Ri apóstol Pablo xubʼij chke ri cristianos re Tesalónica: «We kʼo jun man kunimaj ta ri qatzij pa we wuj riʼ, chikojoʼ retal waʼ» (2 Tes. 3:14). Nabʼe kanoq xaq xiw chke ri kʼamal taq bʼe kbʼixik che kkikoj ketal. We kʼo jun kraj taj kunimaj ri kubʼij ri Biblia paneʼ kʼi taq mul yaʼom chi pixabʼ che, ri kʼamal taq bʼe kkiya jun chʼabʼal pa ri congregación chrij ri tajin kbʼantajik. Y rukʼ waʼ ri qachalal kkachilaj ta chi wajun winaq riʼ, xaq xiw kkachilaj are chiʼ kbʼe pa ri e riqbʼal ibʼ y kel che utzijoxik ri utzij ri Dios.

Pero kamik qetaʼm chik che ri xubʼij ri apóstol Pablo are kchʼaw chrij ri kkichaʼ ubʼanik ri qachalal chkijujunal. Rumal laʼ rajawaxik ta chik che ri kʼamal taq bʼe kkiya jun chʼabʼal pa ri congregación jawiʼ kkibʼij wi che kachilax ta chi wajun winaq riʼ. ¿Jasche xkʼex wariʼ? Chqanikʼoj ri xubʼij ri apóstol Pablo.

Ri Pablo xubʼij che pa ri congregación e kʼo jujun kkaj taj kenimanik. Rumal che kkinimaj ta ri pixabʼ che kriqitaj pa ri Biblia. Jumul, are chiʼ xeʼusolij xubʼij wariʼ chke: «We kʼo jun man kraj taj kchakunik, mawaʼ bʼaʼ». Paneʼ xubʼij wariʼ chke, are kʼu jujun kkaj ta wi kechakunik. Y kkinim kibʼ pa ri kikʼaslemal ri nikʼaj chik. ¿Jas rajawaxik kkibʼan ri qachalal che kilik ri winaq che jewaʼ kkibʼano? (2 Tes. 3:6, 10-12).

Ri Pablo xubʼij: «Chikojoʼ retal». Pa ri chʼabʼal griega kraj kubʼij che rajawaxik ketaʼmaxik jachin ri winaq kniman taj y jeriʼ kachilax taj rech kbʼan ta ri kubʼano. Wajun pixabʼ ri rajawaxik kkibʼan ronojel ri congregación y xaq xiw ta ri kʼamal taq bʼe (2 Tes. 1:1; 3:6). Rumal laʼ we jun krilo che jun qachalal kunimaj ta ri kubʼij ri Dios pa ri Biblia. Are kchaʼowik we kraj ta chik krachilaj.

¿La kraj kubʼij wariʼ che junam kil rukʼ ri winaq che kesax bʼi pa ri congregación? Junam taj, rumal che ri Pablo xubʼij: «Xaneʼ chipixbʼej je jas ri kibʼan che jun iwachalal». Rumal laʼ chkijujunal kkilo we kekʼojiʼ rukʼ wajun winaq riʼ pa ri e riqbʼal ibʼ y che utzijoxik ri utzij ri Dios, are kʼu kkibʼan ta invitar che utijik uwa, pa waʼkatem o che ubʼanik etzʼanem. Y ri Pablo xubʼij che kbʼan wariʼ «rech kkʼixik». Are chiʼ kbʼan wariʼ che ri winaq che kraj taj kunimaj ri Jehová weneʼ ktobʼan che rech kkʼix rumal ri tajin kubʼano y kukʼex ri ukʼaslemal (2 Tes. 3:14, 15).

¿E kʼu ri oj? ¿Jas kqabʼan che unimaxik ri xubʼij ri Pablo? Nabʼe, rajawaxik kqetaʼmaj we ri winaq riʼ qastzij kraj taj kunimaj ri kubʼij ri Biblia junam rukʼ ri xubʼij ri Pablo. Y, are ta xchʼaw chkij ri qachalal che kkibʼan ta ri utz kqil oj o ri junam ta kkichaʼ ubʼanik rukʼ ri kqachaʼ oj. Xuqujeʼ are ta tajin kchʼaw chkij ri kʼo xesach wi y xkibʼan kʼax chqe. Xaneʼ, ri Pablo are xchʼaw chkij ri winaq che paneʼ kʼi taq mul kyaʼ pixabʼ chke are kʼu kkaj taj kenimanik.

We kqilo che jun qachalal kunimaj ta ri kubʼij ri Biblia, a kojkunik kqachaʼo we kqaya kan rachilaxik, are chiʼ kqabʼan etzʼanem o are chiʼ kojkʼojiʼ kuk nikʼaj chi qachalal. Rumal che oj kojchaʼow wariʼ rajawaxik taj kqabʼij chke konojel ri qa familia. Y kqaya ta kan rachilaxik wajun winaq riʼ pa ri e riqbʼal ibʼ y che utzijoxik ri utzij ri Dios. We kukʼex ri ukʼaslemal kojkunik kojkʼojiʼ chi jumul rukʼ junam rukʼ ri kqabʼan nabʼe kanoq.