1. ¿Jas ubʼanik ri ufamilia ri Santiago?

 RI SANTIAGO, rachalal ri Jesús, xkʼiy pa jun familia che ko ri kikojonik. * Ri José y María, ri utat unan ri Santiago, sibʼalaj xkiloqʼoqʼej ri Jehová y xkikoj kichuqʼabʼ che upatanixik. Ri Santiago xuriq jun nimalaj tewchibʼal: rumal che ri ratz xux ri Mesías are chiʼ xqʼax ri tiempo. ¡Are jun nimalaj tewchibʼal che ri Santiago rumal che xkʼiy pa wajun familia!

2. ¿Jas rumal che ri Santiago nim xril wi ri Jesús?

² Kʼo kʼi rumal che ri Santiago nim xril wi ri ratz (Mat. 13:55). Jun kʼutbʼal, rumal che ri Jesús qas kuchʼobʼ ri uTzij ri Dios, paneʼ kʼateʼ 12 ujunabʼ xmay uwach rumal ri nim retaʼmabʼal kumal ri ajtijabʼ re Jerusalén (Luc. 2:46, 47). Xuqujeʼ, weneʼ ri Santiago xtobʼan rukʼ ri Jesús che ubʼanik taq tem, mexa o nikʼaj chi jastaq. We jeriʼ, qas xuchʼobʼ uwach riʼ ri rachalal. Nathan Knorr amaqʼel kubʼij waʼ taq tzij: «Are chiʼ junam katchakun rukʼ jun winaq, kawetaʼmaj kʼi jastaq chrij». * Ri Santiago xrilo chiʼ «xkʼiy ri Jesús, xnimar ri unoʼj, xkowirik. Utz kil wi rumal ri Dios xuqujeʼ kumal ri winaq» (Luc. 2:52). Rukʼ wariʼ weneʼ kqachomaj che ri Santiago xux jun chke ri nabʼe taq utijoxelabʼ ri Jesús, are kʼu je ta xkʼulmatajik.

3. ¿Jas xubʼan ri Santiago are chiʼ ri Jesús xumaj utzijoxik utzij ri Dios?

 ³ Are chiʼ ri Jesús xumaj utzijoxik utzij ri Dios, ri Santiago xux ta jun chke ri utijoxelabʼ (Juan 7:3-5). Y weneʼ jun ri Santiago chkixoʼl ri e rachalaxik ri Jesús ri xebʼin wariʼ: «Areʼ chʼujirinaq» (Mar. 3:21). Ri Biblia kubʼij taj che ri Santiago kʼo rukʼ ri María, ri unan, are chiʼ xkamisax ri Jesús chuwach jun cheʼ (Juan 19:25-27).

4. ¿Jas kebʼ jastaq kqanikʼoj na?

⁴ Are chiʼ xqʼax ri tiempo, ri Santiago xkojon chrij ri Jesús y xux jun cristiano che nim xil wi pa ri congregación. Pa wajun kʼutunem, kqanikʼoj na kebʼ jastaq ri kqetaʼmaj chrij ri ukʼutbʼal ri Santiago: 1) ¿jasche rajawaxik kqamachʼ qibʼ? y 2) ¿jas kqabʼano rech kojux utz taq ajtijabʼ?

5. ¿Jas xubʼan ri Santiago are chiʼ xukʼut ribʼ ri Jesús chuwach?

⁵ ¿Jas tiempo ri Santiago xux jun utzalaj utijoxel ri Jesús? Are chiʼ kʼastajinaq chi ri Jesús, «xukʼut ribʼ chuwach ri Santiago, xuqujeʼ xukʼut ribʼ chkiwach konojel ri taqomxenlabʼ» (1 Cor. 15:7). Ri xkʼulmatajik, xukʼex kan ri ukʼaslemal ri Santiago. Kʼo kukʼ ri apóstoles are chiʼ xkimulij kibʼ pa uwiʼ jun ja pa Jerusalén rech kqaj lo ri uxlabʼixel pa kiwiʼ (Hech. 1:13, 14). Are chiʼ xqʼax ri tiempo, ri Santiago xuqujeʼ xux jun chke ri xekʼojiʼ pa ri Jupuq Ajkʼamal bʼe cho ronojel uwach Ulew re ri nabʼe siglo (Hech. 15:6, 13-22; Gál. 2:9). Y, chuwach kan ri junabʼ 62, xutzʼibʼaj jun carta chke ri cristianos e chaʼom kebʼe pa ri kaj. Ri carta xutzʼibʼaj kuya utzilal chqe qonojel kimik, paneʼ jalan ri qeyebʼal we pa ri kaj o cho ri uwach Ulew (Sant. 1:1). Jun historiador re ri nabʼe siglo, Josefo ubʼiʼ, kubʼij che xtaq ukamisaxik ri Santiago rumal ri kinimal kojol tabʼal toqʼobʼ judío Anán. Ri Santiago xuya ta kan upatanixik ri Jehová kʼa pa ri ukamikal.

6. ¿Jas xjunamataj ta wi ri Santiago kukʼ ri e kʼamal taq bʼe pa ri uqʼij?

⁶ Ri Santiago xumachʼ ribʼ. Chqilampeʼ ri xjunamataj ta wi ri Santiago kukʼ ri e kʼamal taq bʼe re taq ri kojonem. Are chiʼ ri Santiago qas xuchʼobʼ ri jastaq ri kkʼutuwik chi ri Jesús are ri uKʼojol ri Dios, rukʼ machʼachʼem xkojon chrij. Are kʼu ri e kinimal ri kojol tabʼal toqʼobʼ re Jerusalén je ta xkibʼano. Jun kʼutbʼal, qas xkilo  che ri Jesús xukʼastajisaj ri Lázaro. Are kʼu, xekojon ta chrij che are ri Jehová taqowinaq loq, xaneʼ xkaj xkikamisaj ri Jesús xuqujeʼ ri Lázaro (Juan 11:53; 12:9-11). Y are chiʼ xkʼastaj lo ri Jesús, xkitzukuj ri xkibʼano rech kketaʼmaj ta ri winaq (Mat. 28:11-15). Rumal che kkibʼan nim che kibʼ, xekojon ta chrij ri Mesías.

7. ¿Jasche utz taj kqabʼan nim che qibʼ?

⁷ Ri kqetaʼmaj: Maqabʼan nim che qibʼ y chqayaʼ bʼe che ri Jehová kojutijoj. Jun yabʼil kkunik kukowirisaj ri ibʼochʼ re ri qanimaʼ y jeriʼ kchakun ta chik, junam rukʼ, ri ubʼanik nimal kubʼan kʼax che ri qachomanik rech kqanimaj ta chi ri Jehová. Ri fariseos xaq xkiya bʼe che xkowir ri kanimaʼ rech xkil ta ri jastaq xkʼutuwik che ri Jesús are ri uKʼojol ri Dios y kʼo ri ruxlabʼixel ri Dios pa uwiʼ (Juan 12:37-40). Ri kibʼantajik xuya ta bʼe chke rech kkiriq ri kʼaslemal kʼo ta ukʼisik (Mat. 23:13, 33). Sibʼalaj nim ubʼanik kqaya bʼe che ri uTzij ri Dios y ri ruxlabʼixel kubʼan utz che ri qabʼantajik y kukʼam qabʼe pa ri qachomanik y pa ronojel ri kqachaʼ ubʼanik (Sant. 3:17). Ri Santiago xuya bʼe che kkʼam ubʼe rumal ri Jehová rumal che kumachʼ ribʼ. Y, junam rukʼ ri kqil chanim, rumal ri umachʼachʼem xux jun utzalaj ajtij.

8. ¿Jas kojtoʼwik rech kojux utz taq ajtijabʼ?

⁸ Ri Santiago xkʼojiʼ ta pa jun nimalaj tijobʼal. Chkiwach ri e kʼamal taq bʼe pa ri uqʼij, ri Santiago, junam rukʼ ri Pedro y ri Juan, «xaq e winaq ri man kʼo ta kitijom wi kibʼ» (Hech. 4:13). Are kʼu xux jun utzalaj ajtij, kqil wariʼ are chiʼ kqasikʼij uwach ri wuj xutzʼibʼaj. Junam rukʼ ri Santiago, weneʼ xojok ta pa jun nimalaj tijobʼal. Are kʼu, rukʼ ri utobʼanik ri ruxlabʼixel ri Jehová y ri tijonik kyaʼ chqe pa taq ri tijobʼal re ri utinamit, kojkunik kojux utz taq ajtijabʼ. Chqanikʼojampeʼ ri kqetaʼmaj chrij ri ukʼutbʼal ri Santiago.

9. ¿Jas kabʼan che ubʼixik ri xubʼan ri Santiago che kitijoxik ri winaq?

⁹ Ri Santiago xeʼukoj ta tzij y chomanik che kʼax kichʼobʼik. Ri utzilal xuya ri xubʼano are che ri winaq qas ketaʼm ri rajawaxik  kkibʼano y jas kkibʼan che ubʼanik. Jun kʼutbʼal, chqilampeʼ ri xubʼan ri Santiago che ukʼutik chqawach che rajawaxik kqatzalij ta uwach are chiʼ kbʼan jun kʼax chqe. Xutzʼibʼaj wariʼ: «Ri uj kʼut kqabʼij chi tewichital ri winaq ri kkichʼij ri kʼax. Itom ri uchʼijonik ri Job, iwilom jas xubʼan ri Ajawaxel che are taq xokʼow ri ukʼaxkʼolil. Iwilom chi ri Ajawaxel kutoqʼobʼisaj kiwach ri winaq, kel ukʼuʼx chke» (Sant. 5:11). Waral kqilo che ri Santiago xukoj ri uTzij ri Dios are chiʼ xeʼutijoj ri winaq. Xukoj che kitoʼik rech kkichʼobʼo che ri Jehová amaqʼel keʼutewchiʼj ri winaq we kkiya ta kan upatanixik junam rukʼ ri xubʼan ri Job. Are chiʼ xchʼaw chrij wariʼ xukoj ta tzij y chomanik che sibʼalaj kʼax kichʼobʼik. Rukʼ ri xubʼano, xukʼutu che xraj che are ri Jehová kyaʼ uqʼij.

10. ¿Jas kqabʼan che resaxik uwach ri Santiago are chiʼ keqatijoj ri winaq?

¹⁰ Ri kqetaʼmaj: Cheqatijoj ri winaq rukʼ tzij y chomanik che kʼax ta kichʼobʼik y chqakojoʼ ri uTzij ri Dios. Ri kqaj are taj che kqakʼut chkiwach ri e winaq chi nim ri qetaʼmabʼal, xaneʼ are kqakʼut ri nimalaj retaʼmabʼal ri Jehová chkiwach y che kel ukʼuʼx chke (Rom. 11:33). Kojkun che ubʼanik we amaqʼel kqakoj ri uTzij ri Dios. Jun kʼutbʼal, we kʼo rajawaxik kkikʼex pa ri kikʼaslemal, kqabʼij ta chke ri kqabʼan oj wet oj oj kʼo pa kilugar, xaneʼ rajawaxik kqakʼut chkiwach che kechoman chrij ri kikʼutbʼal ri winaq che kubʼij pa ri Biblia y ri kuchomaj ri Jehová y ri kunaʼo. Rukʼ wariʼ, kkaj kkikʼex ri kikʼaslemal rumal che kkaj keqaj chuwach ri Jehová y xa ta chqawach oj.

11. ¿Jas jujun taq jastaq utz taj tajin kkibʼan ri cristianos pa taq ri uqʼij ri Santiago, y jas pixabʼ xuya chke? (Sant. 5:13-15).

¹¹ Ri Santiago xchoman chrij ri qas tajin kkʼulmatajik. Pa ri carta che xutzʼibʼaj ri Santiago kqilo che qas xchoman chrij ri kʼax tajin kkiqʼaxej ri cristianos y xuya pixabʼ chke chrij ri rajawaxik kkibʼano. Jun kʼutbʼal, weneʼ jujun cristianos aninaq ta kkibʼan pa kikʼaslemal ri pixabʼ re ri uTzij ri Dios (Sant. 1:22). E nikʼaj chik are más nim kekil wi ri qʼinomabʼ taq winaq (Sant. 2:1-3). Y e kʼo jujun kkichomaj ta na ri kkibʼij (Sant. 3:8-10). We cristianos riʼ kʼo jujun jastaq utz taj tajin kkibʼano, are kʼu ri Santiago xuchomaj taj che kkun ta chik keʼutoʼo. Rukʼ utzilal xubʼij chke ri rajawaxik kkibʼano y xubʼij chke ri cristianos che uriqom kʼax ri kikojonik che kkitzukuj ri kitobʼanik ri e kʼamal taq bʼe (chasikʼij uwach Santiago 5:13-15).

12. ¿Jas kqabʼan che utoʼik jun winaq che tajin kretaʼmaj ri kukʼut ri Biblia?

¹² Ri kqetaʼmaj: Chqilaʼ ri qas tajin kkʼulmataj kukʼ ri e qachalal y cheqatoʼ. E kʼi winaq ri kkimaj retaʼmaxik ri kukʼut ri Biblia, weneʼ qas ta aninaq kkibʼanalaʼ pa kikʼaslemal ri kketaʼmaj (Sant. 4:1-4). Weneʼ rajawaxik nim tiempo rech kkikʼex ri kibʼantajik y keʼux cristianos. Junam rukʼ ri xubʼan ri Santiago, oj rajawaxik kqabʼij che ri tajin kretaʼmaj chrij ri Biblia jas rajawaxik kukʼex pa ukʼaslemal. Are kʼu xuqujeʼ chqayaʼ ri tobʼanik che; chqakubʼsaj qakʼuʼx che ri Jehová keʼukʼam lo ri machʼalik taq winaq pa ri utinamit y keʼutoʼo rech kkikʼex ri kikʼaslemal (Sant. 4:10).

13. ¿Jas xuchomaj ta ri Santiago? (Sant. 3:2).

¹³ Ri Santiago xuchomaj taj che kʼo ta kmakun wi. Ri Santiago xuchomaj taj che más nim ubʼanik chkiwach ri nikʼaj chi cristianos rumal che rachalal ri Jesús o rumal ri nimaʼq taq eqelen xyaʼ che. Ri areʼ xubʼij «loqʼalaj taq wachalal»  chke konojel (Sant. 1:16, 19; 2:5). Xuqujeʼ xuchomaj taj che kʼo ta kmakun wi. Xaneʼ xukoj ribʼ che areʼ xuqujeʼ ajmak, are chiʼ xubʼij wariʼ: «Uj kujqaj pa kʼi kiwach sachinaqil» (chasikʼij uwach Santiago 3:2).

14. ¿Jasche rajawaxik kqachʼobʼo che kʼo kojmakun wi?

¹⁴ Ri kqetaʼmaj: Chnaʼtaj chqe che qonojel oj ajmakibʼ. Kqachomaj taj che kʼo jun jastaq kbʼanowik che más nim qabʼanik chkiwach ri e winaq keqatijoj. ¿Jasche? Rumal che we kqakʼut chuwach ri tijoxel che jetaneʼ oj kojmakun taj, weneʼ kuchomaj che kkun taj kubʼan ri ktaqan wi ri Dios. Are kʼu, we kqachʼobʼo che kʼo jujun taq mul kʼax kqariq che ubʼanik ri e pixabʼ re ri Biblia y kqabʼij che ri tijoxel jas ubʼanom ri Jehová che qatoʼik rech kqakʼex ri qakʼaslemal, kqatoʼo rech areʼ krilo che kkunik kupatanij ri Jehová.

15. ¿Jas kibʼanik ri kʼutbʼal xeʼukoj ri Santiago? (Sant. 3:2-6, 10-12).

¹⁵ Ri Santiago xukoj kʼutbʼal che xopan pa kanimaʼ ri e winaq. Qastzij riʼ che xtoʼ rumal ri ruxlabʼixel ri Dios, are kʼu weneʼ xuqujeʼ kʼi xretaʼmaj chrij ri xubʼan ri Jesús che ukojik ri e kʼutbʼal are chiʼ xeʼutijoj ri winaq. Kʼax ta kichʼobʼik ri e kʼutbʼal xeʼukoj ri Santiago pa ri ucarta y qas kojkitoʼ rech kqabʼan pa qakʼaslemal ri kajwatajik (chasikʼij uwach Santiago 3:2-6, 10-12).

16. ¿Jasche rajawaxik keqakoj kʼutbʼal che qas keʼutoʼ ri winaq?

¹⁶ Ri kqetaʼmaj: Cheqakojoʼ kʼutbʼal che qas keʼutoʼ ri winaq. Are chiʼ kqakoj kʼutbʼal che qas ketaʼm ri winaq, keqatoʼo rech qas kkichʼobʼ ri tajin kqabʼij chke. Ri e kʼutbʼal kqakojo keʼutoʼo rech qas kkanaj kan pa kijolom ri jastaq kukʼut ri Biblia. Ri Jesús amaqʼel xeʼukoj kʼutbʼal are chiʼ xeʼutijoj ri winaq, y ri Santiago, ri rachalal, xuqujeʼ je xubʼano. Chqanikʼojampeʼ jun chke ri kʼutbʼal xukoj ri Santiago y chqilampeʼ jasche qas keʼutoʼ ri winaq.

17. ¿Jasche qas keʼutoʼ ri winaq ri kʼutbʼal kʼo pa Santiago 1:22-25?

¹⁷ (Chasikʼij uwach Santiago 1:22-25). Kʼo kʼi rumal che ri kʼutbʼal re ri espejo qas keʼutoʼ ri e winaq. Ri Santiago qas retaʼm ri kraj kukʼutu: we kqaj kqariq ri utzilal kuya ri uTzij ri Dios, rajawaxik che xaq xiw ta kqasikʼij uwach, xaneʼ kqabʼan pa qakʼaslemal ri kqetaʼmaj. Xukoj  jun kʼutbʼal re jun winaq che kril ribʼ pa jun espejo. ¿Jas xraj xukʼutu? Utz taj we jun winaq kril ribʼ pa jun espejo y krilo che kʼo rajawaxik kusukʼumaj, are kʼu kusukʼumaj taj. Xaq junam rukʼ, utz taj che paneʼ kqasikʼij uwach ri Biblia y kqilo che kʼo jun jastaq rajawaxik kqakʼex che ri qabʼantajik o ri oj naqʼatal che ubʼanik, are kʼu kqakʼex taj.

18. ¿Jas oxibʼ jastaq kqabʼano are chiʼ kqakoj jun kʼutbʼal?

¹⁸ Are chiʼ kqakoj jun kʼutbʼal kojkunik kqesaj uwach ri Santiago we kqabʼan oxibʼ jastaq: 1) qas chqilaʼ che ri kʼutbʼal kʼo ubʼanik rukʼ ri kʼutunem ri tajin kojchʼaw chrij; 2) chqakojoʼ jun kʼutbʼal ri qas kkichʼobʼ ri e winaq, y 3) qas utz chqabʼanaʼ che uqʼalajisaxik ri kqaj kqakʼutu. We qas ta kqariq ri kʼutbʼal kqakojo, chqanikʼoj ri kʼo pa ri Índice de las publicaciones Watch Tower. Jawiʼ kubʼij wi «Ejemplos» kqariq kʼi taq kʼutbʼal ri kojkunik kqakojo. Are kʼu chnaʼtaj chqe che ri e kʼutbʼal kejunamataj rukʼ jun micrófono: xaq xiw kojkitoʼo rech qas kkiqʼalajisaj ri chomanik nim kibʼanik. Rumal laʼ chqakojoʼ kʼutbʼal chiʼ kqakʼut jun chomanik nim ubʼanik. Ri más nim ubʼanik are ta kqaj kojux utz taq ajtijabʼ rumal che kqaj kyaʼ qaqʼij, xaneʼ kqaj keqatoʼ ri winaq rech kekʼojiʼ pa ri ufamilia ri Jehová.

19. ¿Jas kqabʼan che ukʼutik che keqaloqʼoqʼej ri e qachalal?

¹⁹ Qastzij che oj junam ta rukʼ ri Santiago che xkʼojiʼ jun rachalal tzʼaqat ri ukʼaslemal, are kʼu sibʼalaj nim kqil wi kqapatanij ri Jehová kukʼ e winaq che kʼo jun utzalaj kikojonik. Kojkunik keqaloqʼoqʼej are chiʼ kqaqʼaxej tiempo kukʼ, kqetaʼmaj jastaq chkij, junam kqatzijoj ri utzij ri Dios y keqatijoj ri winaq. Are chiʼ kqakoj qachuqʼabʼ che resaxik uwach ri Santiago pa ronojel ri qabʼantajik, ri kqachomaj y ri kqakʼutu, kqaya uqʼij ri Jehová y keqatoʼ ri e winaq rech keqebʼ rukʼ ri loqʼalaj qaTat kʼo pa ri kaj.