1, 2. a) ¿Jas kqanaʼo are chiʼ kojchoman chrij ri xubʼan ri Jesús pa ri uwach Ulew? b) ¿Jas kqil na pa wajun kʼutunem riʼ?

 SIBʼALAJ kojbʼisonik are chiʼ kkam jun winaq che sibʼalaj kqaj. Más na we kojchoman chrij ri kʼax che xuriqo are chiʼ majaʼ kkamik, are kʼu are chiʼ kqʼax ri tiempo kojkikot chi jumul rumal che kenaʼtaj jastaq chqe che xubʼano o xukʼut kan chqawach.

² Je kkʼulmataj qukʼ are chiʼ kojchoman chrij ri kʼax xuriq ri Jesús are chiʼ xkamik (1 Cor. 11:24, 25). Are kʼu kuya kikotemal chqe are chiʼ kojchoman chrij ri e jastaq che xubʼano y xubʼij are chiʼ xkʼojiʼ cho ri uwach Ulew. Xuqujeʼ kuya qachuqʼabʼ are chiʼ kojchoman chrij ri tajin kubʼan kimik y ri kubʼan na pa ri petinaq. Pa wajun kʼutunem kqil na che we kojchoman chrij ri ubʼanom ri Jesús pa qawiʼ kojutoʼo rech kojmaltyoxinik.

3. ¿Jasche kqamaltyoxij ri xubʼan ri Jesús pa qawiʼ?

³ Are chiʼ kojchoman chrij ri ukʼaslemal y ri ukamikal ri Jesús kqanaʼ maltyoxinik pa qanimaʼ. Are chiʼ xkʼojiʼ pa ri uwach Ulew, xukʼut chkiwach ri e winaq ri kubʼan na ri uQʼatbʼal tzij ri Dios. Ronojel ri xukʼutu sibʼalaj nim ubʼanik chqawach oj. Kojmaltyoxin rumal ri ukamikal ri Jesús rumal che kojutoʼo rech kojux rachiʼl areʼ y ri Jehová. Qonojel ri kojkojon chrij ri Jesús qeyeʼm ri kʼaslemal kʼo ta ukʼisik  y ri qʼij che kekʼastajisax lo ri kaminaqibʼ (Juan 5:28, 29; Rom. 6:23). Taqal ta chqe che kyaʼ waʼ taq tewchibʼal chqe, rumal che kʼo ta qabʼanom y kojkun taj kqatoj ronojel ri kibʼanom ri Dios y ri Cristo pa qawiʼ (Rom. 5:8, 20, 21). Are kʼu, chqilampeʼ jas kojkunik kqabʼano rech kojmaltyoxin chke.

4. ¿Jas xubʼan ri María Magdalena che ukʼutik che xumaltyoxij ri xbʼan che rumal ri Jesús? (Chawilaʼ ri wachbʼal).

⁴ Chojchoman chrij ri ukʼutbʼal jun ixoq judía, María Magdalena ubʼiʼ. Sibʼalaj xuriq kʼax rumal che xeʼok siete itzel taq uxlabʼal pa ri ubʼaqil. Weneʼ xuchomaj che kʼo ta ktoʼw chuwach wariʼ. ¿La kojkun oj kqanaʼ ri xunaʼo are chiʼ xtoʼ rumal ri Jesús? Sibʼalaj xmaltyoxin riʼ. Rumal laʼ xteriʼ chrij ri Jesús y xukoj ronojel ri utiempo, ri uchuqʼabʼ y ronojel ri kʼo rukʼ che utoʼik (Luc. 8:1-3). Paneʼ ri María sibʼalaj xumaltyoxij ri xbʼan che rumal ri Jesús, are kʼu weneʼ xuchʼobʼ taj che ri Jesús kuya na ri ukʼaslemal pa kiwiʼ ri winaq rech apachin taneʼ ri kkojon chrij kuriq jun kʼaslemal kʼo ta ukʼisik (Juan 3:16). Ri María qas xukʼutu che sibʼalaj xumaltyoxij ri xbʼan che. Rumal che xuya ta kan ri Jesús are chiʼ xekebʼam chi chuwach ri cheʼ (Juan 19:25). Y, are chiʼ muqum chi ri Jesús, ri María y e kebʼ rachiʼl xkikʼam bʼi kʼokʼalaj kunabʼal rech xekikojo che ri ucuerpo (Mar. 16:1, 2). Ri Jehová xutewchij ri usukʼilal ri María, rumal che are jun chke ri winaq che xril uwach ri Jesús are chiʼ kʼastajinaq chik y xtzijon rukʼ (Juan 20:11-18).

5. ¿Jas kqabʼan che ukʼutik che kqamaltyoxij ri kibʼanom ri Jehová y ri Jesús pa qawiʼ?

⁵ Oj xuqujeʼ kojkunik kqamaltyoxij ronojel ri kibʼanom ri Jehová y ri Jesús pa qawiʼ. ¿Jas kqabʼan che ukʼutik? Kqakoj ri qatiempo, ri qarajil y ri qachuqʼabʼ rech kqaya ri qatobʼanik che ri utinamit ri Jehová. Jun kʼutbʼal, kojkunik kqaya ri qatobʼanik che uyakik y rilixik ri e Ja rech  Ajawbʼal y ri e Ja re nim riqbʼal ibʼ, rumal che kʼo ubʼanik rukʼ ri qaqʼijilanik che ri Jehová.

6. ¿Jasche kqabʼij che ri Jesús xkam pa qawiʼ chqajujunal?

⁶ Are chiʼ kojchoman chrij ri nimalaj kiloqʼoqʼebʼal ri Jehová y ri Jesús chqe, kojutoʼo rech oj xuqujeʼ kqakoj qachuqʼabʼ che kiloqʼoqʼexik (1 Juan 4:10, 19). Y más na keqaloqʼoqʼej are chiʼ kqachʼobʼo che xkam ri Jesús pa qawiʼ chqajujunal. Ri apóstol Pablo sibʼalaj xumaltyoxij wajun sipanik riʼ. Rumal laʼ, xutzʼibʼaj bʼi waʼ taq tzij chke ri cristianos re ri tinamit Galacia: «Ri uKʼojol ri Dios [...] xinuloqʼoqʼej xuqujeʼ xuya ri ukʼaslemal rumal wech» (Gál. 2:20). Rumal ri ukamikal ri Jesús, katkunik katux rachiʼl ri Jehová (Juan 6:44). ¿La mat qastzij che nim kawilo che ri Jehová xril ri kʼo pa awanimaʼ y xraj xuya ri uKʼojol pa kamikal rech katok rachiʼl? ¿La mat qastzij che katutoʼ wariʼ rech keʼaloqʼoqʼej ri Jehová y Jesús? Rumal riʼ, qonojel rajawaxik kojchoman chrij wariʼ: «¿Jas kinbʼan che kilik ri e nikʼaj chik we keʼenloqʼoqʼej ri Jehová y ri Jesús?».

7. Junam rukʼ ri kawil pa ri wachbʼal, ¿jas rajawaxik kqabʼano rech kqakʼutu che keqaloqʼoqʼej ri Jehová y ri Jesús? (2 Corintios 5:14, 15; 6:1, 2).

⁷ Ri qaloqʼoqʼebʼal che ri Dios y ri Cristo kojutoʼo rech keqaloqʼoqʼej ri e nikʼaj chik (chasikʼij uwach 2 Corintios 5:14, 15; 6:1, 2). Y wariʼ kqakʼutu are chiʼ kqatzijoj ri utzij ri Dios chke konojel winaq; apastaneʼ ri kitinamit, ri kicultura, ri kekaʼyik y we e qʼinom o e qʼinom taj. Jeriʼ tajin kqabʼan ri kraj ri Jehová, rumal che ri areʼ «kraj chi kekolotaj ri winaq chi nimalaj konojel, xuqujeʼ chi kketaʼmaj ri qastzij» (1 Tim. 2:4).

8. ¿Jas kqabʼan che ukʼutik che keqaloqʼoqʼej ri e qachalal?

 ⁸ Ri jun chi kqabʼano rech kqakʼutu che keqaloqʼoqʼej ri Jehová y ri Jesús are che keqaloqʼoqʼej ri qachalal (1 Juan 4:21). Jun kʼutbʼal, kel qakʼuʼx chke y keqatoʼ ri tajin kkiriq kʼax. Kqakubʼsaj kikʼuʼx are chiʼ kʼo jun kachalaxik kkamik, kojopan che kichʼabʼexik are chiʼ e yawabʼ y kqaya kichuqʼabʼ are chiʼ kebʼisonik (2 Cor. 1:3-7; 1 Tes. 5:11, 14). Xuqujeʼ kqabʼan qachʼawem pa kiwiʼ rumal che qetaʼm che «sibʼalaj nim na ukunem ri ubʼochiʼnik jun sukʼalaj winaq» (Sant. 5:16).

9. ¿Jas jun chi jastaq kojkunik kqabʼano rech kqakʼutu che keqaloqʼoqʼej ri qachalal?

⁹ Ri jun chi kqabʼan che ukʼutik che keqaloqʼoqʼej ri e qachalal are che kqakoj qachuqʼabʼ rech oj utz kukʼ. Kqakuy kimak junam rukʼ ri kubʼan ri Jehová. Chojchomanampeʼ chrij wariʼ: we ri Jehová xutaq lo ri Jesús rech kukuy qamak, ¿la mat qastzij che rajawaxik aninaq kqakuy umak jun chke ri qachalal we kubʼan jun kʼax chqe? Kqaj taj kqabʼan qe junam rukʼ ri itzel loqʼom pataninel che xubʼij ri Jesús. Rumal che ri rajaw xubʼij che che kutoj ta chi ri ukʼas, are kʼu ri areʼ xukuy ta umak jun rachiʼl che kʼo jubʼiqʼ ukʼas rukʼ (Mat. 18:23-35). Rumal laʼ, we kʼo jun kʼax chixoʼl rukʼ jun qachalal, utz che kattzijon rukʼ rech ix utz chik are chiʼ majaʼ kuriqaʼ ri qʼij re ri Unaʼtabʼalil ri ukamikal ri Jesús (Mat. 5:23, 24). We je kabʼano kakʼutu che kaloqʼoqʼej ri Jehová y ri Jesús.

10, 11. ¿Jas kekunik kkibʼan ri e kʼamal bʼe rech kkikʼutu che kkiloqʼoqʼej ri Jehová y ri Jesús? (1 Pedro 5:1, 2).

¹⁰ Ri e kʼamal taq bʼe kekunik kkikʼutu che sibʼalaj kekiloqʼoqʼej ri Jehová y ri Jesús are chiʼ rukʼ loqʼoqʼebʼal kekichajij ri e qachalal, che kejunamataj kukʼ chij (chasikʼij uwach 1 Pedro 5:1, 2). Are waʼ ri xubʼij kan ri Jesús che ri apóstol Pedro. Are chiʼ ri Pedro oxmul xubʼij che retaʼm ta uwach ri Jesús, sibʼalaj xbʼisonik rumal laʼ xraj xukʼut chi jumul che qas kuloqʼoqʼej ri Jesús. Are chiʼ ri Jesús kʼateʼ xkʼastajisax pa ri kamikal, xutaʼ wariʼ che ri Pedro: «Simón, ukʼojol ri Jonás, ¿la sibʼalaj kinaloqʼoqʼej?». Xraj ta riʼ ri Pedro xubʼan apachike uwach jastaq rech kukʼut chuwach che kuloqʼoqʼej. Rumal laʼ ri Jesús xubʼij wariʼ che: «Cheʼayuqʼuj ri alaj taq nuchij» (Juan 21:15-17). Xmajtaj lo pa riʼ ri tiempo, ri Pedro xumaj kilixik ri winaq che xeya kan pa uqʼabʼ rumal ri Jesús, jeriʼ xukʼutu che qas kuloqʼoqʼej.

¹¹ ¿Jas kekunik kkibʼan ri e kʼamal bʼe pa ri tiempo re ri Unaʼtabʼalil ri ukamikal ri Jesús rech kkikʼutu che qas kkaj kkibʼan ri xubʼij kan ri Jesús che ri Pedro? Kkikʼutu are chiʼ kekisolij ri e qachalal y kekitoʼ ri kiyaʼom kan upatanixik ri Jehová (Ezeq. 34:11, 12). Xuqujeʼ utz che kekitoʼ ri winaq che tajin kyaʼ etaʼmanik re ri Biblia chke y ri kʼateʼ nabʼe mul keʼopan pa ri Unaʼtabʼalil ri ukamikal ri Jesús. Rumal che kkichomaj che ri e winaq riʼ kekunik keʼux testigos rech Jehová pa ri petinaq.

12. ¿Jasche kuya qachuqʼabʼ ri xubʼij ri Jesús pa ri kʼisbʼal chaqʼabʼ re ri ukʼaslemal? (Juan 16:32, 33).

¹² Pa ri kʼisbʼal chaqʼabʼ re ri ukʼaslemal ri Jesús, xubʼij wariʼ chke ri utijoxelabʼ: «Pa ri uwach Ulew kiriq na kʼaxkʼolil. Chijikibʼa bʼaʼ ikʼuʼx, ri in in chʼakaninaq puwiʼ ri uwach ulew» (chasikʼij uwach Juan 16:32, 33). ¿Jas xtoʼw ri Jesús rech xujikibʼa ukʼuʼx o xuxiʼj ta ribʼ chkiwach ri ukʼulel y xuya ta kan upatanixik ri uTat kʼa pa ri  ukamikal? Are rumal che xukubʼsaj ukʼuʼx chrij ri Jehová. Rumal che ri Jesús retaʼm che ri utijoxelabʼ kkiriq na kʼi taq kʼax, xubʼij che ri Jehová pa chʼawem che keʼuchajij (Juan 17:11). ¿Jasche kuya qachuqʼabʼ wariʼ? Rumal che ri Jehová más nim na ri uchuqʼabʼ chuwach apachike uwach qakʼulel (1 Juan 4:4). Ri areʼ kril ronojel ri tajin kkʼulmatajik. Y qas qetaʼm che we kqakubʼsaj qakʼuʼx chrij, kʼo ta jumul kqaxeʼj qibʼ chuwach ri kʼaxkʼolil o ri e qakʼulel.

13. ¿Jas xubʼan ri José re Arimatea che ukʼutik che xuxiʼj ta ribʼ?

¹³ Chojchoman chrij ri José re Arimatea, jun achi che nim kil wi kumal ri judíos. Wajun achi kʼo chkixoʼl ri e kʼo pa ri jupuq qʼatal taq tzij judíos ri kbʼix Sanedrín che. Are kʼu are chiʼ ri Jesús xutzijoj ri utzij ri Dios, ri José xuxeʼj ribʼ chkiwach ri winaq. Rumal che ri Juan xubʼij wariʼ chrij: «Ri areʼ utijoxel ri Jesús, xa chi kʼuyal [o chawal] rumal rech chi kuxeʼj ribʼ chkiwach ri judíos» (Juan 19:38). Paneʼ utz xuta ri xtzijox chrij ri uQʼatbʼal tzij ri Dios, xuqʼalajisaj ta chkiwach ri winaq che kkojon chrij ri Jesús. ¿Jasche jeriʼ xubʼano? Weneʼ xa kuxeʼj ribʼ che nim ta chi kil kumal ri winaq. Apastaneʼ ri rumal, ri Biblia kubʼij che are chiʼ kaminaq chi ri Jesús, ri José xuxeʼj «ta ribʼ, xok bʼik chuwach ri Pilato, xutzʼonoj ri ucuerpo ri Jesús che» (Mar. 15:42, 43). Rukʼ wariʼ, ri José xukʼut chkiwach ri winaq che kkojon chrij ri Jesús.

14. ¿Jas kqabʼano rech kqaxeʼj ta qibʼ chuwach ri kkibʼij ri winaq?

¹⁴ ¿La kaxeʼj awibʼ at chuwach ri kkichomaj ri winaq chawij junam rukʼ ri xukʼulmaj ri José re Arimatea? ¿La kʼo jujun mul pa ri tijobʼal o pa ri chak katkʼixik kabʼij che at testigo rech Jehová? ¿La at publicador taj o abʼanom ta aqasanjaʼ rumal che kaxeʼj awibʼ? Kaya ta bʼe che ri kkibʼij ri e nikʼaj chik katuqʼatej rech kabʼan ri kqaj chuwach ri Jehová. Chabʼij che ri Jehová che katutoʼo rech kaxeʼj ta awibʼ che ubʼanik ri kraj. Are chiʼ kawilo che kutzalij uwach ri achʼawem, kaxeʼj ta chi awibʼ chkiwach ri winaq (Is. 41:10, 13).

15. ¿Jas xeʼutoʼ wi ri tijoxelabʼ are chiʼ xketaʼmaj che kʼasal ri Jesús? (Lucas 24:52, 53).

¹⁵ Ri utijoxelabʼ ri Jesús sibʼalaj xebʼisonik are chiʼ xkamik. Rumal che xaq xiw ta xkam jun loqʼalaj kachiʼl xaneʼ xuqujeʼ xkinaʼo che kʼo ta chi jachin ketoʼwik (Luc.  24:17-21). Are kʼu are chiʼ xqʼax ri tiempo, ri Jesús xukʼut ribʼ chkiwach y xubʼij chke che xkamik rumal che are laʼ ri bʼim kan chrij pa ri Biblia. Xuqujeʼ xubʼij chke che rajawaxik kkibʼan jun chak nim ubʼanik (Luc. 24:26, 27, 45-48). Ri Jesús xbʼe pa ri kaj are chiʼ qʼaxinaq chi 40 qʼij che ri ukʼastajibʼal. Are kʼu ri tijoxelabʼ sibʼalaj xekikot chik rumal che ri Jesús kʼaslik y keʼutoʼ che ubʼanik ri chak ri xeʼutaq wi kanoq. Ri kikotemal xkinaʼo xtobʼanik rech xkiya ta kan uqʼijilaxik ri Jehová (chasikʼij uwach Lucas 24:52, 53; Hech. 5:42).

16. ¿Jas kqabʼan che resaxik kiwach ri utijoxelabʼ ri Jesús?

¹⁶ E kʼu ri oj, ¿jas kqabʼan che resaxik kiwach ri utijoxelabʼ ri Jesús? Rajawaxik kqapatanij ri Jehová ronojel taq qʼij, xaq xiw ta pa ri tiempo re ri Unaʼtabʼalil ri ukamikal ri Jesús. Rech kojkun che ubʼanik, rajawaxik kqilij ri chak che kʼo ubʼanik rukʼ ri uQʼatbʼal tzij ri Dios. Jun kʼutbʼal, e jujun qachalal kikʼexom ri hora re ri kichak rech kkitzijoj más ri utzij ri Dios, kebʼe pa taq ri riqbʼal ibʼ y kkibʼan ri kiqʼijilanik pa ri familia ronojel taq semanas. Xuqujeʼ are ta más kbʼe kikʼuʼx che utzukuxik jastaq che qas ta kajwataj chke. ¿Jasche? Rumal che jeriʼ kekunik ketobʼan más pa ri congregación o kebʼe che utzijoxik ri utzij ri Dios jawchiʼ rajawaxik wi más tobʼanik. Qastzij che kajwataj chuqʼabʼ rech kqapatanij ri Jehová, are kʼu we kqabʼano, ri areʼ kojutewchij (Prov. 10:22; Mat. 6:32, 33).

17. ¿Jas rajawaxik kqabʼan pa ri tiempo re ri Unaʼtabʼalil ri ukamikal ri Jesús? (Chawilaʼ ri wachbʼal).

¹⁷ Kqaj kopanilobʼ ri qʼij martes 4 re abril rech kqanaʼtajisaj ri ukamikal ri Jesús. Rajawaxik taj che kʼa kopan na wajun qʼij rech kʼateʼ kojchoman chrij ri ukʼaslemal y ri ukamikal ri Jesús xuqujeʼ chrij ri uloqʼoqʼebʼal areʼ y ri uloqʼoqʼebʼal ri Jehová. Utz che ronojel taq qʼij pa ri tiempo re ri Unaʼtabʼalil ri ukamikal ri Jesús keqanikʼoj ri jastaq che xekʼulmataj pa ri kʼisbʼal taq qʼij re ri ukʼaslemal pa ri wachbʼal re ri kʼutunem «¿Jas kqabʼan che utijoxik qibʼ che ri Conmemoración?» pa ri wuj Qachak xuqujeʼ Qakʼaslemal ri oj Cristianos: Wuj re chak, abril 2019. Cheʼatzukuj textos rech ri Biblia che katutoʼo rech katmaltyoxinik, katloqʼoqʼenik, kaxeʼj ta awibʼ y katkikotik. Y, chatchoman chrij ri rajawaxik kabʼano rech qas kqʼalajinik che katmaltyoxin rukʼ ronojel awanimaʼ. Qas chnaʼtaj chqe: Jesús nim kril wi che kojchoman chrij pa ri tiempo re ri Unaʼtabʼalil ri ukamikal (Apoc. 2:19).