1. ¿Jas kubʼan chqe are chiʼ kojchoman chrij ri kʼaslemal kʼo ta ukʼisik che tajin kutzujuj ri Jehová chqe?

 RI JEHOVÁ kraj che ri keniman che kkiriq «junalik kʼaslemal» (Rom. 6:23). Are chiʼ kojchoman chrij wajun jeʼlalaj jastaq che kutzujuj chqe knimar ri qaloqʼoqʼebʼal che. Chojchoman chrij wariʼ: ri qaTat kʼo pa ri kaj sibʼalaj kojuloqʼoqʼej y kraj kusipaj wariʼ chqe rech amaqʼel kojkʼojiʼ chunaqaj.

2. ¿Jasche kukubʼsaj qakʼuʼx che ri Jehová kuya na ri kʼaslemal kʼo ta ukʼisik chqe?

² Ri kʼaslemal kʼo ta ukʼisik che kutzujuj ri Dios chqe kojutoʼo rech kqachʼij ri kʼax. Paneʼ ri e qakʼulel kkaj kojkikamisaj, kqaya ta kan upatanexik ri Jehová. ¿Jasche? Jun rumal are che qetaʼm che we kqaya ta kan upatanexik kʼa pa ri kamikal, ri areʼ kojukʼastajisaj chi na y kuya ri kʼaslemal kʼo ta ukʼisik chqe (Juan 5:28, 29; 1 Cor. 15:55-58; Heb. 2:15). ¿Jasche qas qetaʼm che kojkunik kqariq ri kʼaslemal kʼo ta ukʼisik? Chqilampeʼ jujun taq rumal.

3. ¿Jasche qas qetaʼm che ri Jehová kkunik kuya qakʼaslemal kʼo ta ukʼisik? (Salmo 102:12, 24, 27).

³ Qetaʼm che ri Jehová kkunik kuya jun kʼaslemal kʼo ta ukʼisik chqe rumal che rukʼ kpe wi ri kʼaslemal y kkam ta wi (Sal. 36:9). Chqilampeʼ jujun taq versículos re ri Biblia che kukʼutu che ri Jehová amaqʼel kʼolinaq y amaqʼel kkʼojiʼ na. Salmo 90:2 kubʼij che ri areʼ «pa taq ri  qʼijol ojer petinaq uloq kʼa pa ri kʼisbʼal taq qʼijol». Ri Salmo 102 xuqujeʼ kchʼaw chrij wariʼ (chasikʼij uwach Salmo 102:12, 24, 27). Y, are chiʼ ri Habacuc xchʼaw chrij ri qaTat kʼo pa ri kaj xutzʼibʼaj wariʼ: «Ajawaxel, ¿la xa pu ma ta lal jeqel chbʼe qʼij saq, ri tastalikalaj nuDios ri man kamel taj?» (Hab. 1:12).

4. ¿Jasche rajawaxik taj ksach qakʼuʼx we kqachʼobʼ taj che ri Jehová amaqʼel kʼolinaq?

⁴ ¿La kʼax kqabʼan che uchʼobʼik che ri Jehová are «junalik Dios» o kkam ta wi? (Is. 40:28). Xaq xiw ta at kanaʼ wariʼ. Ri Elihú xubʼij wariʼ chrij ri Dios: «Mawi kojkuʼinik keqajilaj taq ri e ujunabʼ» (Job 36:26). Are kʼu, we kqachʼobʼ ta rij jun jastaq, kraj ta kubʼij che qastzij taj kʼolik. Jun kʼutbʼal, weneʼ qas ta kqachʼobʼo jas ubʼanik kchakun ri luz. Are kʼu wariʼ kraj ta kubʼij che kʼo ta ri luz. Xaq junam rukʼ, we kqachʼobʼ taj jasche ri Jehová kʼo ta xkʼiy wi uloq y kʼo ta kekʼis wi. Kraj taj kubʼij che mat kʼo ukʼaslemal kʼo ta ukʼisik y che mat qastzij ri kubʼij ri Biblia chrij (Rom. 11:33-36). Xuqujeʼ, areʼ kʼolinaq chik are chiʼ majaʼ kbʼan ri kajulew che kʼo ri Qʼij y nikʼaj chi chʼumil chupam. Ri Biblia kubʼij wariʼ chqe: «Ri Ajawaxel rukʼ ri ukuʼinem, xubʼan ri ulew». Xuqujeʼ kubʼij: «Xulikʼ ri kaj» (Jer. 51:15; Hech. 17:24). Chqilaʼ chi jun rumal jasche kqabʼij che kojkunik kqariq ri kʼaslemal kʼo ta ukʼisik.

5. ¿Jas xraj ri Jehová chke ri nabʼe taq winaq?

⁵ Are chiʼ ri Jehová xubʼan ri uwach Ulew xaq xiw chke ri winaq xuya wi ri kʼaslemal kʼo ta ukʼisik. Are kʼu, xubʼij wariʼ che ri Adán: «Matij awe ri uwach ri cheʼ riʼ, we katijo qastzij katkam na» (Gén. 2:17). Wet ri Adán y Eva xeniman che ri Jehová mat xekam riʼ. Are chiʼ qʼaxinaq chi ri tiempo weneʼ xuya ta bʼe riʼ chke rech kkitij uwach «ri cheʼ re kʼaslemal», rech qas kkilo che kekunik kekʼasiʼ «chbʼe qʼij saq» (Gén. 3:22). b

6, 7. a) ¿Jas kkʼutuwik che oj bʼanom taj rech kojkamik? b) ¿Jas kawaj at kabʼano are chiʼ kyaʼ ri kʼaslemal kʼo ta ukʼisik chawe? (Chawilaʼ ri e wachbʼal).

⁶ Sibʼalaj nim ubʼanik che e jujun científicos ketaʼmam che ri qatzantzaqʼor kkunik kumulij kʼi información chuwach ri kqetaʼmaj pa ri qakʼaslemal kimik. Pa ri 2010, jun revista xuqʼalajisaj che ri qatzantzaqʼor weneʼ kkunik kubʼan grabar jun video re tres millones  de horas, che weneʼ kukʼam bʼi 300 junabʼ rech kilik. Y weneʼ ri xubʼij ri revista are ta ronojel ri kkun ri qatzantzaqʼor che ubʼanik. Are kʼu wariʼ kukʼutu che ri Jehová xubʼan ri qatzantzaqʼor rech kkunik kukʼol más información chuwach ri kojkunik kqetaʼmaj xa pa 70 o 80 junabʼ (Sal. 90:10).

⁷ Ri Jehová xuqujeʼ xojubʼano rech kqaj taj kojkamik. Ri Biblia kubʼij che ri Dios «xukoj kʼut chupam ri uchomanik ri winaq ri chʼobʼonik re ri man kʼistajel taj» (Ecl. 3:11). Rumal laʼ ri kamikal are jun qakʼulel (1 Cor. 15:26). Chojchoman chrij wariʼ. Are chiʼ kojyawajik y kojnimatajik, ¿la xaq kqaqʼaluj qaqʼabʼ? Je taj. Xaneʼ kojbʼe rukʼ ri kunanel y kqatij kunabʼal rech kojkunatajik. Rukʼ wariʼ tajin kqakʼutu che kqakoj ronojel qachuqʼabʼ rech kojkam taj. Y, are chiʼ kkam jun qachalaxik o jun qachiʼl, we kʼa majaʼ na o nim chi ujunabʼ, sibʼalaj kojbʼisonik y aninaq ta kel bʼi pa ri qanimaʼ (Juan 11:32, 33). Kojkunik kqetaʼmaj kʼi kʼakʼ taq jastaq y kqaj taj kojkamik rumal che ri Dios jelaʼ xubʼan chqe. Are kʼu kʼo más kkʼutuwik che kojkunik kqariq jun kʼaslemal kʼo ta ukʼisik. Chqilampeʼ ri ubʼanom ri Jehová y ri tajin kubʼano rech kqachʼobʼo che ukʼexom ta ri uchomanik.

8. ¿Jas kukʼut chqawach ri kubʼij Isaías 55:11 chrij ri kraj ri Jehová kubʼan pa kiwiʼ ri winaq?

⁸ Paneʼ ri Adán y ri Eva xemakunik y kumal e areʼ xqechbʼej ri kamikal, are kʼu ri Jehová ukʼexom ta ri kraj kubʼan pa kiwiʼ ri winaq (chasikʼij uwach Isaías  55:11). Ri areʼ kraj che ri utz taq winaq kkiriq jun kʼaslemal che kʼo ta ukʼisik. ¿Jasche qetaʼm? Rumal ri ubʼim y ri ubʼanom.

9. Junam rukʼ ri kubʼij Daniel 12:2, 13, ¿jas utzujum ri Dios?

⁹ Ri Jehová ubʼim che keʼuwalajisaj na ri e winaq che e kaminaq y kuya ri kʼaslemal kʼo ta ukʼisik chke (Hech. 24:15; Tito 1:1, 2). Ri Job xretaʼmaj che ri Jehová sibʼalaj kraj kuwalajisaj pa ri kamikal (Job 14:14, 15). Ri qʼaxal tzij Daniel xretaʼmaj che ri Jehová keʼukʼasuj na ri winaq pa ri kamikal y kuya jun kʼaslemal kʼo ta ukʼisik chke (Sal. 37:29; chasikʼij uwach Daniel 12:2, 13). Ri judíos che xekʼojiʼ pa ri utiempo ri Jesús xuqujeʼ xketaʼmaj che ri Jehová kkunik kuya «ri junalik kʼaslemal» chke ri sukʼalaj taq upatanelabʼ (Luc. 10:25; 18:18). Ri Jesús kʼi mul xchʼaw chrij wajun tzujunik riʼ y ri areʼ xwalajisax chkixoʼl ri e kaminaqibʼ rumal ri uTat (Mat. 19:29; 22:31, 32; Luc. 18:30; Juan 11:25).

10. ¿Jas kukʼut chqawach ri kʼastajibʼal che xbʼan kan ojer? (Chawilaʼ ri wachbʼal).

¹⁰ Ri Jehová are yaʼowinaq ri kʼaslemal, rumal laʼ kkunik kutzalij chi jumul chke ri kaminaqibʼ. Xukoj ri qʼaxal tzij Elías rech xukʼasuj ri ral jun malkaʼn ixoq re Sarepta (1 Rey. 17:21-23). Are chiʼ xqʼax ri tiempo, xukoj chi ri qʼaxal tzij Eliseo rech xukʼasuj ri ral jun ixoq re Sunem (2 Rey. 4:18-20, 34-37). Waʼ taq kʼastajibʼal riʼ kukʼutu che ri Jehová kʼo uchuqʼabʼ che utzalixik chi jumul ri kikʼaslemal ri e kaminaq. Y are chiʼ ri Jesús xkʼojiʼ cho ri uwach Ulew xukʼutu che are ri Jehová, ri uTat, yaʼowinaq uchuqʼabʼ (Juan 11:23-25, 43, 44). Kimik ri Jesús yaʼom chi «ronojel taqanik» pa uqʼabʼ pa ri kaj y pa ri uwach Ulew. Rumal laʼ kkunik keʼukʼastajisaj «konojel ri kaminaqibʼ» y kekam ta chik (Mat. 28:18; Juan 5:25-29).

11. ¿Jasche kqariq ri kʼaslemal che kʼo ta ukʼisik rumal ri ukamikal ri Jesús?

¹¹ ¿Jasche ri Jehová xuya bʼe che xkamisax ri uKʼojol? Ri Jesús xutzalij uwach wajun pregunta are chiʼ xubʼij: «Chiʼ kqil wi chi ri Dios sibʼalaj keʼuloqʼoqʼej ri winaq cho ri uwach ulew, xuya kʼut ri uKʼojol, ri xa jun kʼolik, rech konojel ri kekojon che, man ksach ta kiwach, xaneʼ kkʼojiʼ na junalik kikʼaslemal» (Juan 3:16). Are chiʼ ri Dios xuya ri uKʼojol che utojik ri qamak, xuya bʼe chqe rech kqariq ri kʼaslemal kʼo ta ukʼisik (Mat. 20:28). Ri apóstol Pablo xchʼaw chrij ri kraj kubʼan ri Dios are chiʼ xubʼij ri e tzij riʼ: «Rumal kʼu jun winaq, xpe ri kamikal. Xuqujeʼ rumal jun winaq, kekʼastaj na ri kaminaqibʼ. Jekʼuriʼ jachaʼ konojel kekam na rukʼ ri Adán, jekʼuriʼ xuqujeʼ konojel kkiriq na ri kʼaslemal rukʼ ri Cristo» (1 Cor. 15:21, 22).

12. ¿Jas kubʼan na ri uQʼatbʼal tzij ri Dios pa kiwiʼ ri winaq?

¹² Ri Jesús xukʼut chkiwach ri utijoxelabʼ che kkitaʼ ri uQʼatbʼal tzij ri Dios pa kichʼawem y che kubʼan ri xuchomaj ubʼanik pa ri uwach Ulew (Mat. 6:9, 10). Y areʼ kraj che kekam ta chi ri e winaq. Rumal laʼ, ri Jehová xuchaʼ ri Jesús y ri 144,000 winaq rech kbʼantaj ri kraj cho ri uwach Ulew (Apoc. 5:9, 10).

13. ¿Jas tajin kubʼan ri Jehová kimik, y jas rajawaxik kabʼano?

¹³ Pa taq ri qaqʼij, ri Jehová tajin keʼumulij ri «kʼiʼalaj winaq» y tajin keʼutijoj rech kekunik kkiriq ri tewchibʼal che kuya na ri uQʼatbʼal tzij (Apoc. 7:9, 10;  Sant. 2:8). Paneʼ ri e winaq kkaj ta kibʼ y kechʼojinik, ri «kʼiʼalaj winaq» tajin kkikoj kichuqʼabʼ rech kkibʼan ta kech. Jetaneʼ tajin kkibʼan «bʼanbʼal tajibʼal» che ri kamisabʼal che xkikoj kan nabʼe (Miq. 4:3). Are tajin kekitijoj ri winaq rech kketaʼmaj uwach ri qastzij Dios y ri kraj kubʼano, jeriʼ kkiriq «ri qastzij kʼaslemal» (1 Tim. 6:19). Rumal che xaq xiw kkiya kitobʼanik che ri uQʼatbʼal tzij ri Dios, weneʼ kkiriq kʼax kumal ri kachalaxik o kʼo ta kirajil, are kʼu ri Jehová kuya ri kajwataj chke (Mat. 6:25, 30-33; Luc. 18:29, 30). Ronojel wariʼ kukʼutu che qastzij wi kʼo ri uQʼatbʼal tzij ri Dios y ktobʼan na rech ri winaq kkiriq kʼi tewchibʼal.

14, 15. ¿Jas kbʼan che usachisaxik uwach ri kamikal?

¹⁴ Ri Jesús tajin kuqʼat chi tzij pa ri kaj y kubʼan na ronojel ri utzujum ri Jehová (2 Cor. 1:20). Kimik tajin ktaqan chi pa kiwiʼ ri ukʼulel, che xumaj lo pa ri 1914 (Sal. 110:1, 2). Xa jubʼiqʼ chi kraj, ri areʼ y ri 144,000 kkisach na kiwach ri itzel taq winaq (Apoc. 6:2).

¹⁵ Pa ri Mil Junabʼ che kuqʼat tzij ri Jesús, keʼukʼastajisaj na ri kaminaqibʼ y keʼutoʼ na ri winaq rech kkiriq ri tzʼaqatalaj kʼaslemal. Chukʼisbʼal ri Mil Junabʼ, ri e winaq che xeniman che ri Jehová  «kkechbʼej na ri ulew kejeqiʼ kʼu na chuwach chbʼe qʼij saq» (Sal. 37:10, 11, 29). Sibʼalaj kuya kikotemal riʼ are chiʼ kopan ri qʼij che ri Dios kubʼan wariʼ: «Ri kʼisbʼal kʼulel ri kusach na uwach, are ri kamikal» (1 Cor. 15:26).

16. ¿Jasche kqaj taj kqaya kan upatanexik ri Jehová?

¹⁶ Junam rukʼ ri qilom chik, ri qeyebʼal re jun kʼaslemal che kʼo ta ukʼisik qas pa ri uTzij ri Dios qesam wi. Wajun eyebʼal kojutoʼo rech kqaya ta kan upatanexik ri Jehová pa ri kʼisbʼal taq qʼij che oj kʼo wi. Are kʼu we kqaj kojqaj chuwach ri Jehová, rajawaxik che kqaya ta kan upatanexik ri areʼ y kqabʼan ri xubʼan ri Jesús, xaq xiw ta rumal che kqaj kqariq ri kʼaslemal, xaneʼ rumal che qas keqaloqʼoqʼej (2 Cor. 5:14, 15). Wajun loqʼoqʼebʼal kojutoʼo rech kqesaj kiwach y kqatzijoj chke ri winaq ri kubʼan na ri Jehová (Rom. 10:13-15). We kqakoj qachuqʼabʼ rech xaq xiw ta kojchoman chbʼil qibʼ oj y kel qakʼuʼx chke ri nikʼaj chik, kux qachiʼl ri Jehová pa ronojel ri qakʼaslemal (Heb. 13:16).

17. Junam rukʼ ri kubʼij Mateo 7:13, 14, ¿jas kojkunik kqachaʼ pa qajujunal?

¹⁷ ¿E kʼu ri oj? ¿La kqariq ri kʼaslemal kʼo ta ukʼisik? Ri Jehová uyaʼom wajun sipanik chqe qonojel, are kʼu oj kojchaʼowik we kqaj kojbʼe pa ri bʼe che kojukʼam bʼi pa ri kʼaslemal che kʼo ta ukʼisik (chasikʼij uwach Mateo 7:13, 14). Tekʼuriʼ, ¿jas ubʼanik riʼ ri qakʼaslemal are chiʼ kojkam ta chik? Kqil na ri urespuesta pa ri jun chi kʼutunem.