1. ¿Jas kqabʼano rech kqatas qatiempo rech kojchʼaw rukʼ ri Jehová?

 ¿LA MAT qastzij che qonojel utz kqilo kojkʼojiʼ kukʼ ri e winaq che keqaj? Jun kʼutbʼal, ri e kʼulaj utz kkilo are chiʼ kkitas tiempo rech kekʼojiʼ pa junamam. Y ri alabʼom alitomabʼ sibʼalaj utz kkilo kekʼojiʼ kukʼ ri e kachiʼl. Y qonojel utz kqilo are chiʼ kojkʼojiʼ kukʼ ri e qachalal. Ri más utz kqilo are che kqatas qatiempo rech kojchʼaw rukʼ ri qaDios. ¿Jas kqabʼan che ubʼanik? Kojchʼaw rukʼ are chiʼ kqabʼan qachʼawem che, kqasikʼij ri uTzij, kojchoman chrij ri kraj kubʼano y chrij ri utz taq ubʼantajik. ¡Sibʼalaj nim kqil wi ri tiempo che kqaya che ri Jehová! (Sal. 139:17).

2. ¿Jasche kʼax resaxik tiempo rech kqachilaj ri Jehová?

² Paneʼ utz kqilo kqaya ri qatiempo che ri Jehová, are kʼu kʼax ubʼanik wariʼ. Ronojel taq qʼij latzʼ qawach, rumal laʼ kʼax uriqik tiempo che ri jastaq re ri qakojonik. Ri qachak, ri qafamilia y nikʼaj chi jastaq kubʼano che latzʼ qawach, rumal laʼ weneʼ kqachomaj che kʼo ta qatiempo kqabʼan qachʼawem, kqasikʼij ri uTzij ri Dios y kojchoman chrij ri kqasikʼij uwach.

3. ¿Jas chrij rajawaxik kqachajij wi qibʼ?

³ Kʼo jun jastaq che rajawaxik kqachajij qibʼ chuwach. Kʼo etzʼanem o jastaq kqabʼano che paneʼ awas taj, are kʼu kresaj qatiempo y kojqebʼ ta chi rukʼ ri Jehová. Jun kʼutbʼal, qonojel utz kqilo kojetzʼan kukʼ ri e qachiʼl. Are kʼu we kqachajij ta qibʼ, weneʼ wariʼ kresaj qatiempo y kqabʼan ta chi ri jastaq re ri qakojonik. Utz che kojchoman chrij ri tiempo che kqakoj che ri etzʼanem (Prov. 25:27; 1 Tim. 4:8).

4. ¿Jas kqil na pa wajun kʼutunem riʼ?

 ⁴ Pa wajun kʼutunem kqilo jasche rajawaxik kojchoman chrij ri jastaq che más nim ubʼanik pa ri qakʼaslemal. Xuqujeʼ kojchʼaw na chrij jas rajawaxik kqabʼano rech kqaya más qatiempo che ri Jehová y jas utzilal kqariqo we kqabʼan wariʼ.

5. ¿Jas tobʼanik kuya Efesios 5:15-17 chke ri alabʼom alitomabʼ rech utz kkibʼan che uchaʼik ri jastaq pa ri kikʼaslemal?

⁵ Utz chqabʼanaʼ che uchaʼik ri kqaj kqabʼan pa ri qakʼaslemal. Wariʼ nim ubʼanik chke ri alabʼom alitomabʼ. Weneʼ pa ri tijobʼal o jun kifamilia che Testigo taj kubʼij chke che kebʼe pa nimaʼq taq tijobʼal rech kkʼojiʼ jun utzalaj kicarrera y rukʼ wariʼ kʼo kirajil. Wariʼ kukʼam bʼi nim tiempo chkiwach. Are kʼu ri kitat kinan y ri e qachalal re ri congregación kkibʼij chke che kkijach ri kikʼaslemal che ri Jehová y kkipatanij. ¿Jas ktoʼw ri ala ri ali che kuloqʼoqʼej ri Jehová rech utz kubʼan che uchaʼik ri kraj kubʼano? Kkunik kusikʼij uwach ri kubʼij Efesios 5:15-17 (chasikʼij uwach). Are chiʼ chomanaq chi chrij ri xusikʼij, kkunik kutaʼ wariʼ chbʼil ribʼ: «¿Jas riʼ ‹ri urayibʼal ri Ajawaxel› chwe in? ¿La kqaj chuwach ri kinchaʼ ubʼanik? Y, ri kinchaʼ ubʼanik ¿la kinutoʼ rech utz kinbʼan che ukojik ri tiempo?». Chnaʼtaj chqe che «itzel taq qʼij uj kʼolik» y ri jastaq che e kʼo pa uqʼabʼ ri Itzel xa jubʼiqʼ chi kraj ksachisax uwach. Ri más utz kqabʼano are che kqakoj ri qakʼaslemal che ubʼanik ri kqaj chuwach ri Jehová y kuya kikotemal che.

6. ¿Jas xuchaʼ ri María y jasche más utz ri xuchaʼ?

⁶ Chojchoman chrij ri más nim ubʼanik. Rech utz kqabʼan che ukojik ri qatiempo, rajawaxik kqachaʼ jun chke kebʼ jastaq ri más nim ubʼanik chqawach, paneʼ e itzel jastaq taj. Are riʼ ri xkʼulmatajik are chiʼ ri Jesús xopan kukʼ ri María y ri Marta. Rumal che ri Marta utz kubʼan che kikʼulaxik ri winaq pa ri rachoch, are chiʼ xopan ri Jesús, xumaj ubʼanik jun nimalaj rikil. Are kʼu ri María, ri rachalal, xtʼuyiʼ chunaqaj ri Jesús y xutatabʼej ri tajin kukʼutu. Awas ta ri xubʼan ri Marta, are kʼu ri Jesús xubʼij che ri «María uchaʼom ri utz na» (Luc. 10:38-42). Are chiʼ xqʼax ri tiempo, weneʼ ri María xsach che ri xutijo, are kʼu qastzij riʼ che xsach ta che ri xretaʼmaj rukʼ ri Jesús. Qas qʼalaj che ri María nim xril wi ri tiempo che xkʼojiʼ rukʼ ri Jesús y oj xuqujeʼ nim kqil wi ri tiempo kqataso rech kojkʼojiʼ rukʼ Jehová. ¿Jas kqabʼano rech nim kqil wi ri tiempo kqaya che ri Jehová?

7. ¿Jasche nim ubʼanik kqabʼan qachʼawem, kqanikʼoj ri Biblia y kojchoman chrij ri kqetaʼmaj?

⁷ Pa ri qaqʼijilanik kʼo ri chʼawem, unikʼoxik uwach ri Biblia y uchomaxik rij ri kqetaʼmaj. Are chiʼ kqabʼan qachʼawem, tajin kojtzijon rukʼ ri qaTat kʼo pa ri kaj ri sibʼalaj kojuloqʼoqʼej (Sal. 5:7). Are chiʼ kqanikʼoj uwach le Biblia, tajin kkʼojiʼ «ri retaʼmaxik uwach ri Dios» qukʼ, ri winaq más nim unoʼj pa ri kajulew (Prov. 2:1-5). Y, are chiʼ kqachomaj rij ri kqetaʼmaj chrij ri Jehová, tajin kojchoman chrij ri jeʼlalaj taq ubʼantajik, ri kraj kubʼan pa qawiʼ oj y pa kiwiʼ konojel ri e winaq. ¿La kʼo lo jun chi jastaq kojkunik kqabʼano rech más utz kqabʼan che ukojik ri tiempo? Kʼo taj. Qastzij che kʼo kʼi jastaq kqabʼano, are kʼu, ¿jas kojtoʼwik rech qas utz kqabʼan che ukojik ri tiempo?

8. ¿Jas kqabʼan che resaxik uwach ri Jesús are chiʼ xbʼe pa ri desierto?

 ⁸ We kbʼanik, chqatzukuj jun lugar ri xaq qatukel kojkʼojiʼ wi. Chojchoman chrij ri xubʼan ri Jesús. Are chiʼ xumaj utzijoxik ri utzij ri Dios, 40 qʼij xkʼojiʼ pa ri desierto (Luc. 4:1, 2). Chilaʼ xkunik xubʼan uchʼawem y xchoman chrij ri rajawaxik kubʼano rech kqaj chuwach ri uTat. Qastzij wi che ri xubʼan pa ri desierto xutoʼ chuwach taq ri kʼax che xuriqo. ¿Jas kqetaʼmaj chrij ri ukʼutbʼal? Weneʼ jujun taq mul, qas ta kuyaʼ kojchoman chrij ri kqanikʼoj uwach pa ri Biblia, rumal che oj kʼi pa ri familia. We jeriʼ, ¿la kojkunik kojel bʼi jubʼiqʼ pa ri qachoch rech xaq qatukel kojkʼojiʼk? Are riʼ ri kubʼan ri qachalal Julie are chiʼ kraj kukoj utiempo che ubʼanik uchʼawem che ri Jehová. Ri areʼ pa Francia e kʼo wi pa jun alaj ja rukʼ ri rachajil, rumal laʼ jujun taq mul kbʼan taj xaq utukel kkʼojiʼ rukʼ ri Jehová. Kubʼij: «Ronojel taq qʼij kinbʼe pa ri parque rech kinebʼinoq. Chilaʼ kinkunik kinkʼojiʼ nutukel rukʼ ri Jehová, kinchoman chrij ri kuchomaj y kintzijon rukʼ».

9. Paneʼ ri Jesús sibʼalaj latzʼ uwach, ¿jas xubʼan che ukʼutik che nim kril wi ri rachilanik rukʼ ri Jehová?

⁹ Ri Jesús sibʼalaj latzʼ uwach. Apawijeʼ taneʼ ri kbʼe wi, konojel ri winaq kkaj ketijox rumal y kkaj kuya ri utiempo chke. Ri Biblia kubʼij che kʼo jumul «konojel ri ajtinimit xkimulij kibʼ chuchiʼ» jun ja rumal che kkaj kkil uwach. Paneʼ jeriʼ, ri areʼ amaqʼel xutas utiempo rech kuchajij ri rachilanik rukʼ ri Jehová. Majoʼq chsaqirik, xutzukuj jun lugar ri xaq utukel xkʼojiʼ wi rukʼ ri uTat (Mar. 1:32-35).

10, 11. Junam rukʼ ri kubʼij Mateo 26:40, 41, ¿jas pixabʼ nim ubʼanik xuya ri Jesús chke ri utijoxelabʼ pa ri jardín re Getsemaní, are kʼu jas xkʼulmatajik?

¹⁰ Pa ri kʼisbʼal chaqʼabʼ re ri ukʼaslemal ri Jesús pa ri uwach Ulew, xutzukuj chi jun lugar ri xaq utukel kkʼojiʼ wi y xubʼan uchʼawem che ri Jehová: pa ri jardín re Getsemaní (Mat. 26:36). Chilaʼ xuya jun pixabʼ nim ubʼanik chrij ri chʼawem chke ri utijoxelabʼ.

¹¹ Chqilampeʼ ri xbʼantajik. Are chiʼ xeʼopan pa ri jardín re Getsemaní, weneʼ más nikʼaj aqʼabʼ chik, sibʼalaj matam chi chke konojel. Ri Jesús xubʼij chke ri rapóstoles che kewar taj, tekʼuriʼ xbʼe che ubʼanik uchʼawem (Mat. 26:37-39). Are chiʼ xtzalij loq, e warinaq konojel. Rumal riʼ xubʼij chi wariʼ chke: «Chixkʼaskʼatoq, chibʼanaʼ chʼawem rukʼ Dios» (chasikʼij uwach Mateo 26:40, 41). Ri areʼ retaʼm che sibʼalaj e kosinaq, rumal laʼ xutoqʼobʼisaj kiwach y xubʼij chke che «ri [k]icuerpo man kʼo ta uchuqʼabʼ». Paneʼ jeriʼ ubʼanom chik, kamul  xbʼe chi na che ubʼanik uchʼawem y are chiʼ xtzalij loq xuqujeʼ xeʼuriqo tajin ta kkibʼan kichʼawem, xaneʼ e roqoroj che waram (Mat. 26:42-45).

12. ¿Jas kojkunik kqabʼano are chiʼ sibʼalaj oj kosinaq y kqanaʼo che kojkun taj kqabʼan qachʼawem?

¹² Chqilaʼ jas tiempo ri más utz chqe. Weneʼ jujun taq mul kqanaʼo che sibʼalaj oj kosinaq y kqachomaj che kojkun taj kqabʼan qachʼawem, oj kʼi kqakʼulmaj wariʼ. ¿Jas kojkunik kqabʼano? E kʼo jujun qachalal kinaqʼtisam kibʼ are chiʼ ya kewarik kkibʼan kan ri kichʼawem, are kʼu kilom che más utz na we kkibʼan kichʼawem are chiʼ kʼateʼ xok aqʼabʼ o are chiʼ qas ta e kosinaq. E nikʼaj chik kilom che más utz kel ri kichʼawem we ketʼuyiʼk o kexukiʼk. ¿Jas kqabʼano we sibʼalaj kojbʼisonik o kqanaʼo che maj qachuqʼabʼ che ubʼanik qachʼawem? Chqabʼij che ri Jehová ri kqanaʼo rumal che areʼ kutoqʼobʼisaj qawach y kuchʼobʼ ronojel ri tajin kqakʼulmaj (Sal. 139:4).

13. ¿Jas weneʼ kubʼan ri teléfono o jun chi jastaq rech kunim ribʼ chqaxoʼl are chiʼ qatukel oj kʼo rukʼ ri Jehová?

¹³ Chqilaʼ che kʼo ta jun jastaq kojqʼatenik rech are qas kojchoman chrij ri tajin kqetaʼmaj. Xaq xiw ta ri chʼawem kojkunik kqabʼano rech kqakowirisaj ri qachilanik rukʼ ri Jehová, xaneʼ xuqujeʼ kojkunik kqanikʼoj más ri uTzij y kojbʼe pa ri e riqbʼal ibʼ. ¿La kʼo más kqabʼano rech kqariq ri utzilal kkiya ri e riqbʼal ibʼ y unikʼoxik uwach ri Biblia? Chqataʼ wariʼ chbʼil qibʼ: «¿Jas jastaq kbʼanowik che qas ta kinchoman chrij ri tajin kinnikʼoj uwach pa ri wetaʼmanik chrij ri Biblia o pa ri riqbʼal ibʼ?». ¿La jun llamada, jun correo electrónico, jun mensaje ktaq lo chawe o jun chi jastaq? Sibʼalaj kojkitoʼ ri e jastaq riʼ, kimik sibʼalaj e kʼi winaq kekojowik. Are kʼu, e jujun winaq kʼo nim ketaʼmabʼal kkibʼij che are chiʼ jun winaq qas kraj kchoman chrij ri tajin kubʼano, tekʼuriʼ kʼo jun teléfono chunaqaj, qas ta kkun riʼ kchoman chrij ri tajin kubʼano. Jun ajtij re Psicología kubʼij: «Katkun taj katchoman chrij ri tajin kabʼano. Bʼenaq ri achomanik pa jun chi lugar». Pa taq ri e nimaʼq taq riqbʼal ibʼ, are chiʼ ya kumajij, kbʼix chqe che rajawaxik kqaqasaj uchuqʼabʼ ri qateléfono rech ri e nikʼaj chik qas kkitatabʼej ri kbʼixik, ¿la  kojkunik je kqabʼano are chiʼ qatukel oj kʼo rukʼ ri Jehová rech kʼo ta jun jastaq kunim ribʼ chqaxoʼl are chiʼ tajin kojtzijon rukʼ?

14. Junam rukʼ ri kubʼij Filipenses 4:6, 7, ¿jas kubʼan ri Jehová che qatoʼik rech are qas kqilij ri tajin kqabʼano?

¹⁴ Chqabʼij che ri Jehová che kojutoʼo rech are qas kqilij ri tajin kqabʼano. We are chiʼ tajin kqanikʼoj ri Biblia o oj kʼo pa ri riqbʼal ibʼ y kqilo che are ta más kojchoman chrij ri tajin kqabʼano o ri kbʼixik, chqataʼ tobʼanik che ri Jehová. We kʼo jun jastaq pa qajolom y xaq are kojchoman chrij, nim ubʼanik kqesaj pa qachomanik y are kojchoman chrij ri tajin kqanikʼoj pa ri Biblia o ri tajin kbʼix pa jun riqbʼal ibʼ. Chqataʼ ri jamaril re ri Jehová rech kukʼam qabʼe pa ri qanimaʼ y ri qachomanik (chasikʼij uwach Filipenses 4:6, 7).

15. ¿Jas jun utzilal kqariqo are chiʼ kqatas qatiempo che ri Jehová?

¹⁵ Kqariq kʼi utzilal are chiʼ kqatas qatiempo rech kojchʼaw rukʼ ri Jehová, kqatatabʼej ri kubʼij chqe y kojchoman chrij areʼ. ¿Jas ri utzilal kqariqo? Nabʼe, utz kqabʼan che uchaʼik ri jastaq che kqaj kqabʼano. Ri Biblia kubʼij: «Chawukʼaj awibʼ kukʼ ri ajnoʼjabʼ kariq kʼu na anoʼj» (Prov. 13:20). Rumal laʼ, are chiʼ más kqakoj qatiempo rech kojkʼojiʼ rukʼ ri Jehová, ri winaq más nim unoʼj pa ri uwach Ulew, kkʼojiʼ más qanoʼj. Kqachʼobʼ riʼ jas kqabʼano rech kojqaj chuwach y kqabʼan ta jastaq che kubʼan kʼax che.

16. ¿Jasche we kqatas qatiempo rech kojkʼojiʼ rukʼ ri Jehová kojux más utz taq ajtijabʼ?

¹⁶ Ukabʼ, kojux más utz taq ajtijabʼ. Are chiʼ kqaya etaʼmanik re ri Biblia, jun chke ri jastaq kqaj kqabʼano are che ri tijoxel kqebʼ rukʼ ri Jehová. Are chiʼ amaqʼel kojtzijon rukʼ ri qaTat kʼo pa ri kaj, más kqaloqʼoqʼej y más qetaʼm ri kqabʼan che kitoʼik ri tijoxelabʼ rech xuqujeʼ e areʼ kkiloqʼoqʼej. Are riʼ ri xubʼan ri Jesús. Rukʼ loqʼoqʼebʼal xchʼaw chrij ri uTat, rumal riʼ ri utijoxelabʼ je xkibʼano (Juan 17:25, 26).

17. ¿Jasche kkowir ri qakojonik we kqabʼan qachʼawem y kqanikʼoj ri Biblia chqajujunal?

¹⁷ Urox, kkowir más ri qakojonik. Chojchoman chrij ri kkʼulmatajik are chiʼ kqataʼ che ri Dios kukʼam qabʼe, kukubʼsaj qakʼuʼx o kojutoʼo. Are chiʼ kqilo che tajin kojutoʼ, knimar ri qakojonik (1 Juan 5:15). Jun chi jastaq ri kukowirisaj ri qakojonik, are unikʼoxik ri uwach ri Biblia chqajujunal. Rumal che, «jun winaq nabʼe kutatabʼej na jun tzij rech kkojonik» (Rom. 10:17). Qastzij che we kqaj kkowir ri qakojonik xaq xiw ta  rajawaxik kʼo kqetaʼmaj. ¿Jas más rajawaxik kqabʼano?

18. Chayaʼ ubʼixik rukʼ jun kʼutbʼal jasche rajawaxik kojchoman chrij ri ubʼanom ri Jehová.

¹⁸ Rajawaxik kojchoman chrij ri tajin kqetaʼmaj. Chojchoman chrij ri xtzʼibʼan ri Salmo 77. Sibʼalaj kbʼisonik rumal che xuchomaj che ri areʼ y ri israelitas weneʼ xa keqaj ta chi chuwach ri Jehová. Sibʼalaj kbʼisonik, rumal riʼ kok ta chi uwaram (versículos 2-8). ¿Jas xubʼano? Xubʼij wariʼ che ri Jehová: «Kinchoman chrij ronojel ri [a]bʼanom» (versículo 12). Qastzij che ri areʼ retaʼm ri xubʼan ri Jehová pa uwiʼ ri utinamit ojer kanoq. Are kʼu xutaʼ wariʼ chbʼil ribʼ: «¿La xa lo xsach ri rutzil ri Dios pa ujolom? ¿La xa lo sibʼalaj oyowarinaq, chi man kel ta chi ukʼuʼx chqe?» (versículo 9). Ri xtzʼibʼan wajun salmo xchoman chrij ri utz taq jastaq ri xubʼan ri Jehová y ri ubʼanom che utoqʼobʼisaxik uwach ri utinamit ojer kanoq (versículo 11). Rukʼ wariʼ, qas xuchʼobʼo che kewonobʼax ta kan rumal ri Jehová (versículo 15). Xaq junam, kkowir ri qakojonik are chiʼ kojchoman chrij ri jastaq ubʼanom ri Jehová che utoʼik ronojel ri utinamit y ri ubʼanom che qatoʼik chqajujunal.

19. ¿Jas jun chi utzilal kqariqo we kqatas qatiempo rech kojkʼojiʼ rukʼ ri Jehová?

¹⁹ Ukaj, kqaloqʼoqʼej más ri Jehová. Wariʼ are ri utzilal más nim ubʼanik. ¿Jasche? Rumal che ri loqʼoqʼebʼal kojutoʼ che unimaxik ri Jehová, kqabʼan jastaq che utz krilo y kojutoʼo rech kqachʼij apachike uwach kʼax (Mat. 22:37-39; 1 Cor. 13:4, 7; 1 Juan 5:3). Ri rachilaxik ri loqʼalaj qaDios Jehová, más nim ubʼanik chuwach apachike uwach jastaq (Sal. 63:1-8).

20. ¿Jas achomam ubʼanik rech katas más atiempo che ri Jehová?

²⁰ Jumul chik, chnaʼtaj chqe che pa ri qaqʼijilanik kʼo ri chʼawem, unikʼoxik uwach ri Biblia y uchomaxik rij ri kqetaʼmaj. Chqesaj uwach ri Jesús, chqatasaʼ qatiempo y chqatzukuj jun lugar rech kojkʼojiʼ qatukel rukʼ ri Jehová. Maqayaʼ bʼe che nikʼaj chi jastaq kkesaj ri qatiempo. Y, we kʼo jun jastaq kojkun taj kqesaj pa qajolom are chiʼ tajin kqanikʼoj ri Biblia o pa ri riqbʼal ibʼ, chqataʼ tobʼanik che ri Jehová rech qas are kojchoman chrij ri tajin kqabʼano o ri tajin kbʼixik. We utz kqabʼan che ukojik ri tiempo, kojutewchij na ri Jehová rukʼ jun kʼaslemal maj ukʼisik pa ri kotzʼiʼj uwach Ulew (Mar. 4:24).