¿La awetaʼm?
¿Jasche xekʼojiʼ winaq re nikʼaj chi tinamit kukʼ ri rajchʼojabʼ ri David?
CHKIXOʼL ri rajchʼojabʼ ri David e kʼo winaq che israelitas taj, jun kʼutbʼal, Zélec ri ammonita, Urías ri hitita xuqujeʼ ri Itmá ri moabita (1 Crón. 11:39, 41, 46). a Xuqujeʼ e kʼo ri keretitas, ri peletitas y ri guititas (2 Sam. 15:18). Weneʼ ri keretitas y ri peletitas kʼo jun achilanik chkixoʼl kukʼ ri filisteos (Ezeq. 25:16). Y ri guititas weneʼ e re ri tinamit filistea re Gat (Jos. 13:2, 3; 1 Sam. 6:17, 18).
¿Jasche xuya ri David che e kʼo winaq re nikʼaj chi tinamit kukʼ ri rajchʼojabʼ? Rumal che retaʼm che xaq xiw ta ri areʼ kkʼut sukʼilal che, xaneʼ xuqujeʼ che ri Jehová. Jun kʼutbʼal, chojchoman chrij ri xkibʼan ri keretitas y ri peletitas, ri The New Interpreterʼs Dictionary of the Bible kubʼij: «Amaqʼel xekʼojiʼ rukʼ ri David are chiʼ xuriq kʼax pa ri tiempo che xuqʼat tzij». ¿Jasche kqabʼij wariʼ? Are chiʼ «konojel ri achijabʼ re Israel» xkiya kan ri qʼatal tzij David y xkiterneʼj «ri Seba», ri keretitas y ri peletitas xkitoʼ ri David rech xkisachisaj uwach ri rajchʼojabʼ ri Seba (2 Sam. 20:1, 2, 7). Jumul chik, jun chke ri ukʼojol ri qʼatal tzij David ubʼiʼ Adonías kraj kux qʼatal tzij y kkʼojiʼ che ukʼexwach ri utat. Are kʼu ri keretitas y peletitas xekʼojiʼ rukʼ ri David y xkiya tobʼanik rech ri Salomón xux qʼatal tzij, rumal che ketaʼm che are ri Jehová xchaʼowik (1 Rey. 1:24-27, 38, 39).
Jun winaq re jun chi tinamit che xux sukʼ rukʼ ri David are ri Ittái ri guitita. Ri areʼ y ri 600 rajchʼojabʼ xkitoʼ ri David are chiʼ ri Absalón xraj xresaj ri qʼatbʼal tzij pa uqʼabʼ ri David, xraj xuchʼak ri kanimaʼ ri winaq pa Israel. Ri David xubʼij che ri Ittái che rajawaxik taj kchʼojin puwiʼ, rumal che rech jun chi tinamit. Are kʼu ri Ittái xubʼij: «Kinbʼan na ri chiʼnik ri qas kabʼan na chuwach ri Ajawaxel Dios xuqujeʼ chwach la, chi apachike kʼolbʼal ri kakʼojiʼ wi la, we che kʼaslemal o che kamikal, chilaʼ xuqujeʼ kakʼojiʼ wi na we pataninel ech la» (2 Sam. 15:6, 18-21).
Ri Ittái qas xkʼojiʼ rukʼ ri David, ri qʼatal tzij che chaʼom rumal ri Jehová.
Paneʼ ri keretitas, ri peletitas y ri guititas pa jun chi tinamit kepe wi, kekojon chrij ri Jehová ri qastzij Dios y nim kkil wi ri David che chaʼom rumal ri Jehová. Ri David sibʼalaj nim xril wi ri kitobʼanik ri achijabʼ riʼ, rumal che xekʼojiʼ rukʼ.
a Ri utaqanik ri Dios che kqariq pa Deuteronomio 23:3-6 kubʼij che nijun ammonita ni moabita kkʼojiʼ pa ri congregación rech Israel. Weneʼ wariʼ kraj kubʼij che kekun taj kkiriq jujun eqeleʼn junam kukʼ ri israelitas. Are kʼu kubʼij taj che kekun taj ketzijon rukʼ ri utinamit ri Dios o kkibʼan kachoch chilaʼ. Pa ri wuj Perspicacia para comprender las Escrituras, chatok pa «Ammonitas» tekʼuruʼ pa ri subtítulo «Se casan con israelitas».
