Nabʼe ri e nunan nutat e católicos. Pero, are chiʼ xkil pa ri Biblia che ri ubʼiʼ ri Dios are Jehová, xeʼux testigos rech Jehová. Nabʼe, ri nutat kubʼan wachbʼal rech ri Jesús rukʼ cheʼ, are kʼu xubʼan ta chi wariʼ, xaneʼ xubʼan Ja rech Ajawbʼal rukʼ tzʼalam pa jun cuarto che kʼo chuxeʼ ri qachoch. Are waʼ ri nabʼe Ja rech Ajawbʼal che xbʼan pa San Juan del Monte, pa ri tinamit Manila, ri capital re Filipinas.

Xinalax pa ri junabʼ 1952 y ri nunan nutat xkikʼut chnuwach chrij ri Jehová, junam rukʼ ri xkibʼan kukʼ ri kajibʼ watz y ri oxibʼ wanabʼ che e nabʼeʼal chnuwach. Are chiʼ tajin kinkʼiyik ri nutat kubʼij chwe che rajawaxik kinsikʼij jun capítulo rech ri Biblia ronojel taq qʼij. Xuqujeʼ kunikʼoj wukʼ jujun chke ri e qawuj. Jujun taq mul ri nunan nutat kkiyaʼo che kekanaj kan solinelabʼ y betelitas qukʼ pa ri qachoch. Ri e qachalal riʼ kkitzijoj chqe ri kikʼulmam y wariʼ kuya kikotemal chqe y nim xojutoʼ wi. Rumal laʼ xqachʼobʼo che ri upatanixik ri Jehová are ri más nim ubʼanik.

Kʼi xinwetaʼmaj kukʼ ri nunan nutat rumal che ri areʼ rukʼ ronojel kanimaʼ xkipatanij ri Jehová. Are chiʼ ri nunan xkam rumal jun yabʼil pa ri junabʼ 1971, oj kebʼ rukʼ ri nutat xqamajij ri precursorado. Pa ri junabʼ 1973 are chiʼ 20 nujunabʼ ri nutat xkamik. Sibʼalaj xinbʼisonik, are kʼu ri eyebʼal kʼuxaj che kuya ri Biblia xinutoʼo rech más ta xinbʼisonik y xqaj ta uchuqʼabʼ ri nukojonik (Heb. 6:19). Majaʼ naj kaminaq ri nutat, xinux precursor especial y xintaq bʼi pa ri isla ubʼi Coron, che kʼo pa ri tinamit Palawan.

21 nujunabʼ are chiʼ xinopan pa Coron. Y pa jun nim tinamit xinkʼiy wi, rumal laʼ qas ta utz xinnaʼo are chiʼ xinopan pa jun isla jawiʼ kʼo ta wi luz, jaʼ, carros ni motos. Paneʼ e kʼo jujun qachalal chilaʼ pero xaq nutukel kinel che utzijoxik ri utzij ri Dios. Pa ri nabʼe ikʼ sibʼalaj xinbʼisonik, rumal che kinbʼisoj ri nu familia y ri  wamigos. Ronojel taq chaqʼabʼ kinoqʼik, kinkaʼy chikaj y kenwil ri chʼumil. Y jujun taq mul kwaj kintzalij cho wachoch.

Are taq kinnaʼ wariʼ, rukʼ ronojel wanimaʼ kinbʼan orar che ri Jehová. Kinchoman chrij ri nusikʼim pa ri Biblia y ri kkibʼij ri e qawuj. Y sibʼalaj kinchoman chrij ri kubʼij ri Salmo 19:14, y xinwilo che ri Jehová are «panibʼal xuqujeʼ torol wech» we kinchoman chrij ri utz krilo, junam rukʼ ri jeʼlalaj taq jastaq ubʼanom y ri e ubʼantajik. Kʼo jun kʼutunem rech La Atalaya, ubʼiʼ «Usted nunca está solo», a che sibʼalaj xinutoʼo. Kʼi mul xinsikʼij uwach. Y are waʼ ri tiempo xinkojo rech qas kintzijon rukʼ ri Jehová pa oración, kinnikʼoj ri Biblia y kinchoman chrij ri kinsikʼij. Y sibʼalaj nim xinwil wariʼ

Majaʼ naj inopanaq pa Coron xinux kʼamal bʼe y rumal che xaq nutukel in kʼo chilaʼ, rajawaxik in kinkʼamow bʼe pa ri Kʼutunik rech kqetamaj ubʼixik rutzij ri Ajawaxel, ri Riqbʼal ibʼ rech uchak ri Ajawaxel, ri Etamabʼal chirij ri Loqʼalaj Pixabʼ rech Congregación y ri etaʼmanik re Ri Chajinel. Xuqujeʼ in kinyaʼow ri chʼabʼal chke konojel ronojel taq semanas. Y wariʼ xubʼano che kʼo ta chi tiempo rech kinbʼisonik.

Pa ri tinamit Coron ri winaq utz kkita ri ktzijox chke y are chiʼ xqʼax ri tiempo jujun chke xkibʼan ki bautismo. Pero xinriq jujun taq kʼax. Jujun taq mul rech kinopan pa ri territorio, mediodía kinbʼinik y jujun taq mul wetaʼm taj jawiʼ kinkanaj wi kanoq. Yaʼom kʼi islas che ri congregación rech kubʼan predicar chilaʼ. Rumal laʼ pa lancha kinbʼe wi rech kinopan chilaʼ paneʼ kʼo kaqiqʼ jabʼ tajin kubʼano. ¡Y ri in kinkun taj kinmuxanik! Pero ri Jehová amaqʼel xinuchajij y xinutoʼo. Xinwilo che ri tajin kinkʼulmaj xa tajin kinutijoj chrij ri kinriq na pa ri jun chi tinamit che kintaq wi bʼik.

Pa 1978 xintaq bʼi pa Papúa Nueva Guinea, che kʼo pa ri norte re Australia. Papúa Nueva Guinea are jun tinamit che sibʼalaj juyubʼ upam y kjunamataj ri unimal rukʼ España. Paneʼ xa tres millones winaq e kʼo pa wajun tinamit riʼ, are kʼu más che 800 chʼabʼal ktzijox chilaʼ. Pero e kʼi chke ketzijon pa ri chʼabʼal pidgin re Nueva Guinea, xuqujeʼ kbʼix tok pisin che.

Nabʼe xintaq bʼi pa jun congregación re ri chʼabʼal inglés pa ri capital, Port Moresby. Pero naj ta tiempo xinkʼojiʼ chilaʼ rumal che xinbʼe chi pa jun chi congregación re ri chʼabʼal tok pisin y xinmajij retaʼmaxik ri chʼabʼal. Ri kinwetaʼmaj kinkojo are chiʼ kinbʼan predicar y wariʼ xubʼano che aninaq xinwetaʼmaj ri chʼabʼal. Naj ta tiempo qʼaxinaq, kinkun chik kinya discurso pa ri chʼabʼal tok pisin. Majaʼ kqʼax jun junabʼ inopanaq pa Papúa Nueva Guinea, sibʼalaj xinmay ri xkʼulmatajik: xbʼix chwe che kinok solinel re circuito y che kensolij ri congregaciones re ri chʼabʼal tok pisin che e kʼo pa jalajoj taq tinamit.

Rumal che ri congregaciones naj kixoʼl, kʼi asambleas re circuito xinbʼan organizar, rumal laʼ amaqʼel kinbʼe pa jalajoj taq tinamit. Sibʼalaj xinbʼisonik rumal che kinchʼobʼ ta ri tinamit, ri chʼabʼal che ktzijox chilaʼ ni ri costumbres y xinnaʼo che xaq nutukel in kʼolik. Y rumal che ri tinamit juyubʼ upam, xaq xiw kinkunik pa  avión kinbʼe wi. Jujun taq mul xaq nutukel kinbʼe pa jun riʼj avión. Sibʼalaj kinxeʼj wibʼ kinbʼe pa ri avión, junam rukʼ are chiʼ kinbʼe pa lancha.

Xa e jujun taq winaq kʼo ki teléfono. Rumal wariʼ, xaq cartas kintaq chke ri congregaciones. Kʼi taq mul in nabʼe kinopan chuwach ri cartas che kintaq bʼik, kintaʼ chke ri vecinos jawiʼ e kʼo wi ri testigos rech Jehová. Y are chiʼ kinwil kiwach ri qachalal, sibʼalaj utz kkibʼan che nukʼulaxik y wariʼ kuya nuchuqʼabʼ y knaʼtaj chwe jasche tajin kinbʼan wajun chak riʼ. Sibʼalaj kʼi xubʼan ri Jehová che nutoʼik, wariʼ xubʼan chwe che más xinqebʼ rukʼ.

Pa ri nabʼe riqbʼal ibʼ pa ri isla Bougainville, jun kʼulaj che sibʼalaj kekikotik xkitaʼ chwe: «¿La kachʼobʼ qawach?». Ri in kinchʼobʼ kiwach rumal che xinbʼan predicar chke are chiʼ kʼateʼ xinopan pa Port Moresby, y jun tiempo xinya na etaʼmabʼal re ri Biblia chke, pero jun chiʼ qachalal xuya ri etaʼmanik chke. ¡Y chanim kibʼanom chi ri ki bautismo! Wariʼ are jun chke ri kʼi tewchibʼal xinriq pa ri oxibʼ junabʼ che xinkʼojiʼ pa Papúa Nueva Guinea.

Pa ri 1978 xinya kan ri tinamit re Coron, pero are chiʼ xinkʼojiʼ chilaʼ xinwetaʼmaj uwach jun qachalal ixoq ubʼiʼ Adel che sibʼalaj kupatanij ri Jehová rukʼ chuqʼabʼ y sibʼalaj ajchak. E kʼo kebʼ ral —Samuel y Shirley—, y xaq utukel tajin keʼukʼiyisaj, tajin kuchajij ri unan y xuqujeʼ precursora regular. Pa mayo re 1981 xintzalij chi jumul pa Filipinas rech kinkʼuliʼ rukʼ ri al Adel. Oj kebʼ oj precursores y xqachajij ri qa familia.

Paneʼ kʼo chi nu familia, pa ri 1983 xyaʼ jun eqeleʼn chwe rech kinbʼan precursor especial. Xintaq bʼi pa ri isla re Linapacan, pa ri tinamit re Palawan. Sibʼalaj naj kʼo wi, e kʼo ta Testigos, are kʼu qonojel xojbʼe chilaʼ. Are chiʼ jun junabʼ oj kʼo chi chilaʼ, ri unan ri wixoqil xkamik. Ri xuya qachuqʼabʼ pa wajun nimalaj kʼax riʼ are che xqaya ta kan utzijoxik ri utzij ri Dios. Xqaya etaʼmanik re ri Biblia chke kʼi winaq che xkikoj kichuqʼabʼ che ubʼanik ri kubʼij ri Biblia, are kʼu xqiloʼ che rajawaxik jun Ja rech Ajawbʼal pa wajun isla riʼ. Rumal laʼ, xqabʼan jun Ja rech Ajawbʼal. Are chiʼ qʼaxinaq chi oxibʼ junabʼ ¡sibʼalaj xojkikotik rumal che 110 xeʼopan pa ri Unaʼtabʼalil ri ukamikal ri Jesús! Y are chiʼ xqʼax ri tiempo kʼi chke xkibʼan ki bautismo.

Xintaq bʼi pa Culion pa ri 1986, y pa wajun isla riʼ kʼo jun lugar jawiʼ e kʼo wi ri winaq che e yawabʼ che lepra. Qʼaxinaq ri tiempo, ri wixoqil xyaʼ ri eqeleʼn re ri precursorado especial che. Kqaxiʼj qibʼ kqatzijoj ri utzij ri Dios chke ri winaq rumal che kʼax ubʼanom ri kibʼaqil rumal ri lepra. Pero ri e qachalal che e kʼo pa ri lugar xkibʼij chqe che ri kiriqom lepra tajin kekunaxik rumal laʼ kojkitʼiq ta che ri kiyabʼ. Jujun chke keʼopan pa ri riqbʼal ibʼ che kbʼan pa ri rachoch jun qachalal. Are chiʼ xqʼax ri tiempo xukʼam qawach chilaʼ y sibʼalaj xojkikotik rumal che xeqatoʼ ri winaq are chiʼ xqatzijoj ri utzij ri Dios chke rumal che sibʼalaj kebʼisonik che kexutux kumal ri winaq y kkichomaj che ri Dios  kel ta ukʼuʼx chke. Y sibʼalaj kuya kikotemal chqe are chiʼ kqilo che ri winaq riʼ sibʼalaj kekikotik are chiʼ xketaʼmaj che pa ri petinaq keʼutzir na che ri kiyabʼ (Luc. 5:12, 13).

¿Jas xetoʼw ri qalkʼwal rech xukʼam kiwach pa Culion? Ri wixoqil y ri in xeqabʼan invitar kebʼ qachalal alitomabʼ che keʼel pa Coron rech ri e qalkʼwal kekʼojiʼ kukʼ utz taq achilanik. Ri a Samuel, ri al Shirley y ri e kebʼ qachalal che xeqabʼan invitar sibʼalaj xekikotik are chiʼ xekitoʼ nikʼaj chik rech kketaʼmaj chrij ri Dios. Ri e areʼ kkiya etaʼmanik re ri Biblia chke e kʼi akʼalabʼ y ri wixoqil y ri in kqaya etaʼmanik chke ri kinan kitat. Jumul xqaya etaʼmanik re ri Biblia chke e 11 familias. Y rumal che e kʼi winaq tajin kketaʼmaj chrij ri Dios, xojux jun congregación.

Nabʼe, xaq xiw in ri kʼamal bʼe in kʼo chilaʼ. Rumal laʼ ri sucursal xubʼij chwe che in kinbʼanow ri e riqbʼal ibʼ ronojel taq semanas y e ocho ri publicadores e kʼo pa ri congregación re Culion, y je xinbʼan kukʼ ri nueve publicadores che e kʼo pa ri tinamit Marily. Rech kojopan pa wajun lugar riʼ tres horas kqabʼinibʼej puwiʼ ri mar. Y are chiʼ kkʼis ri riqbʼal ibʼ, kʼi horas kqabʼinibʼej rukʼ ri nu familia pa ri kʼachelaj rech kojbʼe che uyaʼik etaʼmanik rech ri Biblia pa ri tinamit ubʼiʼ Halsey.

Are chiʼ xqʼax ri tiempo, e kʼi winaq xkibʼan testigos rech Jehová pa Marily y pa Halsey , rumal laʼ xeqabʼan Ja rech Ajawbʼal pa ri e kebʼ tinamit riʼ. Junam rukʼ ri xkʼulmataj pa Linapacan, ri qachalal y ri winaq che utz xkita ri xtzijox chke, xkiya ri xajwatajik rech kbʼan ri Ja rech Ajawbʼal y nim xetobʼan wi. Ri Ja rech Ajawbʼal che xbʼan pa Marily keʼuchʼij weneʼ 200 winaq y kuyaʼo che kebʼan nim riqbʼal ibʼ chilaʼ.

Pa ri junabʼ 1993, are chiʼ e nimaʼq chi ri qalkʼwal, oj kebʼ rukʼ ri wixoqil xojok che solinelabʼ y xeqasolij congregaciones pa Filipinas. Tekʼuriʼ pa ri junabʼ 2000, xinbʼan invitar pa ri Escuela de Entrenamiento Ministerial rech kintijoxik y kinux ajtij (instructor). Ri in xinchomaj che taqal ta wajun eqeleʼn chwe, pero ri wixoqil amaqʼel xukubʼsaj nukʼuʼx. Y amaqʼel kunaʼtajisaj chwe che ri Jehová kinutoʼ na che ubʼanik wajun eqeleʼn riʼ (Filip. 4:13). Ri wixoqil qas  kuchʼobʼ ri tajin kubʼij rumal che ri areʼ tajin kukoj uchuqʼabʼ che upatanexik ri Jehová paneʼ uriqom jun yabʼil.

Pa ri 2006, are chiʼ in instructor chik, xbʼix che ri wixoqil che xuriq párkinson, che are jun yabʼil ri kubʼano che qas ta chi kkunik kchʼawik y ktakʼik, rumal che xaq kbʼirbʼit chik. Sibʼalaj xojbʼisonik are chiʼ xqata wariʼ. Xinbʼij che che kqaya kan ri qa asignación rech más kuchajij ribʼ, pero ri areʼ xubʼij chwe: «Chatzukuj jun doctor rech kinutoʼo. Y ri Jehová kojutoʼ na rech kqaya ta kan ri qa asignación». Y seis junabʼ ri wixoqil xupatanij chi na ri Jehová rukʼ kikotemal. Are chiʼ kkun ta chik kbʼinik, kutzijoj ri utzij ri Dios pa silla de ruedas. Y kuya u comentarios xaq rukʼ jun o kebʼ tzij, rumal che kkun taj kchʼawik. Amaqʼel xkubʼsax ukʼuʼx kumal ri qachalal rukʼ utz taq tzij rumal che rukʼ kikotemal tajin kupatanij ri Jehová kʼa xkam pa ri junabʼ 2013. Más che 30 junabʼ xinwachilaj ri loqʼalaj wixoqil y rumal laʼ are chiʼ xkamik sibʼalaj xinbʼisonik.

Xinya ta kan ri nu asignación, paneʼ xkam ri wixoqil. Kʼi xinbʼan che upatanixik ri Jehová y wariʼ xinutoʼo rech más ta xinbʼisonik. Xinmajij pa ri 2014 xintaq che kisolixik congregaciones re ri chʼabʼal tagalo, jawiʼ qʼatem wi uwach ri qachak, xinbʼan wariʼ kʼa pa ri junabʼ 2017. Tekʼuriʼ xinsolij chi congregaciones pa Taiwán, Estados Unidos y Canadá re ri chʼabʼal tagalo. Pa ri 2019, xinya clases pa ri Tijobʼal chke ri kkiya ubʼixik ri Ajawbʼal pa ri chʼabʼal inglés pa ri tinamit India y Tailandia. Sibʼalaj xinkikot pa ri nu asignaciones. Y are chiʼ más kinpatanij ri Jehová, más kinkikotik.

Pa taq ri lugar che xintaq wi bʼik xukʼam nuwach kukʼ ri qachalal, sibʼalaj keʼinloqʼoqʼej. Rumal laʼ sibʼalaj kinbʼisonik are chiʼ keʼinya kanoq. Are kʼu chiʼ kinkʼulmaj wariʼ más kinkubʼsaj nukʼuʼx chrij ri Jehová che amaqʼel kinutoʼo, rumal laʼ kinkʼam apachike eqeleʼn che kuya chwe. Kamik riʼ in precursor especial pa Filipinas. Sibʼalaj kinkikot pa wajun congregación riʼ che jetaneʼ e nu familia che kinkichajij. Y sibʼalaj kinkikotik rumal che ri a Samuel y ri al Shirley tajin kkipatanij ri Jehová junam rukʼ ri xubʼan ri kinan (3 Juan 4).

Qastzij che kʼi kʼax nukʼulmam pa ri nukʼaslemal, junam rukʼ ri ukamikal ri loqʼalaj wixoqil rumal jun kʼaxalaj yabʼil. Y kʼi taq mul xinkoj nuchuqʼabʼ rech kukʼam nuwach pa taq ri asignaciones che xintaq wi bʼik. Pero qas wilom che ri Jehová «man naj ta kʼo wi chqe chqajujunal» (Hech. 17:27). Y che kʼo nimalaj uchuqʼabʼ che qatoʼik, paneʼ oj kʼo pa lugares che naj e kʼo wi (Is. 59:1). Sibʼalaj kinmaltyoxij che ri Jehová che amaqʼel xkʼojiʼ wukʼ are taq chiʼ xinriq kʼax y ni jumul xinuya kanoq.