Ri apóstol Pablo xutzʼibʼaj ri e tzij riʼ che ri Timoteo rumal che are jun kʼamal bʼe: «Katinbʼochiʼj chuwach ri Dios, chuwach ri [...] Jesucristo xuqujeʼ chkiwach ri taqoʼn aj kaj ri e chaʼtalik, chi chataqej we jastaq riʼ, mabʼan kʼu jalan taq wachaj maya kʼu uqʼij jachin jun» (1 Tim. 5:21). ¿E jachin riʼ ri ángeles «ri e chaʼtalik»?

Ri ángeles «ri e chaʼtalik» che xubʼij ri Pablo are ta ri e 144,000. ¿Jasche jelaʼ kqabʼij? Rumal che are chiʼ ri Pablo xubʼij bʼi wariʼ che ri Timoteo, kʼa majaʼ kmajix kikʼasuxik ri winaq ri kebʼe pa ri kaj. Ri apóstoles y ri nikʼaj chi winaq ri xechaʼik rech kebʼe pa ri kaj kʼa majaʼ na kyaʼ jun ki cuerpo espiritual. Rumal laʼ kqabʼij che e are ta ri ángeles «ri e chaʼtalik» (1 Cor. 15:50-54; 1 Tes. 4:13-17; 1 Juan 3:2).

Xuqujeʼ e are ta ri ángeles ri xkinimaj ta ri Dios pa taq ri u tiempo ri Noé. Rumal che ri ángeles riʼ are xkitoʼ uwiʼ ri Satanás y xeʼux demonios y ukʼulel ri Jesús (Gén. 6:2; Luc. 8:30, 31; 2 Ped. 2:4). Rumal laʼ ri Jesús keʼutzʼapij na 1,000 junabʼ pa jun nimalaj jul, tekʼuriʼ ksachisax na kiwach rukʼ ri Satanás (Jud. 6; Apoc. 20:1-3, 10).

Rumal che 1 Timoteo 5:21 kubʼij che ri ángeles «ri e chaʼtalik» e kʼo rukʼ ri Dios y ri Cristo Jesús, rukʼ wariʼ kqachʼobʼo che e areʼ utzalaj taq ángeles ri e kʼo pa ri kaj y xaq junam kechakunik.

E kʼo miles utzalaj taq ángeles (Heb. 12:22, 23). Are kʼu wariʼ kraj ta kubʼij che are chiʼ ri Jehová kuya jun chak chke, e juntir ketobʼan che ubʼanik (Apoc. 14:17, 18). Chnaʼtaj chqe che jumul xa jun ángel xtaq che kikamisaxik e 185,000 soldados asirios (2 Rey. 19:35). Are kʼu ri Jesús xubʼij che kʼo jun grupo re ángeles che «kkesaj pa ri Uqʼatbʼal tzij juntir uwach jastaq ri kkʼaman bʼi pa ri makaj y ri e winaq ri kkibʼan kʼax» (Mat. 13:39-41). Y weneʼ e nikʼaj chi ángeles «kekimulij na ri e chaʼtalik» rech kebʼe pa ri kaj (Mat. 24:31). Y e kʼo chi nikʼaj ángeles ri e taqom lo che qachajixik, junam rukʼ ri kubʼij Salmo 91:11 (Mat. 18:10; chajunamisaj rukʼ Mateo 4:11 y Lucas 22:43).

Ri ángeles «ri e chaʼtalik» che kubʼij 1 Timoteo 5:21 weneʼ are ri ángeles ri kekichajij ri congregaciones pa taq ri tiempo riʼ. Pa ri nikʼaj chi textos re wajun capítulo riʼ, ri Pablo tajin kchʼaw chkij ri kʼamal taq bʼe y tajin kubʼij chke ri qachalal re ri congregación che rajawaxik nim kekil wi. Y ri kʼamal taq bʼe rajawaxik «ma[ki]bʼan kʼu jalan taq wachaj ma[ki]ya kʼu uqʼij jachin jun» y aninaq taj kkichaʼla ubʼanik jun jastaq. ¿Jasche rajawaxik je kkibʼano? Ri Pablo xubʼij che ri kʼamal taq bʼe che tajin kekilij ri qachalal «chuwach ri Dios, chuwach ri [...] Jesucristo xuqujeʼ chkiwach ri taqoʼn aj kaj ri e chaʼtalik». Kraj kubʼij che ri Jehová, ri Jesús y ri ángeles tajin kkil ri kkibʼan ri kʼamal taq bʼe che kilixik ri qachalal pa ri congregación. Rukʼ wariʼ kqachʼobʼo che e kʼo jujun ángeles kkil ri kbʼantaj pa ri congregación, kekichajij ri upatanelabʼ ri Dios y kkil ri kbʼan che utzijoxik ri utzij ri Dios rech kekiyaʼ ubʼixik che ri Jehová ri xkilo (Mat. 18:10; Apoc. 14:6).