1, 2. a) ¿Jampaʼ más knaʼtaj jun winaq chqe che kaminaq? b) ¿Jas taqanik xuya kan ri Jesús?

 ARE chiʼ kkam jun qachalal o jun qachiʼl amaqʼel knaʼtaj chqe. Más na are chiʼ kopan ri qʼij che xkamik.

² Ronojel taq junabʼ, sibʼalaj e kʼi winaq cho ronojel uwach Ulew, kqamulij qibʼ rech kqanaʼtajisaj ri ukamikal ri Jesús (1 Ped. 1:8). Kqabʼan wariʼ rumal che ri Jesús xojresaj pa uqʼabʼ ri makaj y ri kamikal (Mat. 20:28). Ri Jesús kraj che ri utijoxelabʼ kkinaʼtasaj ri ukamikal rumal laʼ xuya kan wajun taqanik riʼ: «Chitijaʼ waʼ che naʼtabʼal wech» (Luc. 22:19).

3. ¿Jas kqil na pa wajun kʼutunem riʼ?

³ Ri millones winaq che kkinaʼtasaj ri ukamikal ri Jesús xa jun jupuq chke kebʼe pa ri kaj, are kʼu más e kʼi kekʼojiʼ kan cho ri uwach Ulew. Pa wajun kʼutunem riʼ, kqil na kʼi rumal che ri e kebʼ jupuq riʼ kkinaʼtasaj ri ukamikal ri Jesús ronojel taq junabʼ. Xuqujeʼ kqil na ri utzilal che kqariqo we kojkʼojiʼ pa wajun qʼij riʼ. Nabʼe chqilaʼ jujun rumal che kekʼojiʼ ri e chaʼom che kebʼe pa ri kaj.

4. ¿Jasche xaq xiw ri e chaʼom kebʼe pa ri kaj kekunik kkitij ri kaxlanwa y ri vino?

⁴ Jun rumal che kekʼojiʼ ri e chaʼom che kebʼe pa ri kaj pa ri Unaʼtabʼalil ri ukamikal ri Jesús are che kkitij ri kaxlanwa  y ri vino. ¿Jasche kekunik kkitijo? Rech kqetaʼmaj chrij wariʼ, chnaʼtaj chqe ri xubʼan ri Jesús pa ri kʼisbʼal chaqʼabʼ re ri ukʼaslemal. Are chiʼ kibʼanom chi ri Pascua, ri Jesús xubʼan chi kan jun nimaqʼij che kbʼix ri Uwaʼim ri qAjaw che. Xuqʼaxej ri kaxlanwa y ri vino chke ri 11 sukʼalaj taq rapóstoles y xubʼij chke che kkitijo. Xchʼaw kukʼ chrij kebʼ pactos: ri kʼakʼ pacto y ri pacto re ri uQʼatbʼal tzij ri Dios (Luc. 22:19, 20, 28-30). * Rumal ri kebʼ pactos riʼ, ri apóstoles y e nikʼaj chi cristianos kekunik keʼux e qʼatal taq tzij y e kojol tabʼal toqʼobʼ pa ri kaj (Apoc. 5:10; 14:1). Ri e chaʼom che kebʼe pa ri kaj ri e kʼasal na kimik xaq xiw ri e areʼ kekunik kkitij ri kaxlanwa y ri vino pa ri Unaʼtabʼalil ri ukamikal ri Jesús, rumal che xaq xiw chke ri e chaʼom xbʼix wi ri kebʼ pactos riʼ.

5. ¿Jas ketaʼm ri e chaʼom che kebʼe pa ri kaj che kkiriq na?

⁵ Jun chi rumal che ri e chaʼom kekʼojiʼ pa ri Unaʼtabʼalil ri ukamikal ri Jesús are che kekunik kechoman chrij ri keyebʼal. Ri eyebʼal che uyaʼom ri Jehová chke sibʼalaj nim ubʼanik rumal che kekam taj, kepatanin rukʼ ri Jesucristo y kukʼ ri 144,000, xuqujeʼ kekʼojiʼ chuwach ri Jehová (1 Cor. 15:51-53; 1 Juan 3:2). Ri e chaʼom che kebʼe pa ri kaj ketaʼm che yaʼom wajun sikʼinik riʼ chke. Are kʼu rech kekunik kebʼe pa ri kaj rajawaxik kkikʼut sukʼilal pa ronojel ri kikʼaslemal (2 Tim. 4:7, 8). Chiʼ kechoman chrij ri keyebʼal, sibʼalaj kekikotik (Tito 2:13). ¿E kʼu ri e nikʼaj chik ri kbʼix nikʼaj chi chij chke? (Juan 10:16). ¿Jasche kekʼojiʼ pa ri Unaʼtabʼalil ri ukamikal ri Jesús? Chqilaʼ jujun rumal.

6. ¿Jasche ri kʼo keyebʼal cho ri uwach Ulew kekʼojiʼ pa ri Unaʼtabʼalil ri ukamikal ri Jesús?

⁶ Jun rumal che kekʼojiʼ pa ri Unaʼtabʼalil ri ukamikal ri Jesús are che xaq xiw kekilaʼ, kkitij ta ri kaxlanwa y ri vino. Pa ri junabʼ 1938 xesikʼix nabʼe mul ri kʼo keyebʼal cho ri uwach Ulew rech kekʼojiʼ pa ri Unaʼtabʼalil ri ukamikal ri Jesús. Ri wuj La Torre del Vigía (che kbʼix Ri Chajinel che kimik) re marzo 1938 xubʼij che «sibʼalaj nim ubʼanik che ri kʼo keyebʼal cho ri uwach Ulew kekʼojiʼ y kkil ri kbʼan pa ri Unaʼtabʼalil ri ukamikal ri Jesús». Xuqujeʼ xubʼij: «Che ri e areʼ rajawaxik kekikot pa ri qʼij riʼ». Junam rukʼ ri kikotemal che kkinaʼ ri e nikʼaj chi winaq che keʼopan pa jun kʼulanem, ri kʼo keyebʼal cho ri uwach Ulew sibʼalaj kekikotik chiʼ kekʼojiʼ pa ri Unaʼtabʼalil ri ukamikal ri Jesús.

7. ¿Jasche ri kʼo keyebʼal cho ri uwach Ulew kkaj kkitatabʼej ri chʼabʼal re ri Unaʼtabʼalil ri ukamikal ri Jesús?

⁷ Ri winaq che kekanaj kan cho ri uwach Ulew xuqujeʼ kechoman chrij ri keyebʼal. Rukʼ kikotemal kkitatabʼej ri chʼabʼal che kyaʼ pa ri Unaʼtabʼalil ri ukamikal ri Jesús, rumal che are kchʼaw chrij ri kkibʼan na ri Cristo y ri 144,000 che uqʼatik tzij pa kiwiʼ ri winaq pa Mil Junabʼ. Ri e 144,000 kkitoʼ ri Jesús rech kkibʼan kotzʼiʼj che ri uwach Ulew y rech ri winaq kkiriq ri tzʼaqatalaj  kʼaslemal. Sibʼalaj kekikot riʼ ri winaq are chiʼ kechoman chrij ri qʼij che ktzʼaqatisax ri kubʼij pa Isaías 35:5, 6; 65:21-23 y Apocalipsis 21:3, 4. Kkowir ri keyebʼal y kkiya ta kan upatanixik ri Jehová are chiʼ kechoman apan chrij ri qʼij che kkiriq na kibʼ pa ri kʼakʼ uwach Ulew kukʼ ri kachalal o kachiʼl che e kaminaq (Mat. 24:13; Gál. 6:9).

8. ¿Jas jun chi rumal che kekʼojiʼ ri kʼo keyebʼal cho ri uwach Ulew pa ri Unaʼtabʼalil ri ukamikal ri Jesús?

⁸ Ri winaq che kʼo keyebʼal cho ri uwach Ulew kekʼojiʼ pa ri Unaʼtabʼalil ri ukamikal ri Jesús rumal che kkiloqʼoqʼej y kkaj kkiya ri kitobʼanik chke ri kebʼe pa ri kaj. Ri uTzij ri Dios xubʼij kanoq che ri e chaʼom che kebʼe pa ri kaj y ri kekʼojiʼ kan cho ri uwach Ulew kkʼojiʼ jun utzalaj achilanik chkixoʼl. Chqilampeʼ jujun taq profecías che kchʼaw chrij wariʼ.

9. Junam rukʼ ri profecía che kyaʼ ubʼixik pa Zacarías 8:23, ¿jas kkinaʼ ri winaq che kekanaj kan cho ri uwach Ulew chke ri kebʼe pa ri kaj?

⁹ (Chasikʼij uwach Zacarías 8:23). Wajun profecía riʼ kukʼut ri kkinaʼ ri winaq che kekanaj kan cho ri uwach Ulew chke ri kachalal che kebʼe pa ri kaj. Ri e tzij «jun ajjudey» y «iwukʼ» kchʼaw chkij ri e chaʼom che kebʼe pa ri kaj ri e kʼasal na (Rom. 2:28, 29). Ri tzij «lajuj winaq ri e kech juleʼ nimaʼq taq tinimit» kchʼaw chkij ri winaq che kekanaj kan cho ri uwach Ulew. Tekʼuriʼ are chiʼ kubʼij che kkichap na «jun ajjudey che ri ratzʼyaq» kraj kubʼij che kkiya ri kitobʼanik chke ri e chaʼom che kebʼe pa ri kaj y pa junamam kkiqʼijilaj ri Jehová. Y kkikʼut wariʼ are chiʼ junam kekʼojiʼ pa ri Unaʼtabʼalil ri ukamikal ri Jesús.

10. ¿Jas ubʼanom ri Jehová rech tzʼaqatinaq ri profecía che kʼo pa Ezequiel 37:15-19, 24, 25?

¹⁰ (Chasikʼij uwach Ezequiel 37:15-19, 24, 25). Tzʼaqatinaq wajun profecía, rumal che ri Jehová ubʼanom che kʼo keyebʼal pa ri kaj y ri kʼo keyebʼal cho ri uwach Ulew junam kechakunik. Wajun profecía riʼ kchʼaw chkij kebʼ cheʼ. Ri «cheʼ re Judá» are ri e winaq che kebʼe pa ri kaj (pa ri tribu riʼ xechaʼ wi ri xeʼux qʼatal tzij pa Israel). Y ri «cheʼ re Efraín» are ri e winaq che kekʼojiʼ kan cho ri uwach Ulew. * Ri Jehová xa jun cheʼ kubʼan na chke, kraj kubʼij che junam kkiqʼijilaj ri Jehová chuxeʼ ri uQʼatbʼal tzij ri Cristo Jesús. Ronojel taq junabʼ ri e chaʼom che kebʼe pa ri kaj y ri kekanaj kan cho ri uwach Ulew junam kkinaʼtasaj ri ukamikal ri Jesús, junam rukʼ jun jumulaj chij che xa jun kajyuqʼ (Juan 10:16).

11. Junam rukʼ ri kubʼij pa Mateo 25:31-36, 40, ¿jas tobʼanik kkiya ri «chij» chke ri e rachalal ri Cristo?

¹¹ (Chasikʼij uwach Mateo 25:31-36, 40). Ri e «chij» che kchʼaw pa wajun kʼutbʼal riʼ kchʼaw chkij ri e sukʼalaj taq winaq che e kʼasal na kimik y che kekʼojiʼ kan pa ri kotzʼiʼj uwach Ulew, ri kbʼix nikʼaj chi chij chke. Rukʼ sukʼilal kkiya ri kitobʼanik chke ri e chaʼom che e kʼo na cho ri uwach Ulew kimik rech kkitzijoj ri utzij ri Dios (Mat. 24:14; 28:19, 20).

12, 13. ¿Jas más tobʼanik kkiya ri winaq kʼo keyebʼal pa ri kotzʼiʼj uwach Ulew chke ri rachalal ri Cristo?

¹² Ronojel taq junabʼ, are chiʼ xa jubʼiqʼ  chi kraj knaʼtasax ri ukamikal ri Jesús, ri e winaq kʼo keyebʼal pa ri kotzʼiʼj uwach Ulew, kekitoʼ ri rachalal ri Cristo. Y kkibʼan wariʼ chiʼ kekisikʼij konojel ri e winaq rech kekʼojiʼ pa ri Unaʼtabʼalil ri ukamikal ri Jesús (chawilaʼ ri recuadro « ¿Jas katkunik kabʼan pa ri tiempo re ri Unaʼtabʼalil ri ukamikal ri Jesús?»). Konojel ri congregaciones pa ronojel ri uwach Ulew kkinaʼtasaj ri ukamikal ri Jesús paneʼ kʼo ta jun chaʼom kukʼ. Sibʼalaj kekikot ri winaq kʼo keyebʼal pa ri kotzʼiʼj uwach Ulew rumal che kekunik kekitoʼ ri rachalal ri Cristo. Kkichʼobʼo che ri tobʼanik tajin kkiyaʼo jetaneʼ che ri Cristo tajin kkibʼan wi (Mat. 25:37-40).

¹³ Apastaneʼ ri qeyebʼal, ¿jas rumal che kojkʼojiʼ pa ri Unaʼtabʼalil ri ukamikal ri Jesús?

14. ¿Jas kibʼanom ri Jehová y ri Jesús che ukʼutik che sibʼalaj kojkaj?

¹⁴ Rumal che kqamaltyoxij ri kiloqʼoqʼebʼal ri Jehová y ri Jesús. Sibʼalaj kʼi ubʼanom ri Jehová che ukʼutik ri uloqʼoqʼebʼal chqe. Are kʼu ri más nim ubʼanik are che xutaq lo ri uKʼojol rech xuriq kʼax y xkam rumal qech (Juan 3:16). Ri Jesús xuqujeʼ xukʼut ri uloqʼoqʼebʼal are chiʼ xraj xujach ri ukʼaslemal rumal qech (Juan 15:13). Qastzij che kojkun taj kqatoj ri xkibʼan rumal qech, are kʼu kojkunik kqakʼut maltyoxinik chiʼ kqanimaj ri Dios (Col. 3:15). Chiʼ kojkʼojiʼ pa ri Unaʼtabʼalil ri ukamikal ri Jesús, kqakʼut ri qamaltyoxinik xuqujeʼ kqakʼutu che keqaj.

15. ¿Jasche ri e chaʼom kebʼe pa ri kaj y ri winaq kʼo keyebʼal pa ri kotzʼiʼj uwach Ulew kkimaltyoxij ri xubʼan ri Jesús pa kiwiʼ?

¹⁵ Rumal che sibʼalaj nim kqil ri xubʼan ri Jesús pa qawiʼ (Mat. 20:28). Ri e chaʼom che kebʼe pa ri kaj nim kkil ri tojbʼal mak, rumal che wariʼ kubʼano che kʼo keyebʼal pa ri kaj. Rumal ri kikojonik chrij ri ukamikal ri Cristo, keʼux sukʼ taq winaq chuwach ri Jehová y keʼux e ralkʼwal (Rom. 5:1; 8:15-17, 23). Y, ri winaq kʼo keyebʼal pa ri kotzʼiʼj uwach Ulew xuqujeʼ nim kkil wi ri xubʼan ri Jesús pa kiwiʼ, ri kikojonik chrij ri ukamikal keʼutoʼo rech keqaj chuwach ri Dios y kekʼasiʼ kan pa «ri nimalaj kʼaxkʼolil» (Apoc. 7:13-15). Are chiʼ ronojel junabʼ pa junamam kkinaʼtasaj ri ukamikal ri Jesús, kkikʼutu che kemaltyoxin rumal ri tojbʼal mak.

16. ¿Jas jun chi rumal che kojkʼojiʼ pa ri Unaʼtabʼalil ri ukamikal ri Jesús?

¹⁶ Rumal che kqaj kqanimaj ri Jesús. Apastaneʼ ri qeyebʼal kʼolik, qonojel kqaj kqanimaj wajun taqanik riʼ che xuya kan ri Jesús: «Chibʼanaʼ waʼ che nunaʼtaxik» (1 Cor. 11:23, 24).

17. ¿Jasche kojnaqajin más che ri Jehová are chiʼ kojkʼojiʼ pa ri Unaʼtabʼalil ri ukamikal ri Jesús?

¹⁷ Rumal che kojqebʼ más rukʼ ri Jehová (Sant. 4:8). Junam rukʼ ri qilom chik, are chiʼ kojkʼojiʼ pa ri Unaʼtabʼalil ri ukamikal ri Jesús kubʼano che kojchoman chrij ri qeyebʼal uyaʼom ri Jehová y chrij ri loqʼoqʼebʼal che ukʼutum chqe (Jer. 29:11; 1 Juan 4:8-10). Are chiʼ kojchoman chrij ri qeyebʼal y chrij ri uloqʼoqʼebʼal  ri Dios, kqaloqʼoqʼej más y kojnaqajin más che (Rom. 8:38, 39).

18. ¿Jas kojutoʼ wi chiʼ kojchoman chrij ri ukʼutbʼal ri Jesús?

¹⁸ Kubʼano che kqesaj uwach ri Jesús (1 Ped. 2:21). Chiʼ knaqajin ri qʼij che unaʼtasaxik ri ukamikal ri Jesús, kqanikʼoj ri ukʼaslemal, ri ukamikal y ri ukʼastajibʼal. Y, ri chʼabʼal che kyaʼ pa ri Unaʼtabʼalil ri ukamikal ri Jesús, kunaʼtasaj chqe che sibʼalaj kojraj (Efes. 5:2; 1 Juan 3:16). Usikʼixik y uchomaxik chrij ri xubʼan ri Jesús pa qawiʼ kojutoʼ rech ri qakʼaslemal «kjunamataj rukʼ ri ukʼaslemal ri Jesucristo» (1 Juan 2:6).

19. ¿Jas rajawaxik kqabʼano rech amaqʼel kojkʼojiʼ pa ri uloqʼoqʼebʼal ri Dios?

¹⁹ Kojutoʼ rech amaqʼel kojkʼojiʼ pa ri uloqʼoqʼebʼal ri Dios (Jud. 20, 21). Are chiʼ kqakoj qachuqʼabʼ che unimaxik, che uchʼajchʼobʼisaxik ri ubʼiʼ y uyaʼik kikotemal che, amaqʼel kojkʼojiʼ pa ri uloqʼoqʼebʼal (Prov. 27:11; Mat. 6:9; 1 Juan 5:3). Are chiʼ kojkʼojiʼ pa ri Unaʼtabʼalil ri ukamikal ri Jesús kuya qachuqʼabʼ rech kqakʼut rukʼ ri qabʼantajik che kqaj amaqʼel kojux rachiʼl ri Jehová.

20. ¿Jasche kojkʼojiʼ pa ri Unaʼtabʼalil ri ukamikal ri Jesús?

²⁰ Apastaneʼ ri qeyebʼal kʼolik, qonojel rajawaxik kojkʼojiʼ pa ri Unaʼtabʼalil ri ukamikal ri Jesús che kbʼan ronojel taq junabʼ. Kqakʼutu che kqaloqʼoqʼej ri Jesús are chiʼ kojkʼojiʼ pa ri Unaʼtabʼalil ri ukamikal. Xuqujeʼ, kqanaʼtasaj ri nimalaj uloqʼoqʼebʼal ri Jehová che xukʼutu are chiʼ xuya ri uKʼojol pa kamikal rumal qech. Ri Unaʼtabʼalil ri ukamikal ri Jesús kbʼan pa viernes 15 re abril 2022. Sibʼalaj keqaloqʼoqʼej ri Jehová y ri Jesús. Rumal laʼ, kqaya taj che kʼo jun jastaq kojuqʼatej rech kojkʼojiʼ ta pa ri Unaʼtabʼalil ri ukamikal ri Jesús.