PA RI miércoles 18 re enero 2023, xyaʼ jun anuncio che nim ubʼanik pa jw.org: ri e qachalal Gage Fleegle y Jeffrey Winder e jun chi chkixoʼl ri Jupuq Ajkʼamal bʼe cho ronojel uwach Ulew kech ri testigos rech Jehová. Ri kebʼ qachalal riʼ pa kʼi taq junabʼ tajin kkipatanij ri Jehová.

Ri qachalal Fleegle xkʼiy pa ri oeste re Pensilvania (Estados Unidos). Ri unan utat xkikʼut chuwach chrij ri Jehová. Are chiʼ kʼa ala na, xebʼe pa jun alaj tinamit ri kajwataj wi utzijoxik ri utzij ri Dios. Xubʼan uqasanjaʼ pa ri 20 re noviembre 1988.

Ri unan utat amaqʼel xkibʼij che che utz we kupatanij ri Jehová pa tiempo completo. Amaqʼel kekibʼan invitar ri solinel re circuito y betelitas, je wariʼ xrilo che ri qachalal riʼ sibʼalaj kekikot che upatanixik ri Jehová. Pa ri 1 re septiembre 1989, are chiʼ majaʼ naj ubʼanom ri uqasanjaʼ, xumajij ri precursorado regular. Y qʼaxinaq chi kebʼ junabʼ xkun che ubʼanik jun meta che uchomam lo ubʼanik are chiʼ kʼateʼ 12 ujunabʼ: che kpatanin pa Betel. Xumajij ri uchak pa Betel re Brooklyn pa octubre 1991.

Ocho junabʼ xchakun chilaʼ pa ri taller de encuadernación, tekʼuriʼ xtaq chi bʼi pa ri Departamento de Servicio. Pa ri tiempo riʼ, xuya ri utobʼanik pa jujun taq junabʼ pa ri congregación re ri chʼabʼal ruso. Pa ri junabʼ 2006 xkʼuliʼ rukʼ Nadia y e kebʼ e kʼo pa Betel. Xkiya ri kitobʼanik pa jun congregación portuguesa y más che 10 junabʼ xkiya ri kitobʼanik pa jun congregación español. Are chiʼ kʼi chi junabʼ che ri qachalal Fleegle tajin kchakun pa ri Departamento de Servicio, xtaq chi bʼi pa ri Oficina re ri Comité de Enseñanza tekʼuriʼ xtzalij chi pa ri Oficina re ri Comité de Servicio. Pa ri marzo 2022 xyaʼ ubʼixik che ktobʼan pa ri Comité  de Servicio re ri Jupuq Ajkʼamal bʼe cho ronojel uwach Ulew.

Ri qachalal Winder xkʼiy pa Murrieta (California). Ri unan utat —che e Testigos— xkikʼut ri qastzij chuwach y xubʼan ri uqasanjaʼ pa ri 29 re marzo 1986. Kʼateʼ qʼaxinaq jun ikʼ che ubʼanom ri uqasanjaʼ xumajij ri precursorado auxiliar, sibʼalaj utz xrilo che uyaʼom ta kan ubʼanik. Pa ri 1 re octubre 1986, kʼateʼ qʼaxinaq kebʼ oxibʼ ik, xumajij ri precursorado regular.

Are chiʼ ri qachalal Winder kʼa ala na xbʼe che kisolixik kebʼ rachalal che e nabʼeʼal chuwach y che tajin kepatanin pa Betel. Wariʼ xubʼano che kraj kunojisaj ri solicitud are chiʼ ktzʼaqat ujunabʼ. Y pa mayo 1990 xsikʼix pa Betel re Wallkill.

Chilaʼ xubʼan jalajoj taq chak, xkʼojiʼ pa ri Departamento de Limpieza, xkʼojiʼ pa ri Departamento de la Hacienda y ri Oficina re Betel. Pa ri junabʼ 1997 xkʼuliʼ rukʼ Angela y e kebʼ tajin kepatanin pa Betel. Pa ri junabʼ 2014 xebʼe pa Warwick, chilaʼ ri qachalal Winder xtobʼan pa ri construcción re ri central mundial. Pa ri junabʼ 2016 xebʼe pa Patterson, pa ri Centro Educativo re ri Watchtower y chilaʼ ri qachalal Winder xchakun pa ri Servicios de Audio y Video. Are chiʼ qʼaxinaq chi kajibʼ junabʼ xetzalij pa Warwick y ri qachalal Winder xchakun pa ri Oficina re ri Comité de Personal. Pa marzo re ri junabʼ 2022 xyaʼ ubʼixik che ktobʼan pa ri Comité de Personal re ri Jupuq Ajkʼamal bʼe cho ronojel uwach Ulew.

Ri kebʼ achijabʼ riʼ e jun sipanik che ri Jehová uyaʼom chqe (Efes. 4:8). Kqataʼ che ri Jehová che keʼutewchiʼj rumal ri nimalaj chak che tajin kkibʼan rumal rech ri uQʼatbʼal tzij ri Dios.