1. ¿Jas xkibʼan ri upatanelabʼ ri Dios re ri nabʼe siglo rech pa cholajil xkibʼan ri jastaq?

 ARE chiʼ ri Jehová kuya jun chak chke ri upatanelabʼ, ri e areʼ kkaj kkibʼan rukʼ cholajil (1 Cor. 14:33). Ri Jehová kraj che ri utzalaj taq tzij ktzijox cho ronojel ri uwach Ulew (Mat. 24:14). Y uyaʼom che ri Jesús kukʼam ubʼe wajun chak riʼ. Y ri Jesús ubʼanom che rukʼ cholajil kbʼan wajun chak riʼ. Ri kʼamal taq bʼe pa Jerusalén y ri apóstoles e areʼ keʼilow ri rajawaxik kbʼan pa ri congregaciones (Hech. 15:2; 16:4). Pa ronojel ri congregaciones e kʼo kʼamal taq bʼe che kkikʼam kibʼe ri qachalal y kkibʼij chke ri rajawaxik kkibʼano (Hech. 14:23). Rumal che ri qachalal kkinimaj ri kbʼix chke, «ri e komon kojonelabʼ ko xetakʼabʼax pa ri kikojonik» (Hech. 16:5).

2. ¿Jas ubʼanom ri Jehová che ukʼamik ubʼe y uyaʼik ri kajwataj che ri utinamit che umajim lo pa ri junabʼ 1919?

² Kimik ri Jehová, kubʼano che ri utinamit kubʼan ri jastaq pa cholajil. Pa ri junabʼ 1919, ri Jesús xukoj jun jupuq achijabʼ rech kebʼe pa ri kaj rech kkil ri kbʼan che utzijoxik ri utzij ri Dios y rech kkiya ri kajwataj chke ri cristianos pa ri kikojonik (Luc. 12:42). a Y qastzij che ri Jehová tajin kutewchij ri chak che kkibʼan wajun jupuq achijabʼ riʼ (Is. 60:22; 65:13, 14).

3, 4. a) Chayaʼ ubʼixik rukʼ jun kʼutbʼal ri utzilal kqariqo rumal che ri utinamit ri Dios rukʼ cholajil kubʼan ri jastaq. b)¿Jas kqil na pa wajun kʼutunem riʼ?

 ³ We ta ri utinamit ri Jehová kʼo ta pa cholajil, kojkun ta riʼ kqabʼan ri chak che xuya kan ri Jesús (Mat. 28:19, 20). Jun kʼutbʼal, we ta mat etaʼmatalik jas territorio ktzijox wi ri utzij ri Dios, weneʼ apachike lugar riʼ kqatzijoj wi. Rumal laʼ weneʼ kʼi taq mul kqatzijoj ri utzij ri Dios pa jun territorio y nikʼaj chik kqatzijoj taj. ¿La kʼo jun chi utzilal kpe pa ajolom rumal che ri utinamit ri Dios tajin kubʼan ronojel rukʼ cholajil?

⁴ Kimik, ri Jesús ubʼanom che ri utinamit ri Dios kkibʼan ri jastaq rukʼ cholajil junam rukʼ ojer kanoq. Pa wajun kʼutunem riʼ, kqil na ri kʼutbʼal che xukoj ri Jesús y kqetaʼmaj na che ri utinamit ri Dios re kimik tajin kubʼano. Xuqujeʼ kqil na ri rajawaxik kqabʼano rech kqakʼutu che kqakubʼsaj qakʼuʼx chrij ri utinamit ri Dios.

RI UTINAMIT RI DIOS KUNIMAJ RI JESÚS

5. ¿Jas kubʼan ri utinamit ri Dios che resaxik uwach ri Jesús? (Juan 8:28).

⁵ Ri Jesús xretaʼmaj rukʼ ri Jehová ri rajawaxik kubʼano y ri kubʼij. Xa junam rukʼ, ri utinamit ri Dios pa ri Biblia kresaj wi ri pixabʼ che kukʼutu (chasikʼij Juan 8:28; 2 Tim. 3:16, 17). Y amaqʼel kubʼij chqe che kqasikʼij ri Biblia y che kqabʼan pa ri qakʼaslemal ri kqetaʼmaj. ¿Jas utzilal kqariqo are chiʼ kqabʼan wajun pixabʼ riʼ?

6. ¿Jas utzilal kqariqo are chiʼ kqanikʼoj ri Biblia?

⁶ Usikʼixik ri Biblia y ri e qawuj nim kojutoʼ wi. Jun kʼutbʼal, kojkunik kqajunamaj ri kqetaʼmaj pa ri Biblia rukʼ ri kuyaʼ ubʼixik ri utinamit ri Dios. Are chiʼ kqilo che ri kubʼij ri utinamit ri Jehová pa ri Biblia esam wi, más kqakubʼsaj qakʼuʼx chrij (Rom. 12:2).

7. ¿Jas xutzijoj ri Jesús ojer y jas tajin kubʼan ri utinamit ri Dios che resaxik uwach?

⁷ Ri Jesús xutzijoj «ri utzalaj taq tzij re ri rajawbʼal ri Dios» (Luc. 4:43, 44). Xuqujeʼ xubʼij chke ri utijoxelabʼ, che je kkibʼano (Luc. 9:1, 2; 10:8, 9). Kimik, konojel ri upatanelabʼ ri Dios kkitzijoj ri utzij ri Dios apastaneʼ ri lugar che keʼel wi.

8. ¿Jas eqeleʼn yaʼom chqe?

⁸ Are jun nimalaj eqeleʼn yaʼom chqe che kqatzijoj ri utzij ri Dios chke ri winaq. Konojel taj kekunik kkibʼan wajun eqeleʼn riʼ. Jun kʼutbʼal, are chiʼ ri Jesús xkʼojiʼ cho ri uwach Ulew, xuya taj che ri itzel taq uxlabʼal xkiya ubʼixik ri ketaʼmam chrij ri Jesús (Luc. 4:41). Kimik we jun winaq kraj kel kukʼ ri testigos rech Jehová che utzijoxik ri utzij ri Dios, rajawaxik kniman che ri Dios. ¿Jas kqabʼan che ukʼutik che nim kqil utzijoxik ri utzij ri Dios? Kqakʼutu are chiʼ kqabʼan ronojel ri kojkun che ubʼanik rech kojel che utzijoxik. Junam rukʼ ri Jesús, qas kqakoj qachuqʼabʼ riʼ rech kqakʼam bʼi ri utzij ri Dios chke ri winaq che kʼo jun utz kanimaʼ (Mat. 13:3, 23; 1 Cor. 3:6).

9. ¿Jas kibʼanom ri testigos rech Jehová che uqʼalajisaxik ri ubʼiʼ ri Dios?

⁹ Ri Jesús xuya ubʼixik ri ubʼiʼ ri Dios chke ri winaq. Are chiʼ ri Jesús xubʼan uchʼawem, xubʼij wariʼ che ri Dios: «Ri in nuyoʼm retaʼmaxik ri bʼiʼ la chke» (Juan 17:26). Ri utinamit ri Dios kimik kresaj uwach ri Jesús y kubʼan ronojel ri kkun che ubʼanik rech ri winaq kkichʼobʼ ri ubʼiʼ ri Dios. Ri tajin kkikoj che ukʼutik ri ubʼiʼ  ri Dios are ri Traducción del Nuevo Mundo, wajun Biblia riʼ kriqitaj —ronojel o xa nikʼaj— pa más che 270 chʼabʼal. Wajun Biblia riʼ xukoj chi jumul ri ubʼiʼ ri Dios jawiʼ kʼo wi nabʼe kanoq are chiʼ xtzʼibʼaxik. Ri apéndices A4 y A5 kubʼij jawchiʼ xyaʼ chi wi ri ubʼiʼ ri Dios. Y pa ri apéndice C, che kʼo chupam ri Biblia de estudio, kuya ubʼixik jasche rajawaxik 237 mul kkoj ri ubʼiʼ ri Dios pa ri Escrituras Griegas Cristianas.

10. ¿Jas kqetaʼmaj chrij ri ukʼutbʼal jun ixoq re Myanmar?

¹⁰ Junam rukʼ ri xubʼan ri Jesús, ri oj kqaj che e kʼi winaq kketaʼmaj ri ubʼiʼ ri Dios. Pa Myanmar, jun qachalal ixoq xukʼut chuwach jun chi ixoq che kʼo 67 ujunabʼ, che ri ubʼiʼ ri Dios are Jehová. Ri ixoq sibʼalaj xkikotik y rukʼ oqʼej xubʼij wariʼ: «Kʼateʼ nabʼe mul waʼ che kinta ri ubʼiʼ ri Dios. [...] Xinwetaʼmaj ri más nim ubʼanik pa ri nukʼaslemal». Wajun kʼutbʼal riʼ kukʼut chqawach che ri ubʼiʼ ri Dios kubʼano che kkʼextaj ri kikʼaslemal ri winaq.

AMAQʼEL CHQAKʼUTUʼ CHE KQAKUBʼSAJ QAKʼUʼX CHRIJ RI UTINAMIT RI DIOS

11. ¿Jas kkibʼan ri kʼamal taq bʼe che ukʼutik che kkikubʼsaj kikʼuʼx chrij ri utinamit ri Dios? (Xuqujeʼ chawilaʼ ri e wachbʼal).

¹¹ ¿Jas kkibʼan ri kʼamal taq bʼe che ukʼutik che kkikubʼsaj kikʼuʼx chrij ri utinamit ri Dios? Jun che kekunik kkibʼano are che qas kkisikʼij ri kutaq lo ri utinamit ri Dios y qas kkibʼan ronojel ri kbʼix chke. Jun kʼutbʼal, kbʼix chke ri kbʼan che ubʼanik ri chʼawem y ri e kʼutbʼal che keya pa ri riqbʼal ibʼ are chiʼ ktzijox ri utzij ri Dios, are kʼu xuqujeʼ kbʼix chke ri kkibʼan che uchajixik ri utinamit ri Dios. Are chiʼ ri kʼamal taq bʼe kkibʼan ronojel ri kbʼix chke ri qachalal ri e kʼo pa ri congregación, kkinaʼo che ri Jehová qas keraj.

12. a) ¿Jasche rajawaxik kqabʼan ri kkibʼij ri kʼamal taq bʼe? (Hebreos 13:7, 17). b) ¿Jasche utz che are kqil ri utz taq kibʼantajik ri kekʼamow qabʼe?

¹² Are chiʼ ri kʼamal taq bʼe kkibʼij chqe ri rajawaxik kqabʼano, utz che qas rukʼ ronojel qanimaʼ kqabʼan ri kkibʼij. Je wariʼ kojtobʼanik rech kʼax ta kkibʼan che ubʼanik ri kichak. Ri Biblia kubʼij chqe che kojniman chke ri kkikʼam qabʼe (chasikʼij Hebreos 13:7, 17). Jujun taq mul kʼax kqabʼan che ubʼanik wariʼ rumal che ri kʼamal taq bʼe e ajmakibʼ. Are kʼu chnaʼtaj chqe, che we are más kqil ri kesach wi más kekikot riʼ ri qakʼulel. ¿Jasche kqabʼij wariʼ? Rumal che, we are kqil ri kesach wi ri kʼamal taq bʼe y kʼax kojchʼaw chkij, weneʼ kqakubʼsaj ta chi qakʼuʼx riʼ chrij ri utinamit ri Dios. Are kʼu, ¿jas rajawaxik kqabʼano rech kqaxutuj ronojel ri kkibʼij ri ukʼulel ri Dios?

MAQAYAʼ BʼE CHE KUBʼAN KEBʼ QAKʼUʼX

13. ¿Jas kkibʼij ri e qakʼulel chrij ri utinamit ri Dios?

¹³ Ri e qakʼulel kkibʼij jastaq chqe che kqachomaj che ri utinamit ri Dios utz ta ri tajin kubʼano. Jun kʼutbʼal, ri Biblia kubʼij chqe che ri oj upatanelabʼ ri Dios rajawaxik oj chʼajchʼoj pa ri qakʼaslemal, pa ri qacuerpo y pa ri qakojonik. Xuqujeʼ kubʼij che apachike winaq che kubʼan jun makaj y kuya ta kan ubʼanik kesax bʼi pa ri congregación (1 Cor. 5:11-13; 6:9, 10). Rumal che ri oj kqabʼan ronojel ri kubʼij ri Biblia, ri qakʼulel kkibʼij che más kqaya uwiʼ ri kqabʼano, oj itzel taq winaq y che kqanaʼo che más nim qabʼanik chkiwach nikʼaj chik.

14. ¿Jawchiʼ petinaq wi ri molom taq tzij che kbʼix chrij ri utinamit ri Dios?

 ¹⁴ Chnaʼtaj chqe jawchiʼ xpe wi ri nabʼe molom tzij. Ri Satanás, «areʼ utat ri bʼanoj tzij», kʼo chrij ronojel ri molom taq tzij che kbʼix chrij ri utinamit ri Dios (Juan 8:44; Gén. 3:1-5). Rumal laʼ kqamay taj che keʼukoj jujun winaq che ubʼixik ri molom taq tzij riʼ. Rumal che je xubʼan pa ri nabʼe siglo.

15. ¿Jas xkibʼan ri kʼamal taq bʼe re ri e qastzij taj kojonem che ri Jesús y chke ri utijoxelabʼ?

¹⁵ Paneʼ ri Jesús are ri uKʼojol ri Dios y tzʼaqat ri ukʼaslemal xuqujeʼ xubʼan milagros, are kʼu ri Satanás xeʼukoj jujun winaq che xkibʼij molom taq tzij chrij. Jun kʼutbʼal, ri kʼamal taq bʼe re ri e kojonem che qastzij taj pa ri uqʼij ri Jesús, xkibʼij chke ri winaq che ri Jesús keresaj ri itzel taq uxlabʼal rukʼ «ri kinimal ri itzel taq uxlabʼal» (Mar. 3:22). Tekʼuriʼ are chiʼ xqʼat tzij puwiʼ ri Jesús, ri kʼamal taq bʼe re ri e kojonem xkibʼij molom taq tzij chrij y xekitaqchiʼj ri winaq rech kkikamisaj (Mat. 27:20). Are chiʼ xqʼax ri tiempo, ri utijoxelabʼ ri Jesús xkimajij utzijoxik ri utzij ri Dios, ri kikʼulel «xkikoj kikʼuʼx ri man aj judeyibʼ taj» y «xkibʼan tzij chkij» rech keterenexik (Hech. 14:2, 19). La Atalaya 1 re diciembre 1998 xchʼaw chrij ri kubʼij Hechos 14:2. Y xubʼij che ri itzel taq judíos xaq xiw ta xkixutuj ri utzij ri Dios, xaneʼ «xkikoj kikʼuʼx ri man aj judeyibʼ taj, xkibʼan tzij chkij» rech ri winaq re nikʼaj chi tinamit itzel kekil wi ri cristianos.

16. ¿Jas rajawaxik knaʼtaj chqe are chiʼ kqata ri molom taq tzij chrij ri utinamit ri Dios?

¹⁶ Ri Satanás amaqʼel kubʼan molom taq tzij y kimik «keʼusubʼ konojel ri winaq»  (Apoc. 12:9). Rumal laʼ, we kqata molom taq tzij chrij ri utinamit ri Dios o chkij ri qachalal che kkikʼam bʼe pa ri congregación, chnaʼtaj chqe che jewaʼ xkʼulmataj rukʼ ri Jesús y ri utijoxelabʼ. Junam rukʼ ri kubʼij ri Biblia, kekiterenej ri testigos rech Jehová y kkibʼij molom taq tzij chkij (Mat. 5:11, 12). Ri e qakʼulel kekun taj kojkisubʼu we qetaʼm jasche kkibʼij molom taq tzij chqij y we qetaʼm ri kqabʼano rech kqachajij qibʼ chkiwach. ¿Jas rajawaxik kqabʼano rech kqachajij qibʼ?

17. ¿Jas rajawaxik kqabʼano are chiʼ kbʼix molom taq tzij chqe? (2 Timoteo 1:13; xuqujeʼ chawilaʼ ri recuadro « ¿Jas kabʼano we xata jun molom tzij?»).

¹⁷ Chqaxutuj ri molom taq tzij. Ri apóstol Pablo xubʼij ri rajawaxik kqabʼano we kqata molom taq tzij. Pa 1 Timoteo 1:3, 4 kubʼij che kqakoj ta ri molom taq tzij. Y xubʼij wariʼ che ri Timoteo: «Mabʼe awanimaʼ kukʼ taq ri pukinik ri man kʼo ta kipatan ri kkitzijoj» (1 Tim. 4:7). Jun kʼutbʼal: we jun alaj akʼal kuriq jun jastaq cho ri ulew, weneʼ kukʼamo kunim pa uchiʼ; are kʼu jun winaq che nim chik kubʼan ta wariʼ rumal che retaʼm che utz taj y retaʼm che kubʼan kʼax che. Xa junam rukʼ, we oj kqaxutuj ri molom taq tzij che kbʼixik, xaq xiw kqatatabʼej riʼ «ri utzalaj tzij [re ri qastzij] ri man kʼo ta etzelal che» (chasikʼij 2 Timoteo 1:13).

18. ¿Jas kqabʼan che ukʼutik che kqakubʼsaj qakʼuʼx chrij ri utinamit ri Jehová?

¹⁸ Xqetaʼmaj che ri utinamit ri Dios oxibʼ kubʼan che resaxik uwach ri Jesús, are kʼu xaq xiw ta wariʼ kubʼano. Are chiʼ kawetaʼmaj chrij ri Biblia, qastzij che kariq nikʼaj chik. Mayaʼ kan kitoʼik ri qachalal rech más kkikubʼsaj kikʼuʼx chrij ri utinamit ri Dios. Y mayaʼ kan upatanexik ri Jehová rukʼ sukʼilal y mayaʼo che kʼo katesan kan chupam ri utinamit ri Dios che tajin kubʼan ri urayibʼal (Sal. 37:28). ¿La mat qastzij che are jun utzilal che kqapatanij ri Dios pa jun tinamit jawiʼ kʼo wi loqʼoqʼebʼal y junamil? ¡Nim chqilaʼ wi wajun eqeleʼn riʼ!