Are chiʼ ri Jehová xubʼij wariʼ chke ri nabʼe taq winaq: «Chinojisaj ri uwach ulew, chixtaqan puwiʼ», xukʼutu che kopan na jun qʼij che kux na kotzʼiʼj ronojel ri uwach Ulew (Gén. 1:28). Ri kkiriq na ri kʼaslemal kʼo ta ukʼisik cho ri uwach Ulew rajawaxik kkitzʼaqatisaj na wajun taqanik che xubʼij kan ri Dios ojer. Rumal laʼ, are chiʼ kkʼis ri chʼoj re Armagedón, rajawaxik kjosqʼix ri uwach Ulew rumal ri kʼax che kibʼanom kan ri winaq chuwach. ¡Kqaya na riʼ che ri chak!

Are je xkibʼan ri israelitas are chiʼ xetzalij lo pa Jerusalén, rumal che 70 junabʼ kʼo ta jun winaq xkʼojiʼ pa ri tinamit. Are kʼu xekunik xkijosqʼij rukʼ ri utobʼanik ri Jehová, junam che xuya kan ubʼixik ri qʼaxal tzij Isaías: «Kebʼenjalwachij na chaqiʼj taq ulew ri e kʼo pa ri chaqiʼj uwo saq pa jun tikbʼal kotzʼiʼj. Jachaʼ ri tikonijibʼal kotzʼiʼj ri xusukʼumaj ri Ajawaxel pa Edén» (Is. 51:3). Xekunik xkibʼan  jeʼlalaj lugar che ri tinamit. Xa junam rukʼ, rukʼ ri utobʼanik ri Jehová ri kekanaj kan cho ri uwach Ulew kekunik kkibʼan kotzʼiʼj che. Are kʼu kimik, rajawaxik kʼo kabʼano rech kakʼutu che kawaj kattobʼan che ubʼanik ri chak che kbʼan na cho ri uwach Ulew.

Jujun chke ri e jastaq che katkunik kabʼano are che kakoj achuqʼabʼ che chʼajchʼoj ri awachoch y kaya ri jastaq pa ukʼolbʼal. Rajawaxik kabʼan wariʼ paneʼ ri akʼulja e chʼajchʼoj taj. Xuqujeʼ katkunik kattobʼan che ujosqʼixik o usukʼumaxik ri Ja rech Ajawbʼal o ri kebʼan wi ri nimaʼq taq riqbʼal ibʼ. Y, we kbʼan awumal cheʼatoʼ ri e qachalal che kkiriq jun kʼax. Je wariʼ kakʼutu che kawaj keʼatoʼ ri kʼo más kajwataj chke. Chatchoman chrij wariʼ: «¿La kinkunik kwetaʼmaj más chak rech kintobʼan pa ri kotzʼiʼjalaj uwach Ulew?».

Are chiʼ ri Jesús xukʼasuj ri umiʼal ri Jairo pa ri kamikal, xubʼij che rajawaxik kyaʼ uwa (Mar. 5:42, 43). Kʼax ta xbʼan che utzuqik ri alaj ali che kʼateʼ 12 ujunabʼ. Are kʼu, más nim na ri chak kqabʼano are chiʼ ri Jesús kubʼan na wariʼ: «Konojel ri kaminaqibʼ kkitaʼ na ri uchʼabʼal, keʼel na uloq pa taq ri muqbʼal» (Juan 5:28, 29). Paneʼ ri Biblia kchʼaw ta más chrij wariʼ, are kʼu qastzij riʼ che ri kekʼastaj loq kajwataj kachoch, kiwa y katzʼyaq. ¿Jas rajawaxik kabʼan at kimik rech kakʼutu che kawaj keʼatoʼ ri winaq che kekʼastaj loq? Chatchoman chrij ri preguntas riʼ.

Are chiʼ kbʼix pa ri acongregación che kpe ri solinel re circuito che isolixik, ¿la katzʼibʼaj awibʼ che uyaʼik uwa? We jun qachalal kel bʼi pa Betel o jun solinel re circuito xkʼis ri reqeleʼn, ¿la keqatoʼ che utzukuxik jun kachoch? We kbʼan jun nim riqbʼal ibʼ re oxibʼ qʼij o especial chunaqaj ri awachoch, ¿la katkunik aninaq katopanik are chiʼ majaʼ kumajij o katkanaj na kan jubʼiqʼ tiempo rech kattobʼanik? Xuqujeʼ we kbʼanik, utz keʼakʼulaj pa ri awachoch ri qachalal che keʼopan pa ri nim riqbʼal ibʼ.

Ri kyaʼ ubʼixik pa Hechos 24:15 kukʼutu che sibʼalaj e kʼi winaq kekʼastaj na lo pa ri kamikal. E kʼi chke xekun taj xketaʼmaj chrij ri Jehová are chiʼ e kʼasal na, are kʼu pa ri kʼakʼ uwach Ulew kekunik kketaʼmaj na uwach. a Ri kipatanim ri Jehová pa kʼi taq junabʼ, are ri keyoʼw na tijonik chke ri kekʼastaj na loq (Is. 11:9). Jun qachalal Charlotte ubʼiʼ, che petinaq pa Europa, Sudamérica y África che utzijoxik ri utzij ri Dios, kubʼij che ya kraj kok pa ri kʼakʼ uwach Ulew rech kukʼut chkiwach ri winaq chrij ri Jehová. Rukʼ kikotemal kubʼij wariʼ: «Sibʼalaj kwaj kinya tijonik re Biblia chke ri kekʼastaj loq. Are chiʼ kinsikʼij chrij jun winaq che xkʼasiʼ ojer kinchomaj wariʼ chrij: ‹We ta ri winaq riʼ xretaʼmaj chrij ri Jehová, jalan ta ubʼanik riʼ ri ukʼaslemal›. Kwaj kopan ri tiempo che kintzijoj ri utz taq jastaq chke ri winaq che xketaʼmaj ta uwach ri Jehová».

Xuqujeʼ ri upatanelabʼ ri Jehová che xekʼasiʼ kanoq are chiʼ majaʼ kpe ri Jesús cho ri uwach Ulew rajawaxik kketaʼmaj na kʼi taq jastaq. Qas kqaj kqabʼij che ri Daniel ri kraj kubʼij ronojel ri profecías che xutzʼibʼaj kanoq che xkun ta che uchʼobʼik (Dan. 12:8). O chachomaj ri kikotemal kanaʼo are chiʼ katoʼ ri Rut y ri Noemí che retaʼmaxik che pa ri kifamilia xpe wi ri Mesías. Are jun nimalaj tewchibʼal kitijoxik ri winaq che kekʼastaj na lo pa ri kʼakʼ uwach Ulew jawiʼ kʼo ta chi jun kʼax, ni jastaq che kusach ri qachomanik.

¿Jas kabʼan che ukʼutik che kawaj kattobʼan che uyaʼik ri tijonik che kbʼan na pa ri kotzʼiʼjalaj uwach Ulew? Are chiʼ kakoj achuqʼabʼ rech katux jun utzalaj ajtij y amaqʼel katzijoj ri utzij ri Dios (Mat. 24:14). Apastaneʼ ri katriqitaj wi, o nim chi ri ajunabʼ are kʼu we kakoj achuqʼabʼ che utzijoxik ri utzij ri Dios, tajin kakʼutu che kawaj katzijoj ri utzij ri Dios chke ri kekʼastaj na loq.

Ri pregunta are: ¿la qas kawaj kawechbʼej ri uwach Ulew?, ¿la katkikotik che kattobʼan na che ujosqʼixik ri uwach Ulew, kitoʼik ri kekʼastaj na loq rech kkiriq ri kajwatajik y ukʼutik chkiwach chrij ri Jehová? We kattobʼan che ri chak che tajin kbʼan kimik cho ri uwach Ulew kakʼutu che qas kawaj kawechbʼej ri kʼakʼ uwach Ulew.