E KEBʼ alitomabʼ tajin kebʼin pa jun bʼe re negocios re ri tinamit Baguio (Filipinas). Xkil jun carrito re predicación pública, are kʼu xeqebʼ ta rukʼ. Helen, ri qachalal che kʼo rukʼ ri carrito, xkaʼy chke y xtzeʼn kukʼ. Ri alitomabʼ xaq xeqʼatan bʼik, are kʼu sibʼalaj xkimayo che Helen xtzeʼn kukʼ.

Are chiʼ qʼaxinaq chi jubʼiqʼ tiempo, e kʼo pa jun camioneta bʼenam kij cho kachoch, xkil jun nimalaj wuj re jw.org che nakʼal chuwach jun Ja rech Ajawbʼal. Xnaʼtaj chke che xa junam ri letras che kʼo cho ri carrito re predicación pública che xkil kan nabʼe. Xeqaj kan pa ri camioneta y xekilaʼ ri hora re ri e riqbʼal ibʼ che kkibʼan ri jalajoj taq congregaciones pa ri Ja rech Ajawbʼal.

Ri e kebʼ alitomabʼ xeʼopan pa jun riqbʼal ibʼ. Y ¿jachin xkilo chiʼ xeʼok bʼi pa ri Ja rech Ajawbʼal? ¡Are ri Helen! Aninaq xkichʼobʼ uwach ri qachalal rumal che ktzeʼtzot ri upalaj. Helen kubʼij: «Are chiʼ xwilo che wukʼ xepe wi, xinxibʼij wibʼ. Xinchomaj che weneʼ xa xinbʼan jun jastaq che utz taj». Are kʼu ri alitomabʼ xkibʼij che ri Helen ri xkʼulmatajik.

Ri alitomabʼ utz xkil ri riqbʼal ibʼ y ri kachilanik ri qachalal; xkinaʼo che jetaneʼ e kʼo cho kachoch. Are chiʼ xkil ri e qachalal tajin kkimes upam ri Ja rech Ajawbʼal chiʼ xkʼis ri riqbʼal ibʼ, xkibʼij che kkaj ketobʼanik. Jun chke ri alitomabʼ kʼo ta chi pa Filipinas, are kʼu ri jun chik amaqʼel kbʼe pa ri e riqbʼal ibʼ y xumaj retaʼmaxik ri kukʼut ri Biblia... ¡ronojel xkʼulmatajik rumal che ri qachalal xtzeʼn kukʼ!