1, 2. Junam rukʼ ri kubʼij Salmo 34:8, ¿jas rajawaxik kqabʼano rech qas kqatijtobʼej o kqanaʼ ri rutzilal ri Jehová?

CHOJCHOMAN chrij jun winaq che kuya jun qawa, kʼo ta jumul qatijom ri rikil kuya chqe. Kojkun riʼ kqetaʼmaj jas kpe ri rikil are chiʼ kqilo, kqasiqo, kqataʼ jas taq ukunel uyaʼom rukʼ o kqataʼ che jun chik we utz kunaʼo. Are kʼu, ri más utz kqabʼano rech kqetaʼmaj jas kpe ri rikil, are che qas kqatij jubʼiqʼ y kqanaʼo jas ubʼanik.

² Junam rukʼ wariʼ, rech kqanaʼ ri rutzilal ri Jehová pa qakʼaslemal, rajawaxik kqasikʼij uwach ri Biblia, ri e qawuj y kqataʼ chke nikʼaj chik jas bʼanom che kitewchixik rumal. Are kʼu, kʼate qas kqachʼobʼo che sibʼalaj utz ri Jehová, we kqatijtobʼej o kqanaʼ ri rutzilal pa qech wi chqajujunal (chasikʼij uwach Salmo 34:8). Jun kʼutbʼal, chqachomajampeʼ che kqaj kojux precursor regular, are kʼu rajawaxik kkʼojiʼ jun qakʼaslemal che xaq xiw kqatzukuj ri jastaq ri qas rajawaxik chqe. Weneʼ kiʼ mul qasikʼim uwach ri utzij ri Jesús, che ri Jehová kuya na ronojel ri rajawaxik chqe we are qas keqilij ri jastaq re ri uQʼatbʼal tzij, are kʼu weneʼ qanaʼom ta pa qakʼaslemal ri kraj kubʼij (Mat. 6:33). Tekʼuriʼ, rumal che qas kqakubʼsaj qakʼuʼx chrij ri ubʼim ri Jesús, xaq xiw chi kqaloqʼ ri jastaq che rajawaxik chqe, kʼi ta chi hora kqakoj pa ri qachak, y are más kqatzijoj chi ri utzij ri Dios. Rukʼ wariʼ, qas tajin kqil chik che ri Jehová qastzij wi kojuchajij. Y jeriʼ qas kqanaʼ pa qakʼaslemal ri rutzilal ri Jehová.

3. Junam rukʼ ri kubʼij Salmo 16:1, 2, ¿jachin taq kkʼut utzilal chke rumal ri Jehová?

³ Ri Jehová «utz kukʼ konojel», xuqujeʼ kukʼ ri e winaq che ketaʼm ta uwach (Sal. 145:9; Mat. 5:45). Are kʼu sibʼalaj keʼutewchij ri keloqʼoqʼen che y ri kepatanin che rukʼ ronojel kanimaʼ  (chasikʼij uwach Salmo 16:1, 2). Chqilampeʼ jujun chke ri utz taq jastaq ubʼanom ri Jehová chqe.

4. ¿Jas kubʼan ri Jehová che ukʼutik ri rutzilal chke ri kkimaj retaʼmaxik uwach?

⁴ Are chiʼ kqabʼan pa qakʼaslemal ri kqetaʼmaj chrij ri Jehová, kqil ri utzilal kuya chqe. Are chiʼ xqamaj retaʼmaxik kʼi jastaq chrij y xqamaj uloqʼoqʼexik, xojkunik xqakʼex ri qabʼantajik y xojqebʼ rukʼ (Col. 1:21). Y, are chiʼ xqajach ri qakʼaslemal che y xqabʼan qaqasanjaʼ, xukʼut más ri rutzilal chqe rumal che xuya bʼe chqe rech kkʼojiʼ jun utz retaʼmabʼal qakʼuʼx y jun utz qachilanik rukʼ (1 Ped. 3:21).

5. ¿Jas kʼutbʼal re ri rutzilal ri Jehová qilom are chiʼ kqatzijoj ri utzij?

⁵ Are chiʼ kqatzijoj ri utzij ri Dios, kqil kʼi kʼutbʼal re ri rutzilal ri Jehová. ¿La qas ta katchʼawik? E kʼi upatanelabʼ ri Jehová je ri kibʼantajik. Are chiʼ majaʼ kamaj retaʼmaxik chrij ri utzij ri Dios weneʼ xachomaj taj che katopan na chuchiʼ rachoch jun winaq che awetaʼm ta uwach rech kakʼut ri kubʼij ri Biblia chuwach. Are kʼu, kimik ronojel tiempo tajin kabʼan chik. Y xaq xiw ta wariʼ, rukʼ ri utobʼanik ri Jehová, sibʼalaj katkikotik are chiʼ katzijoj ri utzij. Xuqujeʼ anaʼom jas ubʼanom che atoʼik pa jalajoj taq jastaq. Jun kʼutbʼal, at utoʼm rech kʼo akochʼonik paneʼ xa katyaj lo chuchiʼ taq ja. Xuqujeʼ at utoʼm rech aninaq knaʼtaj ri texto re ri Biblia chawe che rajawaxik kakoj rukʼ jun winaq ri kraj kretaʼmaj más. Y uyaʼom achuqʼabʼ rech kaya ta kan utzijoxik ri utzij paneʼ ri e winaq kkaj taj kkitatabʼej (Jer. 20:7-9).

6. ¿Jas kubʼan ri Jehová che ukʼutik ri rutzilal rumal che kojutijoj?

⁶ Ri Jehová xuqujeʼ ukʼutum ri rutzilal chqe rumal che kojutijoj rech kqatzijoj ri utzij (Juan 6:45). Pa ri riqbʼal ibʼ che kbʼan chuxoʼl semana, kkʼut chqawach jas kqabʼano rech utz kqabʼan che ri tzijonem kukʼ ri winaq. Weneʼ kqaxeʼj jubʼiqʼ qibʼ are chiʼ kqamaj ubʼanik ri kʼakʼ taq jastaq che kkʼut chqawach pa ri utinamit ri Jehová. Are kʼu, we kqamaj ubʼanik ri kkʼut chqawach, kqilo che sibʼalaj utz kel ronojel chqawach kukʼ ri e winaq. Xuqujeʼ kbʼix chqe pa ri e riqbʼal ibʼ y pa ri e nimaʼq taq riqbʼal ibʼ che kqakʼex ri kqabʼan che utzijoxik ri utzij ri Dios. Wariʼ kraj kubʼij che weneʼ rajawaxik kqakʼex kʼi jastaq pa ri qakʼaslemal y pa ri qachomanik. Are kʼu, we jeʼ kqabʼano kqakʼut chuwach ri Jehová che kqaj kojutewchij. Chanim, chqanikʼoj jujun chke ri utz taq jastaq kuya ri Jehová chqe are chiʼ kqanimarisaj ri qachak che upatanixik, apastaneʼ ri kojriqitaj wi. Tekʼuriʼ kqilo jas kqabʼano rech kqanimarisaj más ri qachak che upatanixik.

7. ¿Jas tewchibʼal kqariqo we kqanimarisaj más ri qachak che upatanixik ri Jehová?

⁷ Kojqebʼ más rukʼ ri Jehová. Chqilampeʼ ri ukʼutbʼal ri qachalal Samuel * jun kʼamal bʼe che tajin kpatanin pa Colombia rachiʼl ri rixoqil. Rukʼ kikotemal tajin kkibʼan ri kiprecursorado pa ri congregación re ri tinamit jawi xkʼiy wi, are kʼu kkaj ketobʼan jawiʼ kajwataj wi más tobʼanik. Rech kekunik kebʼek, rajawaxik kʼo jujun jastaq kkikʼex pa ri kikʼaslemal. Ri qachalal Samuel kubʼij: «Xqabʼan ri kubʼij Mateo 6:33 y xaq xiw chi ri jastaq ri rajawaxik chqe kqaloqʼo. Are kʼu, ri más kʼax ubʼanik xqabʼano are che xqaya kan ri jeʼlikalaj qachoch che qaloqʼom chik». Pa ri kʼakʼ kicongregación, xkilo che xa jubʼiqʼ pwaq  ri rajawaxik chke. Rumal laʼ kubʼij: «Qilom che ri Jehová ukʼamom qabʼe y qas kutzalij uwach ri qachʼawem. Kqanaʼo che sibʼalaj kojqaj chuwach y kojuloqʼoqʼej». ¿La katkun at kanimarisaj más ri achak che upatanixik ri Jehová? We je kabʼano, katqebʼ más riʼ rukʼ y ri areʼ katuchajij na (Sal. 18:25).

8. ¿Jas kawetaʼmaj chrij ri xkibʼij ri qachalal Iván y ri al Viktoria?

⁸ Upatanixik ri Jehová kuya kikotemal chqe. Chojchoman chrij ri kkibʼij ri a Iván y ri al Viktoria, jun kʼulaj precursores che tajin kepatanin pa Kirguistán. Xkichomaj upatanixik más ri Jehová, rumal laʼ xkimaj uyaʼik tobʼanik che uwokik Ja rech Ajawbʼal. Ri qachalal Iván kubʼij: «Kqakʼis qibʼ che ubʼanik ri chak. Paneʼ bʼenaq taq qʼij sibʼalaj kojkosik, kqanaʼ nimalaj kikotemal rumal che qetaʼm che che ri Jehová tajin kqaya wi ronojel ri qachuqʼabʼ. Xuqujeʼ kuya nimalaj kikotemal chqe are chiʼ knaʼtaj chqe ri utz taq jastaq che xqabʼano y ri e utzalaj taq qachiʼl che xeqariqo» (Mar. 10:29, 30).

9. ¿Jas ubʼanom jun qachalal che unimarisaxik ri uchak che ri Dios paneʼ tajin kuriq kʼax, y jas uriqom rukʼ wariʼ?

⁹ Ri upatanixik ri Jehová kuya kikotemal chqe paneʼ kʼo kʼax tajin kqariqo. Are waʼ ri xuriq jun qachalal re África Occidental, al Mirreh ubʼiʼ, kʼo ta chi rachajil y are jun kunanel. Are chiʼ xukʼis kan ubʼanik ri uchak, xux precursora. Are kʼu, sibʼalaj keqʼoxow taq ri e bʼaq che ri ubʼaqil y are chiʼ kbʼe che utzijoxik utzij ri Dios xa jun hora kuchʼijo kbʼinik. Are kʼu, más kuchʼijo kkʼojiʼ pa ri predicación pública. E kʼo kʼi winaq keʼusolij y kuya etaʼmanik re ri Biblia chke y e jujun chke ri winaq keʼuchʼabʼej pa teléfono. ¿Jas xyaʼow uchuqʼabʼ rech kunimarisaj más ri uchak che ri Jehová? Ri areʼ kubʼij: «Sibʼalaj kinloqʼoqʼej ri Jehová y ri Jesucristo. Amaqʼel kinta nuchuqʼabʼ che ri Jehová rech kinkunik kinpatanij más» (Mat. 22:36, 37).

10. Junam rukʼ ri kubʼij 1 Pedro 5:10, ¿jas kuya ri Jehová chke ri kkikoj kichuqʼabʼ che upatanixik más?

¹⁰ Ri Jehová utz kubʼan che qatijoxik. Jun qachalal precursor a Kenny ubʼiʼ, tajin kpatanin pa ri tinamit Mauricio, kubʼij che qastzij wi wariʼ. Are chiʼ xretaʼmaj ri qas kukʼut ri Biblia, xbʼe ta chi pa ri universidad, xubʼan uqasanjaʼ y xux precursor regular. Ri areʼ kubʼij: «Kinkoj ronojel nuchuqʼabʼ rech kinbʼan we ri xubʼan ri qʼaxal tzij Isaías, che xubʼij: ‹In kʼolik riʼ. Chintaqaʼ la bʼik›» (Is. 6:8). Ri qachalal Kenny uyaʼom tobʼanik che uyakik kʼi Ja rech Ajawbʼal y che uqʼaxexik ri e wuj pa ri uchʼabʼal. Kubʼij: «Xaq xiw ta xintijox che ubʼanik ri nuchak, xaneʼ xwetaʼmaj jas jastaq kinkun ta che ubʼanik y jas bʼantajik rajawaxik kinkʼutu rech utz kinbʼan che upatanixik ri Jehová» (chasikʼij uwach 1 Pedro 5:10). Utz we kanikʼoj ri katkun che ubʼanik rech kapatanij más ri Jehová, jeriʼ kattijox más pa ri utinamit.

11. ¿Jas utz chak xkibʼan jujun qachalal re Corea del Sur, y jas kiriqom rukʼ wariʼ? (Chawilaʼ ri wachbʼal re ri uwach ri wuj).

¹¹ Ri Jehová xuqujeʼ kraj keʼutijoj ri e qachalal che pa kʼi junabʼ e Testigos chik. Are chiʼ xumaj ri nimalaj yabʼil re ri COVID-19, ri e kʼamal bʼe re jun congregación re Corea del Sur xkibʼij: «E jujun qachalal xkichomaj che kekun taj kkitzijoj ri utzij ri Dios rumal che e yawabʼ, are kʼu kimik kkibʼan pa videoconferencia. Oxibʼ qachalal ixoqibʼ che kʼo más che 80 kijunabʼ kenaw chi che ukojik ri kiteléfonos y computadoras. Y kimik ronojel taq qʼij kkitzijoj ri utzij ri Dios» (Sal. 92:14, 15). ¿La kawaj  kapatanij más ri Jehová rech kanaʼ más ri rutzilal pa akʼaslemal? Ri kqil chanim katutoʼ che ubʼanik wariʼ.

12. ¿Jas kubʼij ri Jehová chke ri kkikubʼsaj kikʼuʼx chrij?

¹² Chawetaʼmaj ukubʼsaxik akʼuʼx chrij ri Jehová. We kqakubʼsaj qakʼuʼx chrij y kqaya ronojel che, ri areʼ kubʼij che sibʼalaj kojutewchij na (Mal. 3:10). Jun qachalal che kel Colombia, al Fabiola ubʼi, xrilo che qastzij wariʼ. Are chiʼ kʼate xubʼan ri uqasanjaʼ xraj xux precursora regular, are kʼu xuchomaj che kkun taj, rumal che tajin kchakunik y ri pwaq che kuchʼako kajwataj che ri ufamilia. Rajawaxik kubʼan jubilar ribʼ, y wariʼ are jun jastaq che aninaq ta kyaʼik. Rumal laʼ, are chiʼ xukoj ri uwuj, xuta che ri Jehová che ktoʼ rumal. Ri areʼ kubʼij: «Are chiʼ kakoj awuj rech kawaj kabʼan jubilar awibʼ, sibʼalaj naj tiempo ksachiʼ ri asolicitud. Are kʼu ri wech in, aninaq xyaʼik, rumal laʼ sibʼalaj xinmay ri xkʼulmatajik». Are chiʼ kʼate kebʼ ikʼ qʼaxinaq, xumaj ubʼanik ri precursorado. Kimik kʼo más che 70 ujunabʼ y más che 20 junabʼ tajin kubʼan ri precursorado. Pa ri tiempo riʼ, e utoʼm ocho winaq rech xkibʼan kiqasanjaʼ. Kubʼij: «Jujun mul kinnaʼo che kʼo ta nuchuqʼabʼ, are kʼu ronojel qʼij ri Jehová kinutoʼ che utzʼaqatisaxik ri nutiempo».

13, 14. ¿Jas kʼutbʼal kojkitoʼ che ukubʼsaxik qakʼuʼx chrij ri Jehová y rech kqanimarisaj ri qachak che?

¹³ Chakubʼsaj akʼuʼx chrij ri Jehová junam rukʼ ri xkibʼan ri upatanelabʼ ojer. Pa  ri Biblia keriqitaj kʼutbʼal kech winaq che xkikoj kichuqʼabʼ che upatanixik más ri Jehová. Kʼi mul, nabʼe rajawaxik kʼo xkibʼano rech xetewchixik. Jun kʼutbʼal, ri Dios xutewchiʼj ri Abrahán rumal che are nabʼe xuya kan ri rachoch «paneʼ man retaʼm ta kʼut jawijeʼ kbʼe wi» (Heb. 11:8). Ri Jacob xuqujeʼ xtewchixik, are kʼu nabʼe rajawaxik xukoj chuqʼabʼ rukʼ jun ángel (Gén. 32:24-30). Y, rech ri israelitas xyaʼtaj ri Tzujum Ulew chke, rajawaxik che nabʼe ri e kojol tabʼal toqʼobʼ rukʼ kowil kʼuʼx xeʼok pa ri nimalaj jaʼ re ri Jordán (Jos. 3:14-16).

¹⁴ Xuqujeʼ kojkunik kqetaʼmaj kʼi jastaq chkij ri Testigos re ri qaqʼij che kinimarisam ri kichak che upatanixik ri Jehová y kikubʼsam kikʼuʼx chrij pa jalajoj taq kʼax. Jun kʼutbʼal, ri qachalal Payton y ri al Diana ri rixoqil, amaqʼel kkisikʼij uwach ri e kʼutunem chrij ri kikʼaslemal e nikʼaj chi qachalal che kʼo pa ri serie «Se ofrecieron para ayudar». * Ri qachalal Payton kubʼij: «Are chiʼ tajin kqasikʼij uwach, jetaneʼ tajin kqil jun winaq che tajin kutij jun utzalaj rikil. Wariʼ kubʼan chqe che kqaj oj kqanaʼ ri rutzilal ri Jehová pa qakʼaslemal». Are chiʼ xqʼax ri tiempo, wajun kʼulaj riʼ xebʼe pa jun chi tinamit che kajwataj wi tobʼanik. ¿La asikʼim kiwach at ri e kʼutunem riʼ? Y, ¿la awilom ri videos Predicación en lugares apartados: Australia y Predicación en lugares apartados: Irlanda, che kriqitaj pa jw.org? Ronojel wariʼ kuya tobʼanik chawe rech kawaj kapatanij más ri Jehová.

15. ¿Jas kojkitoʼ wi ri e utz taq qachiʼl?

¹⁵ Cheʼatzukuj utz taq awachiʼl. We kʼo jun rikil kqaj kqetaʼmaj jas ubʼanik, rajawaxik kojkʼojiʼ kukʼ ri e winaq che utz kkinaʼ ri rikil riʼ. Junam rukʼ wariʼ, we kojkʼojiʼ kukʼ winaq che kkikoj kichuqʼabʼ che upatanixik más ri Jehová, xuqujeʼ oj kqaj kqabʼan qe. Jeriʼ xkibʼan ri a Kent y ri al Verónica. Ri a Kent kubʼij: «Ri e qachiʼl y ri qafamilia, kkibʼij chqe che kqabʼan chi nikʼaj jastaq che upatanexik más ri Jehová. Xqilo che kojkunik kqapatanij más ri Jehová we amaqʼel keqachilaj ri je tajin kkibʼano». Kimik, e precursores especiales pa ri tinamit Serbia.

16. Junam rukʼ ri kubʼij ri kʼutbʼal re Lucas 12:16-21, ¿jasche rajawaxik kqakʼex jujun jastaq pa ri qakʼaslemal?

¹⁶ We kʼo rajawaxik kakʼexo rech kapatanij más ri Jehová, chakʼexaʼ. ¿La rajawaxik che kʼo ta chi jun jastaq qe pa ri qakʼaslemal rech kojqaj chuwach ri Jehová? Je taj. Utz we kʼo jujun jastaq qe rech kojkikotik (Ecl. 5:19, 20). Are kʼu, we kqaj taj kqanimarisaj ri qachak che ri Jehová xa rumal che kqaj taj kqakʼex jujun jastaq pa ri qakʼaslemal. Weneʼ kojjunamataj rukʼ ri qʼinom achi che xchʼaw ri Jesús chrij, xsachan ri Dios pa ujolom xa rumal ri jastaq kʼo rukʼ (chasikʼij uwach Lucas 12:16-21). Jun qachalal Christian ubʼiʼ, che kel Francia, kubʼij: «Tajin ta chi kinkoj nuchuqʼabʼ y nutiempo che upatanixik ri Jehová y tajin ta chi kwilij ri nufamilia». Ri areʼ y ri rixoqil xeʼux precursores, are kʼu rajawaxik xkiya kan ri kichak. Rech kkiriq ri jastaq ri kajwataj chke, xkibʼan jun alaj kikʼay y xekikot rukʼ ri jubʼiqʼ kkichʼako. ¿La utz ri xkibʼano? Ri qachalal Christian kubʼij: «Sibʼalaj kojkikot che utzijoxik ri utzij ri Dios, rumal che ri e winaq kketaʼmaj más uwach ri Jehová».

17. ¿Jasche e kʼo jujun kkaj taj kkibʼan kʼakʼ taq jastaq che upatanixik más ri Jehová?

¹⁷ Chabʼanaʼ kʼakʼ taq jastaq che upatanixik más ri Jehová (Hech. 17:16, 17; 20:20, 21). Jun precursora re Estados Unidos  al Shirley ubʼiʼ, xrilo che rajawaxik kukʼex jujun jastaq are chiʼ xumaj ri nimalaj yabʼil re ri COVID-19. Nabʼe, kuxeʼj ribʼ kutzijoj ri utzij ri Dios pa teléfono. Are kʼu, chiʼ xopan ri solinel re circuito pa ri ucongregación, xkʼut chuwach jas kbʼan che ubʼanik. Rumal laʼ, amaqʼel kubʼan chik. Ri areʼ kubʼij: «Kimik sibʼalaj kinkikotik kintzijoj ri utzij ri Dios pa teléfono, junam ta rukʼ nabʼe kanoq. Más e kʼi winaq kojtzijon kukʼ chuwach ri keqariqo are chiʼ kojbʼe chuchiʼ taq ja».

18. ¿Jas kojtowik rech kqanimarisaj ri qachak che ri Jehová paneʼ kʼo kʼax kqariqo?

¹⁸ Chatchoman chrij ri kawaj kabʼano y chakojoʼ achuqʼabʼ che ubʼanik. Are chiʼ kqariq kʼax, kqabʼan qachʼawem che ri Jehová y kojchoman chrij jas kqabʼan che uqʼaxexik (Prov. 3:21). Ri al Sonia, jun precursora regular che kpatanin pa jun alaj jupuq re ri chʼabʼal romaní re Europa, kubʼij: «Utz kwilo kintzʼibʼaj chuwach jun wuj ronojel ri kwaj kinbʼano y kinnakʼo jawiʼ ri qas qʼalaj wi. Pa uwiʼ ri numesa nuyaʼom jun wuj ri kʼo wi jun wachbʼal re jun bʼe che kujach bʼi ribʼ pa jalajoj taq kʼolbʼal. Are chiʼ kinchaʼ ubʼanik jun jastaq, kwil ri wachbʼal y kinchoman chrij ri kinukʼam wi bʼik». Y are chiʼ ri al Sonia kuriq kʼax, kchoman chrij ri utz taq jastaq kʼo rukʼ. Kubʼij: «Ri kʼax kinqʼaxej kukʼut kebʼ jastaq chnuwach, we kinchomaj che kinkun che ubʼanik ri kwaj, kinkun riʼ, we kinchomaj che kinkun taj, kinkun ta riʼ. Nim ubʼanik che kkʼojiʼ jun utz nuchomanik».

19. ¿Jas kqabʼan che ukʼutik che kqamaltyoxij ri utz taq jastaq uyaʼom ri Jehová chqe?

¹⁹ Ri Jehová kʼi kubʼan che qatewchixik. Kojkunik kqamaltyoxij ri uyaʼom chqe we kqakoj ronojel qachuqʼabʼ che uyaʼik uqʼij (Heb. 13:15). Wariʼ kraj kubʼij che kqabʼan kʼakʼ taq jastaq rech kqanimarisaj ri qachak che upatanixik. We je kqabʼano, kojutewchij na más ri Jehová. Rumal laʼ, ronojel taq qʼij chqakojoʼ qachuqʼabʼ che unaʼik ri rutzilal ri Jehová pa qakʼaslemal. Rukʼ wariʼ kojux junam rukʼ ri Jesús che xubʼij: «Ri nuwa are waʼ chi kinbʼan ri urayibʼal ri xintaqow uloq, xuqujeʼ chi kintzʼaqatisaj ri uchak» (Juan 4:34).