1. ¿Jas (o su) más chrij kechoman wi ri winaq kamik?

 KAMIK e kʼi winaq are más kechoman chbʼil kibʼ. Pa ri redes sociales ri winaq kkikʼutu jas tajin kkibʼan pa ri kikʼaslemal rech jeriʼ nim keʼil kumal ri más winaq. Pero e kʼi ta ri winaq kkiya ri uqʼij ri Dios. Pa wajun kʼutunem riʼ, kqil na jas kraj kubʼij kqaya uqʼij ri Jehová y jasche rajawaxik kqabʼano. Y kqetaʼmaj na jas kqabʼan che uyaʼik uqʼij ri Jehová che yaʼtal che y jas kubʼan na ri areʼ che uyaʼik uqʼij ri ubʼiʼ pa ri petinaq.

¿JAS KRAJ KUBʼIJ KQAYA UQʼIJ RI JEHOVÁ?

2. ¿Jas xubʼan ri Jehová che ukʼutik ri u poder chkiwach ri winaq pa ri juyubʼ Sinaí? (Xuqujeʼ chawilaʼ ri wachbʼal).

² Ri Biblia kubʼij che ri Jehová nim ubʼanik y kʼo u poder. Are chiʼ ri israelitas e kʼo ta chi pa Egipto, ri Jehová xukʼut ri u poder chkiwach. Chojchoman chrij are chiʼ ri israelitas e takʼal chuwach ri juyubʼ Sinaí rech kketaʼmaj ri kubʼij na ri Jehová chke. Xilitaj jun nimalaj sutzʼ che xuchʼuq ri juyubʼ. Y chupam wariʼ xtataj trompetas (cuerno), kaqulja y xilitaj koyopaʼ (Éx. 19:16-18; 24:17; Sal. 68:8). Qastzij riʼ che ri israelitas xkimay ri nimalaj u poder ri Jehová che kʼolik.

3. ¿Jas kraj kubʼij uyaʼik uqʼij ri Jehová?

³ ¿La kojkunik kqaya uqʼij ri Jehová? Qastzij wi che kojkunik. Jun chke ri kojkunik kqabʼano rech kqaya uqʼij  ri Jehová, are che kqakʼut chkiwach ri winaq chrij ri u poder y ri utzalaj taq ubʼantajik che kʼolik. Y kqaya uqʼij ri Jehová are chiʼ kqabʼij, che rukʼ ri utobʼanik kojkun che ubʼanik ri kqabʼano (Is. 26:12). Je wariʼ xubʼan ri rey David. Jumul, chkiwach konojel ri winaq re Israel, xubʼij: «¡E ech la, Ajawaxel, ri nimalil, ri kuʼinem, ri juluwem, ri ajawinik xuqujeʼ ri nimalaj bʼanik la! Rumal rech chi ronojel ri kʼo pa ri kaj xuqujeʼ ri kʼo pa ri uwach ulew e ech la». Y are chiʼ xukʼis ri uchʼawem, «konojel kʼut ri winaq xeqʼijilan che ri» Jehová (1 Crón. 29:11, 20).

4. ¿Jas xubʼan ri Jesús che uyaʼik uqʼij ri Jehová?

⁴ Ri Jesús xuya uqʼij ri Jehová are chiʼ xkʼojiʼ cho ri uwach Ulew. Amaqʼel xubʼij che juntir ri milagros che xubʼano xubʼan rukʼ ri utobʼanik ri Jehová (Mar. 5:18-20). Xuya uqʼij ri Jehová are chiʼ rukʼ utz taq tzij xeʼuchʼabʼej ri winaq. Jumul are chiʼ kʼo pa ri sinagoga xril jun ixoq che 18 junabʼ chik okinaq jun demonio che. Rumal wajun demonio riʼ ri ixoq xaq pachalik kbʼinik y kkuntaj kusukʼumaj ri rij. ¡Sibʼalaj kʼax ri uriqom! Are chiʼ ri Jesús xrilo, sibʼalaj xutoqʼobʼisaj uwach ri ixoq y xubʼij che: «Ixoq, at utzoqopim ri ayabʼ». Y xuya ri uqʼabʼ pa ujolom ri ixoq y rukʼ wariʼ xkunatajik y ri ixoq «xunimarisaj uqʼij ri Dios» (Luc. 13:10-13). Qastzij wi che ri ixoq kkunik kuya uqʼij ri Jehová rumal ri xkʼulmataj rukʼ; ri oj xuqujeʼ kojkunik je kqabʼano.

¿JASCHE KQAYA NIMALAJ UQʼIJ RI JEHOVÁ?

5. ¿Jasche nim kqil wi ri Jehová?

⁵ Sibʼalaj kqaya uqʼij ri Jehová rumal che nim kqil wi. Kʼo kʼi rumal che nim kqil wi. Ri Jehová kʼo uchuqʼabʼ che ubʼanik ri kraj y kkʼistaj ta ukʼuʼx che ubʼanik (Sal. 96:4-7). Kqil ri nimalaj unojibʼal rukʼ ronojel ri ubʼanom. Uyaʼom ri qakʼaslemal y ri rajawaxik rech kojkʼasiʼk (Apoc. 4:11). Amaqʼel kuya tobʼanik rumal che kloqʼoqʼenik (Apoc. 15:4). Utz kel ronojel ri kubʼano y amaqʼel kubʼan ri kubʼij (Jos. 23:14). Rumal laʼ ri profeta Jeremías xubʼij: «Chkixoʼl konojel ri ajnoʼjabʼ xuqujeʼ taq ri ajawinelabʼ re ri uwach ulew, man kʼo ta jachin jun jachaʼ ta ri lal» (Jer. 10:6, 7). Rumal ronojel wariʼ nim kqil wi ri Jehová, are kʼu xiw ta nim kqilo xaneʼ xuqujeʼ kqaloqʼoqʼej.

6. ¿Jasche kqaloqʼoqʼej ri Jehová?

⁶ Kqaya uqʼij ri Jehová rumal che sibʼalaj kqaloqʼoqʼej rukʼ ronojel qanimaʼ. E kʼi ri ubʼantajik ri Jehová kubʼano che sibʼalaj kqaloqʼoqʼej. Jun chke are ri toqʼobʼisal wachaj (Sal. 103:13; Is. 49:15). Kbʼisonik are chiʼ krilo che tajin kqariq kʼax (Zac. 2:8). Kuya ri tobʼanik chqe rech kojkunik kqabʼan ramigos (Sal. 25:14; Hech. 17:27). Kubʼan ta nim che ribʼ, rumal laʼ «kupachbʼa kʼu ne uloq ribʼ che rilik ri kaj xuqujeʼ ri uwach Ulew. Ri Ajawaxel kuwalajisaj ri mebʼaʼ ri kʼo pa ri ulew» (Sal. 113:6, 7). Qastzij che kqaj kqaya nim uqʼij ri Jehová rumal ri utzalaj taq ubʼantajik (Sal. 86:12).

7. ¿Jas kojkun oj kqabʼano?

⁷ Kqaya uqʼij ri Jehová rumal che kqaj che konojel ri winaq kketaʼmaj uwach. E kʼi ri winaq che utz ta ri kichomanik chrij ri Jehová. ¿Jasche? Rumal che ri Satanás ubʼim kʼi molom taq tzij chrij y rumal laʼ ri winaq jalan kkichomaj chrij ri Jehová (2 Cor. 4:4). Ri Satanás kubʼij che ri Jehová kutzalij ukʼaxel ronojel ri  kojsach wi y che are ajmak che ri kʼax che kkʼulmataj pa ri uwach Ulew. Pero qetaʼm che qastzij ta wariʼ, rumal laʼ kqakʼut ri qastzij chkiwach ri winaq y je wariʼ kqaya nim uqʼij ri Jehová (Is. 43:10). Chqilaʼ ri kubʼij ri Salmo 96 che kukʼut chqawach jas kqabʼan che uyaʼik uqʼij ri Jehová.

¿JAS KQABʼAN CHE UYAʼIK UQʼIJ RI JEHOVÁ?

8. ¿Jas kojkunik kqabʼano rech kqaya uqʼij ri Jehová? (Salmo 96:1-3).

⁸ (Chasikʼij Salmo 96:1-3). Kojkunik kqaya uqʼij ri Jehová rukʼ ri kqabʼij chrij. Chupam ri versículos riʼ kqilo che ri Jehová keʼubʼan invitar ri upatanelabʼ rech kebʼixon che, nim kkil ri ubʼiʼ y kkiya ubʼixik ri utzalaj taq noticias chke konojel ri tinamit. Ronojel wariʼ kuya uqʼij ri Qatat Jehová. Ri judíos y ri cristianos re ri nabʼe siglo xkibʼan ronojel ri xekun che ubʼanik rech xkiya uqʼij ri ubʼiʼ ri Jehová, rumal che amaqʼel xkitzijoj chke ri winaq ri utz taq ubʼantajik y ri ubʼanom che kitoʼik (Dan. 3:16-18; Hech. 4:29). ¿Jas kqabʼan oj che ubʼanik qe jachaʼ ri xkibʼan ri cristianos re ri nabʼe siglo?

9, 10. ¿Jas kqetaʼmaj chrij ri xukʼulmaj ri qachalal Angelina? (Xuqujeʼ chawilaʼ ri wachbʼal).

⁹ Chqilaʼ ri xukʼulmaj ri qachalal Angelina a che kel pa Estados Unidos. Xuxiʼj ta ribʼ y xutoʼ uwiʼ ri ubʼiʼ ri Jehová pa ri uchak. Pa ri nabʼe qʼij che xumajij chak, xemulix konojel ri ajchakibʼ rech ketaʼmax kiwach ri kʼateʼ nabʼe mul xeʼopan pa ri chak, rumal laʼ xbʼix che che kubʼij jujun jastaq chrij ri ukʼaslemal rech ketaʼmax más uwach kumal ri rachiʼl. Ri areʼ kraj kukʼut jujun fotos chkiwach rech kkilo che kkikotik rumal che testigo rech Jehová. Are kʼu jun chke ri rachiʼl che xchʼaw nabʼe xubʼij che xkʼiy pa jun familia che e testigos rech Jehová y xumaj kiyoqʼik ri testigos rech Jehová. Ri qachalal Angelina kubʼij: «Sibʼalaj xinxiʼj wibʼ are kʼu xinchomaj wariʼ: ‹¿La kinya bʼe che kbʼix molom taq tzij chrij ri Jehová o kintoʼo?›».

¹⁰ Are chiʼ ri rachiʼl xukʼis tzijonem, ri qachalal Angelina xubʼan orar nabʼe. Rukʼ utzalaj taq tzij xubʼij che: «In xuqujeʼ are chiʼ in akʼal na xkʼut chnuwach chrij ri Jehová y kamik in testigo rech  Jehová». Ri rachiʼl utz ta xuta wariʼ pero ri qachalal xuxiʼj ta ribʼ. Y xukʼut jujun fotos chkiwach konojel chrij ri kkibʼan ri testigos rech Jehová y rukʼ utzalaj taq tzij xutoʼ uwiʼ ri ubʼiʼ ri Jehová (1 Ped. 3:15). Are chiʼ ri qachalal xukʼis tzijonem, ri rachiʼl che nabʼe kanoq xpe royowal xubʼij che xuqujeʼ knaʼtaj che ri kikotemal xunaʼo are chiʼ xupatanij ri Jehová ojer. Ri qachalal Angelina kubʼij: «Yaʼtal che ri Jehová che kqatoʼ uwiʼ ri ubʼiʼ. ¡Are jun nimalaj eqeleʼn!». Oj xuqujeʼ kojkunik kqatoʼ uwiʼ ri ubʼiʼ ri Jehová are chiʼ ri nikʼaj chik kkibʼij molom taq tzij chrij.

11. ¿Jas kkibʼan ri testigos rech Jehová che ukojik ri pixabʼ che kriqitaj pa Salmo 96:8?

¹¹ (Chasikʼij Salmo 96:8). Kojkunik kqaya uqʼij ri Jehová rukʼ ri jastaq qech. Ri qastzij upatanelabʼ ri Jehová amaqʼel kiyaʼom uqʼij rukʼ ri jastaq kech (Prov. 3:9). Junam rukʼ ri xkibʼan ri israelitas ojer che xkiya kikuchuj are chiʼ xwalajisaxik y xsukʼumax ri templo (2 Rey. 12:4, 5; 1 Crón. 29:3-9). E jujun u discípulos ri Jesús «xkikoj ri jastaq kech» rech xkitoʼ ri Jesús y ri u apóstoles (Luc. 8:1-3). Y ri cristianos re ri nabʼe siglo xekitoʼ ri kachalal (Hech. 11:27-29). Kamik kojkunik kqaya uqʼij ri Jehová rukʼ ri kuchuj che kqayaʼo.

12. ¿Jasche kuya uqʼij ri Jehová ri kuchuj che kqayaʼo? (Xuqujeʼ chawilaʼ ri wachbʼal).

¹² Chqilaʼ jun ejemplo jas kqabʼan che uyaʼik uqʼij ri Jehová rukʼ ri qakuchuj. Pa ri junabʼ 2020 xubʼan ta más jabʼ pa Zimbabue, rumal wariʼ weneʼ e millones ri winaq kekam na rumal che kʼo ta ktijowik. Jun chke ri winaq riʼ are ri qachalal ubʼiʼ Prisca. Paneʼ tajin kuriq kʼax, pero ronojel taq miércoles y viernes xukoj uchuqʼabʼ rech xutzijoj ri utzij ri Dios y xubʼan wariʼ paneʼ are ri tiempo che kchakux ri ulew. Ri u vecinos xetzeʼn chrij rumal che are más kutzijoj ri utzij ri Dios chuwach ri uchakuxik ri rulew, rumal laʼ kkibʼij che: «¡Katkam na rumal wiʼjal!». Pero ri qachalal amaqʼel kubʼij chke: «Ri Jehová kuya ta kan kichajixik ri upatanelabʼ». Qʼaxinaq jujun taq qʼij, ri utinamit ri Jehová xutaq ri kajwataj che ri qachalal. E jujun chke ri u vecinos sibʼalaj xkimayo y xkibʼij che: «Ri a Dios at uyaʼom ta kanoq. Kqaj kqetaʼmaj más  chrij». Rukʼ waʼ e siete chke xkimajij bʼenam pa ri e riqbʼal ibʼ.

13. Junam rukʼ ri kubʼij Salmo 96:9, ¿jas kqabʼan che uyaʼik uqʼij ri Jehová?

¹³ (Chasikʼij Salmo 96:9). Kojkunik kqaya uqʼij ri Jehová rukʼ ri kqabʼan pa ri qakʼaslemal. Ojer, ri Jehová xubʼij chke ri sacerdotes che rajawaxik keʼatinik ronojel taq qʼij are chiʼ kepatanin pa ri tabernáculo y pa ri templo (Éx. 40:30-32). Oj xuqujeʼ kqakoj qachuqʼabʼ rech ronojel taq qʼij kojatinik, pero ri más nim ubʼanik are che ri qakʼaslemal saq chuwach ri Jehová (Sal. 24:3, 4; 1 Ped. 1:15, 16). Rajawaxik kqakoj qachuqʼabʼ rech kqabʼan ri kraj ri Jehová y che kqaya kan ubʼanik ri utz ta krilo. Wariʼ kraj kubʼij che rajawaxik kqaxutuj juntir uwach itzelal y tzʼil taq jastaq, chqakʼutuʼ rukʼ ri qachomanik y ri kqabʼano che kqesaj uwach ri utz taq ubʼantajik ri Jehová (Col. 3:9, 10). Ojer e kʼi winaq che sibʼalaj tzʼil ri kikʼaslemal y e kʼanalaj taq winaq, pero rukʼ ri utobʼanik ri Jehová xekunik xkikʼex ri kibʼantajik y chanim tajin kkipatanij rukʼ jun saq kikʼaslemal.

14. ¿Jas kqetaʼmaj chrij ri ukʼaslemal ri qachalal Jack? (Xuqujeʼ chawilaʼ ri wachbʼal)

¹⁴ Chqilaʼ ri xkʼulmataj rukʼ jun achi ubʼiʼ Jack, che ojer kanoq xbʼix Demonio che rumal che sibʼalaj kʼaʼn, xubʼan kʼi kʼax y kamisanik. Y rumal ronojel ri xubʼano xyaʼ pa cárcel y xbʼix che che kkamisax na. Are chiʼ kʼo pa ri cárcel xaq reyem ri qʼij che kkamisaxik, pero xraj xretaʼmaj chrij ri Biblia rukʼ jun qachalal che kopan pa ri cárcel. Sibʼalaj xukoj uchuqʼabʼ che ukʼexik ri ukʼaslemal y xux testigo rech Jehová. Konojel ri e kʼo pa ri cárcel sibʼalaj xkimayo che xukʼex ri ukʼaslemal, rumal wariʼ e jujun chke ri guardias sibʼalaj xeʼoqʼik are chiʼ xkamisaxik. Jun sargento xubʼij wariʼ chrij: «Ojer kanoq, ri a Jack are ri achi más itzel che xkʼojiʼ waral. Are kʼu chanim are jun chke ri más utz taq winaq». Qʼaxinaq chi jun semana, ri e qachalal xeʼopan chi pa ri cárcel rech kkibʼan ri riqbʼal ibʼ, pero xkilo che kʼo jun achi chilaʼ che kʼo ta jumul opanaq pa ri riqbʼal ibʼ. ¿Jasche xraj xopanik? Rumal che sibʼalaj xumay ronojel ri xkʼulmataj rukʼ ri qachalal Jack, xraj  xretaʼmaj jas rajawaxik kubʼano rech kuqʼijilaj ri Jehová. Qastzij wi, ri kqabʼan pa ri qakʼaslemal kuya uqʼij ri Qatat Jehová (1 Ped. 2:12).

¿JAS KUBʼAN NA RI JEHOVÁ PA RI PETINAQ CHE UYAʼIK UQʼIJ RI UBʼIʼ?

15. ¿Jas kubʼan na ri Jehová pa ri petinaq che uyaʼik uqʼij ri ubʼiʼ? (Salmo 96:10-13).

¹⁵ (Chasikʼij Salmo 96:10-13). Ri kʼisbʼal taq versículos re ri Salmo 96 kukʼut chqawach che ri Jehová are jun Rey che kuqʼat tzij rukʼ sukʼilal. ¿Jas kubʼan na ri Jehová che uyaʼik uqʼij ri ubʼiʼ pa ri petinaq? Kubʼan na wariʼ are chiʼ kuqʼat tzij rukʼ sukʼilal. Xa jubʼiqʼ chi kraj kusachisaj na kiwach juntir ri e kojonem che kibʼim molom taq tzij chrij ri ubʼiʼ (Apoc. 17:5, 16; 19:1, 2). Weneʼ jujun chke ri winaq che e kʼo chupam ri e kojonem riʼ kkaj kkipatanij ri Jehová qukʼ are chiʼ kkilo ksachisax kiwach ri e kojonem. Pa ri Armagedón ri Jehová kusach na uwach ri Satanás xuqujeʼ konojel ri kibʼim molom taq tzij chrij ri ubʼiʼ, are kʼu kutoqʼobʼisaj na kiwach e jachin nim kkil ri ubʼiʼ, keniman che y kkitoʼ ri ubʼiʼ chkiwach ri winaq (Mar. 8:38; 2 Tes. 1:6-10). Ri Jehová qas kuya na uqʼij ri ubʼiʼ are chiʼ kkʼis ri Mil junabʼ che kuqʼat na tzij ri Cristo y are chiʼ kkʼis ri tiempo che ri Jehová uyaʼom bʼe che ri Satanás keʼubʼan engañar ri winaq. Pa ri tiempo riʼ ketaʼmax na uwach ri Jehová pa ronojel ri uwach Ulew, «jachaʼ ri kubʼan ri jaʼ kunojisaj ri» mar (Hab. 2:14).

16. ¿Jas kawaj at kabʼano? (Xuqujeʼ chawilaʼ ri wachbʼal)

¹⁶ ¡Sibʼalaj jeʼl riʼ are chiʼ konojel ri winaq kkiya uqʼij ri ubʼiʼ ri Jehová! Are chiʼ qeyem che kopan ri qʼij riʼ, kojkunik kqakoj qachuqʼabʼ rech kqaya uqʼij ri ubʼiʼ ri Jehová. Rumal laʼ, ri Cuerpo Gobernante xuchaʼ ri Salmo 96:8 rech are ri texto re ri junabʼ 2025: «Chiyaʼ ri qʼijilanik che taqal che ri ubʼiʼ ri Jehová».