Xa taj. Qastzij wi ri xubʼij, chqilampeʼ jasche.

Chatchoman chrij ri xutzʼibʼaj pa Salmo 61:8 y pa nikʼaj chi versículos. Xubʼij wariʼ: «Kinya kʼu na uqʼij ri bʼi la amaqʼel, keʼentzʼaqatisaj na ri keʼnchʼij qʼij chi qʼij», «Wajaw nuDios kinqʼijilan na che la rukʼ ronojel ri wanimaʼ xuqujeʼ kinya uqʼij ri bʼi la amaqʼel» y «Kintewchiʼj na ri bʼi la amaqʼel» (Sal. 61:8; 86:12; 145:1, 2).

Xa ta xuya uwiʼ ri xubʼij ri David. Rumal che ri areʼ xuchʼobʼo che xa ajmak y kopan ri qʼij che kkamik (Gén. 3:3, 17-19; Sal. 51:4, 5). Retaʼm che e kʼo utz taq upatanelabʼ ri Jehová e kaminaq chik, junam rukʼ ri Abrahán, Isaac y Jacob. Xuqujeʼ, xrilo che tajin krijobʼik (Sal. 37:25; 39:4). Are kʼu rukʼ ri xubʼij pa Salmo 61:8 kukʼutu che kraj amaqʼel kuya uqʼij ri Dios, kraj kubʼij are chiʼ kʼa kʼasal na (2 Sam. 7:12).

Jujun taq mul ri David xutzʼibʼaj ri tajin kukʼulmaj, junam rukʼ ri tzʼibʼatal puwiʼ ri Salmos 18, 51 y 52. Pa ri Salmo 23, xutzʼibʼaj che ri Jehová are jun ajyuqʼ che kukʼam ubʼe ri e uchij. Ri David je laʼ xubʼan che kichajixik ri e uchij y rumal laʼ xraj xupatanij ri Jehová pa ronojel qʼij re ri ukʼaslemal (Sal. 23:6).

Chnaʼtaj chqe che ronojel ri xutzʼibʼaj ri David petinaq rukʼ ri Dios. Jujun chke ri xutzʼibʼaj qas xbʼantaj ojer kanoq. Jun kʼutbʼal pa ri Salmo 110, xutzʼibʼaj che kopan na jun qʼij che ri rajaw ktʼuyiʼ na pa ri uwikiqʼabʼ ri Dios y kyaʼ na taqanik pa uqʼabʼ. Rukʼ wariʼ, kkunik ktaqan pa kiwiʼ ri ukʼulel ri Dios y kuqʼat na tzij «che usachik kiwach ri nimaʼq taq tinamit». Ri David xux riʼjalil ri Mesías che kuqʼat lo tzij pa ri kaj xuqujeʼ «aj kojol tabʼal toqʼobʼ chbʼe qʼij saq» (Sal. 110:1-6). Ri Jesús xubʼij che ri kuya ubʼixik pa Salmo 110 tajin kchʼaw chrij areʼ y che qas kbʼantaj wi na pa ri petinaq (Mat. 22:41-45).

Junam rukʼ ri xqilo, ri Jehová xukʼam ubʼe ri David rech xchʼaw chrij ri xkʼulmataj pa ri utiempo y ri kkʼulmataj na pa ri petinaq, are chiʼ kkʼasux pa ri kamikal y jeriʼ amaqʼel kuya uqʼij ri Jehová. ¿Jas kojutoʼ wi wariʼ che uchʼobʼik ri kubʼij pa Salmo 37:10, 11, 29? Pa we versículos riʼ xchʼaw chrij ri kʼaslemal pa ri ojer Israel y ri kʼaslemal che kriqitaj na pa ri kʼakʼ uwach ulew are chiʼ ri Dios kubʼan na ronojel ri utzujum (chawilaʼ pa wajun wuj ri párrafo 8 re ri kʼutunem «Katkʼojiʼ na wukʼ pa ri jeʼlalaj kʼolbʼal»).

Ri kuya ubʼixik pa Salmo 61:8 y pa nikʼaj chi versículos kojutoʼ che uchʼobʼik che ri xraj xubʼij ri David are che amaqʼel kuqʼijilaj ri Jehová are chiʼ kʼasal na. Y xchoman chrij ri kubʼan na pa ri petinaq are chiʼ kkʼasux na rumal ri Jehová.