Tajin ta kubʼij wariʼ. Ri Itzel xubʼij ta che ri Eva, che we kutij uwach ri cheʼ che xubʼij ri Dios che ktijow taj, xaq xiw kkam ri ubʼaqil xuqujeʼ che kʼo kkʼasiʼ kan che (che kimik ri e winaq kkibʼij che kkam ta ri animaʼ). Satanás xukoj jun kumatz rech xuya ubʼixik che ri Eva che kkam taj. Xubʼano che ri Eva kuchomaj che kkam taj xuqujeʼ che kkʼojiʼ jun utzalaj ukʼaslemal cho ri uwach Ulew, jun kʼaslemal che ktaqan ta ri Dios pa uwiʼ (Gén. 2:17; 3:3-5).

Are kʼu, we pa ri Edén xumaj ta ri molom tzij che kkam ta ri animaʼ junam che kkibʼij ri e winaq kimik, ¿jachiʼ xumaj wi? Qas ta kojkunik kqabʼij jachiʼ. Qetaʼm che ri qastzij taj kojonem xsach uwach are chiʼ xpe ri Nimalaj Jabʼ pa taq uqʼij ri Noé. Rumal che xaq xiw ri Noé xuqujeʼ ri ufamilia xekʼasiʼ kanoq, che konojel e upatanelabʼ ri Dios, ronojel ri e chomanik che e qastzij taj xsach uwach.

Rumal laʼ ri etaʼmanik che kʼo kimik che kkam ta ri animaʼ xumaj lo chiʼ qʼaxinaq chi ri Nimalaj Jabʼ. Are chiʼ ri Dios xukʼex ri kichʼabʼal ri e winaq pa Babel, ri e winaq xkijabʼuj kibʼ pa «ronojel ri uwach Ulew», qastzij riʼ che ri e winaq xkikʼam bʼi ri chomanik che kkam ta ri animaʼ (Gén. 11:8, 9). Rumal laʼ qetaʼm taj jampaʼ xmajtaj lo wajun etaʼmanik riʼ che qastzij taj. Ri qas qetaʼm are che ri «utat ri bʼanoj tzij», Satanás, are ri ajmak xuqujeʼ che xkikotik are chiʼ xrilo che wajun chomanik riʼ xjabʼun pa ronojel ri uwach Ulew (Juan 8:44).