Ri bʼantajik kʼo pa Deuteronomio 22:25-27 are ta qas kukʼutu che ri achi are ajmak, rumal che qas qʼalaj che areʼ ajmak. Wajun taqanik riʼ are kukʼutu we ri ixoq kʼo ta umak. Chqilaʼ jas más ri kuya ubʼixik.

Ri versículos che xqil kanoq ktzijon chrij jun achi che xqʼoyiʼ rukʼ jun ixoq «pa ri tinamit» che taʼom chi che kʼulanem. Rumal che ri e taʼom chi che kʼulanem keʼilik che jetaneʼ e kʼulan chik, rumal laʼ ri achi areʼ ajmak. ¿E kʼu ri ixoq? «Man xuraq ta uchiʼ». We ta xubʼano, qastzij riʼ che ri e winaq kkitoʼo. Are kʼu rumal che xuraq ta uchiʼ, ri ixoq xuqujeʼ ajmak. Rumal laʼ ri e kebʼ keʼux ajmakibʼ (Deut. 22:23, 24).

Ri taqanik xuqujeʼ kubʼij chi jun jastaq: «We jun ala kuriq jun ali pa ri juyubʼ ri tzʼonon chi che kʼulanem rumal jun ala chik, kukoj kʼu uchuqʼabʼ che rech kqʼoyiʼ rukʼ, xuwi kkamisax ri ala ri xqʼoyiʼ rukʼ ri ali. Ri ali man kʼo ta kbʼan che, man kʼo ta kʼu jun mak ubʼanom ri taqal ta wi ukamisaxik; xaq junam waʼ rukʼ jun winaq ri kukamisaj jun rajil utzʼaqat, jeʼ waʼ ri xbʼan che ri ali; xaq kʼu utukel ri ali xuriq pa ri juyubʼ, paneʼ ta kʼu ne xuraq uchiʼ ri ali, man kʼo ta jachin jun riʼ xkun ta che utoʼik» (Deut. 22:25-27).

Are chiʼ kkʼulmataj wariʼ, ri e qʼatal taq tzij are kkikoj ri kubʼij ri ixoq. Rumal che «paneʼ ta kʼu ne xuraq uchiʼ ri ali, man kʼo ta jachin jun riʼ xkun ta che utoʼik». Ri ixoq are ta ajmak xaneʼ are ri achi ri ajmak rumal che xukoj «uchuqʼabʼ che rech kqʼoyiʼ rukʼ» ri ixoq.

Rumal laʼ, paneʼ wajun taqanik riʼ are kukʼutu che ri ixoq kʼo ta umak, ri bʼantajik kukʼutu che ri achi ajmak rumal che rukʼ chuqʼabʼ xqʼoyiʼ rukʼ ri ixoq xuqujeʼ are ta ukʼulaj. Qastzij riʼ che ri e qʼatal tzij kkinikʼoj rij ri xbʼantajik xuqujeʼ kkinikʼoj ri kyaʼ ubʼixik pa ri utaqanik ri Dios che kʼi mul yaʼom tekʼuriʼ kkichaʼ ri kkibʼano (Éx. 20:14; Deut. 13:14; 17:4).