1. ¿Jasche ri babilonios xkimayo are chiʼ xkil ri Daniel?

 ARE chiʼ ri Daniel kʼa ala na ri babilonios naj xkikʼam wi bʼik, are kʼu sibʼalaj xkimayo are chiʼ xkilo. Y are más xkil ri uwachbʼal, jun ala che «utz [k]kaʼyik, ri man kʼo ta [u]yabʼ» che kpe pa jun familia che nim ubʼanik (1 Sam. 16:7). Rumal laʼ, ri babilonios xkikʼut kʼi jastaq chuwach rech kux jun junam kukʼ (Dan. 1:3, 4, 6).

2. ¿Jas xuchomaj ri Jehová chrij ri Daniel? (Ezequiel 14:14).

² Ri Daniel sibʼalaj xloqʼoqʼex rumal ri Jehová, are kʼu rumal ta ri kkaʼyik, xaneʼ rumal ri utz taq ubʼantajik. Y qetaʼm che ri Jehová qas xuloqʼoqʼej ri Daniel, rumal che are chiʼ kʼateʼ 20 ujunabʼ xuqujeʼ xchʼaw chrij are chiʼ xtzijon chkij ri Noé y ri Job, achijabʼ che xkipatanij ri Jehová rukʼ sukʼilal pa kʼi taq junabʼ (Gén. 5:32; 6:9, 10; Job 42:16, 17; chasikʼij uwach Ezequiel 14:14). Y ri Jehová xuya ta kan uloqʼoqʼexik ri Daniel, che kʼi junabʼ xkʼasiʼk (Dan. 10:11, 19).

3. ¿Jas kqil na pa wajun kʼutunem riʼ?

³ Pa wajun kʼutunem riʼ, kqil na kebʼ ubʼantajik ri Daniel che xubʼano che nim xil wi rumal ri Jehová. Nabʼe, keqil na ri e bʼantajik riʼ che xukʼut ri Daniel are chiʼ xukʼulmaj jujun taq kʼax. Tekʼuriʼ kqil na ri xubʼano rech xkunik xukʼut ri e bʼantajik riʼ. Y kʼisbʼal, kqil na ri kqabʼano rech kojkunik kqesaj uwach. Paneʼ wajun kʼutunem riʼ xbʼan chke ri alabʼom alitomabʼ, are kʼu qonojel kʼo kqetaʼmaj chrij ri Daniel.

4. ¿Jampaʼ xukʼut ri Daniel che xuxiʼj ta ribʼ?

⁴ Ri winaq che kkixiʼj ta kibʼ kkiya ta kan ubʼanik ri utzilal. Daniel are jun ala che xuxiʼj ta ribʼ. Chqilaʼ che kamul xukʼut ri Daniel wajun bʼantajik riʼ. Ri nabʼe xkʼulmatajik are chiʼ weneʼ kebʼ junabʼ chik che ri babilonios kisachisam uwach ri Jerusalén. Ri qʼatal tzij Nabucodonosor xuxiʼj ribʼ are chiʼ xrachikʼaj jun nimalaj wachbʼal o tzʼaq. Tekʼuriʼ xuya taqanik chke ri ajnoʼjabʼ xuqujeʼ ri Daniel che kkibʼij che ri kraj kubʼij ri rachikʼ, we kkibʼij ta ri kraj kubʼij ri rachikʼ keʼukamisaj konojel (Dan. 2:3-5). Ri Daniel rajawaxik che aninaq kʼo kubʼano rumal che e kʼi kʼo pa kʼax ri kikʼaslemal. Rumal laʼ «xutzʼonoj kʼu che chi chuyaʼ na kebʼ oxibʼ qʼij che rech kkunik kutzijoj ri ichikʼ che xuqujeʼ ri kel kubʼij» (Dan. 2:16). Ri Daniel xajwatajik che kuxiʼj ta ribʼ y che kkʼojiʼ nim ukojonik. ¿Jasche? Rumal che ri Biblia kubʼij taj che ri Daniel nabʼe kanoq xuya ubʼixik ri kraj kubʼij jun achikʼ. Ri Daniel xchʼaw kukʼ ri oxibʼ rachiʼl, ri Sadrac, Mesac y Abednego, b «rech kkitzʼonoj tobʼanik che ri Dios ri kʼo pa ri kaj» (Dan. 2:18). Ri Jehová xutatabʼej ri kichʼawem, rumal laʼ xkunik xuya ubʼixik ri kraj kubʼij ri rachikʼ ri qʼatal tzij. ¡Ri Daniel y ri e rachiʼl xekamisax taj!

5. ¿Jampaʼ xukʼut chi jumul ri Daniel che kuxiʼj ta ribʼ?

⁵ Are chiʼ ri Daniel ubʼim chi ri kraj kubʼij ri rachikʼ ri Nabucodonosor xuqujeʼ xuriq jun chi kʼax che rajawaxik xukʼutu che kuxiʼj ta ribʼ. Ri Nabucodonosor xubʼan chi jun xibʼibʼalalaj achikʼ, xrachikʼaj jun nimalaj cheʼ. Ri Daniel xuxiʼj ta ribʼ y xubʼij che ri kraj kubʼij ri rachikʼ. Xubʼij che che kchʼujarik y che kqʼax na jun tiempo che kuqʼat ta chi tzij (Dan. 4:25). Ri Nabucodonosor weneʼ xutaq ta ukamisaxik riʼ ri Daniel we ta xuchomaj che xa kbʼan kʼax che rumal. Are kʼu ri Daniel xubʼij che ri Nabucodonosor ri kraj kubʼij ri rachikʼ.

6. ¿Jas xtoʼw ri Daniel rech xuxiʼj ta ribʼ?

 ⁶ ¿Jas xtoʼw ri Daniel rech xuxiʼj ta ribʼ che ri xukʼulmaj pa ronojel ri ukʼaslemal? Weneʼ ri xtoʼwik are ri utz kikʼutbʼal ri utat unan. Ri areʼ xkinimaj ri taqanik che xuya ri Jehová chke ri tat nan israelitas y xkikʼut ri uTaqanik ri Dios chuwach ri Daniel (Deut. 6:6-9). Ri Daniel xaq xiw ta retaʼm ri Diez Mandamientos che xyaʼ chke ri israelitas, xaneʼ xuqujeʼ retaʼm chrij ri jastaq che utz taj kkitijo (Lev. 11:4-8; Dan. 1:8, 11-13). c Y retaʼm ri kkikʼulmaj ri keniman ta che ri Dios (Dan. 9:10, 11). Ronojel ri xukʼulmaj pa ri ukʼaslemal, xubʼano che más xukubʼsaj ukʼuʼx chrij ri Jehová y chkij ri ángeles (Dan. 2:19-24; 10:12, 18, 19).

7. ¿Jas más xtoʼw ri Daniel rech xuxiʼj ta ribʼ? (Xuqujeʼ chawilaʼ ri wachbʼal).

⁷ Ri Daniel amaqʼel xusikʼij ri xkitzʼibʼaj kan ri profetas, junam rukʼ ri xutzʼibʼaj kan ri Jeremías. Rukʼ wariʼ ri Daniel xretaʼmaj che ri judíos naj ta chi kraj keʼel bʼi pa Babilonia (Dan. 9:2). Weneʼ más xukubʼsaj ukʼuʼx chrij ri Jehová are chiʼ xrilo che ronojel ri profecías tajin ketzʼaqatik. Are chiʼ jun winaq kukubʼsaj ukʼuʼx chrij ri Jehová kuxiʼj ta ribʼ (chajunamaj wajun chomanik riʼ rukʼ Romanos 8:31, 32, 37-39). Ri xtoʼw ri Daniel are che amaqʼel xubʼan uchʼawem che ri Jehová (Dan. 6:10). Kubʼij che ri kmakun wi, ri kunaʼo y kutaʼ ri utobʼanik (Dan. 9:4, 5, 19). Ri Daniel xalax ta rukʼ wajun bʼantajik riʼ, che kuxeʼj ta ribʼ. Ri xubʼano rech kkʼiy wajun bʼantajik riʼ are che xunikʼoj ri uTzij ri Dios, xubʼan uchʼawem y xukubʼsaj ukʼuʼx chrij ri Jehová.

8. ¿Jas kojtoʼwik rech kqaxeʼj ta qibʼ?

⁸ Paneʼ ri qatat qanan kkixiʼj ta kibʼ y kkibʼij chqe che xuqujeʼ kqaxiʼj ta qibʼ, are kʼu wariʼ kqechbʼej ta oj. Wajun bʼantajik riʼ kjunamataj rukʼ jun chak: rajawaxik kqakoj qachuqʼabʼ rech kqetaʼmaj. Rech kojkun che ubʼanik jun chak rajawaxik qas kqil ri kubʼan ri ajtij y kqesaj uwach. Junam rukʼ, rech kqaxiʼj ta qibʼ rajawaxik kqil ri kkibʼan ri kkixiʼj ta kibʼ y kqesaj kiwach. ¿Jas kqetaʼmaj chrij ri Daniel? Che rajawaxik kqanikʼoj ri Biblia, kojux rachiʼl ri Jehová, kqabʼan qachʼawem rukʼ ronojel qanimaʼ y kqakubʼsaj qakʼuʼx che amaqʼel kojutoʼo. We kqabʼan wariʼ, kqaxeʼj ta qibʼ riʼ are chiʼ kbʼan kʼax chqe pa ri qakojonik.

9. ¿Jas utzilal kqariqo are chiʼ kqaxiʼj ta qibʼ?

⁹ We kqaxiʼj ta qibʼ kqariq na kʼi tewchibʼal. Chojchoman chrij ri xukʼulmaj ri a Ben, d che kel pa Alemania. Are chiʼ kʼo pa ri escuela, konojel kekojon chrij ri evolución y kkibʼij che qastzij ta ri kubʼij ri Biblia chrij ri ubʼanom ri Dios. Xbʼix che che kuqʼalajisaj chkiwach konojel jasche kukojo che are ri Dios xbʼanow ronojel y ri areʼ xuxiʼj ta ribʼ xuqʼalajisaj chkiwach konojel. ¿Jas xkʼulmatajik? Ri areʼ xubʼij: «Ri ajtij qas xutatabʼej ri xinbʼij y xuya jun copia chke konojel ri e wachiʼl chrij ri xinqʼalajisaj chkiwach». ¿Jas xkibʼan ri e rachiʼl ri a Ben? Ri areʼ kubʼij: «E kʼi xinkitatabʼej y xkibʼij chwe che kkimay ri xinbʼij chke». Ri ukʼutbʼal kukʼut  chqawach che ri winaq che kkixiʼj ta kibʼ, kubʼano che ri e nikʼaj chik nim kekilo y che kkaj kketaʼmaj más chrij ri Jehová. Nim ubʼanik che kqaxiʼj ta qibʼ.

10. ¿Jas riʼ ri sukʼilal?

¹⁰ Pa ri Biblia, ri tzij «sukʼilal» are kchʼaw chrij ri loqʼoqʼebʼal che kunaʼ jun winaq che jun chik. Kʼi taq mul are kchʼaw chrij ri loqʼoqʼebʼal che kunaʼ ri Dios chke ri upatanelabʼ. Xuqujeʼ kchʼaw chrij ri loqʼoqʼebʼal che kkinaʼ ri upatanelabʼ ri Dios chbʼil taq kibʼ (2 Samuel 9:6, 7). Ri Jehová kraj che ri oj xuqujeʼ kojux sukʼ. Are chiʼ kqʼax ri tiempo, más kojux sukʼ. Wariʼ xilitaj rukʼ ri profeta Daniel.

11. ¿Jas kʼax xuriq ri Daniel are chiʼ más 90 chi ujunabʼ? (Chawilaʼ ri wachbʼal re ri uwach ri wuj).

¹¹ Pa ronojel ri ukʼaslemal, ri Daniel kʼi taq mul xukʼut sukʼilal che ri Jehová. Are kʼu, are chiʼ 90 chi ujunabʼ xuriq kʼax ri usukʼilal. Pa wajun tiempo riʼ, ri Babilonia kʼo pa kiqʼabʼ ri medos y ri persas y ri qʼatal tzij are ri Darío. Jujun chke ri winaq che nim kibʼanik pa ri qʼatbʼal tzij, itzel kkil ri Daniel y nim ta kkil wi ri Jehová. Rumal laʼ xkitzukuj ri xkibʼano rech kkisachisaj uwach ri Daniel, xkibʼano che ri Darío xuya jun taqanik che xuya pa kʼax ri usukʼilal ri Daniel. Rajawaxik kukʼutu we are sukʼ che ri Dios o che ri qʼatal tzij. Rech kukʼut sukʼilal che ri qʼatal tzij rajawaxik kubʼan ta uchʼawem che ri Dios pa 30 qʼij. Are kʼu ri Daniel xubʼan ta wariʼ, xaneʼ xux sukʼ che ri Jehová y rumal laʼ xkʼaq bʼi kukʼ ri e koj. Ri Jehová xutoʼo y xutewchij ri usukʼilal (Dan. 6:12-15, 20-22). ¿Jas kojtoʼwik rech kojux sukʼ junam rukʼ ri Daniel?

12. ¿Jas xubʼan ri Daniel rech xux sukʼ che ri Jehová?

¹² Rech kojux sukʼ che ri Jehová rajawaxik qas kqaloqʼoqʼej. Ri Daniel xux sukʼ che ri Jehová rumal che kuloqʼoqʼej. Weneʼ ri uloqʼoqʼebʼal ri Daniel che ri Jehová xkʼiyik are chiʼ xchoman chrij ri utz taq ubʼantajik y ri ubʼanom che ukʼutik (Dan. 9:4). Ri Daniel amaqʼel kchoman chrij ri utzilal che uyaʼom ri Jehová che y che ri utinamit (Dan. 2:20-23; 9:15, 16).

13. a) ¿Jas kʼax kkiriq ri alabʼom alitomabʼ che kkipatanij ri Jehová? Chayaʼ jun kʼutbʼal. (Xuqujeʼ chawilaʼ ri wachbʼal). b) ¿Jas kqabʼij che jun winaq we kutaʼ chqe jas kqachomaj chkij ri homosexuales? (Chawilaʼ pa jw.org ri video «Ri sukʼil kuyaʼ na jamaril»).

 ¹³ Ri alabʼom alitomabʼ che kkipatanij ri Jehová, kkiriq kʼax junam rukʼ ri Daniel, e kʼo chkixoʼl winaq che nim ta kkil ri utaqanik ri Jehová. Weneʼ ri e winaq riʼ itzel kekil ri Testigos rumal che kkipatanij ri Jehová. Y weneʼ jujun chke kekitaqchij ri alabʼom alitomabʼ rech kkibʼan jastaq che utz ta kril ri Jehová. Are waʼ ri xukʼulmaj ri a Gabriel, che kel pa Australia. Are chiʼ ala na xkoj pa kʼax ri usukʼilal are chiʼ kʼo pa ri escuela. Ri ajtij xutaʼ chke jas kkibʼij riʼ we jun kachiʼl kubʼij che homosexual. Xubʼij chke che kkitas kibʼ ri utz kekil ri homosexuales y che kkitas kibʼ ri utz ta kkilo. Ri a Gabriel kubʼij: «Konojel xkitas kibʼ, xaq oj kebʼ rukʼ jun chi Testigo che xojbʼe ta kukʼ ri utz kekil ri homosexuales». Wariʼ xubʼano che xkʼojiʼ pa kʼax ri kisukʼilal ri qachalal Gabriel y ri jun chi Testigo. Ri areʼ kubʼij: «Kʼa kʼo na kraj che kkʼis ri clase, ri qachiʼl y ri profesora xkiya ta kan qayoqʼik y xaq ketzeʼn chqij. Xinkoj nuchuqʼabʼ rech xinxiʼj ta wibʼ y rech xinqʼalajisaj chkiwach ri kubʼij ri Biblia, are kʼu xinkitatabʼej taj». ¿Jas xunaʼ ri qachalal Gabriel? Ri areʼ kubʼij: «Utz ta xinto che xinkiyoqʼo, are kʼu sibʼalaj xinkikotik rumal che xinkʼut ri nusukʼilal chuwach ri Jehová y xintoʼ uwiʼ ri nukojonik».

14. ¿Jas kqabʼano rech kqaya ta kan ukʼutik sukʼilal che ri Jehová?

¹⁴ We kqaloqʼoqʼej ri Jehová rukʼ ronojel qanimaʼ, kojux sukʼ riʼ junam rukʼ ri xubʼan ri Daniel. Rech kkʼiy ri qaloqʼoqʼebʼal che ri Jehová, rajawaxik kqetaʼmaj ri ubʼantajik y wariʼ kqabʼano are chiʼ kojchoman chrij ronojel ri jastaq che ubʼanom (Rom. 1:20). Ala ali, ¿jas tobʼanik kʼolik che katutoʼo rech más knimar ri aloqʼoqʼebʼal che ri Jehová? Pa ri sección «¿La kʼo xebʼanowik?» e kʼo videos y kʼutunem che katkunik kawilo. Y katkunik keʼasikʼij ri folletos ¿Es la vida obra de un Creador? y El origen de la vida. Chawilampeʼ ri xubʼij jun qachalal ali ubʼiʼ Esther che kel pa Dinamarca chkij ri e wuj riʼ. Ri areʼ xubʼij: «Sibʼalaj utz kwil ri kubʼij ri folletos. Kubʼij ta chawe ri rajawaxik katkojon chrij, xaneʼ kukʼut chawach jachin xebʼanow ri jastaq tekʼuriʼ at katchowik jas chrij katkojon wi». Ri a Ben che xojchʼaw kan chrij pa ri párrafo 9 kubʼij: «Ri e kʼutunem riʼ y ri folletos xukowirisaj ri nukojonik. Xukʼut chnuwach che are ri Dios xyaʼow ri kʼaslemal». We keʼasikʼij ri folletos riʼ weneʼ ri kachomaj kjunamataj rukʼ ri kubʼij pa Apocalipsis 4:11: «Qajaw xuqujeʼ qaDios, yaʼtal che la ri ukʼamik ri juluwem, ri nim ilik xuqujeʼ ri kunem. Lal xebʼanow la konojel ri jastaq». e

15. ¿Jas más kojkunik kqabʼano rech más kkowir ri qachilanik rukʼ ri Jehová?

¹⁵ Rech más kqaloqʼoqʼej ri Jehová utz che kqetaʼmaj más chrij ri ukʼaslemal ri Jesús. Are waʼ ri xubʼan jun qachalal ali ubʼiʼ Samira che kel pa Alemania. Ri areʼ kubʼij: «Are chiʼ más xinnikʼoj ri ukʼaslemal ri Jesús, más xinloqʼoqʼej ri Jehová». Are chiʼ ri Samira kʼa nitzʼ na kuchomaj che ri Jehová kril ta ri kqakʼulmaj,  are kʼu je ta kuchomaj chrij ri Jesús. Ri areʼ kubʼij: «Utz kwil ri ubʼantajik ri Jesús rumal che xukʼutu che keʼuloqʼoqʼej ri akʼalabʼ». Are chiʼ más xretaʼmaj chrij ri Jesús, ri rachilanik rukʼ ri Jehová más xnimarik. ¿Jasche? Ri qachalal Samira kubʼij: «Xwetaʼmaj che ri Jesús kjunamataj rukʼ ri Jehová, rumal che are kresaj uwach. Y xwetaʼmaj che ri Jehová xutaq lo ri uKʼojol cho ri uwach Ulew rech ri e winaq kketaʼmaj uwach» (Juan 14:9). Ala ali, we kawaj che más knimar ri awachilanik rukʼ ri Jehová, chawetaʼmaj más chrij ri ukʼaslemal ri Jesús. We kabʼano, más kaloqʼoqʼej riʼ ri Jehová y más knimarik riʼ ri awachilanik rukʼ.

16. ¿Jasche rajawaxik kojux sukʼ? (Salmo 18:25; Miqueas 6:8).

¹⁶ Ri winaq che kkikʼut sukʼilal amaqʼel e kʼo utz taq kachiʼl y naj kuchʼij ri kachilanik (Rut 1:14-17). We kqakʼut sukʼilal che ri Jehová, kqanaʼ jamaril riʼ. Rumal che kukubʼsaj qakʼuʼx che ri Jehová sukʼ kukʼ ri e rachiʼl (chasikʼij uwach Salmo 18:25; Miqueas 6:8). ¿La mat qastzij che kuya kikotemal chqe che ri Jehová kraj kux qachiʼl? Kʼo ta nijun jastaq kojutas chrij ri Jehová, ni ri kamikal (Dan. 12:13; Luc. 20:37, 38; Rom. 8:38, 39). Qastzij che kuya utzilal chqe are chiʼ kojux sukʼ che ri Jehová junam rukʼ ri xubʼan ri Daniel.

17, 18. ¿Jas más kqetaʼmaj chrij ri Daniel?

¹⁷ Pa wajun kʼutunem riʼ xqetaʼmaj chrij kebʼ ubʼantajik ri Daniel, are kʼu kojkunik kqetaʼmaj más chrij ri ukʼaslemal. Ri Jehová xubʼano che ri Daniel xuqʼalajisaj jujun achikʼ, visiones y profecías. Kʼi chke ri profecías riʼ e tzʼaqatajinaq chik y nikʼaj chik kubʼij ri kkʼulmataj na pa ri petinaq y che kʼo kubʼan pa kikʼaslemal ri winaq cho ronojel ri uwach Ulew.

¹⁸ Pa ri jun chi kʼutunem kqil na kebʼ profecías rech ri wuj re Daniel. Retaʼmaxik ri profecías riʼ kojutoʼ qonojel rech utz ri kqachaʼ ubʼanik pa ri qakʼaslemal. Ri profecías riʼ kojutoʼo rech kqaxiʼj ta qibʼ y rech más kqakʼut sukʼilal che ri Jehová, je wariʼ kqaxiʼj ta qibʼ chuwach ri kʼax che kqariq na pa ri petinaq.