1. ¿Jas pixabʼ xuya ri apóstol Pedro chke ri e rachalal cristianos, y jasche weneʼ kqachomaj che kʼax ubʼanik?

 APASTANEʼ ri qeyebʼal we are pa ri kaj o pa ri kotzʼiʼj uwach Ulew, kojkunik kqariq utzilal rumal ri pixabʼ che xuya ri apóstol Pedro chke ri cristianos re ri nabʼe siglo che e chaʼom kebʼe pa ri kaj. Are waʼ ri xutzʼibʼaj: «Jas ri Dios ri xixusikʼij, are tastalik, xuqujeʼ ri ix chixux tastalikalaj taq winaq pa ronojel ri kibʼano. Tzʼibʼatal kʼut kubʼij: ‹Chixux tastalikalaj taq winaq chrij ri etzelal rumal rech chi ri in in tastalikalaj Dios chrij ri etzelal›» (1 Ped. 1:15, 16). ¿Jas kkikʼut waʼ taq tzij chqawach? Kkikʼutu che kojkunik kqesaj uwach ri Jehová, ri areʼ tastalik. Kojkunik y rajawaxik kojux tastalik pa ronojel ri kqabʼano, paneʼ kqachomaj che kojkun ta che ubʼanik rumal che xa oj ajmakibʼ. Ri apóstol Pedro xuqujeʼ kʼi mul xmakunik, are kʼu ri ukʼutbʼal kukʼut chqawach che kojkunik kojux tastalikalaj taq winaq.

2. ¿Jas preguntas kqatzalij na kiwach pa wajun kʼutunem riʼ?

² Pa wajun kʼutunem riʼ, kqatzalij na kiwach ri preguntas riʼ: ¿jas kraj kubʼij che jun winaq kux tastalik?, ¿jas kukʼut ri Biblia chqawach chrij ri ubʼanik ri Jehová che tastalik?, ¿jas kqabʼano rech oj tastalik pa ronojel ri kqabʼano? y we jun winaq tastalik, ¿la kʼo ubʼanik rukʼ ri rachilanik rukʼ ri Jehová?

3. ¿Jas kkichomaj e kʼi winaq chrij jun winaq tastalik, are kʼu jawiʼ kqariq wi ri qastzij?

³ Are chiʼ ri winaq kechoman chrij jun winaq tastalik, kechoman chrij jun winaq kbʼisonik o qas ta ktzenik, junam rukʼ ri e kʼo chuwach wachbʼal e bʼanom kumal ri pintores. Are kʼu qastzij ta ri kkichomaj. Rumal che ri Biblia kubʼij che  ri Jehová are «ri Dios ri knimarisax uqʼij» o ri kkikotik (1 Tim. 1:11). Xuqujeʼ kubʼij che ri tinamit ri kqʼijilan ri Jehová sibʼalaj kekikotik (Sal. 144:15). Y ri Jesús xubʼij chke ri e winaq che utz ta tajin kkibʼano paneʼ kkikoj charachaq taq atzʼyaq y kkibʼan utz che ri jastaq xa rumal che keʼilitaj kumal ri e nikʼaj chik (Mat. 6:1; Mar. 12:38). Ri oj cristianos qas qetaʼm jas riʼ ri tastalikil, rumal ri qetaʼm chrij ri Biblia. Y qetaʼm che ri qaDios, che sibʼalaj tastalik y kojuloqʼoqʼej kubʼij ta chqe che kqabʼan jun jastaq che mat kojkun che ubʼanik. Rumal laʼ, we ri Jehová kubʼij chqe «Chixux tastalikalaj taq winaq», retaʼm che kojkun che ubʼanik. Qastzij wi, rech kojux tastalik pa ronojel ri kqabʼano, rajawaxik kqachʼobʼo jas kraj kubʼij che jun winaq kux tastalik.

4. ¿Jas kraj kubʼij ri tzij tastalik y tastalikil?

⁴ ¿Jas kraj kubʼij che jun winaq tastalik? Pa ri Biblia, ri e tzij tastalik y tastalikil kchʼaw chrij jun winaq che chʼajchʼoj pa ri ukʼaslemal y pa ri ukojonik. Waʼ taq tzij riʼ xuqujeʼ kukʼutu che jun winaq o jun jastaq tasom che upatanexik ri Dios. Pa nikʼaj chi tzij, wariʼ kraj kubʼij che kojux tastalik taq winaq we oj chʼajchʼoj pa qakʼaslemal, we kqaya uqʼij ri Jehová junam rukʼ ri kraj areʼ y we kʼo jun utz qachilanik rukʼ. Sibʼalaj nim ubʼanik are chiʼ kojchoman chrij, che paneʼ xa oj ajmakibʼ kojkunik kojux rachiʼl ri Jehová, paneʼ sibʼalaj tastalik.

5. ¿Jas kqetaʼmaj chrij ri Jehová kumal ri e sukʼ taq ángeles?

⁵ Ri Jehová sibʼalaj chʼajchʼoj pa ronojel ri ubʼantajik. Are waʼ ri xkibʼij jujun ángeles che kbʼix serafines chke, ri e kʼo chunaqaj ri tem re uQʼatbʼal tzij ri Jehová. Xkibʼij: «Tastalik, tastalik, tastal ri Ajawaxel ri kʼo ronojel ukuʼinem» (Is. 6:3). Qastzij che rech kʼo jun utz kachilanik rukʼ ri Dios, e areʼ rajawaxik keʼux tastalik y qetaʼm che qastzij wi e tastal e areʼ. Rumal laʼ are chiʼ ri Jehová kutaq lo jun ángel cho ri uwach Ulew, ri lugar che kul wi kux tastalik. Jeriʼ xkʼulmatajik are chiʼ ri Moisés xqebʼ rukʼ «ri qʼaqʼ ri knikow, chupam juwiʼ kʼix» (Éx. 3:2-5; Jos. 5:15).

6, 7. a) Junam rukʼ ri kubʼij Éxodo 15:1, 11, ¿jas xubʼan ri Moisés che uqʼalajisaxik che ri Dios tastalik? b) ¿Jas xetoʼw ri israelitas rech knaʼtaj chke che ri Dios tastalik? (Chawilaʼ ri wachbʼal re ri uwach ri wuj).

⁶ Are chiʼ ri Moisés e utoʼm chi ri israelitas rech xeqʼax pa ri mar Rojo, xuqʼalajisaj che ri Jehová, ri uDios, tastalik (chasikʼij uwach Éxodo 15:1, 11). Tastal ta ri kibʼantajik ri winaq che kkiqʼijilaj ri dioses re Egipto. Xuqujeʼ are je kibʼanik ri e winaq rech ri tinamit Canaán, rumal che kekiporoj ri e kalkʼwal y kemakun kukʼ achijabʼ ixoqibʼ rech kekiqʼijilaj ri kidioses (Lev. 18:3, 4, 21-24; Deut. 18:9, 10). Are kʼu ri Jehová kjunamataj ta kukʼ ri e dioses riʼ, rumal che kʼo ta jumul kubʼij chqe che kqabʼan jun jastaq che xa kubʼan kʼax chqe. Ri Jehová sibʼalaj tastalik. Wariʼ kqʼalajinik rumal ri e tzij e tzʼibʼam chuwach ri likʼilik chʼichʼ re pisbʼal jolomaj re ri kinimal kojol tabʼal toqʼobʼ, ri kubʼij: «Tastal che patanixik ri Ajawaxel» (Éx. 28:36-38).

⁷ Ri e tzij che kʼo chuwach ri chʼichʼ riʼ kuqʼalajisaj chuwach ri winaq ri kilowik che ri Jehová sibʼalaj tastalik. Are kʼu, ¿jas kkʼulmatajik we jun israelita kril ta ri chʼichʼ re ri pisbʼal jolomaj rumal che kkun taj kqebʼ rukʼ ri kinimal kojol tabʼal toqʼobʼ? ¿La kkunik kretaʼmaj che ri Jehová tastalik? Kkunik. Konojel ri israelitas ri achijabʼ, ri ixoqibʼ y ri akʼalabʼ kekunik kkita are chiʼ ksikʼix uwach ri uTaqanik ri Dios (Deut. 31:9-12). Wet xojkʼojiʼ oj are chiʼ ksikʼix uwach  ri uTzij ri Dios, xojkun ta riʼ xqata ri e tzij riʼ: «In kʼut ri Ajawaxel ri iDios, ri ix rajawaxik [...] chixux kʼu tastalik, in kʼu in tastalik», «ri ix rajawaxik kixux tastalik chwe, in kʼut ri Ajawaxel, in tastalik» (Lev. 11:44, 45; 20:7, 26).

8. ¿Jas kkikʼut ri e tzij che kʼo pa Levítico 19:2 y 1 Pedro 1:14-16 chqawach?

⁸ Chojchomanampeʼ chrij jujun taq tzij ksikʼix uwach chkiwach ri israelitas che kriqitaj pa Levítico 19:2. Ri Jehová xubʼij che ri Moisés: «Chabʼij chke konojel ri aj israelibʼ ri kinbʼij chawe: [‹]Chixux tastalik, ri in kʼut ri Ajawaxel ri iDios, in tastalik[›]». Weneʼ ri apóstol Pedro xchoman chrij ri e tzij riʼ are chiʼ xuya pixabʼ chke ri cristianos, xubʼij wariʼ: «Chixux tastalikalaj taq winaq» (chasikʼij uwach 1 Pedro 1:14-16). Qastzij che oj kʼo ta chi chuxeʼ ri uTaqanik ri Moisés, are kʼu ri xutzʼibʼaj ri Pedro kukʼutu che ri Jehová tastalik junam rukʼ ri kubʼij pa Levítico 19:2 y che rajawaxik keʼux tastalik ri winaq che keqʼijilan che. Wariʼ kchʼaw chqij qonojel, apastaneʼ ri qeyebʼal, we are pa ri kotzʼiʼj uwach Ulew o pa ri kaj (1 Ped. 1:4; 2 Ped. 3:13).

9. ¿Jasche sibʼalaj utz che kqanikʼoj uwach ri capítulo 19 re Levítico?

⁹ Rumal che kqaj kojqaj chuwach ri Dios, kqaj kqetaʼmaj jas rajawaxik kqabʼano rech kojux tastalikalaj taq winaq junam rukʼ areʼ. Ri Jehová kuya utzalaj taq pixabʼ chqe rech kojkunik kqabʼan wariʼ. Kqariq jujun taq pixabʼ pa Levítico 19. Jun winaq che kʼo retaʼmabʼal chrij ri chʼabʼal hebreo ubʼiʼ, Marcus Kalisch xubʼij: «Wajun capítulo riʼ, are ri capítulo che más tzʼaqat, y che jalajoj kʼutunem kʼo chupam xuqujeʼ are ri capítulo más nim ubʼanik re ri wuj Levítico xuqujeʼ weneʼ are ri más nim ubʼanik pa ri jobʼ nabʼe taq wuj re ri Biblia (Pentateuco)». Chqilaʼ jujun taq versículos re wajun capítulo riʼ che kʼo kʼutunem chupam che rajawaxik kqabʼan pa jalajoj taq jastaq re ri qakʼaslemal. Are chiʼ kqanikʼoj uwach, chnaʼtaj chqe che ri capítulo 19 kumaj rukʼ waʼ taq tzij riʼ «Chixux tastalik».

10, 11. ¿Jas jastaq re ri qabʼantajik kʼo pa Levítico 19:3, y jas kqabʼan che rilik wajun taqanik riʼ?

¹⁰ Are chiʼ ri Jehová ubʼim chi chke ri israelitas che rajawaxik keʼux tastalikalaj taq  winaq, xubʼij chi wariʼ chke: «Chijujunal nim chiwilaʼ wi ri itat xuqujeʼ ri inan [...]. In riʼ ri Ajawaxel ri iDios» (Lev. 19:2, 3).

¹¹ Wariʼ kukʼutu che rajawaxik kqanimaj ri taqanik che nim keqil wi ri qanan qatat. Chnaʼtaj chqe che jumul, jun achi xutaʼ wariʼ che ri Jesús: «¿Jas ri utz kinbʼan na rech kinwechbʼej ri junalik kʼaslemal?». Y ri respuesta che xuya ri Jesús che are che rajawaxik nim kril wi ri utat unan (Mat. 19:16-19). Ri Jesús xubʼij che utz ta tajin kkibʼan ri fariseos y ri escribas che kkitzukuj kkibʼano rech keniman ta che wajun pixabʼ riʼ. Rumal laʼ xubʼij chke che rukʼ wariʼ «[k]kiyaʼ ta uqʼij ri utaqanik ri Dios» (Mat. 15:3-6). Chupam «ri utaqanik ri Dios» kʼo ri uro [quinto] taqanik re ri Diez Mandamientos che xuqujeʼ kqasikʼij uwach pa Levítico 19:3 (Éx. 20:12). Chnaʼtaj chqe che ri taqanik che kʼo pa Levítico 19:3 che rajawaxik nim keqil wi ri qatat qanan xbʼixik are chiʼ bʼim chi ri tzij riʼ: «Chixux tastalik, ri in kʼut ri Ajawaxel ri iDios, in tastalik».

12. Are chiʼ kojchoman chrij ri taqanik che kʼo pa Levítico 19:3, ¿jas pregunta rajawaxik kqabʼano?

¹² Chqajujunal ri oj cristiano rajawaxik kqachomaj wariʼ: «¿La tajin kinnimaj ri taqanik che nim kinwil wi ri nutat nunan?». We rukʼ wariʼ kqilo che qabʼanom taj, chqakojoʼ qachuqʼabʼ rech kqabʼano. Qastzij che kojkun taj kqakʼex ri qabʼanom kanoq, are kʼu rajawaxik kqabʼan más jastaq chke e areʼ. Weneʼ rajawaxik che kqaya más qatiempo chke. ¿La kojkunik keqatoʼ más rukʼ ri kajwataj chke pa ri kikʼaslemal, pa ri kikojonik y pa ri kichomanik? We kqabʼano, tajin kojniman riʼ che ri taqanik che kʼo pa Levítico 19:3.

13. a) ¿Jas jun chi pixabʼ kqariq pa Levítico 19:3? b) ¿Jas kqabʼan che resaxik uwach ri ukʼutbʼal ri Jesús che kʼo pa Lucas 4:16-18?

¹³ Kqetaʼmaj chi jun jastaq chrij ri tastalikil pa Levítico 19:3. Chilaʼ kubʼij che rajawaxik nim kil wi ri qʼij sábado. Rumal che ri oj cristianos oj kʼo ta chi chuxeʼ ri Taqanik xyaʼ che ri Moisés, rajawaxik ta chik kqanimaj ri taqanik rech ri qʼij sábado. Are kʼu kqetaʼmaj kʼi taq jastaq chrij ri kkibʼan ri israelitas pa ri qʼij riʼ y ri tewchibʼal kyaʼ chke rumal che kenimanik. Pa ri qʼij sábado keʼuxlan che ronojel ri kichak y are kkiqʼijilaj ri Jehová. * Rumal laʼ ri Jesús kbʼe pa taq ri sinagogas y kusikʼij uwach ri uTzij ri Dios (Éx. 31:12-15; chasikʼij uwach Lucas 4:16-18). Ri taqanik che kʼo pa Levítico 19:3 che kubʼij che rajawaxik nim kil wi ri sábados, kukʼut chqawach che rajawaxik kqesaj qatiempo ronojel qʼij rech kqabʼan ri jastaq re ri qakojonik. ¿La rajawaxik kqakʼex jujun taq jastaq pa ri qakʼaslemal rech kqabʼan wariʼ? We kqaya qatiempo rech kqanikʼoj ri jastaq re ri qakojonik, ri qachilanik rukʼ ri Jehová kubʼan más ko. Y wariʼ are jun jastaq che sibʼalaj nim ubʼanik rech kojux tastalikalaj taq winaq.

14. ¿Jas kʼutunem nim ubʼanik kuqʼalajisaj pa ronojel ri capítulo 19 re Levítico?

¹⁴ Pa ri capítulo 19 re Levítico kʼi mul kukʼut chqawach ri jastaq che kojutoʼ rech kojux tastalikalaj taq winaq. Pa ri versículo 4 kubʼij: «In riʼ ri Ajawaxel ri iDios». Waʼ taq tzij o nikʼaj chik che kejunamataj rukʼ wariʼ, 16 mul kriqitaj pa wajun capítulo riʼ. Wariʼ kunaʼtasaj chqe ri kubʼij ri nabʼe taqanik che kʼo pa ri Diez Mandamientos, kubʼij: «In riʼ ri Ajawaxel ri aDios [...]. Mekʼojiʼ juleʼ taq diosibʼ chik we ta ma ta xaq xuwi ri in» (Éx.  20:2, 3). Ronojel cristiano che kraj kux tastalikalaj winaq kuya ta bʼe che jun jastaq o jun winaq kuqʼatej rech nim ta chi ubʼanik ri rachilanik rukʼ ri Jehová. Y, rumal che oj testigos rech Jehová, kqaj taj che kʼo jun jastaq kubʼano che kutzʼilobʼisaj ri ubʼiʼ (Lev. 19:12; Is. 57:15).

15. ¿Jas kqetaʼmaj chrij ri tabʼal toqʼobʼ che kʼo pa Levítico 19?

¹⁵ Ri israelitas kkikʼutu che are ri Jehová ri kiDios are chiʼ keniman che ri utaqanik. Pa Levítico 18:4 kubʼij: «Chinimaj kibʼanik ri nutaqomal, chixok il che kibʼanik ri nupixabʼ, chitaqej kibʼanik. In riʼ ri Ajawaxel ri iDios». Chupam ri capítulo 19 kʼo jujun taq taqanik che Jehová xuya che ri tinamit Israel. Jun kʼutbʼal, pa ri versículos 5 kopan 8, 21 y 22 kchʼaw chkij ri e chikop che kkoj che tabʼal toqʼobʼ. Are chiʼ keya ri tabʼal toqʼobʼ rajawaxik che ri kbʼan che uyaʼik krawasij ta «ri tastal che ri Ajawaxel». Are chiʼ kqasikʼij uwach wa taq versículos riʼ kubʼano che kqaj kojqaj chuwach ri Jehová y kqaya uqʼij rukʼ ri jastaq che kqabʼano junam rukʼ ri kubʼij pa Hebreos 13:15.

16. ¿Jas pixabʼ kqariq pa Levítico 19 che kunaʼtasaj chqe che rajawaxik oj junam ta kukʼ ri e winaq?

¹⁶ Rech kojux tastalikalaj taq winaq, rajawaxik che qas kqaj che ri e nikʼaj chik kkilo che oj junam ta kukʼ apachike winaq. Wariʼ kʼax ubʼanik rumal che jujun taq mul ri e qachiʼl pa ri tijobʼal, pa ri chak o ri qafamilia che e testigo taj kkaj che kqabʼan jastaq che kubʼan kʼax che ri qachilanik rukʼ ri Jehová. Are chiʼ kojriqitaj chuwach wariʼ, rajawaxik kqachaʼ ubʼanik jun jastaq nim ubʼanik. ¿Jas kojtoʼwik rech utz ri kqachaʼ ubʼanik? Chqilaʼ jun pixabʼ che kqariq pa Levítico 19:19, che kubʼij: «Makoj jun awatzʼyaq ri jalan taq bʼatzʼ e kojom che ukemik». We ri israelitas keniman che wajun taqanik riʼ kubʼano che kejunamataj ta kukʼ ri e nikʼaj chi winaq. Kimik kʼo ta kubʼano che kqakoj atzʼyaq ri kojom algodón y poliéster che, o bʼanom rukʼ lana y rayón. Are kʼu utz taj we ri qatzʼyaq kubʼano che kojjunamataj kukʼ ri winaq che kkibʼan jastaq che utz taj paneʼ qachiʼl pa ri tijobʼal, pa ri qachak o we e qafamiliares. Qastzij riʼ che keqaj ri qafamilia y ri e winaq. Are kʼu are chiʼ kqachaʼ ubʼanik jun jastaq rajawaxik che qas kqʼalajinik che oj upatanelabʼ ri Jehová. Chnaʼtaj chqe che we kqaj kojqaj chuwach ri Dios rajawaxik che oj tastalik (2 Cor. 6:14-16; 1 Ped. 4:3, 4).

17, 18. ¿Jas jastaq nim ubʼanik kukʼut chqawach ri Levítico 19:23-25?

¹⁷ Ri tzij «In riʼ ri Ajawaxel» xeʼutoʼ riʼ ri israelitas rech más nim kkil ri kachilanik rukʼ ri Jehová. Chqilaʼ ri kkibʼan che ubʼanik  junam rukʼ ri kubʼij pa Levítico 19:23-25 (chasikʼij uwach). Chojchoman chrij ri kukʼut waʼ taq tzij riʼ chke ri israelitas are chiʼ xeʼok pa ri Tzujum Ulew. Are chiʼ jun winaq kutik jun cheʼ, oxibʼ junabʼ kuyak ta uwach y pa ri ukaj junabʼ ri uwachinik kyaʼ pa ri rachoch ri Jehová. Tekʼuriʼ pa ri uro junabʼ kkunik kutij ri uwach ri cheʼ. Wajun taqanik riʼ kukʼut chkiwach ri israelitas che are ta nabʼe kkilij ri jastaq che kajwataj chke. Rajawaxik kkikubʼsaj kikʼuʼx che ri Jehová kuya ri kajwataj chke y che más kkilij ri jastaq re ri kikojonik. Xuqujeʼ ri Dios xubʼij chke che rajawaxik kkiya kikuchuj pa ri rachoch, ri lugar che kqʼijilax wi.

¹⁸ Ri taqanik che kʼo pa Levítico 19:23-25 kunaʼtajisaj chqe ri e tzij xubʼij ri Jesús pa ri Sermón del Monte: «Mixok il [...] jas ri kitij na, o jas ri kiwukʼiʼaj na». Xuqujeʼ xubʼij: «Ri iTat kʼut ri kʼo chilaʼ chikaj retaʼm chi konojel we jastaq riʼ keʼajwataj chiwe». Ri Dios kuya ri kajwataj chqe junam rukʼ ri kubʼan che uyaʼik ri kajwataj chke ri e chikop kerapanik (Mat. 6:25, 26, 32). Qas qetaʼm che ri Jehová kuya ri rajawaxik chqe. Xuqujeʼ keqatoʼ ri qachalal che kʼo kajwataj chke y kqabʼilaʼ taj che xeqatoʼ y kqaya ri qakuchuj che ri kajwataj che ri congregación. Ri Jehová kril ri kqabʼan che kitoʼik ri e nikʼaj chik y kuya ukʼaxel chqe (Mat. 6:2-4). We kojsipanik, kqakʼutu che xqachʼobʼ ri e kʼutunem e kʼo pa Levítico 19:23-25.

19. ¿Jas utzilal uyaʼom chawe unikʼoxik jun chʼaqap re ri wuj Levítico?

¹⁹ Ri xqabʼan che kinikʼoxik kebʼ oxibʼ versículos re ri capítulo 19 re Levítico, xukʼut kʼi jastaq chqawach rech kojkunik kojux tastalik taq winaq junam rukʼ ri Jehová. Are chiʼ kqesaj uwach ri Jehová, kqakʼutu che kqakoj qachuqʼabʼ rech kojux tastalik taq winaq pa ronojel ri qabʼantajik (1 Ped. 1:15). E kʼi winaq che kkipatanij ta ri Jehová qas kilom ri utz taq qabʼantajik. Jujun chke xuqujeʼ kiyaʼom uqʼij ri Jehová rumal ri kkilo (1 Ped. 2:12). Are kʼu, kʼo kʼi jastaq kqetaʼmaj pa ri capítulo 19 re Levítico. Pa ri jun chi kʼutunem kqil na más versículos che kojkitoʼ che rilik nikʼaj chi jastaq re ri qakʼaslemal rech kojux tastalik taq winaq junam rukʼ ri xubʼij ri apóstol Pedro.