1. ¿Jasche (o suche) nim ubʼanik ri kaxlanwa chkiwach ri winaq ojer?

 RI KIWA ri winaq re ojer are ri kaxlanwa (Gén. 14:18; Luc. 4:4). Are waʼ ri qas kkitij ri winaq ojer, rumal laʼ ri Biblia kubʼij wa che (Mat. 6:11; Hech. 20:7). Pa ri kebʼ milagros che xubʼan ri Jesús rech keʼutzuq ri winaq xuya kaxlanwa chke (Mat. 16:9, 10). Chqilampeʼ jun chke ri milagros che xubʼan ri Jesús che kriqitaj pa ri capítulo 6 re Juan y chqilaʼ jas kojkunik kqetaʼmaj chrij.

2. ¿Jampaʼ xajwataj kiwa e kʼi winaq?

² Are chiʼ ri apóstoles xetoʼtaj che utzijoxik ri utzij ri Dios sibʼalaj e kosinaq chik. Rumal laʼ, ri Jesús xeʼukʼam bʼi pa jun alaj barco y xebʼe pa jun lugar chunaqaj Betsaida jawiʼ e kʼo ta wi winaq rech keʼuxlanik (Mar. 6:7, 30-32; Luc. 9:10). Are chiʼ ri winaq xkito che ri Jesús kʼo chilaʼ, xebʼe che rilik. Ri areʼ xuya ri u tiempo, xumaj utzijoxik ri Uqʼatbʼal tzij ri Dios chke y xeʼukunaj ri yawabʼibʼ. Rumal che matam chik, ri discípulos tajin kkichomaj jas kkibʼan ri winaq che ri kiwa. E jujun chke ri winaq weneʼ kukʼam bʼi jubʼiqʼ kiwa pero más e kʼi ri kebʼe na che uloqʼik ri kiwa pa taq ri aldeas (Mat. 14:15; Juan 6:4, 5). ¿Jas kubʼan riʼ ri Jesús?

RI JESÚS XUBʼAN JUN MILAGRO

3. ¿Jas xubʼan ri Jesús are chiʼ xrilo che rajawaxik kiwa ri winaq? (Xuqujeʼ chawilaʼ ri wachbʼal).

³ Ri Jesús xubʼij wariʼ chke ri apóstoles: «Rajawaxik ta na kebʼek, chiyaʼ kiwa ix» (Mat. 14:16, Ri Biblia. Traducción del Nuevo Mundo). ¿Jas kkibʼan che ubʼanik wariʼ rumal che e kʼi winaq e kʼolik? Weneʼ e kʼo 5 mil achijabʼ y we keʼajilax ri ixoqibʼ y ri akʼalabʼ weneʼ kopan  más che 15 mil winaq (Mat. 14:21). Rumal laʼ ri Andrés xubʼij wariʼ: «Kʼo jun akʼal waral ri e rukʼam jobʼ kaxlanwa re cebada xuqujeʼ kebʼ kar». Pero kubʼanaʼ ta laʼ che kitzuqik juntir ri winaq (Juan 6:9). Amaqʼel kriqitaj ri kaxlanwa re cebada y paqal ta rajil y ri kar weneʼ are ri e chaqijsam y kʼo atzʼam chkij. Paneʼ ri alaj akʼal xuya wariʼ chke pero kubʼanaʼ ta riʼ che kitzuqik konojel ri winaq.

4. ¿Jas kqetaʼmaj chrij ri kubʼij Juan 6:11-13? (Xuqujeʼ chawilaʼ ri e wachbʼal).

⁴ Ri Jesús xraj xeʼutzuq ri winaq rumal laʼ xubʼij chke che kkijach kibʼ pa grupos y ketʼuyiʼ cho ri qʼayes (Mar. 6:39, 40; chasikʼij Juan 6:11-13). Ri Biblia kubʼij, che ri Jesús xubʼan jun oración rech xumaltyoxij che ri Utat rumal ri kaxlanwa y ri e kar. Sibʼalaj utz che xubʼan wariʼ, rumal che are ri Dios xyaʼow kiwa ri winaq. Wariʼ kunaʼtajisaj chqe che oj xuqujeʼ rajawaxik kqabʼan qa oración are chiʼ majaʼ kqatij qawa, paneʼ xaq qatukel oj kʼolik o oj kʼo kukʼ nikʼaj chik. Are chiʼ xbʼantaj orar rumal, ri Jesús xeʼutaq ri apóstoles rech kkijach ri wa chke ri winaq y e juntir xenojik. Are kʼu xkʼistaj y ri Jesús xtaqan che umulixik rech kʼateʼ ktijik. Xukʼaq ta bʼi ri kar y ri kaxlanwa che xkʼis taj xaneʼ xkikʼolo, wariʼ kukʼut chqawach che xaq ta kqakʼaq bʼi ri jastaq qe che kʼolik xaneʼ utz kqabʼan che ukojik. Ri e tat nan utz kkinikʼoj wariʼ kukʼ ri alaj taq akʼalabʼ rech kketaʼmaj ubʼanik orar, kel kikʼuʼx chke ri winaq y kesipanik.

5. ¿Jas xkibʼan ri winaq are chiʼ xkil ri milagros xubʼan ri Jesús y jas xubʼan ri areʼ?

⁵ Ri e winaq sibʼalaj xkimay ri milagros  che xubʼan ri Jesús y ri xubʼan che kitijoxik. Y ketaʼm che ri Moisés xubʼij kanoq che ri Dios kutaq na lo jun profeta y weneʼ rumal laʼ xkichomaj che ri profeta riʼ are ri Jesús (Deut. 18:15-18). We are laʼ ri xkichomaj, weneʼ xkaj che ri Jesús xok che rey rech keʼutzuq juntir ri winaq. Rumal laʼ xkaj xkichapo rech kkibʼan rey che (Juan 6:14, 15). Wet ri Jesús xuya bʼe che kbʼan rey che, qastzij che xa tajin kunim ribʼ riʼ pa ki política ri judíos che pa ri tiempo riʼ kʼa kʼo na pa kiqʼabʼ ri romanos. Pero xuya ta bʼe che ri winaq kkibʼan wariʼ. Rumal laʼ ri Biblia kubʼij, che ri Jesús aninaq «xpaqiʼ chi jumul pa ri juyubʼ». Paneʼ ri e winaq xkikoj kichuqʼabʼ rech xok che rey, pero ri areʼ xraj taj xunim ribʼ pa política. ¡Jun utzalaj kʼutbʼal!

6. ¿Jas kqabʼan che resaxik uwach ri Jesús? (Xuqujeʼ chawilaʼ ri wachbʼal).

⁶ Kamik, kʼo ta jun kubʼij chqe che kqabʼan jun milagro y keqatzuq kʼi winaq, keqakunaj o kojok che qʼatal tzij. Pero weneʼ kkibʼij chqe che rajawaxik kqabʼan votar o kqatoʼ uwiʼ jun winaq che kkichomaj che kkun che utoʼik ri tinamik. Ri Jesús xuya kan jun utz kʼutbʼal chqawach. Ri areʼ xunim ta ribʼ pa política. Rumal laʼ xubʼij wariʼ: «Ri wajawbʼal man aj uwach ulew taj» (Juan 17:14; 18:36). Ri oj cristianos rajawaxik junam kojchoman rukʼ ri Jesús y kqesaj uwach ri xubʼano. Ri  oj xaq xiw kqatoʼ uwiʼ ri Uqʼatbʼal tzij ri Dios, kqabʼij chke nikʼaj chik y kqabʼan orar rech kopan ri tiempo che kuqʼat na tzij cho ri uwach Ulew (Mat. 6:10). Chqilampeʼ jas más kojkunik kqetaʼmaj chrij ri milagro che xubʼan ri Jesús rukʼ ri kaxlanwa.

XKICHʼOBʼ TA «RI MAYIBʼAL RI XUBʼAN RI JESÚS RUKʼ RI KAXLANWA»

7. ¿Jas jun chi milagro xubʼan ri Jesús y jas xkibʼan ri apóstoles? (Juan 6:16-20).

⁷ Are chiʼ xetzuqutaj ri winaq, ri Jesús xubʼij chke ri u apóstoles che ketzalij pa Capernaúm pa jun alaj barco y ri areʼ xbʼe kan pa ri juyubʼ rech ri winaq kkibʼan ta rey che (chasikʼij Juan 6:16-20). Are chiʼ ri apóstoles e bʼenaq pa ri barco xumaj jun nimalaj kaqiqʼ y kuslabʼsaj ri joron. Rumal laʼ ri Jesús xbʼe kukʼ, xbʼin bʼi puwiʼ ri joron y xubʼij che ri apóstol Pedro che je kubʼano (Mat. 14:22-31). Are chiʼ ri Jesús xaqʼan pa ri barco, xtaniʼ ri kaqiqʼ. Ri discípulos sibʼalaj xkimayo y xkibʼij wariʼ: «Qastzij wi chi at at Ukʼojol ri Dios» (Mat. 14:33, TNM). a Ri apóstoles kʼateʼ xkibʼij waʼ taq tzij riʼ are chiʼ xkilo che ri Jesús tajin kbʼin puwiʼ ri joron xkibʼij taj are chiʼ ri Jesús xeʼutzuq e kʼi winaq rukʼ kebʼ oxibʼ kaxlanwa y kar. Ri Marcos xuya kan ubʼixik jas más xkinaʼ ri apóstoles, xubʼij: «Man kichʼobom ta kʼu ri mayibʼal ri xubʼan ri Jesús rukʼ ri kaxlanwa, xaneʼ ko ri kanimaʼ» (Mar. 6:50-52). Rukʼ wariʼ xkikʼutu che kichʼobʼom ta na ri poder uyaʼom ri Jehová pa uqʼabʼ ri Jesús che ubʼanik milagros. Are chiʼ xqʼax jubʼiqʼ tiempo, ri Jesús xtzijon chrij ri milagro che xubʼan rukʼ ri kaxlanwa y kʼo kqetaʼmaj chrij wariʼ.

8, 9. ¿Jasche xebʼe ri winaq che utzukuxik ri Jesús? (Juan 6:26, 27).

⁸ Ri Jesús xrilo che ri winaq che xeʼutzuqu xaq xiw kebʼe rukʼ rumal ri kuya chke. Chukabʼ qʼij are chiʼ xkilo e kʼo ta chi ri Jesús y ri u apóstoles, xebʼe pa ri barcos ri e petinaq pa Tiberíades y xebʼe pa Capernaúm che utzukuxik ri Jesús (Juan 6:22-24). Pero ¿la xkibʼan wariʼ rech kketaʼmaj más chrij ri Uqʼatbʼal tzij ri Dios? Je taj. Ri más kkaj are che kyaʼ kiwa. ¿Jasche jelaʼ kqabʼij?

⁹ Nabʼe chqilaʼ jas xkibʼan ri winaq are chiʼ xekiriqa ri Jesús chunaqaj Capernaúm. Ri Jesús xubʼij chke ri winaq che ri kkaj are che kyaʼ kiwa. Rumal laʼ xubʼij che xenoj rukʼ ri kaxlanwa che xkitijo che «ksach uwach». Y xubʼij chke che rajawaxik kkitzukuj «ri wa [...] ri kuya junalik kʼaslemal» (chasikʼij Juan 6:26, 27). Y xubʼij chke che are ri Utat kyaʼow wariʼ chke. Ri winaq sibʼalaj xkijiqʼaj o xqimayo are chiʼ xkito che kʼo jun wa ri kuya jun jeʼlik kʼaslemal chke. Pero ¿jas ubʼanik wajun wa riʼ, y jas kkibʼan che uriqik?

10. ¿Jas «uchak ri Dios» rajawaxik kkibʼan ri winaq rech kkiriq ri kʼaslemal kʼo ta ukʼisik?

¹⁰ Weneʼ ri e winaq riʼ xkichomaj che kʼo jun chak rajawaxik kkibʼano rech kyaʼ ri kiwa. Weneʼ are tajin kechoman chrij jun chak che kʼo pa ri Ley che xyaʼ kan che ri Moisés. Pero ri Jesús xubʼij wariʼ chke: «Are waʼ ri uchak ri Dios, chi chixkojon che ri jun ri taqom uloq rumal» (Juan 6:28, 29). Rech kekunik kkiriq ri kʼaslemal kʼo ta ukʼisik rajawaxik kekojon chrij ri Jesús. Ya ubʼim chi ri Jesús wariʼ nabʼe kanoq (Juan 3:16-18, 36). Pero jumul chik kubʼij na ri rajawaxik kqabʼano rech  kqariq ri kʼaslemal kʼo ta ukʼisik (Juan 17:3).

11. ¿Jas xkibʼan ri judíos che ukʼutik che xaq are tajin kechoman chrij ri wa? (Salmo 78:24, 25).

¹¹ Ri judíos riʼ xkikoj ta ri tajin kukʼut ri Jesús chkiwach chrij ri jun kʼakʼ «uchak ri Dios». Rumal laʼ xkitaʼ wariʼ che: «¿Jas ri etal kbʼan la rech kqilo, kujkojon kʼu che la?» (Juan 6:30). Y xkibʼij che ri Jesús che pa taq uqʼij ri Moisés xyaʼ ri maná chke che kiwa (Neh. 9:15; chasikʼij Salmo 78:24, 25). Rukʼ wariʼ kqilo che xaq are kechoman chrij ri wa. Are chiʼ ri Jesús xubʼij chrij «ri qas wa ajkaj», ri kuya kʼaslemal, ri judíos xkita ta che jas kraj kubʼij «ri qas wa ajkaj», rumal che ri e areʼ xkichomaj che are junam rukʼ ri maná (Juan 6:32). Are tajin kechoman chrij ri jastaq ri kajwataj chke ronojel taq qʼij are ta xechoman chrij ri tajin kukʼut ri Jesús chkiwach. ¿Jas kojkunik kqetaʼmaj chrij wariʼ?

RI MÁS NIM UBʼANIK CHQAWACH

12. ¿Jas xubʼan ri Jesús che ukʼutik jas ri más nim ubʼanik?

¹² Jun jastaq che nim ubʼanik che kqetaʼmaj pa ri capítulo 6 re Juan are che: ri más nim ubʼanik are ri qachilanik rukʼ ri Dios y che kqanimaj ronojel ri kubʼij. Ri Jesús xuya ubʼixik chrij wariʼ are chiʼ xuxutuj jun chke ri tentaciones che xukoj ri Satanás chuwach (Mat. 4:3, 4). Y pa ri Sermón del Monte xuya ubʼixik che rajawaxik kqachajij ri qachilanik rukʼ ri Dios (Mat. 5:3). Rumal laʼ utz kojchoman chrij wariʼ: «¿La tajin kinkʼut pa ri nukʼaslemal che ri más nim ubʼanik chnuwach are ri wachilanik rukʼ ri Jehová?».

13. a) ¿Jasche awas taj kojkikot rukʼ ri kʼo qukʼ? b) ¿Jas ri rajawaxik knaʼtaj chqe? (1 Corintios 10:6, 7, 11).

¹³ Utz kqataʼ che ri Dios ri kajwataj chqe y kojkikot rukʼ ri kuyaʼo (Luc. 11:3). Ri Biblia kubʼij che rukʼ ri qachak kojkunik kqariq ri kqatijo y che wariʼ kuya kikotemal chqe, rumal che «kpe rukʼ ri Dios» (Ecl. 2:24; 8:15; Sant. 1:17). Paneʼ jeriʼ, rajawaxik kqachajij qibʼ rech kbʼe ta qakʼuʼx chrij ri jastaq ri kajwataj chqe. Are laʼ ri xubʼij ri apóstol Pablo chke ri cristianos. Xunaʼtajisaj chke ri xbʼantaj kukʼ ri israelitas are chiʼ e kʼo chunaqaj ri juyubʼ Sinaí. Y xubʼij chke che «kkirayij ta ri itzel taq jastaq», junam rukʼ ri xkibʼan ri israelitas (chasikʼij 1 Corintios 10:6, 7, 11). Ri e areʼ are xbʼe kikʼuʼx chrij ri jastaq kkitijo y are ta xkil ri tajin kubʼan ri Jehová che kichajixik, rumal laʼ kqabʼij che xkirayij itzel taq jastaq (Núm. 11:4-6, 31-34). Y je xkibʼano are chiʼ xkiqʼijilaj ri alaj amaʼ wakax, xewaʼik y xekikot rumal ri tajin kkibʼano (Éx. 32:4-6). Are waʼ ri xunatajsaj ri Pablo chke ri judíos rumal che xa jubʼiqʼ chi kraj ksach uwach Jerusalén pa ri junabʼ 70 re ri qaqʼij. Y kamik xa jubʼiqʼ chi kraj ksach uwach wajun uwach ulew riʼ, rumal laʼ rajawaxik nim kqil wi ri xubʼij kan ri Pablo.

14. ¿Jas kubʼij ri Biblia chrij ri wa che kqatij na pa ri kʼakʼ uwach Ulew?

¹⁴ Are chiʼ ri Jesús xubʼij che kqataʼ che ri Dios che kuya «ri qawa re wajun qʼij riʼ», xuqujeʼ xubʼij che rajawaxik kqataʼ che kbʼan ri kraj ri Dios «pa ri kaj, xuqujeʼ pa ri uwach ulew» (Mat. 6:9-11, TNM). ¿Jas kachomaj at che kbʼantaj na? Ri Biblia kubʼij che jun chke ri kraj ri Dios are che kʼo kʼi ktijow cho ri uwach Ulew. Rumal laʼ pa Isaías 25:6-8 kubʼij che are chiʼ kʼo chi ri Uqʼatbʼal tzij ri Dios sibʼalaj jeʼl ri jastaq ktijow na cho ri uwach Ulew. Y pa ri Salmo 72:16 kubʼij che «mat chkʼis ri  triko pa ri ulew; sibʼalaj ta chwachin pa kiwiʼ taq ri juyubʼ». ¿La kʼo jumul at chomanaq chrij che tajin kakoj ri triko che ubʼanik ri akaxlanwa ri sibʼalaj utz kanaʼo o che kakoj che ubʼanik jun arikil? ¿La at chomanaq chrij che tajin kayak uwach jun cheʼ che at xattikowik? (Is. 65:21, 22). E juntir ri winaq kekikot na rukʼ wa taq tewchibʼal riʼ.

15. ¿Jas rajawaxik kketaʼmaj na ri winaq ri kekʼastaj na loq? (Juan 6:35).

¹⁵ (Chasikʼij Juan 6:35). ¿Jas kkiriq na ri winaq ri xetzuq rumal ri Jesús rukʼ ri kaxlanwa y ri kar? Are chiʼ kekʼastajisax ri kaminaqibʼ, weneʼ kewalajisax jujun chke ri winaq riʼ paneʼ xekojon ta chrij ri Jesús ojer kanoq y kojkowinik kqetaʼmaj na kiwach (Juan 5:28, 29). Kketaʼmaj na jas xraj xubʼij ri Jesús are chiʼ xubʼij: «In riʼ ri wa re kʼaslemal. Apachin ri kape wukʼ in, man kanum ta chi na». Rajawaxik kekojon chrij ri Jesús rumal che xuya ri ukʼaslemal pa kiwiʼ. Kyaʼ na etaʼmanik re ri Biblia chke ri winaq ri kekʼastajisax na y ri akʼalabʼ ri keʼalax pa ri kʼakʼ uwach Ulew. ¡Sibʼalaj kojkikot na riʼ rumal che kojtobʼan pa wajun nimalaj chak! Are waʼ ri kuya na más kikotemal chqe chuwach utijik qawa. Ri más nim ubʼanik are che knimar ri qachilanik rukʼ ri Dios.

16. ¿Jas kqetaʼmaj na pa ri jun chi kʼutunem?

¹⁶ Chanim riʼ xa jubʼiqʼ xqetaʼmaj chrij ri kubʼij pa ri capítulo 6 re Juan. Pero ri Jesús kʼo más xubʼij chrij ri jun kʼaslemal kʼo ta ukʼisik. Wariʼ sibʼalaj nim ubʼanik chkiwach ri judíos ojer y je chqawach oj kamik. Pa ri jun chi kʼutunem kqetaʼmaj na más chrij ri capítulo 6 re Juan.