1. ¿Jas kuya ri Jehová chke ri sukʼalaj taq upatanelabʼ pa kijujunal?

RUKʼ loqʼoqʼebʼal, ri Jehová kuya jun lugar pa ri congregación chke ri sukʼalaj taq upatanelabʼ pa kijujunal. Paneʼ jalajoj ri kojkun che ubʼanik, qonojel nim qabʼanik y qonojel rajawaxik kqatoʼ la qibʼ. Ri apóstol Pablo kojutoʼ che uchʼobʼik wajun kʼutbʼal riʼ nim ubʼanik. ¿Jas kubʼan che qatoʼik rech kqachʼobʼo?

2. Junam rukʼ ri kubʼij Efesios 4:16, ¿jasche rajawaxik nim kqil wi qibʼ y kojtobʼan chbʼil qibʼ?

² Junam che kubʼij ri texto re wajun kʼutunem riʼ, Pablo xubʼij che are chiʼ kqil jun upatanel ri Jehová utz taj kqachomaj: «Man at rajawaxik ta chwe» (1 Cor. 12:21). Rech kʼo jamaril pa ri congregación, rajawaxik che nim kqil wi qibʼ y kojtobʼan chbʼil qibʼ (chasikʼij uwach Efesios 4:16). Are chiʼ kʼo utzilal, kubʼan más ko ri kikojonik ri e qachalal y kkinaʼ che keloqʼoqʼexik.

3. ¿Jas kqil na pa wajun kʼutunem riʼ?

³ ¿Pa jas jastaq rajawaxik kqakʼutu che nim keqil wi ri e qachalal? Pa wajun kʼutunem riʼ, nabʼe kqil na ri rajawaxik kkibʼan ri e kʼamal bʼe rech nim kekil wi ri e nikʼaj chi kʼamal bʼe. Tekʼuriʼ, kqanikʼoj na ri rajawaxik kqabʼan qonojel rech nim keqil wi ri e qachalal che e kʼulan taj. Chukʼisbʼal, kqil na ri rajawaxik kqabʼano rech kqakʼutu che nim keqil wi ri qas ta kekunik kechʼaw pa ri qachʼabʼal.

4. ¿Jas pixabʼ xuya ri Pablo che kʼo pa Romanos 12:10 che rajawaxik kkibʼan ri e kʼamal bʼe?

⁴ Konojel ri e kʼamal bʼe kechaʼ rumal ri ruxlabʼixel ri Jehová, are kʼu pa kijujunal kʼo utz taq kibʼantajik y kʼo jastaq che qas kekun che ubʼanik (1 Cor. 12:17, 18). Weneʼ e kʼo jujun che kʼateʼ xyaʼ wajun eqelen riʼ chke y kʼo ta más ketaʼmabʼal, e nikʼaj chik weneʼ qas ta kʼo kekun chik kkibʼano rumal ri kijunabʼ o rumal che e yawabʼ. Are kʼu nijun kʼamal bʼe kril ri rachiʼl y kuchomaj: «Man at rajawaxik ta chwe». Rajawaxik che are kkibʼan ri pixabʼ xuya ri Pablo che kʼo pa Romanos 12:10 (chasikʼij uwach).

5. ¿Jas kkibʼan ri e kʼamal bʼe che ukʼutik che nim kekil wi ri e kachiʼl, y jasche rajawaxik nim kekil wi?

⁵ Ri e kʼamal bʼe kkikʼutu che nim kekil wi ri e nikʼaj chi kʼamal bʼe are chiʼ qas kekitatabʼej. Sibʼalaj kajwataj wariʼ más na are chiʼ kkimulij kibʼ che unikʼoxik jujun taq jastaq che nim ubʼanik. ¿Jasche? Chojchoman chrij ri xubʼij ri wuj La Atalaya 1 re octubre 1988: «Ri e kʼamal bʼe kkichʼobʼo che rukʼ ri utobʼanik ri uxlabʼixel, Cristo kkunik kukʼam ubʼe ri uchomanik apachin taneʼ kʼamal bʼe, che unaʼtajisaxik ri pixabʼ re ri Biblia che kajwatajik rech kchaʼ ubʼanik jun jastaq (Hechos 15:6-15). Rajawaxik che nijun chke ri kʼamal bʼe ktaqan pa kiwiʼ ri e nikʼaj chi kʼamal bʼe».

6. a) ¿Jas ketoʼw ri e kʼamal bʼe rech kechakun pa junamil? b) ¿Jas utzilal kuriq ri congregación?

⁶ We jun kʼamal bʼe nim keril wi ri e rachiʼl, kukoj ta uchuqʼabʼ rech are nabʼe kubʼij ri kuchomaj pa jun riqbʼal ibʼ kech kʼamal bʼe. Xaq xiw ta areʼ kchʼawik y kuchomaj taj che ronojel ri kubʼij are ri utz. Xaneʼ rukʼ machʼachʼem kubʼij ri kuchomaj, kuchʼobʼo che retaʼm ta ronojel ri jastaq y qas keʼutatabʼej ri e nikʼaj chik. Pa uwiʼ ronojel, qas kraj kril ri kukʼut ri Biblia y kubʼan ri kubʼij ri «jikalaj pataninel, utz uchomanik» (Mat. 24:45-47). Are chiʼ ri e kʼamal bʼe kkibʼan ri jastaq rukʼ  loqʼoqʼenik y nim kkil wi kibʼ, ri ruxlabʼixel ri Dios kkʼojiʼ kukʼ xuqujeʼ ketoʼ rumal rech kkichaʼ ubʼanik jastaq che kuya uchuqʼabʼ ri congregación (Sant. 3:17, 18).

7. ¿Jas xuchomaj ri Jesús chkij ri winaq che e kʼulan taj?

⁷ Pa ri congregaciones, xaq xiw ta keriqitaj winaq che e kʼulanik, familias, xaneʼ e kʼo qachalal che e kʼulan taj. ¿Jas kqabʼan che kilik ri qachalal che e kʼulan taj? Chqilaʼ ri kuchomaj ri Jesús chkij ri winaq che e kʼulan taj. Are chiʼ xkʼojiʼ pa ri uwach Ulew, xkʼuliʼ taj y xukoj ronojel ri utiempo che ubʼanik ri uchak che ri Dios. Xukʼut taj che qas rajawaxik che ri cristianos kekʼulik o kekʼuliʼ taj. Are kʼu xubʼij che e kʼo jujun cristianos kkichaʼ che kekʼuliʼ taj (Mat. 19:11, 12). * Areʼ nim xeril wi ri e kʼulan taj y xuchomaj taj che kʼo ta kipatan o che kʼo kajwataj na pa kikʼaslemal.

8. Junam che xubʼij Pablo pa 1 Corintios 7:7-9, ¿jas chrij rajawaxik kechoman wi ri cristianos?

⁸ Junam rukʼ ri Jesús, ri apóstol Pablo are jun upatanel ri Dios che xkʼuliʼ taj. Xubʼij taj che utz ta ri kʼulanem. Retaʼm che wariʼ are jun jastaq che ri e winaq kkichaʼ pa kitukel. Paneʼ retaʼm wariʼ, xubʼij chke ri cristianos che we kekunik kekʼuliʼ taj rech kkipatanij más ri Jehová (chasikʼij uwach 1 Corintios 7:7-9). Qastzij wi, Pablo xubʼij taj che mat nim kibʼanik ri e kʼulan taj. Xaneʼ, xuchaʼ ri ala Timoteo, che kʼulan taj, rech xuya eqelen che, che nim kibʼanik (Filip. 2:19-22). * Rumal laʼ, utz taj kqachomaj che jun qachalal más kkun che ubʼanik ri jastaq xa rumal che kʼulanik o kʼulan taj (1 Cor. 7:32-35, 38).

9. ¿Jas kqabʼij chkij ri e winaq e kʼulanik y ri e kʼulan taj?

⁹ Jesús y Pablo xkikʼut taj che qas rajawaxik kkʼuliʼ jun winaq o kkʼuliʼ taj. Rumal laʼ, ¿jas kqabʼij chkij ri e winaq e kʼulanik y ri e kʼulan taj? Ri wuj La Atalaya 1 re octubre 2012 xubʼij wariʼ: «Ri qastzij, are che we jun winaq kkʼuliʼ o kkʼuliʼ taj,  ri kebʼ jastaq are utewchibʼal ri Dios. [...] Kraj ta kubʼij che chuwach ri Jehová mat kkikotik o che are jun kʼixbʼal we ri winaq kʼulan taj». Qas qʼalaj che rajawaxik nim kqil wi ri kilugar ri e kʼulan taj pa ri congregación.

10. ¿Jas kqabʼan che ukʼutik che nim kqil wi ri kkinaʼ y ri keriqitaj wi ri e qachalal che e kʼulan taj?

¹⁰ ¿Jas kqabʼan che ukʼutik che nim kqil wi ri kkinaʼ y ri keriqitaj wi ri e qachalal che e kʼulan taj? Rajawaxik knaʼtaj chqe che jujun cristianos e kʼulan taj rumal che are laʼ kichaʼom ubʼanik. Nikʼaj chik kkaj kekʼulik, are kʼu kiriqom ta ri winaq che qas utz chke. Nikʼaj chik weneʼ xa xkam ri kikʼulaj. Apastaneʼ ri rumal, kqataʼ ta chke jasche e kʼulan taj y kqabʼij ta chke che keqatoʼ che utzukuxik jun kikʼulaj. Qastzij, weneʼ jujun kkitaʼ tobʼanik chqe. Are kʼu, we kkitaʼ taj, chojchoman chrij ri kkinaʼo we kqabʼij chke (1 Tes. 4:11; 1 Tim. 5:13). Chqilaʼ ri kibʼim jujun chke.

11, 12. ¿Jas weneʼ kqabʼano che kuqasaj kichuqʼabʼ ri e kʼulan taj?

¹¹ Jun solinel re circuito kʼulan taj che sibʼalaj utz tajin kubʼan che ri uchak, kubʼij che kkunik kubʼan más kʼi jastaq rumal che kʼulan taj. Are kʼu kubʼij che jujun taq mul kbʼisonik are chiʼ jujun qachalal kkitaʼ che jasche majaʼ kkʼulik, paneʼ kkitaʼ rukʼ rutzil kanimaʼ. Jun qachalal kʼulan taj che kpatanin pa jun sucursal kubʼij: «Jujun taq mul, kwilo che e jujun qachalal kkibʼisoj kiwach ri e kʼulan taj, jetaneʼ kkichomaj che we jun winaq kʼulan taj are jun eqaʼn y are ta jun sipanik».

¹² Jun qachalal ali kʼulan taj che kpatanin pa Betel kubʼij: «E jujun qachalal kkichomaj che konojel ri e kʼulan taj kkaj kekʼulik o che kkibʼij che utz kojbʼe pa jun nimaqʼij rumal che wariʼ kojutoʼ che uriqik qakʼulaj. Jumul, xintaq bʼi che ubʼanik jun chak pa jun chi lugar y xinopan pa jun qʼij che kʼo riqbʼal ibʼ chaqʼabʼ. Ri qachalal ixoq che xinkʼojiʼ wi xubʼij chwe che pa ri ucongregación e kʼo kebʼ qachalal alabʼom che xaq junam ri kijunabʼ wukʼ. Xubʼij chwe che xa ta tajin kutzukuj nunovio, are kʼu are chiʼ kʼateʼ xojopan pa ri Ja rech Ajawbʼal xuchap ri nuqʼabʼ y xinukʼam bʼi jachiʼ e kʼo wi ri e kebʼ qachalal alabʼom rech kwetaʼmaj kiwach. ¡Ri oj oxibʼ sibʼalaj xojkʼixik!».

13. ¿Jas xuya uchuqʼabʼ jun qachalal ali kʼulan taj?

¹³ Jun chi qachalal ali kʼulan taj che kpatanin pa Betel kubʼij: «Wetaʼm kiwach precursores e kʼulan taj che kʼo chi kijunabʼ, utz kichomanik y kkikoj kichuqʼabʼ pa ronojel, qas ketaʼm ri kkaj kkibʼan pa ri kichak che ri Dios, wariʼ kuya uchuqʼabʼ ri congregación. Kkichomaj taj che nim kibʼanik rumal che e kʼulan taj xuqujeʼ kkinaʼ taj che kʼo ta kipatan rumal che e kʼulan taj o kʼo ta kalkʼwal». Sibʼalaj utz kʼolem pa jun congregación jachiʼ nim kojil wi, kbʼisox ta qawach o ktiʼtat ta knaʼ chqe y knimarisax ta uqʼij jun y ri jun chik kilik che kʼo ta upatan. Konojel kkinaʼ che keloqʼoqʼexik.

14. ¿Jas kqabʼan che ukʼutik che nim keqil wi ri e kʼulan taj?

¹⁴ Ri e qachalal che e kʼulan taj, utz kkilo che kqaqʼat ta tzij pa kiwiʼ, xaneʼ nim keqil wi rumal ri utz taq kibʼantajik. Kqabʼisoj ta kiwach. Xaneʼ nim chqilaʼ wi ri kisukʼilal. We jeʼ kqabʼano, kkichomaj ta riʼ che jetaneʼ tajin kqabʼij chke: «Man at rajawaxik ta chwe» (1 Cor. 12:21). Xaneʼ, kkilo che keqaloqʼoqʼej y nim kqil wi ri kilugar pa ri congregación.

15. ¿Jas jastaq kikʼexom jujun taq publicadores rech kinimarisam ri kichak che ri Dios?

¹⁵ Pa ri kʼisbʼal taq junabʼ, e kʼi publicadores tajin kketaʼmaj jun kʼakʼ chʼabʼal rech kkinimarisaj ri kichak che ri Dios. Wariʼ ubʼanom che rajawaxik kʼo kkikʼexo. Kikʼexom ri kicongregación rech keqʼax pa jun chik jachiʼ kajwataj wi utzijoxik ri utzij ri Dios pa jun chi chʼabʼal (Hech. 16:9). Wariʼ are jun jastaq che pa utukel ri winaq kuchaʼo. Paneʼ kukʼam bʼi kʼi junabʼ rech kekunik kketaʼmaj ri kʼakʼ chʼabʼal, are kʼu sibʼalaj nim tobʼanik kkiya pa ri congregación. Rukʼ ri utz taq kibʼantajik y ri ketaʼmabʼal, kkiya kichuqʼabʼ ri e qachalal. ¿La mat qastzij che nim kqil wi ri chuqʼabʼ kkikojo?

16. ¿Jas chrij rajawaxik kechoman wi ri e kʼamal bʼe are chiʼ kkilo we kyaʼ jun eqelen che jun qachalal?

¹⁶ ¿La utz che ri e kʼamal bʼe kkiya ta eqelen che jun qachalal rech kux kʼamal bʼe o siervo ministerial xa rumal che kʼa majaʼ qas kkunik kchʼaw pa ri chʼabʼal re ri congregación? Utz taj. Rajawaxik che are chiʼ kilik we kyaʼ jun eqelen che ri qachalal are rumal che tajin kubʼan ri kubʼij ri Biblia che rajawaxik kkibʼan ri e kʼamal bʼe y ri siervos ministeriales, are ta rumal che qas retaʼm kchʼaw pa ri chʼabʼal (1 Tim. 3:1-10, 12, 13; Tito 1:5-9).

17. ¿Jas rajawaxik kkichaʼ ubʼanik ri familias che keʼopan pa jun chi tinamit?

¹⁷ Kʼo jujun familias che e bʼenaq chi pa tinamit rumal che kʼo ta chi kekʼojiʼ wi (refugiados) o weneʼ che utzukuxik kichak. Weneʼ ri alkʼwalaxelabʼ kebʼe pa tijobʼal y rajawaxik kketaʼmaj ri chʼabʼal re ri tinamit che xeʼopan wi xuqujeʼ che ri e tat nan rajawaxik kketaʼmaj ri chʼabʼal rech kkiriq kichak. Are kʼu chqachomajampeʼ che kʼo jun congregación o jun grupo che kchʼaw pa ri kichʼabʼal. ¿Jas congregación rajawaxik kebʼe wi? ¿La pa ri kichʼabʼal o pa ri chʼabʼal re ri tinamit che xeʼopan wi?

18. Junam rukʼ ri kubʼij Gálatas 6:5, ¿jas kqabʼano rech kqakʼutu che nim kqil wi ri kuchaʼ ubʼanik ri kʼamal bʼe re ri familia?

¹⁸ Are ri kʼamal bʼe re ri familia kchaʼowik jas congregación kebʼe wi. Rech kuchaʼ ubʼanik wariʼ, rajawaxik kchoman chrij ri kajwataj che ri ufamilia (chasikʼij uwach Gálatas 6:5). Rumal che are jun jastaq che pa utukel ri winaq kuchaʼ ubʼanik, rajawaxik che nim kqil wi ri kuchaʼ ubʼanik ri kʼamal bʼe re ri familia. Kʼo ta kqabʼij chrij ri kkichaʼ ubʼanik y rukʼ loqʼoqʼebʼal chqakʼulaj ri familia pa ri congregación (Rom. 15:7).

19. ¿Jas rajawaxik kubʼan ri kʼamal bʼe re ri familia we ri e kalkʼwal qas ta kichʼobʼ ri chʼabʼal re ri congregación che e kʼo wi?

¹⁹ Weneʼ jujun familias e kʼo pa jun congregación  pa ri kichʼabʼal ri kitat kinan. Are kʼu, we ri alkʼwalaxelabʼ kebʼe pa tijobʼal y kketaʼmaj ri chʼabʼal re ri tinamit che xeʼopan wi, weneʼ qas ta kekunik kechʼaw pa ri kichʼabʼal ri kitat kinan. Rumal laʼ, weneʼ kʼax kkibʼan che uchʼobʼik ri kbʼix pa ri e riqbʼal ibʼ y knimar ta ri kikojonik. We jewaʼ kkʼulmatajik, ri kʼamal bʼe re ri familia rajawaxik kubʼan uchʼawem y kchoman chrij ri kubʼan che kitoʼik ri e kalkʼwal rech kekʼojiʼ naqaj che ri Jehová y che ri utinamit. Kʼo kebʼ jastaq kekunik kkichaʼ ubʼanik: kekitijoj ri e kalkʼwal rech kekunik kechʼaw pa ri kichʼabʼal, o keqʼax pa jun congregación re ri chʼabʼal che más kkichʼobʼ ri e kalkʼwal. Apastaneʼ ri kkichaʼ ubʼanik, rajawaxik che ri congregación keʼopan wi nim kkil wi xuqujeʼ kkiloqʼoqʼej ri familia riʼ.

20. ¿Jas kqabʼan che ukʼutik che nim keqil wi ri tajin kketaʼmaj jun chʼabʼal?

²⁰ Rumal ri kʼi jastaq che qilom chik, pa kʼi congregaciones e kʼo qachalal che kkikoj kichuqʼabʼ che retaʼmaxik jun chʼabʼal. Weneʼ pa ri chʼabʼal qas ta kekunik kkibʼij ri kkichomaj, are kʼu we xaq xiw ta kojchoman chrij ri kekun taj kkibʼij, kqilo che kkiloqʼoqʼej y kkaj kkipatanij ri Jehová. Wariʼ kubʼano che nim keqil wi y keqaloqʼoqʼej rukʼ ronojel qanimaʼ. Kqachomaj taj che keʼajwataj ta chqe xa rumal che qas ta ketaʼm ri qachʼabʼal.

21, 22. ¿Jasche sibʼalaj kojmaltyoxin che ri Jehová?

²¹ Sibʼalaj kqamaltyoxij che ri Jehová rumal che pa qajujunal uyaʼom jun lugar chqe pa ri ucongregación. Apastaneʼ ri qabʼanik achijabʼ, ixoqibʼ, oj kʼulanik o oj kʼulan taj, oj alabʼom alitomabʼ o nim chi qajunabʼ, we kojkunik o qas ta kojkunik kojchʼaw pa jun chʼabʼal: qonojel nim qabʼanik chuwach ri Jehová y chkiwach ri e qachalal (Rom. 12:4, 5; Col. 3:10, 11).

²² Sibʼalaj utz taq kʼutbʼal qetaʼmam chrij ri kʼutbʼal xukoj ri Pablo chrij ri ucuerpo jun winaq. We kqabʼan pa qakʼaslemal, kqakoj más qachuqʼabʼ riʼ che ukʼutik che nim kqil wi ri qalugar y ke ri e nikʼaj chik pa ri ucongregación ri Jehová.