KʼUTUNEM 6
BʼIXONEM 18 Maltyoxinik che ri tojbʼal mak
¿Jasche kqamaltyoxij ri kuybʼal mak che kuya ri Jehová?
«Ri Dios xeʼuloqʼoqʼej ri winaq xuya ri Ukʼojol ri xa jun kʼolik» (JUAN 3:16).
KYAʼ UBʼIXIK
Retaʼmaxik más chrij ri kubʼan ri Jehová che ukuyik qamak kojutoʼo rech nim kqil wi ri kuybʼal mak.
1, 2. ¿Jasche (o suche) kqabʼij che ri qakʼaslemal kjunamataj rukʼ ri ukʼaslemal ri ala che xojchʼaw chrij pa ri párrafo 1?
CHATCHOMAN chrij jun ala che ri utat unan sibʼalaj e qʼinomabʼ. Pero jun qʼij xopan jun noticia rukʼ: ri utat unan xkiriq jun accidente y xekamik. Y xaq xiw ta wariʼ. Xaneʼ xuqujeʼ utz ta xkibʼan che ukojik ri pwaq y kʼo jun nimalaj kikʼas. Rumal laʼ xrechbʼej ta ri pwaq, xaneʼ jun nimalaj kʼasaj. Y tajin kbʼix che che rajawaxik kutojo. Pero sibʼalaj nim ri kʼasaj y ri areʼ kkun ta che utojik.
2 Ri oj winaq je tajin kqakʼulmaj. Ri Adán y Eva e tzʼaqat y xekʼojiʼ pa jun jeʼlikalaj uwach Ulew (Gén. 1:27; 2:7-9). Xekun ta riʼ xkiriq jun utzalaj kʼaslemal rukʼ kikotemal. Are kʼu juntir xkʼextajik, xyaʼ ta chi ri kʼaslemal kʼo ta ukʼisik chke y xsach uwach ri utzalaj kikʼolbʼal. ¿Jas xkiya kan chke ri kalkʼwal? Ri Biblia kubʼij: «Je kʼu riʼ, xa rumal jun winaq [Adán] xok ri makaj cho ri uwach Ulew xukʼam kʼu uloq ri kamikal, xqʼax kʼu ri kamikal chke konojel, konojel kʼut e makuninaq» (Rom. 5:12). Ri xuya kan ri Adán chqe are ri makaj che kojukʼam bʼi pa kamikal, ri mak che xqechbʼej kanoq jetaneʼ are jun nimalaj kʼasaj che kʼo ta nijun kkunik kutojo (Sal. 49:8).
3. ¿Jasche kqabʼij che ri makaj kjunamataj rukʼ jun kʼasaj?
3 Ri Jesús xujunamaj ri makaj rukʼ jun kʼasaj (Mat. 6:12, nota). Are chiʼ kojmakunik, kkʼojiʼ jun nimalaj qakʼas rukʼ ri Jehová y rumal laʼ rajawaxik kqatojo. We ta ma ta kʼo xubʼan ri Jehová rech ksach ri qakʼas, xaq xiw kojkun riʼ kqatojo are chiʼ kojkamik (Rom. 6:7, 23).
4. a) ¿Jas kqakʼulmaj riʼ we ta ma ta kʼo kojtoʼwik? (Salmo 49:7-9). b) ¿Jas kraj kubʼij ri tzij makaj pa ri Biblia? (Chawilaʼ ri recuadro « Makaj»).
4 Oj kojkun taj qatukel kqariq chi jumul ri xkisach uwach ri Adán y Eva (chasikʼij Salmo 49:7-9). We ta ma ta xojutoʼ ri Jehová, kojkun ta riʼ kqariq ri kʼaslemal kʼo ta ukʼisik y kojwalij ta riʼ pa ri kamikal. Kojkam riʼ junam kukʼ ri chikop (Ecl. 3:19; 2 Ped. 2:12).
5. ¿Jas ubʼanom ri Jehová rech kojutoʼ che utojik ri qakʼas? (Xuqujeʼ chawilaʼ ri wachbʼal ).
5 Chojchoman chi jumul chrij ri ala che xojchʼaw chrij pa ri párrafo 1. ¿Jas kunaʼ riʼ we jun qʼinom achi kubʼij che kutoj ronojel ri ukʼas? Qastzij riʼ che kumaltyoxij y kukʼam wajun nim sipanik. Junam kubʼan ri Jehová, ri Qatat sibʼalaj kojraj rumal laʼ xuya jun sipanik chqe rech kukuy ri qamak che xqechbʼej kan che ri Adán. Ri Jesús xubʼij jas kraj kubʼij wajun sipanik riʼ: «Ri Dios sibʼalaj keʼuloqʼoqʼej ri winaq cho ri uwach ulew, xuya kʼut ri uKʼojol, ri xa jun kʼolik, rech konojel ri kekojon che, man ksach ta kiwach, xaneʼ kkʼojiʼ na junalik kikʼaslemal» (Juan 3:16). Wajun sipanik riʼ kojutoʼo rech kʼo jun utzalaj qachilanik rukʼ ri Jehová.
Ri Jesús xchʼaw chrij ri kuybʼal mak che kuya ri Jehová rumal ri tojbʼal mak. (Juan 3:16) Tekʼuriʼ ri areʼ rukʼ ronojel ranimaʼ xuya ri ukʼaslemal che tojbʼal mak (Chawilaʼ ri párrafo 5)
6. ¿Jas kqil na pa wajun kʼutunem riʼ y jasche?
6 ¿Jas utzilal kqariq rumal wajun sipanik riʼ y jasche kkuyutaj ri qamak rumal? Rech kqetaʼmaj ri u respuesta, pa wajun kʼutunem riʼ kqil na ri kraj kubʼij ri e tzij riʼ: Ri kraj ri Jehová, ri xubʼano, ri xutojbʼej wi y ri utzilal. Uchʼobʼik wariʼ kojutoʼo rech kqamaltyoxij ronojel ri ubʼanom ri Jehová che ukuyik ri qamak.
RI JEHOVÁ KRAJ KOJUTZIR RUKʼ
7. a) ¿Jas xyaʼ ta chi chke ri Adán y Eva? b) ¿Jas kajwataj chqe ri oj kalkʼwal ri Adán y Eva? (Romanos 5:10, 11).
7 Ri Adán y Eva xekun ta chik xekʼasik xuqujeʼ xsach uwach ri kachilanik rukʼ ri Jehová, ri Kitat. Are chiʼ majaʼ kemakunik e kʼo pa ri u familia ri Dios (Luc. 3:38). Are kʼu are chiʼ xemakun chuwach ri Jehová ri areʼ xeresaj bʼi pa ri u familia. Xkʼulmataj wariʼ are chiʼ majaʼ kkʼojiʼ kalkʼwal (Gén. 3:23, 24; 4:1). Rumal laʼ ri oj kalkʼwal rajawaxik kojutzir rukʼ ri Jehová (chasikʼij Romanos 5:10, 11). Rajawaxik kʼo kbʼanik rech kojux chi ramigos ri Dios. Jun wuj kubʼij che ri tzij kojutzir pa ri chʼabʼal griega jetaneʼ kubʼij che jun kʼulel «kubʼan qamigo». Sibʼalaj mayibʼal rumal che are ri Jehová xbʼanow ronojel rech kojutzir rukʼ. ¿Jas xubʼan che ubʼanik?
RI XUBʼAN RI JEHOVÁ RECH KAKUYUTAJ QAMAK
8. ¿Jas xuya ri Jehová y jas utzilal kqariq rumal wariʼ?
8 Ri Jehová xutzukuj ri xubʼano rech kojkunik kqabʼan ramigo paneʼ oj ajmakibʼ. Xrilo ri xubʼano rech kuya ri kʼaslemal che xutzaq ri Adán. ¿Jas xubʼan che? Xuya jun tzʼaqat kʼaslemal junam rukʼ rech ri Adán nabʼe kanoq, Romanos 3:25 kubʼij: «Ri Dios xuya ri Jesucristo che kojol utzil chkixoʼl ri winaq rukʼ areʼ. Kakiriq we utzil riʼ we kekojon che ri Cristo, ri xturuw ri ukikʼel rumal qech. Xkʼulmataj waʼ che uqʼalajisanik chi ri Dios are sukʼ are taq xeʼukuy ri mak ri kibʼanom uloq ri winaq, man xenaʼtaj ta chi che». Rumal ri xubʼan ri Dios oj kojkunik kojutzir rukʼ ri areʼ y kkʼojiʼ jun utz achilanik chqaxoʼl.
9. ¿Jas taqanik xuya ri Jehová rech ri israelitas kkuyutaj ri kimak?
9 Pa taq ri kiqʼij ri israelitas, ri Jehová xuya taqanik che kkibʼan ri qʼij re kuybʼal mak o Día de expiación y jeriʼ kkuyutaj ri kimak y kkʼojiʼ jun utz achilanik chkixoʼl rukʼ ri Jehová. Wariʼ jumul pa jun junabʼ kbʼanik, ri kinimal ri sacerdotes keʼuya chikop che sacrificios rech kkuyutaj ri umak ri tinamit. Ri sacrificios riʼ che kbʼanik kuchup ta ronojel ri kimak ri israelitas rumal che ri kikʼaslemal ri chikop junam ta rukʼ ri kikʼaslemal ri winaq. Paneʼ je wariʼ ri Jehová xukuy ri kimak ri israelitas we qas kkikʼutu che kkikʼex ri kikʼaslemal y kkiya ri sacrificios junam rukʼ ri ubʼim kanoq (Heb. 10:1-4). Ri sacrificios che kkiya pa ri Día de expiación kunaʼtasaj chke che e ajmakibʼ y che rajawaxik jun tojbʼal che más nim ubʼanik chuwach ri tajin kkiyaʼo, jun che kuchup ronojel ri kimak.
10. ¿Jas xuya ri Jehová rech kkuyutaj ri qamak?
10 ¿Jas xubʼan ri Jehová rech kkuyutaj ri qamak? Xuya ri ukʼojol rech «xa jumul xyaʼ che tabʼal toqʼobʼ che resaxik ri kimak ri e kʼi» (Heb. 9:28). Ri Jesús xuya «ri ukʼaslemal che kitorik kʼiʼalaj winaq» (Mat. 20:28). ¿Y jas riʼ ri tojbʼal mak?
RI XUTOJBʼEJ WI RI JEHOVÁ RI QAMAK
11. a) ¿Jas kubʼij ri Biblia chrij ri tojbʼal? b) ¿Jas ubʼanik riʼ ri kʼaslemal che kkunik kutoj ri qamak?
11 Ri Biblia kchʼaw chrij ri tojbʼal che xuya ri Jehová rech kkuyutaj ri qamak y kojutzir chi jumul rukʼ. a Chuwach ri Jehová rajawaxik wajun tojbʼal mak riʼ rech kuya ri kʼaslemal kʼo ta ukʼisik chqe. Chnaʼtaj chqe che are waʼ ri xkitzaq ri Adán y Eva, rumal laʼ ri tojbʼal rajawaxik junam rukʼ ri xutzaq ri Adán (1 Tim. 2:6). Rajawaxik jun winaq che kʼo jun tzʼaqat ukʼaslemal, che amaqʼel kakʼasiʼ cho ri uwach Ulew y che kraj kuya ri kʼaslemal pa qawiʼ. Jeriʼ ktojtaj ri qakʼas y kojkunik kqariq ri kʼaslemal kʼo ta ukʼisik.
12. ¿Jasche xkun ri Jesús xutoj ri qamak?
12 Chqilaʼ oxibʼ rumal che ri Jesús xkunik xutoj ri qamak: 1) tzʼaqat ri ukʼaslemal, «man kʼo ta mak xubʼano», 2) rumal wariʼ kkunik amaqʼel kkʼasik y 3) xraj xuya ri ukʼaslemal pa qawiʼ (1 Ped. 2:22; Heb. 10:9, 10). Ri Jesús xkʼojiʼ jun tzʼaqat ukʼaslemal junam rukʼ ri ukʼaslemal ri Adán are chiʼ majaʼ kmakunik (1 Cor. 15:45). Rukʼ ri ukamikal xkunik xuya ri ukʼaslemal chukʼexwach ri kʼaslemal che xusach ri Adán (Rom. 5:19). Rumal laʼ ri Jesús xux «ri kʼisbʼal Adán». Rajawaxik ta chik jun kʼaslemal rech kutoj ri kʼaslemal che xusachisaj uwach ri Adán. Ri Jesús xkamik «xa kʼu jumul chbʼe qʼij saq» (Heb. 7:27; 10:12).
13. ¿Jas xubʼan ri Jehová rech kkuyutaj ri qamak y kojkunik kojutzir rukʼ?
13 Qilom chik che ri Jehová xutzukuj ri xubʼano rech jetaneʼ xjaqataj jun bʼe rech kkuyutaj ri qamak y kojutzir rukʼ. Jeriʼ kkʼojiʼ jun utz achilanik chqaxoʼl. Are kʼu rajawaxik kyaʼ ri tojbʼal mak y xtojtaj ri qamak are chiʼ ri Jesús xuya ri tzʼaqatalaj ukʼaslemal pa qawiʼ (Efes. 1:7; Heb. 9:14). ¿Jas utzilal kqariq rumal wariʼ? Chqilampeʼ.
RI UTZILAL KQARIQO RUMAL CHE KKUY RI QAMAK
14. ¿Jas chrij kojtzijon wi na y jasche nim ubʼanik?
14 ¿Jas utzilal kqariqo rumal che ri Jehová xukuy qamak? Rech kqatzalij uwach wajun pregunta riʼ kqil na ri kraj kubʼij kebʼ tzij che kʼo pa ri Biblia che kojutoʼ che uchʼobʼik ri utzilal kqariqo rumal che ri Jehová xukuy ri qamak.
15, 16. a) ¿Jas utzilal qariqom rumal ri tojbʼal mak? b) ¿Jas kqanaʼo are chiʼ kqachʼobʼo che kuya kojesax chuxeʼ ri makaj y ri kamikal?
15 Ri Biblia kubʼij che rumal ri tojbʼal mak xojkunik xojel chuxeʼ ri makaj. Ri apóstol Pablo xubʼij wariʼ: «Ri Jesucristo xuya ri ukʼaslemal rumal qech, che qesaxik pa uqʼabʼ ronojel etzelal» (Tito 2:14).
16 Rumal ri xubʼan ri Jesús kojkunik kojesax chuxeʼ ri makaj y ri kamikal che sibʼalaj uyaʼom kʼax chqe (Rom. 5:21). Rumal laʼ sibʼalaj kqamaltyoxij ri xkibʼan ri Jehová y ri Jesús rech xojel chuxeʼ ri makaj (1 Cor. 15:22).
17, 18. a) ¿Jas kraj kubʼij che kojux sukʼ chuwach ri Jehová? b) ¿Jas utzilal kqariq rumal wariʼ?
17 Ri Biblia kubʼij, che chuwach ri Jehová kuya kojux sukʼ taq winaq. Wariʼ kraj kubʼij che rajawaxik taj che oj kojtojow ri qamak, are kʼu kraj ta kubʼij che ma ta kʼo upatan ri taqanik che uyaʼom ri Jehová. Rumal laʼ ri Jehová kubʼij taj che oj sukʼ rumal che taqal chqe o che utz kril ri qamak. Pero ri Jehová kraj kukuy ri qamak rumal che kqakubʼsaj qakʼuʼx chrij ri xkibʼan rukʼ ri Jesús che utojik (Rom. 3:24; Gál. 2:16).
18 ¿Jas utzilal kqariqo rumal che kojux sukʼ chuwach ri Jehová? Jujun chke ri cristianos e chaʼom rech kkiqʼat tzij rukʼ ri Jesús pa ri kaj y kbʼix ralkʼwal ri Dios chke (Tito 3:7; 1 Juan 3:1). Sachom ri kimak; jetaneʼ kʼo ta jumul xemakunik. Rumal laʼ kuyaʼ kkiqʼat tzij pa ri Uqʼatbʼal tzij ri Dios (Rom. 8:1, 2, 30). Jujun chik kyaʼ na ri kʼaslemal kʼo ta ukʼisik chke cho ri uwach Ulew y kkibʼan ramigos ri Dios. Y sachom ri kimak (Sant. 2:21-23). Ri e kʼi winaq che kekam ta pa ri Armagedón kkiriq na ri kʼaslemal kʼo ta ukʼisik (Juan 11:26). Ri e «utz» y ri e «lawalo» kekʼastaj na loq (Hech. 24:15; Juan 5:28, 29). Are chiʼ kqʼax ri tiempo konojel ri sukʼ taq upatanelabʼ ri Jehová che kekʼojiʼ na cho ri uwach Ulew kkibʼan na «e ralkʼwal ri Dios, kʼo pa ri juluwemalaj kitzoqopitajik» (Rom. 8:21). Xqetaʼmaj che rumal ri xubʼan ri Jehová kojkunik kojutzir rukʼ. ¡Are jun nimalaj tewchibʼal!
19. ¿Jas utzilal kqariq rumal ri xkibʼan ri Jehová y ri Jesús pa qawiʼ? (Xuqujeʼ chawilaʼ ri recuadro « Ri kuybʼal mak che xuya ri Jehová»).
19 Sibʼalaj bʼisobʼal ri kojriqitaj wi, junam rukʼ ri ala che xojchʼaw kan chrij pa ri nabʼe párrafo che xkanaj kan pa jun nimalaj kʼasaj rumal ri xkibʼan ri unan utat. Pero ri Jehová xojutoʼo, xuya ri Ukʼojol che utojik ri qamak, je wariʼ xtojtaj ri qakʼas. We kqakubʼsaj qakʼuʼx chrij ri xubʼan ri Jesús, kubʼano che kojesax chuxeʼ ri makaj y ri kamikal, jetaneʼ kʼo ta jumul xojmakunik. Pero ri más nim ubʼanik are che kkʼojiʼ jun utz achilanik chqaxoʼl rukʼ ri Jehová, ri loqʼalaj Qatat.
20. ¿Jas kqil na pa ri jun chi kʼutunem?
20 Sibʼalaj kojmaltyoxin chke ri Jehová y ri Jesús are chiʼ kojchoman chrij ronojel ri kibʼanom pa qawiʼ (2 Cor. 5:15). Kʼo ta kojesan riʼ chuxeʼ ri makaj we ta ma ta xojkitoʼo. Pa ri jun chi kʼutunem kqil na jujun kʼutbʼal, che kubʼan ri Jehová che ukuyik qamak chqajujunal.
BʼIXONEM 10 ¡Chqayaʼ uqʼij ri qaTat Jehová!
a Pa jujun taq chʼabʼal ri tzij tojbʼal kraj kubʼij ri «rajil jun kʼaslemal» o «ri pwaq che kyaʼik».
