1. ¿Jas xubʼij ri Jesús chke ri utijoxelabʼ are chiʼ xchʼaw chrij «ri ukʼisbʼalil ri uwach ulew», y jas pixabʼ xuya kan chke?

 ARE chiʼ xa jubʼiqʼ chi kraj kkam ri Jesús e kajibʼ utijoxelabʼ xkitaʼ wariʼ che: «¿Jas ri retal ri ukʼisbʼalil ri uwach ulew?» (Mat. 24:3). Weneʼ xkitaʼ wariʼ che rumal che kkaj kketaʼmaj jampaʼ kpe ri kʼisbʼalil. Rumal laʼ, ri Jesús xubʼij chke jas ri kkʼulmataj na are chiʼ ksachisax uwach Jerusalén. Are kʼu xaq xiw ta laʼ xubʼij, xaneʼ xuqujeʼ xchʼaw chrij ri kkʼulmataj na pa «ri ukʼisbʼalil ri uwach ulew». Are chiʼ tajin kchʼaw chrij ri kʼisbʼal taq qʼij riʼ, xubʼij: «Man kʼo ta jun retaʼm jachike joqʼotaj, mawi jachike qʼij kbʼantaj na waʼ. Man ketaʼm ta ri taqonibʼ aj kaj, mawi ne ri Kʼojolaxel. Xuwi ri Tataxel retaʼm». Tekʼuriʼ xubʼij kan wariʼ chke ri utijoxelabʼ: «Chixkʼaskʼatoq» (Mar. 13:32-37).

2. ¿Jasche xekʼaskʼat ri cristianos che xekʼojiʼ pa Jerusalén?

² Rajawaxik che ri nabʼe taq cristianos judíos xekʼaskʼatik rech xekolotaj chuwach ri kʼax che xnaqajin chkiwach. Rumal laʼ, ri Jesús xubʼij kan chke ri utijoxelabʼ ri rajawaxik kkilo rech kketaʼmaj che xa jubʼiqʼ chi kraj kbʼan kʼax che ri tinamit Jerusalén, xubʼij: «Are taq kiwil ri Jerusalén sutim rij kumal ajchʼojabʼ, chichʼobʼoʼ chi chanim ksach na uwach». Are chiʼ kkil wariʼ rajawaxik che aninaq keʼanimaj bʼi pa taq ri juyubʼ, junam che xbʼix chke (Luc. 21:20, 21). Ri judíos che xkinimaj ri xubʼij ri Jesús aninaq xeʼel bʼik are chiʼ majaʼ ksachisax uwach Jerusalén, rumal laʼ xekolotaj kanoq.

3. ¿Jas kqil na pa wajun kʼutunem?

³ Ri oj xuqujeʼ oj kʼo pa ri kʼisbʼal taq qʼij. Rumal laʼ, junam rukʼ ri xkibʼan ri nabʼe taq cristianos rajawaxik qas kqachomaj na jas ri kqabʼano y kojkʼaskʼatik. Pa  wajun kʼutunem riʼ kqil na jas rajawaxik kqabʼano rech kqachomaj na ri kqabʼij are chiʼ kojchʼaw chrij ri tajin kkʼulmataj cho ri uwach Ulew. Xuqujeʼ kqil na jas rajawaxik kqabʼano rech kqachajij qibʼ y rech utz kqabʼan che ukojik ri qatiempo pa ri kʼisbʼal taq qʼij che oj kʼo wi.

4. ¿Jasche kqaj kqetaʼmaj ri tajin kkʼulmataj cho ri uwach Ulew?

⁴ Qastzij wi che qonojel kqaj kqetaʼmaj ri tajin kkʼulmataj cho ri uwach Ulew, rech kqilo we tajin kbʼan ri bʼim kan pa ri profecías. Jun kʼutbʼal, ri Jesús xubʼij kan kʼi jastaq chke ri utijoxelabʼ che kkʼulmataj na are chiʼ xa jubʼiqʼ chi kraj ksachisax uwach ri itzelal cho ri uwach Ulew (Mat. 24:3-14). Ri apóstol Pedro xubʼij che rajawaxik qas kqil ri tajin kbʼan che utzʼaqatisaxik ri profecías re ri Biblia rech knimar más ri qakojonik (2 Ped. 1:19-21). Y ri ukʼisbʼal wuj re ri Biblia kumaj rukʼ ri e tzij riʼ: «Are waʼ ri qʼalajisanik re ri Jesucristo ri xuya ri Dios che, rech kuqʼalajisaj chkiwach ri e pataninel taq rech ri xakol man kekʼulmatajoq» (Apoc. 1:1). Rumal laʼ, qonojel kqaj kqetaʼmaj ri tajin kkʼulmataj cho ri uwach Ulew rech kqilo jas tajin kbʼan che utzʼaqatisaxik ri profecías. Y utz kqilo kojtzijon kukʼ ri qachalal chrij wariʼ.

5. ¿Jasche rajawaxik kqachajij qibʼ are chiʼ kojchʼaw chrij ri tajin kbʼan che utzʼaqatisaxik ri profecías re ri Biblia y jas rajawaxik kqabʼano? (Xuqujeʼ chawilaʼ ri e wachbʼal).

⁵ Are kʼu rajawaxik kqachajij qibʼ are chiʼ kojtzijon chrij ri profecías rech ri Biblia. ¿Jasche? Rumal che weneʼ kqabʼij jun jastaq chke ri qachalal che kukʼex ri kichomanik. Jun kʼutbʼal, weneʼ kqato che ri qʼatal taq tzij kkibʼij che kkesaj ri chʼoj cho ri uwach Ulew rech kqariq jamaril. Rumal laʼ, weneʼ kqachomaj che tajin chi kbʼan ri kubʼij pa 1 Tesalonicenses 5:3, are kʼu ri más nim ubʼanik are che kqil ri uyaʼom lo ubʼixik ri utinamit ri Jehová. Rumal che we are kojtzijon chrij ri ubʼim ri utinamit ri Jehová, tajin kojtobʼanik rech junam ri qachomanik kukʼ ri e qachalal (1 Cor. 1:10; 4:6).

6. ¿Jas kqetaʼmaj pa 2 Pedro 3:11-13?

⁶ (Chasikʼij uwach 2 Pedro 3:11-13). Ri apóstol Pedro kubʼij chqe che rajawaxik kkʼojiʼ jun utz qachomanik are chiʼ kqanikʼoj profecías. Xubʼij: «Chiwaneʼj iwibʼ che ri upetik ri uqʼij ri Dios». ¿Jasche xubʼij wariʼ? Xa ta rumal che kqaj kqetaʼmaj jachike hora y qʼij kpe ri Armagedón, xaneʼ kqaj kqetaʼmaj rech utz kqabʼan che ukojik ri qatiempo rech kojbʼin «pa jun tastalik […] kʼaslemal xuqujeʼ [koj]niman che ri Dios» (Mat. 24:36; Luc. 12:40). Kraj kubʼij che kqakoj qachuqʼabʼ che ukʼexik ri qabʼantajik y che kojniman che ri Jehová rumal che kqaloqʼoqʼej. Are kʼu rech kojkunik kqabʼan wariʼ rajawaxik kqachajij qibʼ chuwach nikʼaj chi jastaq.

7. ¿Jas rajawaxik kqabʼano rech kqachajij qibʼ? (Lucas 21:34).

⁷ Ri Jesús xaq xiw ta xubʼij chke ri utijoxelabʼ che rajawaxik kkil ri tajin kkʼulmataj cho ri uwach Ulew, xaneʼ xuqujeʼ xubʼij che rajawaxik kkichajij kibʼ. Rumal laʼ, xubʼij wariʼ pa Lucas 21:34 (chasikʼij  uwach): «Chichajij iwibʼ». ¿Jas kraj kubʼij ri e tzij riʼ? Che rajawaxik kqachajij qibʼ chuwach apachike jastaq che kubʼan kʼax che ri qachilanik rukʼ ri Jehová, rech je wariʼ kuya ta kan qaloqʼoqʼexik (Prov. 22:3; Jud. 20, 21).

8. ¿Jas xubʼij ri apóstol Pablo chke ri cristianos?

⁸ Ri apóstol Pablo xubʼij chke ri cristianos che rajawaxik kkichajij kibʼ. Jun kʼutbʼal, xubʼij wariʼ chke ri cristianos re Éfeso: «Qas chiwilaʼ na jas ri kibʼano. Mibʼan iwe jas ri man kʼo ta kinoʼj, xaneʼ chibʼanaʼ iwe jas ri kʼo kinoʼj» (Efes. 5:15, 16). Ri Satanás kutzukuj ri kubʼano rech kuqasaj uchuqʼabʼ ri qakojonik. Rumal laʼ, ri Biblia kubʼij chqe che rajawaxik kqachʼobʼo «jas ri urayibʼal ri Dios» rech kqakochʼ ronojel ri kʼax che kuya pa qabʼe (Efes. 5:17).

9. ¿Jas kqabʼan che retaʼmaxik ri kraj ri Jehová kqabʼano?

⁹ Ri Biblia kubʼij ta ronojel ri kubʼan kʼax che ri qachilanik rukʼ ri Jehová. Ronojel taq qʼij rajawaxik kqachaʼ ubʼanik jastaq che weneʼ kʼo ta jun taqanik pa ri Biblia che kojutoʼo che uchʼobʼik jas ri kqabʼano, are kʼu rech utz kqabʼan che uchaʼik ri kqabʼano rajawaxik kqachʼobʼo «jas ri urayibʼal ri Dios». ¿Jas kqabʼan che uchʼobʼik ri kqaj chuwach? Rajawaxik kqanikʼoj y kojchoman chrij ri kqasikʼij uwach pa ri Biblia. We qetaʼm chik jas ri kraj ri Dios che kqabʼano y kqakoj qachuqʼabʼ rech kqariq «ri chomanik re ri Cristo», kʼax ta kqabʼan riʼ che uchaʼik ri kqaj kqabʼano paneʼ kʼo ta jun taqanik re ri Biblia che kchʼaw chrij (1 Cor. 2:14-16). Jujun taq mul aninaq kqachʼobʼ jun jastaq che utz taj kqabʼano, are kʼu e kʼo nikʼaj chik che kqil taj kojqaj chupam.

10. ¿Jas jastaq y bʼantajik rajawaxik keqaxutuj?

¹⁰ Rajawaxik kqaxutuj ri e jastaq riʼ: ri utzujuxik ibʼ che jun winaq (coquetear), ri qʼabʼarik, utijik kʼi jastaq, ubʼixik itzel taq tzij, ubʼanik etzʼanem che kʼo chʼoj o kamisanik chupam y rilik tzʼil taq wachbʼal (Sal. 101:3). Ri Itzel kutzukuj kubʼano rech kubʼan kʼax che ri qachilanik rukʼ ri Jehová (1 Ped. 5:8). We kqachajij ta qibʼ, ri Satanás kkunik kukoj pa qanimaʼ y pa qachomanik itzel taq bʼantajik, junam rukʼ ri ubʼanik nimal, elaqʼ, molom tzij, titikil (kʼax kqanaʼ che jun chik), oyowal y urayixik jastaq ke e nikʼaj chik (Gál. 5:19-21). Weneʼ kqachomaj che kʼo ta kubʼano kqanaʼ wariʼ. Are kʼu we aninaq taj kqesaj ri e itzel taq bʼantajik, nojimal nojimal kubʼan kʼax, junam rukʼ ri kubʼan jun itzel qʼayes che ri tikoʼn (Sant. 1:14, 15).

11. ¿Jas jun kʼax kqariqo we kqachajij ta qibʼ?

¹¹ Chanim riʼ chojchoman chrij jun kʼax che qas ta kqʼalajinik: ri itzel taq achilanik. Chqachomajampeʼ che kqaj che jun qachiʼl pa ri chak utz kchʼaw chkij ri testigos rech Jehová, rumal laʼ oj utz rukʼ, kojtzijon rukʼ, kqabʼan toqʼobʼ che y weneʼ jujun taq mul junam kojwaʼik. Are kʼu nojimal nojimal kkʼaman chqe che junam kojwaʼik, ri areʼ amaqʼel kchʼaw chrij tzʼil taq jastaq y ri oj utz ta kqato rumal laʼ kqakʼexlaʼ ri tzijonem. Are kʼu weneʼ are chiʼ kqʼax ri tiempo xaq kqatatabʼej chi ri kubʼij y junam chi ri qachomanik rukʼ. Qastzij che ri oj testigos rech Jehová nim keqil wi ri e winaq, are kʼu kqaya ta bʼe che junam kojchoman kukʼ (1 Cor. 15:33). We kqabʼan ri xubʼij ri Jesús chqe y kqachajij qibʼ, kojkʼojiʼ ta riʼ kukʼ winaq che  keniman ta che ri Jehová (2 Cor. 6:15). Xuqujeʼ kqachʼobʼ riʼ jas jastaq kubʼan kʼax chqe y kqaxutuj.

12. ¿La xaq xetʼuyiʼ ri utijoxelabʼ ri Jesús che reyexik jampaʼ ksachisax uwach ri tinamit Jerusalén?

¹² ¿La xaq xetʼuyiʼ ri utijoxelabʼ ri Jesús che reyexik jampaʼ ksachisax uwach ri tinamit Jerusalén? Je taj, rumal che ri Jesús xubʼij chke che kkitzijoj ri utzalaj tzij «pa Jerusalén pa ronojel ri ulew re Judea xuqujeʼ pa Samaria, xuqujeʼ kʼu pa taq ri tinamit ri sibʼalaj naj e kʼo wi cho ronojel ri uwach Ulew» (Hech. 1:6-8). ¡Sibʼalaj nim chak xyaʼ chke ri tijoxelabʼ! Are kʼu we kkibʼano, utz riʼ kkibʼan che ukojik ri kitiempo.

13. Junam rukʼ ri kubʼij pa Colosenses 4:5, ¿jasche rajawaxik utz kqabʼan che ukojik ri qatiempo?

¹³ (Chasikʼij uwach Colosenses 4:5). Rajawaxik kqilo jawiʼ kqakoj wi ri qatiempo. Rumal che junam rukʼ ri kubʼij pa Eclesiastés 9:11, qonojel «xaq kʼateʼtal [kqa]taqlebʼej» jun kʼax o kojkamik.

14, 15. ¿Jas rajawaxik kqabʼano rech utz kqabʼan che ukojik ri qatiempo? (Hebreos 6:11, 12; xuqujeʼ chawilaʼ ri wachbʼal).

¹⁴ Ri más utz kqabʼan che ukojik ri  qatiempo are ubʼanik ri kraj ri Jehová y ukowirisaxik ri qachilanik rukʼ (Juan 14:21). Xuqujeʼ utz che kqabʼan pa qakʼaslemal wajun pixabʼ riʼ: «Qas ko chixtakʼaloq, man kʼo ta kixslabʼsanik. Amaqʼel chixok il che ri uchak ri Ajawaxel» (1 Cor. 15:58). We je kqabʼano, kojbʼison ta riʼ are chiʼ kpe ri kʼisbʼal re ri itzelal o are chiʼ kojkamik rumal che xqakoj ronojel ri qatiempo che upatanexik ri Jehová (Mat. 24:13; Rom. 14:8).

¹⁵ Ri Jesús xubʼij kan chke ri utijoxelabʼ che kukʼam kibʼe are chiʼ kkitzijoj ri utzij ri Dios pa ronojel ri uwach Ulew. Rumal ri utinamit ri Jehová, kimik ri Jesús tajin kojutijoj rech kqetaʼmaj ri kqabʼan che utzijoxik ri utzij ri Dios xuqujeʼ uyaʼom ri chakubʼal che kajwataj chqe (Mat. 28:18-20). Ri rajawaxik kqabʼano are che kqaya ta kan utzijoxik ri utzij ri Dios rech kojkʼaskʼatik kʼa are chiʼ kopan ri tiempo che ri Jehová kusachisaj uwach ri itzelal. We kqabʼan ri kubʼij pa Hebreos 6:11, 12 (chasikʼij uwach), kojutoʼ rech kqakubʼsaj qakʼuʼx chrij ri utzujum ri Jehová chqe.

16. ¿Jas ri qas kqaj kqabʼano?

¹⁶ Ri Jehová uchʼikom chi jun fecha rech kusachisaj uwach ri itzelal che kʼo pa ri uwach Ulew. Y are chiʼ kopan ri qʼij riʼ ketzʼaqat ronojel ri profecías che e kʼo pa ri Biblia. Paneʼ kqachomaj che tajin kbʼeyetaj ri uqʼij ri Jehová, are kʼu qas qetaʼm che «kopan kʼu na [pa] ri qʼijol ri rajawaxik» (Hab. 2:3). Rumal laʼ, kqaj kqabʼan ri kubʼij Miqueas 7:7: «Kineyem na che ri Ajawaxel; kinkoj na ri weyebʼal kʼuxaj chrij ri Dios ri nuKolonel».