¿LA AWILOM che ri kkaj ri winaq are che nim keʼil wi? Y rumal laʼ, kkaj che kyaʼ nim eqeleʼn chke. Paneʼ nim keʼil wi are kʼu kkaj kyaʼ más kiqʼij. Pero kqamay ta wariʼ rumal che ri Biblia ubʼim chi kanoq che pa ri kʼisbʼal taq qʼij ri winaq xaq xiw kechoman chkij y kemaltyoxin taj (2 Tim. 3:2).

Amaqʼel e kʼolinaq winaq che xaq xiw kechoman chrij ri kajwataj chke. Ri Adán y Eva xkichomaj che kekunik kkichaʼ ri utz y ri utz taj, rumal laʼ qonojel tajin kqariq kʼax rumal ri xkichaʼ ubʼanik. Qʼaxinaq chi kʼi junabʼ, ri rey Uzías xuchomaj che kkunik kuya ri incienso pa ri templo paneʼ yaʼtal ta che kubʼano (2 Crón. 26:18, 19). Xuqujeʼ ri fariseos y ri saduceos xkichomaj che rajawaxik nim keʼil wi rumal ri Dios rumal che e ralkʼwal ri Abrahán (Mat. 3:9).

Rumal che oj kʼo chkixoʼl winaq che xaq xiw kechoman chkij y nim kkibʼan che kibʼ, weneʼ kubʼano che kqabʼan qe ri kkibʼan e areʼ (Gál. 5:26). Weneʼ kqamajij uchomaxik che rajawaxik nim kojil wi o che taqal jun eqeleʼn chqe. ¿Jas kqabʼano rech je ta kqachomaj oj? Ri nabʼe che kqabʼano are che kqetaʼmaj ri kuchomaj ri Jehová chrij wariʼ. Chqilampeʼ jas kubʼij ri Biblia.

 Are ri Jehová ri kyaʼow jujun taq eqeleʼn. Chqilaʼ jujun chke.

• Pa ri familia, ri Jehová kraj che ri ixoqil kubʼan respetar ri rachajil y che ri achajil kuloqʼoqʼej ri rixoqil rukʼ ronojel ranimaʼ (Efes. 5:33). Ri e kʼulanik xaq xiw kkikʼut ri kiloqʼoqʼebʼal chke ri kikʼulaj (1 Cor. 7:3). Ri tat nan yaʼtal chke che nim keʼil wi kumal ri kalkʼwal y che ri alkʼwalaxelabʼ rajawaxik nim keʼil wi y che keloqʼoqʼex kumal ri kitat kinan (2 Cor. 12:14; Efes. 6:2).

• Yaʼtal chke ri kʼamal taq bʼe che nim keqil wi rumal ri nimalaj chak kkibʼano (1 Tes. 5:12). Are kʼu kekun taj y yaʼtal ta chke che xaq kkalawachij o kkitzuʼ ri kkibʼan ri qachalal (1 Ped. 5:2, 3).

• Ri Dios uyaʼom bʼe che ri e qʼatal taq tzij kekunik kkitaʼ che ktoj ri impuestos chke y che nim keʼil wi (Rom. 13:1, 6, 7).

Ri Jehová sibʼalaj kojuloqʼoqʼej rumal laʼ kuya kʼi jastaq chqe. Rumal che oj ajmakibʼ yaʼtal chqe kojkamik (Rom. 6:23). Pero rumal ri uloqʼoqʼebʼal ri Jehová kuya kʼi utz jastaq chqe (Sal. 103:10, 11). Rumal ri uloqʼoqʼebʼal uyaʼom kʼi tewchibʼal y eqeleʼn chqe (Rom. 12:6-8; Efes. 2:8).

Chqachajij qibʼ chuwach ri kichomanik ri winaq. We man kqachajij qibʼ weneʼ kqachomaj che yaʼtal chqe kyaʼ kʼi jastaq chqe. Ri Jesús xubʼij che kʼax ta ubʼanik wariʼ. Ri areʼ xtzijon chrij jun achi che kʼo utikoʼn re uva y xeʼutzukuj jujun taq ajchakibʼ rech kechakun rukʼ y xubʼij chke che jun denario ri kiqʼij kutojo. Xuqujeʼ xeʼutzukuj más ajchakibʼ y e jujun xa jun hora xechakunik. Are chiʼ xok aqʼabʼ xutoj ri kiqʼij ri ajchakibʼ y jun denario xuya chke konojel. Pero ri ajchakibʼ che xechakun ronojel ri qʼij weneʼ xkichomaj che nim na ri kirajil kkichʼako (Mat. 20:1-16). Rukʼ wajun ejemplo riʼ, ri Jesús xukʼut chqawach che rajawaxik kojkikot rukʼ ri uyaʼom ri Jehová chqe.

Kqataʼ ta más, xaneʼ chojmaltyoxinoq (1 Tes. 5:18). Chqabʼanaʼ qe junam rukʼ ri xubʼan ri apóstol Pablo, che paneʼ yaʼtal che che kutaʼ más chke ri qachalal pa Corinto are kʼu  xubʼan taj (1 Cor. 9:11-14). Rumal laʼ kqataʼ ta más xaneʼ chqamaltyoxij ronojel ri kyaʼ chqe.

Kqabʼan ta nim che qibʼ. Are chiʼ jun kuchomaj che nim ubʼanik, weneʼ kuchomaj che yaʼtal che kyaʼ más jastaq che, are kʼu wajun chomanik riʼ xa junam rukʼ jun veneno. Rumal laʼ, we kqabʼan ta nim che qibʼ kojutoʼo rech kqachomaj taj che yaʼtalik kyaʼ kʼi jastaq chqe.

Ri profeta Daniel are jun utz ejemplo, rumal che xubʼan ta nim che ribʼ. Ri areʼ petinaq pa jun utzalaj familia, utz kkaʼyik, kʼo unoʼj y kʼi kkun che ubʼanik. Xkun ta riʼ xuchomaj che taqal ri eqeleʼn xyaʼ che y che nim kil wi (Dan. 1:3, 4, 19, 20). Xaneʼ xumachʼachʼej ribʼ y rumal waʼ ri Jehová nim xril wi (Dan. 2:30; 10:11, 12).

Rumal laʼ chqachajij qibʼ chuwach ri kibʼantajik ri winaq re wajun uwach Ulew riʼ, che nim kkibʼan che kibʼ y che xaq xiw kechoman chbʼil kibʼ. Xaneʼ chojkikot rukʼ ronojel ri tewchibʼal che kuya ri Jehová chqe rumal ri uloqʼoqʼebʼal.