1, 2. ¿Jas weneʼ kkichomaj ri tat nan are chiʼ ri kalkʼwal kkibʼan preguntas chrij ri Biblia?

 E KʼI winaq kkibʼij che kʼax kikʼiyisaxik ri akʼalabʼ, rumal laʼ we e kʼo iwalkʼwal y tajin kikoj ichuqʼabʼ che kitoʼik rech knimar más ri kikojonik chrij ri Dios, ¡utz ri tajin kibʼano! (Deut. 6:6, 7). Are chiʼ kenimar ri akʼalabʼ weneʼ kkitaʼ chke ri nan tat jasche ri Dios kuya ta bʼe kqabʼan jujun jastaq.

² Are chiʼ kkitaʼ wariʼ chiwe weneʼ kichomaj che xa kkikubʼsaj ta chi kikʼuʼx chrij ri Dios y weneʼ kixbʼison rumal wariʼ. Pero ri akʼalabʼ rajawaxik kkibʼan preguntas rech kketaʼmaj jas chrij kekojon wi (1 Cor. 13:11). Kixbʼison taj are chiʼ kkibʼan preguntas, xaneʼ chikojoʼ ichuqʼabʼ che kitoʼik rech knimar más ri kikojonik chrij ri Dios y ri Biblia are chiʼ kkibʼan preguntas.

3. ¿Jas kqetaʼmaj na pa wajun kʼutunem riʼ?

³ Pa wajun kʼutunem riʼ kqetaʼmaj na jas kkibʼan ri e tat nan che kitoʼik ri kalkʼwal 1) rech kkikubʼsaj más kikʼuʼx chrij ri Dios y ri Biblia, 2) rech kkichʼobʼo jasche kqanimaj ri taqanik kʼo pa ri Biblia y 3) rech kkixeʼj ta kibʼ kkibʼij chke e nikʼaj chik jasche kekojon chrij ri Dios. Xuqujeʼ kqetaʼmaj na jasche utz che ri alaj taq akʼalabʼ kkibʼan preguntas y jas kabʼan che kitoʼik rech más kkikubʼsaj kikʼuʼx chrij ri Dios.

CHEʼITOʼO RECH KKIKUBʼSAJ MÁS KIKʼUʼX CHRIJ RI DIOS Y RI BIBLIA

4. ¿Jas preguntas weneʼ kkibʼan ri akʼalabʼ y jasche?

⁴ Ri e tat nan ketaʼm che ri kikojonik are ta jun herencia kkiya kan chke ri kalkʼwal. Masach chiwe che nijun chqe kojkojon chi chrij ri Dios are chiʼ xojkʼojik. Rumal laʼ ri akʼalabʼ  kkibʼan preguntas junam rukʼ wariʼ: «¿Jas kinbʼan in che retaʼmaxik che qastzij kʼo ri Dios? Y ¿jasche kinkubʼsaj nukʼuʼx chrij ri kʼo pa ri Biblia?». Are chiʼ ri Biblia kubʼij «chinikʼoj ronojel jas uwach», kraj kubʼij che rajawaxik kqilo jasche kojkojon chrij jun jastaq (Rom. 12:1; 1 Tes. 5:21, Ri Tyoxlaj wuj). Rumal laʼ, ¿jas kixkunik kibʼano rech ri iwalkʼwal más kkikubʼsaj kikʼuʼx chrij ri Dios?

5. ¿Jas kbʼan che kitoʼik ri akʼalabʼ rech más kekojon chrij ri kubʼij ri Biblia? (Romanos 12:2).

⁵ Cheʼitoʼo ri iwalkʼwal rech kkijunamaj ri kubʼij ri Biblia rukʼ nikʼaj chi wuj (chasikʼij Romanos 12:2). Are chiʼ ri iwalkʼwal kkibʼan preguntas chikʼutuʼ chkiwach jas kkibʼan che uriqik ri u respuestas pa ri e wuj riʼ Índice de las publicaciones Watch Tower y ri Tobʼanik chike ri testigos rech Jehová rech kketaʼmaj más. Are chiʼ kikoj ri wuj «Tobʼanik chike ri testigos rech Jehová» chixok jawiʼ kubʼij Kʼutunem y chitzukuj «Ri Biblia» y tekʼuriʼ jawiʼ kubʼij «Petinaq rukʼ ri Dios» chilaʼ kiwil wi jasche kqakojo che ri Biblia qas «Utzij ri Dios» y xa ta kitzij winaq (1 Tes. 2:13). Kixkunik kiwetaʼmaj chrij ri tinamit Nínive. E jujun winaq ojer kanoq xkibʼij che wajun tinamit riʼ qastzij taj xkʼojik, pero pa taq ri junabʼ 1850 xriq ri ruinas re wajun tinamit riʼ, wariʼ kukʼut chqawach che qastzij ri kubʼij ri Biblia chrij (Sof. 2:13-15). Xuqujeʼ kixkunik kiwetaʼmaj jas xubʼij ri Biblia che kbʼan che usachisaxik uwach Nínive pa ri kʼutunem «¿La awetaʼm?» che xel pa ri wuj Ri Chajinel re noviembre 2021. Are chiʼ kkijunamaj ri kubʼij pa taq ri qawuj rukʼ ri kubʼij ri enciclopedias y e nikʼaj chi wuj che e kesam ri winaq, tajin kkinimarisaj ri kikojonik chrij ri Biblia rumal che kkilo che qastzij ri kubʼij.

6. ¿Jas kkibʼan ri tat nan che kitoʼik ri kalkʼwal rech kkichʼobʼo che qastzij ri kubʼij ri Biblia? Chayaʼ jun ejemplo. (Xuqujeʼ chawilaʼ ri wachbʼal).

⁶ Cheʼitoʼo rech kechoman chrij ri kketaʼmaj. Ri e tat nan kekunik kekitoʼ ri kalkʼwal rech kkichʼobʼ ri kubʼij ri Biblia y kkikubʼsaj kikʼuʼx chrij ri Dios. Kixkunik kikʼut chkiwach ri iwalkʼwal jun video, jun libro, kixbʼe pa ri kʼachelaj o kiwilaʼ jun sucursal kech ri testigos rech Jehová. Kixkunik kitzukuj jun video che kchʼaw chrij ri jastaq re ojer, are chiʼ tajin kiwilo chibʼij chke ri iwalkʼwal che xuqujeʼ ri Biblia kchʼaw chrij wariʼ, jeriʼ tajin keʼitoʼo rech más kkikubʼsaj kikʼuʼx chrij ri Biblia. Jun ejemplo, kʼo jun abʼaj piedra moabita ubʼiʼ, 3,000 junabʼ chik kʼolik y tzʼibʼatal ri ubʼiʼ ri Dios chuwach y kriqitaj  pa París (Francia). Kixkunik kitzukuj wajun abʼaj riʼ pa Internet xuqujeʼ pa ri sucursal kech ri testigos rech Jehová che kʼo pa Warwick (Nueva York), chilaʼ kʼo jun Museo ubʼiʼ: «Ri Biblia y ri ubʼiʼ ri Dios», chilaʼ kʼo jun copia rech ri piedra moabita y kubʼij chuwach che ri rey Mesá re Moab xchʼojin rukʼ Israel. Y ri Biblia kchʼaw chrij ri rey Mesá y ri xubʼano (2 Rey. 3:4, 5). Are chiʼ kiwil ejemplos junam rukʼ wariʼ, keʼitoʼ ri iwalkʼwal rech kkichʼobʼo che ri kubʼij ri Biblia are ri qastzij y kkikubʼsaj más kikʼuʼx chrij (chajunamisaj rukʼ 2 Crónicas 9:6).

7, 8. a) ¿Jas kojkunik kqetaʼmaj chrij ri ujeʼlikal y ri ubʼanik ri jastaq kʼo cho ri uwach Ulew? Chayaʼ jun ejemplo. (Xuqujeʼ chawilaʼ ri e wachbʼal). b) ¿Jas preguntas ktobʼan chke ri akʼalabʼ rech kketaʼmaj che kʼo xbʼanow ronojel ri jastaq?

⁷ Cheʼitoʼo che rilik ri jastaq che kʼo cho ri uwach Ulew. Are chiʼ kixbʼe pa ri kʼachelaj o are chiʼ kichakuj ri iwulew chikʼutuʼ chkiwach ri iwalkʼwal ri e bʼanom che ri jastaq. Are chiʼ kkilo che jeʼlik bʼanom che, kkichʼobʼo che kʼo xbʼanowik y qas xnaʼw che ubʼanik. Por ejemplo, kixkunik kiwil ri ubʼanik ri upam ri girasol, ri concha, ri uxaq taq cheʼ o qʼayes y ri ubʼanik ri galaxias. a Ri científicos kʼi chi junabʼ kibʼanom estudiar ri kibʼanik ri jastaq riʼ y kkibʼij la sucesión de Fibonacci che.

⁸ Pa taq ri escuelas pa ri curso re ciencias naturales, ri akʼalabʼ kketaʼmaj chrij ri bʼanom che ri jastaq kʼo cho ri uwach Ulew. Por ejemplo, ri bʼanom chke ri cheʼ. Che ri raqan ri cheʼ kel lo uqʼabʼ y che ri uqʼabʼ kel nikʼaj chi uqʼabʼ más nitzʼaq chi na y jeriʼ kubʼano kʼa kekʼisoq. Ri ubʼanik ri cheʼ xuqujeʼ kilitaj pa nikʼaj chi qʼayes o nikʼaj chi jastaq. Pero, ¿jachin xbʼanow ronojel wariʼ y che sibʼalaj jeʼl kekaʼyik? Utz we ri iwalkʼwal amaqʼel kkibʼan preguntas junam rukʼ wariʼ, rumal che ktobʼan chke rech más kkikubʼsaj kikʼuʼx chrij ri Dios, ri xbʼanow ronojel ri jastaq (Heb. 3:4). Ri e tat nan kekunik kkibʼan chi wajun pregunta chke ri kalkʼwal: «We are ri Dios xojbʼanowik, ¿la mat qastzij che retaʼm jas rajawaxik kqabʼano rech kojkikotik?». Tekʼuriʼ kixkunik kikʼut chkiwach ri kubʼij ri Biblia chrij ri rajawaxik kqabʼano rech kojkikotik.

CHEʼITOʼO CHE UCHʼOBʼIK JASCHE RAJAWAXIK KQANIMAJ RI KUBʼIJ RI BIBLIA

9. ¿Jasche e jujun akʼalabʼ kkaj kketaʼmaj jasche rajawaxik kqanimaj ri kubʼij ri Biblia?

⁹ We ri iwalkʼwal kkitaʼ chiwe jasche rajawaxik kqanimaj ri kubʼij ri Biblia, rajawaxik  kichʼobʼo jasche kkibʼan waʼ taq preguntas riʼ. ¿La xa kkaj taj kkinimaj ri kubʼij ri Biblia o xa ketaʼm taj jas kkibʼij chke nikʼaj chik are chiʼ ktaʼ chke? Apastaneʼ ri rumal che kkibʼan ri preguntas riʼ, kixkunik kiwil kukʼ ri iwalkʼwal ri kubʼij pa ri wuj Kʼaslemal kʼo ta ukʼisik b Rech kketaʼmaj jasche kqanimaj ri kubʼij ri Biblia.

10. ¿Jas kbʼan che kitoʼik ri akʼalabʼ rech más keqebʼ rukʼ ri Jehová?

¹⁰ Amaqʼel cheʼitoʼo rech más keqebʼ rukʼ ri Jehová. Are chiʼ kiwil ri Biblia kukʼ ri iwalkʼwal utz kikoj ri preguntas y ri ejemplos che kʼo pa ri wuj Kʼaslemal kʼo ta ukʼisik Rech kixkunik kiwetaʼmaj jas kkichomaj (Prov. 20:5). Kixkunik kikoj ri kʼutunem 8 jawiʼ kubʼij che ri Jehová junam rukʼ jun utzalaj amigo che kunaʼtasaj chqe jas ri rajawaxik kqabʼano rech kqariq ta kʼax y kqariq utzilal pa ri qakʼaslemal. Are chiʼ kiwil ri kubʼij 1 Juan 5:3, chibʼanaʼ wajun pregunta che ri iwalkʼwal: «Rumal che ri Jehová kjunamataj rukʼ jun utzalaj amigo, ¿jas rajawaxik kqachomaj chrij ri kubʼij chqe?». Wajun pregunta riʼ keʼutoʼ ri akʼalabʼ rech kekunik kkilo che ri Jehová sibʼalaj kojraj, rumal laʼ uyaʼom ri utaqanik chqe (Is. 48:17, 18).

11. ¿Jas kixkunik kibʼano rech ri iwalkʼwal más nim kkil ri utaqanik ri Dios? (Proverbios 2:10, 11).

¹¹ Chibʼij chke jasche rajawaxik kqanimaj ri utaqanik ri Dios. Are chiʼ kisikʼij ri Biblia o are chiʼ kiwil ri texto diario kukʼ ri iwalkʼwal amaqʼel chibʼij chke jas tobʼanik uyaʼom ri utaqanik ri Dios pa ri ikʼaslemal. Chichomajampeʼ, ¿la kkichʼobʼ ri iwalkʼwal jasche rajawaxik kojchakunik, kqabʼij ri ubeʼal y kojelaqʼan taj? (Heb. 13:18). Xuqujeʼ kixkunik kibʼij chke ri tobʼanik kuya ri Biblia rech kojkikotik y kojyawaj taj (Prov. 14:29, 30). Are chiʼ kixchʼaw kukʼ chrij ri tobʼanik kuya ri Biblia pa qakʼaslemal, keʼutoʼ ri iwalkʼwal rech más nim kkil wi ri pixabʼ che kuya ri Biblia (chasikʼij Proverbios 2:10, 11).

12. ¿Jas kkibʼan jun kʼulaj che utoʼik ri kalkʼwal rech kuchʼobʼo jasche rajawaxik knimax ri kubʼij ri Biblia?

¹² Jun tat ubʼiʼ Steve, che kel pa Francia, kubʼij jas kibʼanom rukʼ ri rixoqil che utoʼik ri kalkʼwal ubʼiʼ Ethan, rech kuchʼobʼo jasche ri Jehová rukʼ loqʼoqʼebʼal uyaʼom jujun taqanik chqe. Ri qachalal Steve kubʼij: «Kqabʼan preguntas che junam rukʼ wariʼ: ‹¿Jasche ri Jehová kutaʼ chqe che kqanimaj ri utaqanik? ¿Jas kubʼan wajun taqanik che ukʼutik chqawach che ri Jehová qas kojraj y jas kqariq riʼ we kqanimaj taj?›». Waʼ taq preguntas riʼ utoʼom ri a Ethan rech kunimaj ri utaqanik ri Jehová y nim kril wi. Ri qachalal Steve kubʼij chik: «Ri kqaj are che ri a Ethan kuchʼobʼo jasche are más utz kqanimaj ri kubʼij ri Biblia chuwach ri kkibʼij ri winaq».

13. ¿Jas kqabʼan che kitoʼik ri akʼalabʼ rech kkinimaj ri kubʼij ri Biblia? Chayaʼ jun ejemplo.

¹³ Cheʼitoʼo rech kkinimaj ri kubʼij ri Biblia. Weneʼ pa ri escuela kbʼix chke ri akʼalabʼ che rajawaxik kkisikʼij jun libro. Weneʼ ri libro kchʼaw chkij winaq che kkibʼan jastaq che utz ta kril ri Jehová, junam rukʼ ri makunik kukʼ achijabʼ ixoqibʼ y nikʼaj chi itzelal. Y weneʼ kukʼutu che awas ta ubʼanik wariʼ, rumal laʼ ri akʼalabʼ weneʼ kkaj kkibʼan ke ri kubʼij. Utz che kibʼij chke che kkichomaj jas kunaʼ riʼ ri Jehová we ri winaq kkibʼan itzel taq jastaq (Prov. 22:24, 25; 1 Cor. 15:33; Filip. 4:8). Wariʼ keʼutoʼ ri iwalkʼwal rech  kechʼaw chrij ri kubʼij ri Biblia kukʼ ri e kachiʼl pa ri escuela y ri ki maestros.

CHEʼITOʼO RECH KKIXEʼJ TA KIBʼ KKIBʼIJ CHE KEKOJON CHRIJ RI DIOS

14. ¿Jas chrij kkixeʼj wi kibʼ ri alabʼom alitomabʼ y jasche?

¹⁴ Weneʼ jujun taq mul ri alabʼom alitomabʼ kkixeʼj kibʼ kechʼaw chrij ri Dios y weneʼ más na are chiʼ pa ri escuela kechʼaw chrij ri evolución o jawiʼ petinaq wi ri kʼaslemal. Y más na are chiʼ ri maestros kkibʼij che ri kbʼix chrij ri evolución are ri qastzij. ¿Jas kekunik kkibʼan ri tat nan che kitoʼik ri kalkʼwal rech kkixeʼj ta kibʼ kkibʼij che kekojon chrij ri Dios?

15. ¿Jas ketoʼw ri alabʼom alitomabʼ rech kkixeʼj ta kibʼ kkibʼij che kekojon chrij ri Dios?

¹⁵ Cheʼitoʼo rech kkixeʼj ta kibʼ kkibʼij jasche kekojon chrij ri Dios. Rajawaxik che ri alkʼwalaxelabʼ kekʼix taj kkibʼij jasche kkikojo che kʼo xbʼanow juntir ri jastaq (2 Tim. 1:8). Rumal che xaq xiw ta oj kojkojon chrij ri Dios, xaneʼ e kʼi científicos ketaʼm che ri kʼaslemal xaq ta kʼateʼ xkʼojik xaneʼ kʼo xbʼanowik. Are chiʼ ri akʼalabʼ kkibʼan estudiar ri bʼanom che ri kʼaslemal, kkichʼobʼo che kʼo jun xbʼanowik y sibʼalaj xnaʼw che ubʼanik. Je wariʼ kkikoj ta ri kkʼut chkiwach pa ri escuela chrij ri evolución. Ri alabʼom alitomabʼ kekunik kekojon chrij ri Dios are chiʼ kkil ri e toʼwinaq nikʼaj chi qachalal rech xekojon chrij ri Dios y che kʼo xbʼanow ri qakʼaslemal. c

16. ¿Jas kekunik kkibʼan ri e tat nan che kitoʼik ri kalkʼwal rech kkitoʼ uwiʼ ri Dios? (1 Pedro 3:15; xuqujeʼ chawilaʼ ri wachbʼal).

¹⁶ Chikʼutuʼ chkiwach jas kkibʼano rech kkitoʼ uwiʼ ri Dios (chisikʼij 1 Pedro 3:15). Kixkunik kiwil kukʼ ri iwalkʼwal ri serie re ri kʼutunem «¿Creación o evolución? (Kʼutunem 1, kʼutunem 2, kʼutunem 3, kʼutunem 4)» che kʼo pa jw.org, jawiʼ kubʼij wi «Los jóvenes preguntan». Tekʼuriʼ chataʼ chke jas ejemplos kekunik kkikoj kukʼ ri kachiʼl pa ri escuela rech kkikʼutu che qas kʼo xebʼanow ri jastaq, tekʼuriʼ chibʼanaʼ ensayar kukʼ jas kkibʼan che ubʼixik chke ri kachiʼl. Chinaʼtasaj chke che utz taj kechʼojin kukʼ ri kachiʼl we kkaj taj kketaʼmaj. Pero we kʼo jun chke kraj kretaʼmaj, kukoj ta ejemplos che kʼax kichʼobʼik y rukʼ utz taq tzij ktzijon rukʼ. Y we kʼo jun  chke ri rachiʼl pa ri escuela kubʼij wariʼ che: «Xaq xiw kinkojon in chrij ri kinkunik kwilo, y kʼo ta jumul wilom uwach ri Dios». Ri ala o ri ali kkunik kubʼij wariʼ che ri rachiʼl: «Chachomajampeʼ che at kʼo pa jun kʼachelaj y kariq jun pozo che sibʼalaj utz bʼanom che ubʼanik, ¿la mat kachomaj riʼ che jun winaq xbʼanowik? We kʼo xbʼanow ri pozo, ¿la mat qastzij che wariʼ kukʼut chqawach che xuqujeʼ kʼo xbʼanow ri uwach Ulew y ri kaj y sibʼalaj xnaʼw che ubʼanik?».

17. ¿Jas kixkunik kibʼan che kitoʼik ri iwalkʼwal rech kechʼaw chrij ri Dios apawijeʼ taneʼ e kʼo wi? Chayaʼ jun ejemplo chrij ri kkunik kutaʼ jun ala cristiano che jun rachiʼl.

¹⁷ Chibʼij chke che kechʼaw chrij ri Dios apawijeʼ taneʼ e kʼo wi (Rom. 10:10). Ri utzijoxik ri utzij ri Dios kjunamataj rukʼ retaʼmaxik ubʼanik música rukʼ ri guitarra, weneʼ nabʼe kʼax kabʼan che retaʼmaxik ukojik ri guitarra, pero are chiʼ kqʼax ri tiempo katkun chik kawesaj música rukʼ. Je kbʼantajik are chiʼ kamaj tzijonem chrij ri Dios kukʼ ri winaq, nabʼe weneʼ kariq taj jas kabʼij. Rumal laʼ utz kamajij rukʼ kebʼ oxibʼ tzij y kabʼan preguntas kʼax ta uchʼobʼik. Ri ala o ri ali kkunik kutaʼ wariʼ chke ri rachiʼl pa ri escuela: «¿La awetaʼm che ri winaq kkesaj kiwach ri chikop rech kkibʼan jujun jastaq? Chawilaʼ wajun video riʼ, sibʼalaj utz kubʼij chupam». Y katkunik kakʼut jun video chuwach ri kʼo pa ri serie «¿Lo diseñó alguien?» tekʼuriʼ chabʼij che ri awachiʼl: «We sibʼalaj nim kil jun winaq che kkunik kubʼan copiar ri ubʼanik jun chikop o jun cheʼ che ya bʼanom chik, ¿jachin taqal che kyaʼ uqʼij rumal ri jastaq che kʼo cho ri uwach Ulew?». Rukʼ waʼ taq preguntas weneʼ ri awachiʼl pa ri escuela kraj kretaʼmaj más.

KIYA TA KAN KITOʼIK RECH KNIMAR RI KIKOJONIK CHRIJ RI DIOS

18. ¿Jas más kixkunik kibʼan che kitoʼik ri iwalkʼwal rech más kekojon chrij ri Dios?

¹⁸ Oj kʼo chkixoʼl winaq che kekojon ta chrij ri Dios (2 Ped. 3:3). Rumal laʼ, nan tat are chiʼ kiwil ri Biblia kukʼ ri iwalkʼwal, chiwilaʼ temas kukʼ che keʼutoʼ rech nim kkil wi ri Utzij ri Dios y ri taqanik kʼo chupam. Cheʼitoʼ rech kechoman chrij jas qas ubʼanom ri Jehová chke ri jastaq. Y cheʼitoʼ che rilik jas profecías ya bʼantajinaq chik. Junam chibʼanaʼ orar kukʼ y chibʼanaʼ orar pa kiwiʼ. Kiwil kʼu na che ri Jehová qas kutewchij ri chuqʼabʼ kikoj che kitoʼik rech más kkikubʼsaj kikʼuʼx chrij ri Jehová (2 Crón. 15:7).