PA RI Museo ubʼiʼ Tierras de la Biblia, che kʼo pa Jerusalén, kʼo jun abʼaj che e tzʼibʼam tzij chuwach re taq ri junabʼ 700 y 600 nabʼe chuwach ri qaqʼij. Ri abʼaj xriqitaj chunaqaj ri tinamit Hebrón (Israel), chuxeʼ jun cueva o pek che kkoj che muqbʼal. Ri e tzij kubʼij: «Itzeletajinaq Hagaf ukʼojol Hagav rumal ri Yahweh Sabaot». Ri e tzij riʼ kukʼutu che qastzij ri kubʼij ri Biblia rumal che kukʼutu che ri ubʼiʼ ri Dios, Jehová o Yahweh, tzʼibʼatal pa ojer hebreo rukʼ ri letras YHWH, sibʼalaj etaʼmatal uwach y che ri e winaq xkikoj pa ri kikʼaslemal ojer. Xuqujeʼ, e riqom nikʼaj chi tzij che xetzʼibʼax kan ojer pa taq ri cuevas, che kkikʼutu che ri winaq xekojow ri cuevas che kiriqbʼal ibʼ o ri kkowaj wi kibʼ, amaqʼel xkitzʼibʼaj ri ubʼiʼ ri Dios chuwach taq ri abʼaj y kibʼiʼ winaq kojom ri ubʼiʼ ri Dios chupam.

Ri lingüista Rachel Nabulsi, re ri Universidad re Georgia, xubʼij wariʼ chrij ri e tzij che e tzʼibʼatal chuwach ri abʼaj: «Ri rumal che amaqʼel kbʼix ri bʼiʼaj YHWH kraj kubʼij che nim ubʼanik [...]. Ri e tzʼibʼam pa ri Biblia y cho taq abʼaj kkikʼutu che ri e tzij YHWH nim ubʼanik chkiwach ri e tinamit Israel y Judá». Wariʼ kukʼutu che qastzij ri kukʼut ri Biblia, che ri ubʼiʼ ri Dios, tzʼibʼam rukʼ ri e tzij hebreas YHWH sibʼalaj kʼi mul kriqitaj chupam. Pa kʼi chke ri bʼiʼaj xuqujeʼ kojom ri ubʼiʼ ri Dios.

Ri e tzij Yahweh Sabaot, che tzʼibʼam chuwach ri abʼaj che xojchʼaw chrij nabʼe, kraj kubʼij «Jehová de los ejércitos». Wariʼ kukʼutu che ri ubʼiʼ ri Dios y ri e tzij «Jehová de los ejércitos» amaqʼel xekoj ojer. Xuqujeʼ kutoʼ uwiʼ ri e tzij re ri Biblia «Jehová de los ejércitos», che kriqitaj más che 250 mul pa ri Escrituras Hebreas originales, ri más kriqitaj wi are pa ri e wuj re Isaías, Jeremías y Zacarías.