 55:10, 11 chrij ri uchuqʼabʼ ri Jehová?
12 Kqil ri nimalaj uchuqʼabʼ ri Jehová are chiʼ kojchoman chrij ronojel ri utzujunik y ri xubʼan che utzʼaqatisaxik. Rumal laʼ kqakojo che kubʼan na kotzʼiʼj che ri uwach Ulew (chasikʼij uwach Josué 23:14; Isaías 55:10, 11). Jeriʼ kojkunik keqatoʼ e nikʼaj chik rech kekojon chrij ri kʼakʼ uwach Ulew. Are chiʼ ri Jehová xchʼaw chrij ri kʼakʼ kaj y ri kʼakʼ Ulew xubʼij wariʼ: «E jik xuqujeʼ qastzij we tzij riʼ» (Apoc. 21:1, 5).
CHOJOK IL CHE UPATANIXIK RI JEHOVÁ
RI E RIQBʼAL IBʼ
¿Jas kubʼan wariʼ che qatoʼik rech kkowir ri qakojonik? (Chawilaʼ ri párrafo 13).
13. ¿Jas kubʼan ri riqbʼal ibʼ che ukowirisaxik ri qakojonik?
13 Ri urox jastaq che kojutoʼ che ukowirisaxik ri qakojonik are che kojok il che upatanexik ri Jehová. Chojchomanampeʼ chrij ri utzilal kuya ri e riqbʼal ibʼ chqe. Jun qachalal Anna ubʼiʼ, b che upatanim ri Jehová pa tiempo completo, kubʼij: «Ri e riqbʼal ibʼ kejunamataj rukʼ jun ancla che kukowirisaj ri qakojonik. Amaqʼel kʼo kwetaʼmaj pa ri riqbʼal ibʼ che kukowirisaj ri nukojonik, paneʼ ri ajyaʼol chʼabʼal qas ta jun utz ajtij». Xuqujeʼ pa ri riqbʼal ibʼ kqata jujun taq comentarios che kukowirisaj ri qakojonik (Rom. 1:11, 12; 10:17).
RI UTZIJOXIK RI UTZIJ RI DIOS
¿Jas kubʼan wariʼ che qatoʼik rech kkowir ri qakojonik? (Chawilaʼ ri párrafo 14).
14. ¿Jas kubʼan ri utzijoxik ri utzij ri Dios che unimarisaxik ri qakojonik?
14 Xuqujeʼ kkowir ri qakojonik are chiʼ kqatzijoj ri utzij ri Dios (Heb. 10:23). Jun qachalal Barbara ubʼiʼ che upatanim chi ri Jehová más che 70 junabʼ, kubʼij: «Utzijoxik utzij ri Dios ukowirisam ri nukojonik. Wilom che are chiʼ más kinchʼaw chrij ri Jehová y chrij ri utzujunik más knimar ri nukojonik chrij».
RI UNIKʼOXIK RI BIBLIA
¿Jas kubʼan wariʼ che qatoʼik rech kkowir ri qakojonik? (Chawilaʼ ri párrafo 15).
15. ¿Jas kubʼan che ukowirisaxik ri qakojonik ri unikʼoxik ri Biblia? (Xuqujeʼ chawilaʼ ri e wachbʼal).
15 Chqilaʼ chi jun jastaq che kunimarisaj ri qakojonik: are ri unikʼoxik ri Biblia. Ri qachalal Susan kubʼij che xutzʼibʼaj ri hora che kunikʼoj ri Biblia. Kubʼij: «Pa taq domingos kintijoj wibʼ che ri wuj Ri Chajinel rech ri jun semana chik; pa taq lunes y martes kintijoj wibʼ che ri kqil pa ri riqbʼal ibʼ chuxoʼl semana y pa ri e nikʼaj chi qʼij kinnikʼoj ri Biblia y e nikʼaj chi kʼutunem che keʼajwataj chwe». Rumal che ri al Susan amaqʼel jelaʼ kubʼano xkowir más ri ukojonik. Jun chi qachalal Irene ubʼiʼ, che kpatanin pa ri central mundial kubʼij che ri ukowirisam ri ukojonik are kinikʼoxik ri profecías re ri Biblia. Kubʼij: «Sibʼalaj kinmayo che ri Jehová ubʼanom ronojel ri ubʼim». c
«KOPAN KʼU NA RI QʼIJOL»
16. ¿Jasche qetaʼm che ri xubʼij ri Jehová che ri Habacuc xaq xiw ta che areʼ xubʼij wi? (Hebreos 10:36, 37).
16 E jujun upatanelabʼ ri Jehová kʼi junabʼ keyem ri kʼakʼ uwach Ulew. Y weneʼ kkichomaj jasche majaʼ kpetik. Are kʼu ri Jehová kuchʼobʼ ri kkinaʼo, rumal laʼ xubʼij wariʼ che ri qʼaxal tzij Habacuc: «Kʼa majaʼ kʼu neʼ kopan ri qʼijol ri chetzʼaqat we kʼutwachinik riʼ; ma ta kʼu neʼ ma ta chetzʼaqatoq. At chateyenoq, paneʼ kbʼeytajik, kopan kʼu na ri qʼijol ri rajawaxik» (Hab. 2:3). ¿La xaq xiw che ri Habacuc xbʼix wi waʼ taq tzij? Xaq xiw taj, rumal che ri Jehová xubʼij che ri apóstol Pablo che xuqujeʼ kutzʼibʼaj waʼ taq tzij chke ri cristianos che keyem ri kʼakʼ uwach Ulew (chasikʼij uwach Hebreos 10:36, 37). Paneʼ kqanaʼo che kbʼeyetaj ri utzujum ri Jehová, are kʼu «kopan kʼu na ri qʼijol ri rajawaxik».
17. ¿Jas xubʼan jun qachalal che ubʼanik re ri xubʼij ri Jehová che ri Habacuc?
17 E kʼi qachalal keyem ri utzujum ri Jehová pa kʼi junabʼ. Chqilampeʼ ri xukʼulmaj ri qachalal Louise che xumajij upatanexik ri Jehová pa ri 1939. Kubʼij: «Xinchomaj taj che kinopan na pa 18, rumal che weneʼ ya kpe ri Armagedón. Are kʼu xinopan na. Ri xintoʼw pa kʼi junabʼ are ri kikʼutbʼal ri upatanelabʼ ri Jehová re ojer, junam rukʼ ri Noé, Abrahán, José y e nikʼaj chik che xkʼistaj ta kikʼuʼx che reyexik ri xutzujuj ri Jehová chke. Ukubʼsaxik nukʼuʼx chrij ri utzujunik ri Jehová inutoʼm in y e nikʼaj chik rech ksach ta chwe che naqaj chi kʼo wi ri kʼakʼ uwach Ulew». Weneʼ e jujun qachalal che kʼi chi junabʼ kipatanim ri Jehová xuqujeʼ je kkichomaj wariʼ.
18. ¿Jas kojtoʼwik rech kqakojo che ri Jehová qas kukʼam na lo ri kʼakʼ uwach Ulew?
18 Qastzij che majaʼ ktzʼaqat ri utzujum ri Jehová, are kʼu chojchoman chrij ri e jastaq che kojkunik kqilo, ri e chʼumil, ri e cheʼ, ri e awaj y ri e winaq. Paneʼ ri e jastaq riʼ kʼateʼ xebʼanik, are kʼu kʼo ta jun winaq kubʼij che mat e kʼolik rumal che are ri Jehová xebʼanowik y e kʼo chi kimik (Gén. 1:1, 26, 27). Ri Jehová utzujum jun kʼakʼ uwach Ulew chqe, y qas kubʼan wi na. Kqariq jun kʼaslemal che kʼo ta ukʼisik y kojyawaj ta chik. Are chiʼ oj kʼo chi pa ri kʼakʼ uwach Ulew qas kqil riʼ che xubʼan ri xutzujuj ri Jehová (Is. 65:17; Apoc. 21:3, 4).
19. ¿Jas kqabʼan che ukowirisaxik ri qakojonik?
19 Rech kqeyej ri kʼakʼ uwach Ulew, maqayaʼ kan ukowirisaxik ri qakojonik. Chojchoman chrij ri xubʼan ri Jesús pa qawiʼ, ri uchuqʼabʼ ri Jehová y chojok il che upatanixik ri Jehová. We kqabʼan ronojel wariʼ oj jun riʼ chkixoʼl «ri winaq ri kʼo kikojonik, kkichʼij kʼu ri kʼax, kkechbʼej kʼu ri ubʼim ri Dios chi kuyaʼ na chke» (Heb. 6:11, 12; Rom. 5:5).
BʼIXONEM 139 ¿La katkʼojiʼ na pa ri kʼakʼ Ulew?
a Kimik e kʼi winaq kekojon ta chrij ri kutzujuj ri Dios. Are kʼu ri oj qas qetaʼm che ronojel ri utzujum ri Jehová qas kubʼan na. Rumal laʼ rajawaxik kqakowirisaj ri qakojonik rech ksach ta chqe. Pa wajun kʼutunem kqil na jas kqabʼan che ubʼanik.
b Kʼexom jujun bʼiʼaj.
c Pa ri Índice de las publicaciones Watch Tower, jawiʼ kubʼij wi «Profecía» katkunik kariq kʼi kʼutunem che kchʼaw chrij ri profecías. Jun kʼutbʼal, chawilaʼ ri kʼutunem «Lo que Jehová predice se cumple sin falta», pa ri wuj La Atalaya 1 re enero 2008.
