1. ¿Jas eqelen yaʼom chqe?

ARE jun nimalaj eqelen che oj kʼo pa ri ucongregación ri Jehová. Qonojel kqanaʼ jamaril xuqujeʼ kikotemal rumal che kʼo nimalaj utzilal pa ri utinamit ri Jehová. Are kʼu chqajujunal, ¿jas ubʼanik ri qalugar pa ri congregación?

2. ¿Jas kʼutbʼal xukoj ri apóstol Pablo pa kʼi chke ri cartas che xutzʼibʼaj?

² Pa kʼi chke ri ucartas, ri apóstol Pablo xukoj jun kʼutbʼal che kukʼut kʼi jastaq chqawach chrij ri tajin kqetaʼmaj. Xujunamisaj ri congregación rukʼ ri ucuerpo jun winaq y ri e kʼo chupam ri congregación xaq e junam rukʼ ri uchʼaqapil ri cuerpo (Rom. 12:4-8; 1 Cor. 12:12-27; Efes. 4:16).

3. ¿Jas oxibʼ jastaq kqil na pa wajun kʼutunem riʼ?

³ Pa wajun kʼutunem riʼ, kqetaʼmaj oxibʼ jastaq nim kibʼanik che kqetaʼmaj chrij ri kʼutbʼal xukoj ri Pablo. Nabʼe, kqil na che chqajujunal kʼo jun qalugar pa ri ucongregación ri Jehová. * Ukabʼ, kqil na ri rajawaxik kqabʼano we kqachomaj che kʼo ta qapatan pa ri congregación. Y urox, kqil na che rajawaxik kqakoj qachuqʼabʼ che ubʼanik ri chak che uyaʼom ri Jehová chqe.

4. ¿Jas kukʼut chqawach ri e tzij kʼo pa Romanos 12:4, 5?

⁴ Ri nabʼe jastaq kqetaʼmaj chrij ri kʼutbʼal xukoj ri Pablo are che chqajujunal kʼo jun qalugar nim ubʼanik pa ri ufamilia  ri Jehová. Pablo xumaj ri kʼutbʼal rukʼ ri e tzij riʼ: «Jeʼ jas jun cuerpo e kʼo kʼi utzʼaqatil. Man konojel ta kʼut xaq ta junam ri kichak, jeʼ kʼu riʼ ri oj, paneʼ sibʼalaj oj kʼi xa oj jun cuerpo pa ri Cristo qanukʼulaʼm kʼu qibʼ jachaʼ oj utzʼaqatil xa jun cuerpo» (Rom. 12:4, 5). Ri xraj xubʼij ri Pablo chqajujunal are che jalajoj ri chak kqabʼan pa ri congregación, are kʼu qonojel nim qabʼanik.

5. ¿Jas e «sipanik» uyaʼom ri Jehová che ri congregación?

⁵ Are chiʼ kojchoman chkij ri kʼo jun kilugar pa ri congregación, weneʼ aninaq kojchoman chkij ri kʼo keqelen (1 Tes. 5:12; Heb. 13:17). Qastzij che rumal ri Cristo, Jehová uyaʼom achijabʼ jetaneʼ e «sipanik» pa ri congregación (Efes. 4:8). Chkixoʼl ri achijabʼ riʼ e kʼo ri Jupuq Ajkʼamal bʼe cho ronojel ri uwach Ulew xuqujeʼ ri ketobʼan kukʼ, ri e kʼo pa ri Comités re Sucursal, ri solinelabʼ re circuito, ri ajtijabʼ re ri e tijobʼal, ri e kʼamal bʼe re ri congregación xuqujeʼ ri siervos ministeriales. Konojel ri qachalal riʼ yaʼom ri keqelen rumal ri uxlabʼixel rech kekil ri loqʼalaj upatanelabʼ ri Jehová xuqujeʼ kkiya uchuqʼabʼ ri congregación (1 Ped. 5:2, 3).

6. Junam rukʼ ri kubʼij 1 Tesalonicenses 2:6-8, ¿jas kkikoj kichuqʼabʼ che ubʼanik ri qachalal che yaʼom keqelen rumal ri uxlabʼixel?

⁶ Rumal ri uxlabʼixel kyaʼ ri keqelen ri qachalal rech kkibʼan jalajoj taq chak. Junam rukʼ ri qʼabʼaj y ri aqanaj xuqujeʼ nikʼaj chi partes rech ri cuerpo kkibʼan ri kichak rech kkiya utzilal che ronojel ri cuerpo, ri qachalal che kʼo keqelen kkibʼan ri kichak rech kuya utzilal che ronojel ri congregación. Are ta kkaj kyaʼ unimal kiqʼij, xaneʼ kkikoj kichuqʼabʼ rech kekitoʼ xuqujeʼ kkiya kichuqʼabʼ ri kachalal (chasikʼij uwach 1 Tesalonicenses 2:6-8). Kojmaltyoxin che ri Jehová rumal che uyaʼom ri e qachalal riʼ pa ri congregación che kʼo ko kikojonik xuqujeʼ che are kkitzukuj ri utz chke ri e nikʼaj chik.

7. ¿Jas tewchibʼal kkiriq ri precursores xuqujeʼ ri misioneros?

⁷ Weneʼ pa ri qacongregación e kʼo misioneros, precursores especiales o precursores regulares. Qastzij wi, che pa ronojel ri uwach Ulew e kʼo qachalal achijabʼ xuqujeʼ ixoqibʼ kkiya ronojel ri kitiempo che utzijoxik ri Utzij ri Dios rech kkibʼan tijoxelabʼ. Rumal waʼ kiyaʼom tobʼanik chke nikʼaj chik rech keʼux tijoxelabʼ rech ri Cristo Jesús. Paneʼ ri qachalal riʼ kʼi ta jastaq ke kʼolik, are kʼu ri Jehová e utewchim (Mar. 10:29, 30). ¿La mat qastzij che kojmaltyoxinik che e kʼo ri loqʼalaj taq qachalal riʼ pa ri congregación?

8. ¿Jasche pa kijujunal ri publicadores nim kibʼanik chuwach ri Jehová?

⁸ ¿La xaq xiw ri qachalal ri kʼo keqelen xuqujeʼ ri e kʼo pa ri tiempo completo ri kʼo jun kikʼolbʼal pa ri congregación? Xaq xiw taj. Konojel ri publicadores nim kibʼanik chuwach ri Jehová xuqujeʼ pa ri congregación (Rom. 10:15; 1 Cor. 3:6-9). Jewaʼ riʼ rumal che jun chke ri jastaq che rajawaxik kubʼan ri congregación are kitoʼik ri winaq rech keʼux utijoxelabʼ ri Cristo (Mat. 28:19, 20; 1 Tim. 2:4). Konojel ri publicadores re ri congregación, kibʼanom kiqasanjaʼ o kibʼanom taj, kkikoj kichuqʼabʼ rech wajun chak riʼ kux ri más nim ubʼanik pa ri kikʼaslemal (Mat. 24:14).

9. ¿Jasche nim keqil wi ri e qachalal ixoqibʼ?

⁹ ¿Jas kqabʼij chkij ri qachalal ixoqibʼ?  Ri Jehová nim kril wi ri kichak kkibʼan pa ri congregación. Ri areʼ nim keril wi ri ixoqibʼ che e kʼulanik, ri e nan, ri malkanibʼ xuqujeʼ ri qachalal ixoqibʼ che e kʼulan taj che kkipatanij ri Jehová rukʼ sukʼilal. Ri Biblia kchʼaw chrij ri kikʼutbʼal e kʼi ixoqibʼ che xeqaj chuwach ri Jehová rumal ri kinojibʼal, kikojonik, kikikotemal, ukowil kikʼuʼx, e sipanel xuqujeʼ rumal ri utz taq kichak (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Pa ri congregaciones, e kʼo qachalal ixoqibʼ che kkikʼut we utzalaj taq bʼantajik riʼ. Sibʼalaj kojmaltyoxin che ri Jehová rumal che e kʼo ri qachalal riʼ.

10. ¿Jasche nim keqil wi ri e qachalal che nim chi kijunabʼ?

¹⁰ Xuqujeʼ are jun tewchibʼal che e kʼo ri e qachalal che nim chi kijunabʼ. E kʼo jujun kipatanim ri Jehová rukʼ sukʼilal pa ronojel ri kikʼaslemal. Weneʼ e kʼo jujun majaʼ naj xketaʼmaj ri qastzij. Apastaneʼ ri kikʼulmam, weneʼ e kʼo jujun tajin kkikoj kichuqʼabʼ rumal che nim chi kijunabʼ, rumal laʼ kekun ta chik kkibʼan nimalaj chak pa ri congregación xuqujeʼ che utzijoxik ri utzij ri Dios. Paneʼ jewaʼ kkiriqo kkikoj kichuqʼabʼ rech kebʼe che utzijoxik ri utzij ri Dios y kkikoj ronojel ri kichuqʼabʼ che kitoʼik nikʼaj chik xuqujeʼ che kitijoxik. ¡Sibʼalaj kʼi kqetaʼmaj chkij! Qastzij wi che Jehová nim keril wi xuqujeʼ oj (Prov. 16:31).

11, 12. ¿Jas kkibʼan che uyaʼik achuqʼabʼ ri kikʼutbʼal ri alabʼom alitomabʼ re ri acongregación?

¹¹ Chojchoman chkij ri alabʼom alitomabʼ. Kkiriq kʼax pa wa jun uwach Ulew riʼ che kʼo pa uqʼabʼ ri Satanás xuqujeʼ uxutuxik ri itzel taq uchomanik (1 Juan 5:19). Are kʼu sibʼalaj kkiya qachuqʼabʼ are chiʼ kkiya kicomentario pa ri e riqbʼal ibʼ xuqujeʼ are chiʼ kebʼe che utzijoxik ri utzij ri Dios, xuqujeʼ rukʼ ukowil kikʼuʼx kkitoʼ uwiʼ ri kikojonik. Alabʼom alitomabʼ, ix xuqujeʼ kʼo jun utzalaj ikʼolbʼal pa ri utinamit ri Jehová (Sal. 8:2).

 ¹² Are kʼu, kʼo jujun qachalal achijabʼ ixoqibʼ weneʼ kkikoj taj che nim kibʼanik pa ri congregación. ¿Jas kojtoʼw che rilik che chqajujunal kʼo jun qalugar pa ri congregación? Chqilaʼ.

13, 14. ¿Jasche weneʼ e jujun kkichomaj che kʼo ta kipatan pa ri congregación?

¹³ Ri ukabʼ kʼutbʼal che xukoj ri Pablo kubʼano che kojchoman chrij jun kʼax che kkinaʼ jujun kimik, are che kkichomaj che kʼo ta kipatan pa ri congregación. Pablo xutzʼibʼaj: «We ta kʼu kubʼij ri aqanaj: ‹Man in ta rech ri cuerpo, rumal rech chi man in ta qʼabʼaj›, man rumal ta riʼ ma ta utzʼaqatil ri cuerpo. We ta kubʼij ri xikinaj: ‹Man in ta rech ri cuerpo, rumal rech chi man in ta bʼaqʼwachaj›, ma ta utzʼaqatil ri cuerpo» (1 Cor. 12:15, 16). ¿Jas kqetaʼmaj chrij ri e tzij riʼ?

¹⁴ We kqajunamaj qibʼ kukʼ ri nikʼaj chi qachalal re ri congregación, weneʼ kqil taj che kʼo qapatan. Jujun chke ri qachalal e utz ajtijabʼ, utz kkibʼan che usukʼumaxik ri jastaq o e utz taq kʼamal bʼe. Y weneʼ kqachomaj che kojkun taj kqabʼan ri jastaq che kkibʼan ri e areʼ. Wariʼ kukʼutu che kojmachʼachʼik xuqujeʼ che kqachʼobʼo che kʼo jastaq che kojkun ta che ubʼanik (Filip. 2:3). Are kʼu rajawaxik kqachajij qibʼ. We amaqʼel kqajunamaj qibʼ kukʼ ri qas kekun che ubʼanik kʼi taq jastaq, sibʼalaj kojbʼison riʼ. Junam che xubʼij ri Pablo, weneʼ kqachomaj che kʼo ta qapatan pa ri congregación. ¿Jas kojtowik rech kqachomaj ta wariʼ?

15. Junam rukʼ ri kubʼij 1 Corintios 12:4-11, ¿jas rajawaxik kqachomaj chrij apachike jastaq che kojkun che ubʼanik?

¹⁵ Chojchoman chrij wariʼ: jujun chke ri cristianos re ri nabʼe siglo Jehová xuya ri uxlabʼixel chke rech kkibʼan jujun jastaq, are kʼu konojel taj junam chak kkibʼano (chasikʼij uwach 1 Corintios 12:4-11). Paneʼ junam ta ri eqelen xyaʼ chke chkijujunal, konojel e areʼ nim kibʼanik  chuwach ri Jehová. Qastzij che kimik ri uxlabʼixel kubʼan ta chi milagro are kʼu ri pixabʼ kʼextajinaq taj. Weneʼ qonojel taj junam ri kojkun che ubʼanik, are kʼu qonojel nim qabʼanik chuwach ri Jehová.

16. ¿Jas pixabʼ xuya ri apóstol Pablo che rajawaxik kqabʼano?

¹⁶ Are ta kqajunamaj qibʼ kukʼ nikʼaj chi cristianos, chqatereneʼj ri pixabʼ xuya ri apóstol Pablo: «Chkijujunal rajawaxik chunikʼoj ri ukʼaslemal; kʼateʼ kʼu riʼ kunaʼ ribʼ chiʼ kkikotik, mujunamataj kʼu ribʼ kukʼ juleʼ chik» (Gál. 6:4).

17. ¿Jas utzilal kuya chqe we kqabʼan ri pixabʼ xuya ri Pablo?

¹⁷ We kqabʼan ri pixabʼ xuya ri Pablo xuqujeʼ kojchoman chrij ri tajin kqabʼano, weneʼ kqilo che kojkun che ubʼanik jastaq che ri nikʼaj chik kekun taj kkibʼano. Jun kʼutbʼal, weneʼ jun kʼamal bʼe qas ta utz ajtij are chiʼ kʼo pa ri plataforma, are kʼu qas kkunik keʼutoʼ ri winaq rech keʼux tijoxelabʼ. O weneʼ qas ta kubʼan ri jastaq pa cholajil junam rukʼ ri kkibʼan ri nikʼaj chik kʼamal bʼe re ri congregación, are kʼu ri e qachalal kkita pixabʼ re ri Biblia che rumal che etaʼmatal uwach che are jun kʼamal bʼe che sibʼalaj kloqʼoqʼenik. O weneʼ etaʼmatal uwach che sibʼalaj ksipanik (Heb. 13:2, 16). Are chiʼ qas kqil ri kojkun che ubʼanik, kqilo che kʼo rumal rech kojkikotik rumal ri kojkunik kqaya che ri congregación. Wariʼ kubʼano, che kʼo ta kʼax kqanaʼ chkij ri qachalal rumal ri kekun che ubʼanik.

18. ¿Jas kojkunik kqabʼano rech kojux más utz taq ajtijabʼ?

¹⁸ Apastaneʼ ri qalugar pa ri congregación, qonojel rajawaxik kqabʼan más utz che ri qachak xuqujeʼ kojux más utz taq ajtijabʼ. Rumal wariʼ, Jehová kuya tijonik chqe pa ri utinamit. Jun kʼutbʼal, pa ri riqbʼal ibʼ chuxoʼl ri semana kkʼut chqawach ri rajawaxik kqabʼano rech kqabʼan más utz che ri qachak. ¿La nim kqil wi ri tijonik tajin kyaʼ chqe?

19. ¿Jas kojkunik kqabʼano rech kojbʼe pa ri Escuela para Evangelizadores del Reino?

¹⁹ Jun chi utzalaj programa re tijonik are ri Escuela para Evangelizadores del Reino, che kyaʼ chke ri qachalal achijabʼ ixoqibʼ che e kʼo pa ri tiempo completo che kʼo 23 kopan 65 kijunabʼ. ¿La kqachomaj che are jun jastaq che kojkun taj kqariqo? Are ta kqachomaj ri jastaq kojqʼatenik rech kojbʼe ta pa ri tijobʼal, are chqachomaj ri kojkunik kqabʼano rech kojbʼek. Tekʼuriʼ chqakojoʼ qachuqʼabʼ che uriqik ri qameta. Rukʼ ri utobʼanik ri Jehová xuqujeʼ ri ukojik qachuqʼabʼ, kqariq riʼ ri xqachomaj che kojkun taj kqabʼano.

20. ¿Jas kqetaʼmaj chrij ri kubʼij Romanos 12:6-8?

²⁰ Ri urox kʼutunem che kqetaʼmaj chrij ri kʼutbʼal che xukoj ri Pablo kqariq pa Romanos 12:6-8 (chasikʼij uwach). Waral, ri Pablo xubʼij chi jumul che kʼo jalajoj taq jastaq kojkun che ubʼanik. Are kʼu che wajun mul riʼ, xubʼij che pa qajujunal rajawaxik kqakoj ri kojkun che ubʼanik che utoʼik y che uyaʼik uchuqʼabʼ ri congregación.

21, 22. ¿Jas kqetaʼmaj chrij ri xkikʼulmaj Robert xuqujeʼ Felice?

²¹ Chqilaʼ ri xukʼulmaj jun kʼamal bʼe che Robert kqabʼij che. Xpatanin jun tiempo pa jun chi tinamit, tekʼuriʼ xsikʼixik rech kpatanin pa Betel che kʼo pa ri utinamit. Paneʼ xbʼix che, che kʼo ta itzelal xubʼano,  kubʼij: «Pa kʼi ikʼ, utz ta ri nuchomanik, xinnaʼo che kʼo ta nupatan. Jujun taq mul xinchomaj che kinel bʼi pa Betel». ¿Jas xubʼan che uriqik chi jumul ri kikotemal? Jun kʼamal bʼe xunaʼtajisaj che, che ri eqelen xuya ri Jehová chqe ojer kojutoʼ rech más utz kqabʼan che ri chak tajin kqabʼan kimik. Robert xuchʼobʼo che utz taj che are kchoman chrij ri xuriq ojer xaneʼ are utz kchoman chrij ri tajin kubʼan kimik.

²² Kjunamataj rukʼ ri xukʼulmaj ri qachalal Felice Epíscopo. Areʼ xuqujeʼ ri rixoqil xkibʼan graduar kibʼ pa ri escuela re Galaad pa ri junabʼ 1956 xuqujeʼ xux solinel re circuito pa Bolivia. Pa ri junabʼ 1964 xkʼojiʼ jun kalkʼwal. Felice kubʼij: «Xojbʼisonik are chiʼ xqaya kan ri utzalaj qasignación. Kinbʼij ri qastzij, xintzaq jun junabʼ che uchomaxik ri xqakʼulmaj. Are kʼu, rukʼ ri utobʼanik ri Jehová, xinkʼex ri nuchomanik xuqujeʼ xinkoj más nuchuqʼabʼ che ubʼanik ri kʼakʼ nuchak rumal che in tat chik». ¿La kʼo jumul junam ubʼanom ri qachomanik rukʼ Robert o Felice? ¿La ubʼanom kebʼ qakʼuʼx rumal che kʼo ta chi ri eqelen che yaʼom chqe nabʼe kanoq? We jeriʼ, kojkikot más riʼ we kqakoj qachuqʼabʼ che ubʼanik ri qachak che yaʼom kimik che upatanexik ri Jehová xuqujeʼ ri e qachalal. Amaqʼel chqabʼanaʼ ri kojkun che ubʼanik rech keqatoʼ ri e nikʼaj chik jeriʼ kqanaʼ kikotemal are chiʼ kqaya uchuqʼabʼ ri congregación.

23. a) ¿Jas rumal kqesaj qatiempo? b) ¿Jas kqil na pa ri jun chi kʼutunem?

²³ Chuwach ri Jehová, pa kijujunal ri upatanelabʼ nim kibʼanik. Areʼ kraj che qas kqanaʼ che oj kʼo pa ri ufamilia. We kqesaj qatiempo che uchomaxik ri kqabʼan che uyaʼik kichuqʼabʼ ri e qachalal y qas kqabʼan ri xqachomaj, kqil riʼ ri qalugar pa ri congregación. Are kʼu, ¿jas kqabʼan che kilik ri e nikʼaj chik? ¿Jas kqabʼan che ukʼutik che nim keqil wi? Pa ri jun chi kʼutunem, kqil na chrij wajun jastaq riʼ che nim ubʼanik.