• «Jetaneʼ xinnaʼo che ri wachajil tajin kuchʼabʼej chi jun ixoq».

• «Xinnaʼ kʼixbʼal, xinnaʼo che kʼo ta nupatan».

• «Xinnaʼo che xaq nutukel in kʼolik. Y kinkun taj kinbʼij che jun chik ri tajin kinkʼulmaj».

• «Xinnaʼo che ri Jehová kel ta ukʼuʼx chwe».

Ri e tzij riʼ kukʼut ri kunaʼ jun ixoq are chiʼ ri rachajil kril pornografía. Y, we pa kʼi ikʼ o junabʼ chkʼuyal tajin kril ri pornografía, weneʼ ri rixoqil kukubʼsaj ta chi ukʼuʼx chrij. Jun ixoq xubʼij: «Xaq kʼateʼ kinnaʼo che jetaneʼ ri wachajil kinchʼobʼ ta uwach. Y kinbʼij we kʼo nikʼaj chik ubʼim ta chwe».

¿La rilom pornografía ri awachajil? a Wajun kʼutunem riʼ xbʼanik rech katutoʼo. E kʼo pixabʼ rech ri Biblia che kkiya kubʼsal kʼuʼx chawe, y che xaq ta atukel at kʼolik, xaneʼ kʼo ri Jehová che atoʼik y kuya achuqʼabʼ rech katbʼison taj y katutoʼ pa ri akojonik. b

Qastzij che weneʼ katkun taj kawil ronojel ri kubʼan ri awachajil, are kʼu kʼo katkunik kabʼano rech kanaʼ jamaril. Chawilaʼ jujun taq pixabʼ che katutoʼo.

Machomaj che at ri at ajmak. Weneʼ jujun taq mul ri ixoqil kunaʼo che areʼ ajmak che ri rachajil kril pornografía. Chqilampeʼ, ri al Alicia c kuchomaj che umak ri areʼ che ri rachajil kril pornografía y rumal laʼ kubʼij: «¿Jasche ri wachajil are utz keril nikʼaj chi ixoqibʼ chnuwach in?». Y jujun ixoqilal kkichomaj che kimak areʼ ri tajin kkʼulmatajik. Ri al Daniela kubʼij: «Sibʼalaj kpe woyowal are chiʼ kwilo che ri wachajil kuya ta kan rilik pornografía. Y xinnaʼo che in ri ajmak che ri tajin kkʼulmataj pa ri qakʼulanem».

We tajin kakʼulmaj wariʼ, chnaʼtaj chawe che ri Jehová kubʼij taj che at ri at ajmak rumal ri kubʼan ri awachajil. Santiago 1:14 kubʼij: «Chkijujunal ketaqchiʼx che mak, are taq bʼenaq  kikʼuʼx chrij ri kirayibʼal ri e areʼ, kekʼam bʼik rumal» (Rom. 14:12; Filip. 2:12). Chnaʼtaj chawe che chuwach ri Jehová kʼo ta amak at. Xaneʼ nim kril wi ri asukʼilal (2 Crón. 16:9).

We ri awachajil kril pornografía kraj ta kubʼij che at ri at ajmak. Uchʼobʼik wariʼ katutoʼo. Ri e winaq che nim ketaʼmabʼal kkibʼij che ri achijabʼ che kkil pornografía kuya rayinik chke che ri ixoqibʼ kekun taj kkiyaʼo.

Mape awoyowal. Ri al Catarina kubʼij che chi chaqʼabʼ chi paqʼij kchoman chrij ri pornografía che kril ri rachajil. Xaq are kchoman chrij wariʼ. Ri al Francisca kubʼij: «Are chiʼ kʼo ta ri wachajil kinriq taj jas kinbʼano. Ronojel taq qʼij kwaj kwetaʼmaj jawiʼ kʼo wi ri wachajil». E nikʼaj chi ixoqibʼ kkibʼij che kkinaʼ kʼixbʼal are chiʼ e kʼo kukʼ qachalal che weneʼ ketaʼm ri tajin kubʼan ri kachajil. Y e nikʼaj chik kkibʼij che xaq kitukel e kʼolik rumal che weneʼ kkichomaj che kʼo ta kchʼobʼow ri tajin kkikʼulmaj.

Qastzij che kʼo ta kubʼano kanaʼ wariʼ, are kʼu we xaq are amaqʼel katchoman chrij xa kubʼan kʼax chawe. Ri katkunik kabʼano are che más katchoman chrij ri awachilanik rukʼ ri Jehová, rumal che wariʼ kuya achuqʼabʼ rech kaya ta kan upatanixik (Sal. 62:2; Efes. 6:10).

¿Jas kubʼan che atoʼik usikʼixik ri Biblia y katchoman chrij? Ri Biblia kchʼaw chkij ixoqibʼ che xkiriq kʼi kʼax pa ri kikʼaslemal, are kʼu xkinaʼ jamaril pa kanimaʼ are chiʼ xkibʼij ronojel che ri Jehová ri tajin kkikʼulmaj. Paneʼ ri Jehová xresaj ta ri kʼaxkʼolil che xkiriqo, are kʼu xuya jamaril pa kanimaʼ. Chatchoman chrij ri xukʼulmaj ri Ana, che «rukʼ ronojel ranimaʼ katajin koqʼ rukʼ kʼayil». Ri areʼ «xok che ubʼanik chʼawem chuwach ri Ajawaxel», xunaʼ jamaril pa ranimaʼ paneʼ retaʼm taj jas kkʼulmataj na (1 Sam. 1:10, 12, 18; 2 Cor. 1:3, 4).

Chataʼ tobʼanik chke ri e kʼamal bʼe pa ri acongregación. Ri e areʼ «keʼux na jun toʼbʼal ibʼ chuwach ri kaqiqʼ, xuqujeʼ jun panibʼal chuwach ri kaqiqʼ jabʼ» (Is. 32:2). O weneʼ kkibʼij chawe che kattzijon rukʼ jun qachalal ixoq che kakubʼsaj akʼuʼx chrij rech kabʼij che ronojel ri kanaʼo (Prov. 17:17).

Weneʼ kachomaj che katkun taj katoʼ ri awachajil rech kuya kan rilik pornografía. Are kʼu katkunik. Ri Biblia kubʼij che are chiʼ  ksukʼumax jun kʼax che tajin kkʼulmatajik o are chiʼ jun winaq kutoʼ ribʼ chuwach ri ukʼulel, «are kʼo na kipatan kebʼ chuwach xa jun» (Ecl. 4:9-12). E kʼo kebʼinik che kʼax ta uyaʼik kan rilik pornografía are chiʼ ri e kebʼ kkitoʼ laʼ kibʼ rech kkʼojiʼ chi jumul utzilal pa ri kʼulanem.

Rajawaxik kawilo we ri awachajil kraj kuya kan rilik pornografía y kukoj uchuqʼabʼ chuwach. ¿La awilom che kutaʼ tobʼanik che ri Jehová y la utzukum ri kitobʼanik ri kʼamal taq bʼe rech kuya kan rilik? (2 Cor. 4:7; Sant. 5:14, 15). ¿La kʼo tajin kubʼano rech kril ta chi pornografía? Chojchoman chrij wariʼ, ¿la qas ta chi kril ri internet rech jeriʼ kqaj ta chi che rilik pornografía? (Prov. 27:12). ¿La nim kril wi ri tobʼanik che tajin kaya che y la kubʼij chawe ronojel ri kubʼano? We kubʼan wariʼ qastzij riʼ che katkunik katoʼo.

¿Jas kabʼan che utoʼik? Chawilaʼ ri xubʼan ri al Feliciana. Ri areʼ kʼulan rukʼ Iván, che are chiʼ kʼa nitzʼ na xril pornografía. Feliciana xutoʼ ri rachajil rech kril ta pornografía. Iván kubʼij: «Kinkunik kinbʼij ronojel che ri wixoqil ri kinkʼulmaj. Ri areʼ nim kinril wi. Kinutoʼo rech kinbʼan ta jastaq che kubʼano che kwil pornografía y amaqʼel kril ri kinbʼano y ri kwilo rech kinqaj ta chi chupam. Y kril ri kinbʼan che ukojik ri internet». Ri al Feliciana kʼax kunaʼo are chiʼ krilo che ri rachajil utz kril ri pornografía. Are kʼu kubʼij: «Paneʼ sibʼalaj kinbʼisonik y kpe woyowal, wetaʼm che wariʼ ktobʼan ta che rech kuya kan rilik. Nabʼe kojtzijon chrij ri tajin kubʼan ri areʼ, tekʼuriʼ kojtzijon chrij ri kqabʼano rech kinbʼison taj y kpe ta woyowal».

Ri tzijonem che kbʼanik ktobʼan che ri achajil rech kuya kan rilik ri pornografía. Xuqujeʼ ktobʼan che ri ixoqil rech kukubʼsaj chi jumul ukʼuʼx chrij ri rachajil. Are chiʼ jun achajil kubʼij che ri rixoqil ri tajin kukoj wi uchuqʼabʼ, jas ri tajin kubʼano o jawchiʼ kbʼe wi, ri ixoqil más kukubʼsaj ukʼuʼx riʼ chrij.

¿La katkun at kabʼan wariʼ rech katoʼ ri awachajil? We kawilo che katkunik katoʼo. Utz che junam kiwil wajun kʼutunem riʼ. ¿Jas chomanik rajawaxik kkʼojiʼ rukʼ ri awachajil? Rajawaxik kuya kan rilik ri pornografía y kubʼan nikʼaj chi jastaq rech kakubʼsaj chi jumul akʼuʼx chrij. Rajawaxik che ri awachajil kpe ta royowal are chiʼ kattzijon rukʼ chrij ri pornografía y rajawaxik kuchʼobʼo che tajin kubʼan kʼax chawe ri tajin kubʼano. ¿E ri at? ¿Jas rajawaxik kabʼano? Chatoʼo ri awachajil chuwach ri tajin kukoj wi uchuqʼabʼ rech kakubʼsaj chi akʼuʼx chrij. Utz che ri ix kebʼ kiwetaʼmaj jas kbʼanow che jun winaq che kril pornografía y jas rajawaxik kubʼan chuwach rech kuya kan rilik. d

 We kiwilo che kuyak chʼoj chixoʼl are chiʼ kixtzijon chrij wariʼ, utz che kibʼij che jun kʼamal bʼe che kikubʼsaj ikʼuʼx chrij che kkʼojiʼ iwukʼ are chiʼ kixtzijonik. Chnaʼtaj chawe che we ri awachajil xkunik xuya kan rilik ri pornografía, weneʼ at kukʼam bʼi nim tiempo rech kakubʼsaj chi jumul akʼuʼx chrij. Kaya ta kan ukojik achuqʼabʼ. Rumal che are chiʼ kqʼax ri tiempo kiriq chi na jumul kikotemal pa ri ikʼulanem (Ecl. 7:8; 1 Cor. 13:4).

Y we ri awachajil kqaj chi jumul che rilik pornografía, ¿la kraj kubʼij che kunaʼ ta kʼax pa ranimaʼ o kkun taj kuya kan rilik? Je ta wariʼ. Rumal che we kʼamanaq che kril pornografía, weneʼ rajawaxik kukoj uchuqʼabʼ chuwach pa ronojel ri ukʼaslemal. We kuchajij ta ribʼ paneʼ qʼaxinaq chi kʼi junabʼ weneʼ kumajij chi rilik. Rech kukʼulmaj ta chi wariʼ rajawaxik kuchajij ribʼ chuwach paneʼ kunaq chi kan che uyaʼik (Prov. 28:14; Mat. 5:29; 1 Cor. 10:12). «Rajawaxik kkʼojiʼ jun kʼakʼ ichomanik» y kiwetzelaj «ri lawaloyil»; chuxoʼl wariʼ kʼo ri rilik pornografía y nikʼaj chi tzʼil taq jastaq, junam rukʼ ri masturbación (Efes. 4:23; Sal. 97:10; Rom. 12:9). ¿La kkun ri awachajil kuya kan wariʼ? We kkunik, qastzij riʼ che kixkunik kixkikot chi jumul. e

¿Y we ri awachajil kukoj ta uchuqʼabʼ rech kuya kan rilik pornografía? Qastzij riʼ che kʼi mul katbʼisonik, kanaʼo che kʼo ta apatan, y che kpe awoyowal rumal ri kubʼano. Chabʼij ronojel che ri Jehová, wariʼ katutoʼo rech kanaʼ jamaril (1 Ped. 5:7). Kaya ta kan usikʼixik ri Biblia, ubʼanik achʼawem rech katqebʼ más rukʼ ri Jehová y kawil na che ri Jehová katutoʼo. Ri Jehová kʼo kukʼ «ri ubʼanom chʼaqataʼq ri kanimaʼ» y kraj che kkinaʼ chi jumul kikotemal (Sal. 34:18). Chakojoʼ achuqʼabʼ rech katux jun utz upatanel ri Jehová, chatzukuj ri kitobʼanik ri kʼamal taq bʼe y kaya ta kan ukubʼsaxik akʼuʼx che weneʼ kopan na jun qʼij ri awachajil kuya kan rilik ri pornografía (Rom. 2:4; 2 Ped. 3:9).