1. ¿Jas kkʼutuwik che kimik tajin ta chi kkʼut nimalaj loqʼoqʼebʼal?

PA RI Biblia xtzʼibʼax kanoq che pa ri kʼisbʼal taq qʼij ri e winaq «man kʼo ta loqʼoqʼebʼal kikʼuʼx» (2 Tim. 3:1, 3). Wariʼ tajin kkʼulmataj kimik. Jun kʼutbʼal, e millones familias kiriqom kʼax rumal che ri e tat nan kijachom kibʼ, xaq kkiyajajej kibʼ ri tat nan, y ri alkʼwalaxelabʼ kkinaʼo che keloqʼoqʼex taj. Xuqujeʼ, e kʼo familias junam ja e kʼo wi are kʼu kkibʼano che jetaneʼ ketaʼm ta kiwach. Jun consejero familiar, kubʼij: «Ri nan, ri tat y ri alkʼwalaxelabʼ kkilij ta chi kibʼ, xaq xiw chi kkilij ri kicomputadora, ri tableta, ri teléfono o ri máquina re videojuegos. Paneʼ junam ja e kʼo wi, qas ta ketaʼm kiwach».

2, 3. a) Junam che kubʼij Romanos 12:10, ¿jachin chke rajawaxik kqakʼut wi nimalaj loqʼoqʼebʼal? b) ¿Jas kqil na pa wajun kʼutunem riʼ?

² Kqaj taj kojux junam kukʼ ri e winaq kimik che kkikʼut ta chi loqʼoqʼebʼal (Rom. 12:2). Rajawaxik che xaq xiw ta chke ri qafamiliares kqakʼut wi nimalaj loqʼoqʼebʼal, xaneʼ xuqujeʼ chke ri e qachalal pa ri congregación (chasikʼij uwach Romanos 12:10). ¿Jas ubʼanik ri loqʼoqʼebʼal che tajin kojchʼaw chrij? Pa ri chʼabʼal griego, are jun tzij che kraj kubʼij ri loqʼoqʼebʼal che kqanaʼ chke ri qafamiliares che keqil junam rukʼ utzalaj taq qachiʼl. Y are laʼ ri loqʼoqʼebʼal che rajawaxik kqanaʼ chke ri e qachalal pa ri congregación, rumal che are ri qafamilia pa ri qakojonik. We kqakʼut nimalaj loqʼoqʼebʼal, kqatoʼlaʼ qibʼ qonojel rech kqaya ta kan upatanexik ri Jehová (Miq. 2:12).

³ Pa wajun kʼutunem riʼ kqanikʼoj na kebʼ oxibʼ kʼutbʼal re ri Biblia che kojutoʼ che ukʼutik nimalaj loqʼoqʼebʼal.

4. ¿Jas kubʼan Santiago 5:11 che ukʼutik chqawach che Jehová sibʼalaj kojuloqʼoqʼej?

⁴ Ri Biblia kchʼaw chrij ri utzalaj taq ubʼantajik ri Jehová. Jun kʼutbʼal, kubʼij chqe che «ri Dios are loqʼoqʼebʼal kʼuxaj» (1 Juan 4:8). Retaʼmaxik wariʼ kubʼano che kqaj kojqebʼ más rukʼ. Are kʼu, ri Biblia xuqujeʼ kubʼij che ri Jehová are jun Dios che «kel ukʼuʼx» o nim ri uloqʼoqʼebʼal (chasikʼij uwach Santiago 5:11). ¡Sibʼalaj utz kubʼan ri Jehová che ukʼutik che kel ukʼuʼx chqe!

5. ¿Jas kubʼan ri Jehová che ukʼutik toqʼobʼisal wachaj y jas kqabʼan che resaxik uwach?

⁵ Pa Santiago 5:11 kqilo che kjunamisax ri nimalaj uloqʼoqʼebʼal ri Jehová rukʼ jun chi ubʼantajik che utz kqilo: ri toqʼobʼisal wachaj (Éx. 34:6). Ri kubʼan ri Jehová che ukʼutik wajun bʼantajik are che kukuy ri qamak (Sal. 51:1). Are kʼu, chiʼ ri Biblia kubʼij che kutoqʼobʼisaj wachaj, xaq xiw ta kchʼaw chrij che kukuy makaj. Ri toqʼobʼisal wachaj xuqujeʼ are jun bʼantajik che kunaʼ jun winaq y kubʼano che kraj kutoʼ jun chik che tajin kuriq kʼax. Ri Biblia kubʼij ri kunaʼ ri Jehová che qatoʼik más nim na chuwach ri kunaʼ jun nan che utoʼik ri ral (Is. 49:15). Are chiʼ kqariq kʼax, ri utoqʼobʼisal wachaj ri Jehová kubʼan che, che kraj kojutoʼo (Sal. 37:39; 1 Cor. 10:13). Oj kojkunik kqesaj uwach ri utoqʼobʼisal wachaj are chiʼ kqakuy kimak ri e qachalal y kqakʼol ta oyowal pa qanimaʼ are chiʼ kkibʼan jun jastaq che kubʼan kʼax chqe (Efes. 4:32). Are kʼu ri más nim ubʼanik are che keqatoʼ pa ri e kʼax kkiriqo. Are chiʼ are ri loqʼoqʼebʼal ri kubʼano che kqatoqʼobʼisaj kiwach ri e nikʼaj chik, tajin kqesaj uwach ri Jehová, che nim ri uloqʼoqʼebʼal (Efes. 5:1).

6. ¿Jas xkibʼan Jonatán y David che ukʼutik nimalaj loqʼoqʼebʼal chbʼil kibʼ?

⁶ Ri Biblia kuya ubʼixik kʼi kʼutbʼal ke winaq che xkikʼut nimalaj loqʼoqʼebʼal.  Chqilaʼ ri kikʼutbʼal Jonatán y David. Ri Biblia kubʼij che «ri Jonatán sibʼalaj xbʼe ranimaʼ rukʼ ri David, sibʼalaj nim ri uloqʼal chuwach jetaneʼ ri areʼ chbʼil ribʼ» (1 Sam. 18:1). Ri Jehová are xuchaʼ ri David rech kux qʼatal tzij pa ukʼaxel ri Saúl, ri utat ri Jonatán. Ri Saúl utz ta xrilo y sibʼalaj xqʼaqʼar che royowal rumal laʼ xraj xukamisaj ri David. Are kʼu ri Jonatán xutoʼ ta ri utat rech kukamisaj ri David. Jonatán y David xkibʼij che amaqʼel keʼux achiʼl y kkitoʼlaʼ kibʼ (1 Sam. 20:42).

7. ¿Jas jastaq xqʼatem ta ri achilanik chkixoʼl ri Jonatán y ri David?

⁷ Nim kqil riʼ ri kachilanik ri Jonatán y ri David we kojchoman chrij nikʼaj chi jastaq, ¿jas riʼ? Jun kʼutbʼal, 30 junabʼ nabʼeʼal ri Jonatán chuwach ri David. Paneʼ Jonatán kʼo chi nim retaʼmabʼal y kʼo ta kjunamataj wi rukʼ ri David, kʼo ta jumul xuchomaj che David nim ta ubʼanik o che kʼo ta upatan.

8. ¿Jasche kachomaj che Jonatán are jun utzalaj rachiʼl ri David?

⁸ Xuqujeʼ, Jonatán xkun ta riʼ xchʼojin rukʼ ri David rumal che are ri ukʼojol ri qʼatal tzij y taqal che kyaʼ kan ri qʼatbʼal tzij pa uqʼabʼ (1 Sam. 20:31). Are kʼu, Jonatán jeʼ ta xubʼano, xaneʼ xumachʼ ribʼ y xux sukʼ che ri Jehová, rumal laʼ rukʼ ronojel ranimaʼ xuya ri utobʼanik che ri Jehová che are xuchaʼ ri David che qʼatal tzij. Xuqujeʼ xux sukʼ che ri David, paneʼ sibʼalaj xuyak royowal ri Saúl (1 Sam. 20:32-34).

9. ¿Jasche qetaʼm che Jonatán xubʼan ta ukʼulel che David?

⁹ Rumal ri nimalaj uloqʼoqʼebʼal ri Jonatán che ri David xubʼan ta ukʼulel che. Jonatán are jun ajchʼoj che kʼo nim uchuqʼabʼ y knaʼw che ukʼaqik ri flechas. Kbʼixik che areʼ y ri utat más «¡e kʼo na ri kirapinik chkiwach ri kot!» o xik y más «¡kʼo na ri kichuqʼabʼ chkiwach ri koj!» (2 Sam. 1:22, 23). Rumal laʼ ri Jonatán kkunik kubʼan nim che ribʼ rumal che kʼi mul chʼakanaq pa ri e chʼoj. Are kʼu xubʼan taj, xuqujeʼ xpe ta royowal are chiʼ David xchʼakan pa ri e chʼoj. Xaneʼ are nim xril wi ri ukowil ukʼuʼx y ri ukubʼsal ukʼuʼx chrij ri Jehová. Ri xubʼan ri Jonatán are che xuloqʼoqʼej ri David are chiʼ xukamisaj ri Goliat. ¿Jas kqabʼan oj che ukʼutik nimalaj loqʼoqʼebʼal chke ri e qachalal?

10. ¿Jas kraj kubʼij kqaloqʼoqʼej qibʼ rukʼ ronojel qanimaʼ y qachuqʼabʼ?

¹⁰ Ri Biblia kubʼij: «Chiloqʼoqʼelaʼ bʼaʼ iwibʼ rukʼ ronojel iwanimaʼ xuqujeʼ ronojel ichuqʼabʼ» (1 Ped. 1:22). Jehová kuya ri kʼutbʼal chqawach. Areʼ sibʼalaj kojraj, we oj kojux sukʼ che, kʼo ta jun jastaq kojqʼatenik che kojkʼojiʼ naqaj che (Rom. 8:38, 39). Ri e tzij «ronojel chuqʼabʼ» pa ri chʼabʼal griego kraj kubʼij che rajawaxik kkoj chuqʼabʼ che ukʼutik loqʼoqʼebʼal, y are laʼ ri rajawaxik che weneʼ kqabʼan kukʼ jujun taq qachalal. Ri Biblia kubʼij chqe ri rajawaxik kqabʼano are chiʼ kbʼan jun kʼax chqe: «Chkʼol ikochʼonik chikochʼolaʼ kʼu taq iwibʼ rukʼ loqʼoqʼebʼal kʼuxaj, chikojoʼ ichuqʼabʼ rech amaqʼel ix nukʼutalik, rumal ri utobʼanik ri uxlabʼixel xuqujeʼ rumal ri jamaril ri kubʼan xa jun chiwe» (Efes. 4:1-3). Rech amaqʼel kʼo jamaril chqaxoʼl, rajawaxik are ta kqil ri utz taj kkibʼan ri e qachalal, xaneʼ rajawaxik are kqil ri utz kibʼantajik junam  che kubʼan ri Jehová (1 Sam. 16:7; Sal. 130:3).

11. ¿Jasche jujun taq mul kʼax kqabʼan che ukʼutik nimalaj loqʼoqʼebʼal?

¹¹ Jujun taq mul kʼax kqabʼan che ukʼutik nimalaj loqʼoqʼebʼal chke ri e qachalal, más na we are kojchoman chrij ri jastaq che utz ta kkibʼano. Wariʼ xkʼulmataj pa ri nabʼe siglo. Jun kʼutbʼal, Evodia y Síntique utz kkilo ketobʼan rukʼ ri Pablo che utzijoxik «ri tzij re kolobʼal ibʼ». Are kʼu, kʼo kʼax chkixoʼl. Rumal laʼ Pablo xubʼij chke che «xaq junam chechoman pa ri Ajawaxel» (Filip. 4:2, 3).

12. ¿Jas rajawaxik kqabʼano rech kqakʼut nim loqʼoqʼebʼal chke ri e qachalal?

¹² ¿Jas rajawaxik kqabʼano rech kqakʼut nimalaj loqʼoqʼebʼal chke ri e qachalal? Utz kqetaʼmaj más kiwach. Jeriʼ kqachʼobʼo jasche jeʼ kibʼantajik wariʼ y keqaloqʼoqʼej más. Kqaya taj che ri qajunabʼ y ri qacostumbres kojkiqʼatej che ukʼutik nimalaj loqʼoqʼebʼal. Chnaʼtaj ri Jonatán chqe che xkʼojiʼ utz rachilanik rukʼ David paneʼ 30 junabʼ nabʼeʼal chuwach. Utz we katzukuj jun awachiʼl pa ri acongregación che más akʼal o más nabʼeʼal chawach. We kabʼan wariʼ, kakʼutu che keʼaloqʼoqʼej konojel ri e qachalal (1 Ped. 2:17).

13. ¿Jasche kojkun taj kukʼ konojel ri e qachalal pa ri congregación kkʼojiʼ jun nimalaj qachilanik?

¹³ Are kʼu, are chiʼ kqabʼij che kqakʼut nimalaj loqʼoqʼebʼal chke ri e qachalal, ¿la kraj kubʼij che kkʼojiʼ nimalaj qachilanik kukʼ konojel? Jeʼ taj, rumal che kojkun taj kqabʼan wariʼ. Qastzij che e kʼo qachalal ri más utz kqanaʼo kojkʼojiʼ kukʼ rumal che junam ri utz kqilo. Junam rukʼ ri Jesús, konojel ri apóstoles e rachiʼl, are kʼu más loqʼ ri Juan chuwach (Juan 13:23; 15:15; 20:2). Paneʼ jeʼ wariʼ, xaq xiw ta ri Juan xux nim ubʼanik chuwach ri Jesús. Jun kʼutbʼal, are chiʼ ri Juan y ri Santiago, ri rachalal, xkitaʼ che ri Jesús jun nimalaj keqelen pa ri uQʼatbʼal tzij ri Dios, Jesús xubʼij chke: «Ri tʼuyulem pa ri nuwikiʼaqʼabʼ  o pa ri numoxqʼabʼ, man pa nuqʼabʼ ta kʼo wi» (Mar. 10:35-40). Rajawaxik che oj kqabʼan qe junam rukʼ ri Jesús che más ta nim keqil ri e utzalaj taq qachiʼl chkiwach ri e nikʼaj chik (Sant. 2:3, 4). We junam ta keqil ri e qachalal kubʼano che kʼo ta jamaril pa ri congregación (Jud. 17-19).

14. Junam che kubʼij Filipenses 2:3, ¿jas kojtowik rech kqachomaj taj che más kojkun che ubʼanik ri jastaq chkiwach ri e nikʼaj chik?

¹⁴ Ri nimalaj loqʼoqʼebʼal kojutoʼ rech kqachomaj taj che más kojkun che ubʼanik ri jastaq chkiwach ri e qachalal. Chnaʼtaj ri Jonatán chqe che xubʼan ta ukʼulel che ri David y xutoqij ta ri qʼatbʼal tzij pa uqʼabʼ. Chqesaj uwach ri Jonatán y kpe ta qoyowal chke ri e qachalal che más kenaʼw che ubʼanik ri jastaq chqawach oj. Xaneʼ, chqabʼanaʼ ri xubʼij ri Pablo: «Chimachʼarisaj iwibʼ chichʼobʼoʼ chi ri nikʼaj chik e areʼ nimaʼq na kiqʼij chiwach ix» (chasikʼij uwach Filipenses 2:3). Chnaʼtaj chqe che konojel ri e qachalal kʼo kekunik kkibʼan pa ri congregación. We kojmachʼachʼik, are kqil riʼ ri utz taq kibʼantajik ri e qachalal y kqariq utzilal rumal ri utzalaj kikʼutbʼal (1 Cor. 12:21-25).

15. ¿Jas kawetaʼmaj chrij ri xukʼulmaj Tanya y ri ufamilia?

¹⁵ Are chiʼ kqariq kʼax, Jehová keʼukoj ri e qachalal che qatoʼik y ukubʼsaxik qakʼuʼx. Chqilaʼ ri xukʼulmaj jun familia pa jun sábado are chiʼ xetzalij lo pa jun chke ri nim riqbʼal ibʼ internacional ubʼiʼ ¡Ri loqʼoqʼebʼal ksach ta uwach! che xbʼan pa Estados Unidos pa ri junabʼ 2019. Tanya, che e kʼo oxibʼ ral, xubʼij che are chiʼ xetzalij bʼi  pa ri hotel jun chʼichʼ xupukʼij ribʼ chuwach ri kichʼichʼ. Areʼ kubʼij: «Kʼo ta nijun xuriq kʼax, are kʼu xojel lo pa ri chʼichʼ y xojtakʼiʼ pa ri autopista y sibʼalaj xqaxibʼij qibʼ. Tekʼuriʼ xqil jun winaq che kʼo chuxukut ri bʼe tajin kojusikʼij rech kojbʼe jachiʼ kʼo wi ri uchʼichʼ rech kʼo ta kqakʼulmaj. Are jun qachalal che xuqujeʼ kʼateʼ xtzalij lo pa ri nim riqbʼal ibʼ. Y xaq xiw ta areʼ xtakʼiʼk xuqujeʼ e jobʼ qachalal re Suecia che xuqujeʼ e petinaq pa ri nim riqbʼal ibʼ. Ri e qachalal ixoqibʼ xojkimatzej. Are laʼ ri xajwataj chqe. Paneʼ xqabʼij chke che utz qawach are kʼu xekʼojiʼ qukʼ. Xebʼe taj paneʼ xopan ri ambulancia. Qas xkilo we kʼo kajwataj chqe. Pa ri kʼax riʼ, qas xqanaʼ ri uloqʼoqʼebʼal ri Jehová. Y xojutoʼ rech xnimar ri qaloqʼoqʼebʼal chke ri e qachalal. Xuqujeʼ xkʼiy más ri qaloqʼoqʼebʼal y ri qamaltyoxinik che ri Jehová». ¿La knaʼtaj chawe are chiʼ jun qachalal xukʼut nimalaj loqʼoqʼebʼal chawe are chiʼ más xajwataj chawe?

16. ¿Jas rumal che kqakʼut nimalaj loqʼoqʼebʼal chbʼil taq qibʼ?

¹⁶ ¿Jas utzilal kuyaʼo we kqakʼut nimalaj loqʼoqʼebʼal chbʼil taq qibʼ? Kqaya kubʼsal kʼuʼx chke ri e qachalal are chiʼ tajin kkiriq kʼax y keqatoʼ rech junam kqapatanij ri Jehová rukʼ kikotemal. Xuqujeʼ, kqakʼutu che oj qastzij tijoxelabʼ re ri Jesús, wariʼ kubʼano che e kʼi winaq kkaj kkipatanij ri Jehová. Are kʼu ri más nim ubʼanik are che kqaya uqʼij ri Jehová, ri «Tataxel waʼ kutoqʼobʼisaj qawach, are Dios waʼ ri kukubʼsaj qakʼuʼx pa ronojel» (2 Cor. 1:3). Rumal laʼ qonojel chqakʼutuʼ nimalaj loqʼoqʼebʼal.